約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
15:1 I-é-su Sī Chin ê Phû-tô-chhiū
" Góa sī chin ê phû-tô chhiū, góa ê Thiⁿ-pē sī chai phû-tô ê lâng.
15:2 Liâm tī góa ê ki bô kiat kóe-chí ê, I chiū kā i chián-tû; ū kiat kóe-chí ê ki, I chiū kā i siu-chián, hō͘