出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
39:1 In ēng nâ-sek, chí-sek, chu-âng sek ê liāu chò chhiú-kang iù ê saⁿ-khò͘, tī sèng-só͘ chhēng lâi ho̍k-sāi, koh kā A-lông chò sèng-saⁿ, sī chiàu Siōng-chú só͘ hoan-hù Mô͘-se ê.
39:2 I ēng kim kah nâ-sek, chí-sek, chu-âng sek ê liāu kah kòe-pháng ê iù-tē, chò chè-si ho̍k.
39:3 In kā kim tûi-chò po̍h-phìⁿ, chián-chò sòaⁿ, chham tī nâ-sek, chí-sek, chu-âng sek ê liāu kah iù-tē ēng kî-khiáu ê kang-hu chò ê.
39:4 Koh kā i chò phi-kian lâi kā i liân chò-hóe, hō͘ i siang pêng sio-liân.
39:5 Hit téng-bīn ēng kî-khiáu ê kang-hu só͘ chit ê tòa, só͘ ēng lâi hâ ê kah chè-si ho̍k sio-siâng ê chò-hoat kah i liân chò chi̍t tè, ēng kim kah nâ-sek, chí-sek, chu-âng sek ê liāu kah kòe-pháng ê iù-tē lâi chò, chiàu Siōng-chú só͘ hoan-hù Mô͘-se ê.
39:6 Koh tok âng bé-ló ji̍p tī kim-chô-.ni̍h, chiàu khek-ìn ê hong-hoat, tī hit téng-bīn khek I-su-la-el hiahê kiáⁿ ê miâ;
39:7 An-tì tī chè-si ho̍k ê phi-kian, ūi I-su-la-el lâng chò kì-liām chio̍h, chiàu Siōng-chú só͘ hoan-hù Mô͘-se ê.
39:8 Chō Pó͘-kòa
( CAG 28: 15-30)
I ēng kî-khiáu ê sai-hū ê chhiú-kang chò pó͘-kòa, kah chè-si ho̍k sio-siâng ê chò-hoat, ēng kim kah nâ-sek, chí-sek, chu-âng sek ê liāu í-ki̍p kòe-pháng ê iù-tē chò ê.
39:9 Pó͘-kòa sī sù-hong ê, áu-chò siang-têng, tn̂g chi̍t lia̍h, khoah chi̍t lia̍h, sī siang-têng ê.
39:10 Téng-bīn siuⁿ pó-chio̍h sì chōa, chi̍t chōa sī âng-pó-chio̍h, n̂g-ge̍k kah âng-ge̍k, che sī tē-it chōa.
39:11 Tē-jī chōa sī le̍k-pó-chio̍h, nâ-pó-chio̍h kah kim-kong-chio̍h.
39:12 Tē-saⁿ chōa sī chí-sek ê bé-ló, pe̍h-sek ê bé-ló kah chí-sek ê chúi-chiⁿ.
39:13 Tē-sì chōa sī le̍k-ge̍k, âng bé-ló kah phek-ge̍k, chiahê lóng siuⁿ tī kim-chô lāi.
39:14 Chiahê pó-chio̍h chiàu I-su-la-el ê kiáⁿ ê miâ, kiōng cha̍p-jī tè, chhin-chhiūⁿ khek-ìn, múi tè khek chi̍t-ê miâ, ūi tio̍h cha̍p-jī chi-cho̍k lâi ánne chò.
39:15 In ēng sûn-kim phah liān-á, chhin-chhiūⁿ soh-á, an-tì tī pó͘-kòa.
39:16 In koh chò nn̄g-ê kim-chô kah nn̄g-ê kim-khoân, kā chit nn̄g-ê khoân an-tì tī pó͘-kòa ê siang thâu.
39:17 Kā só͘ phah hit nn̄g tiâu kim liān-á, liân tī siang thâu ê nn̄g-ê khoân.
39:18 Ēng só͘ phah nn̄g tiâu liān-á ê siang thâu, liân tī nn̄g-ê chô, an-tì tī chè-si ho̍k phi-kian ê thâu-chêng.
39:19 Chò nn̄g-ê kim-khoân, hē tī pó͘-kòa siang thâu ê kîⁿ, óa chè-si ho̍k ǹg lāi hit pêng.
39:20 Koh chò nn̄g-ê kim-khoân, an-tì tī chè-si ho̍k phi-kian ē-bīn ê thâu-chêng, óa-kīn sio-liân ê só͘-chāi, tī chè-si ho̍k ēng kî-khiáu ê kang-hu só͘ chit ê tòa ê téng-bīn.
39:21 In ēng nâ-sek ê iù-tòa, kā pó͘-kòa ê khoân kah chè-si ho̍k ê khoân pa̍k sio-liân, hō͘ i liân tī chè-si ho̍k ēng kî-khiáu ê kang-hu só͘ chit ê tòa, hō͘ pó͘-kòa kah chè-si ho̍k bô lī-phāng, sī chiàu Siōng-chú só͘ hoan-hù Mô͘-se ê.
39:22 Chè-chō Chè-si ê Kî-tha Sèng-ho̍k
( CAG 28:31-43) I ēng chit pò͘ ê kang-hu chò chè-si ho̍k lāi-bīn ê gōa-phàu, kui niá sī nâ-sek.
39:23 Phâu ê tùi-tiong chò chi̍t-ê niá-khang, khang ê sì-kho͘-ûi chit niá-iân, chhin-chhiūⁿ chiàn-kah ê niá-khang, bián-tit phòa-li̍h.
39:24 Phâu ê ē-kha pô͘, ēng nâ-sek, chí-sek, chu-âng sek ê liāu kah kòe-pháng ê iù-tē, chò sia̍h-liû hêng ê chong-sek.
39:25 Koh ēng sûn-kim chò hâm-lêng, ēng hâm-lêng kâⁿ sia̍h-liû, hē tī phâu ê sì-kho͘-ûi ē-kha pô͘, sia̍h-liû ê tiong-kan;
39:26 chi̍t lia̍p hâm-lêng, chi̍t lia̍p sia̍h-liû, chi̍t lia̍p hâm-lêng, chi̍t lia̍p sia̍h-liû, tī phâu sì-kho͘-ûi ê ē-kha pô͘, thang chhēng lâi ho̍k-sāi, sī chiàu Siōng-chú só͘ hoan-hù Mô͘-se ê.
39:27 In ēng chit-sêng ê iù-tē pò͘, kā A-lông kah i hiahê kiáⁿ chò lāi-saⁿ.
39:28 Mā chò iù-tē pò͘ ê bō-á kah iù-tē pò͘ súi-súi pau thâu-khak ê kin, ēng kòe-pháng ê iù-tē pò͘ chò khò͘.
39:29 Koh ēng kòe-pháng ê iù-tē kah nâ-sek, chí-sek, chu-âng sek ê liāu, ēng siù-hoe ê chhiú-kang chò io-tòa, sī chiàu Siōng-chú só͘ hoan-hù Mô͘-se ê.
39:30 In ēng sûn-kim chò sèng ê bián-liû ê pâi, chiàu khek-ìn ê hong-hoat, khek jī tī hit téng-bīn, ánne siá, " Chò sèng kui Siōng-chú ".
39:31 Koh ēng nâ-sek ê tòa, kā pâi pa̍k tī bō-á téng, sī chiàu Siōng-chú só͘ hoan-hù Mô͘-se ê.
39:32 Sèng-bō͘ Oân-kang
( CAG 35: 10-19)
Chiū ánne, chū-chi̍p ê hōe-bō͘ it-chhè ê kang lóng chò oân liáu-āu, só͘-ū Siōng-chú só͘ hoan-hù Mô͘-se ê, I-su-la-el lâng lóng chiàu ánne chò.
39:33 In sàng kàu Mô͘-se hia, to̍h-sī hōe-bō͘, pò͘-pêⁿ kah só͘-ū ê khì-kū, i ê kau, pán, kông, thiāu, khū,
39:34 ní âng iûⁿ-káng phôe ê kòa, hái-káu phôe ê kòa kah jia-cha̍h ê tiùⁿ-lî,
39:35 hoat-kūi kah i ê kǹg kah si-un-só͘,
39:36 toh-á kah i só͘-ū ê khì-kū kah pâi-lia̍t ê piáⁿ,
39:37 sûn-kim ê teng-tâi kah i ê teng-chóaⁿ, to̍h-sī pâi-lia̍t ê teng-chóaⁿ kah i só͘-ū ê khì-kū, kah tiám kng ê iû,
39:38 kim-tôaⁿ, boah ê iû, hiuⁿ ê phang-liāu, pò͘-pêⁿ mn̂g ê mn̂g-lî,
39:39 tâng-tôaⁿ kah i ê tâng ê teng-sa, i ê kǹg kah i só͘-ū ê khì-kū, sé-tn̄g ê phûn kah i ê chō,
39:40 tiâⁿ ê tiùⁿ-ûi kah i ê thiāu, i ê khū, tiâⁿ-mn̂g ê mn̂g-lî, ēng ê soh, tèng ê teng, í-ki̍p pò͘-pêⁿ kah hōe-bō͘ lāi só͘-ū chò lō͘-ēng ê khì-kū,
39:41 chhiú-kang iù ê saⁿ-khò͘, tī sèng-só͘ chhēng lâi ho̍k-sāi kah chè-si A-lông ê sèng-saⁿ, í-ki̍p i ê kiáⁿ ê saⁿ, chò chè-si lâi ho̍k-sāi.
39:42 I-su-la-el lâng chiàu Siōng-chú só͘ hoan-hù Mô͘-se it-chhè ê ōe, chò it-chhè ê kang.
39:43 Mô͘-se khòaⁿ tio̍h it-chhè ê kang, lí khòaⁿ, in í-keng chò-chiâⁿ, chiàu Siōng-chú só͘ hoan-hù ê, in chiàu ánne chò, Mô͘-se chiū kā in chiok-hok.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。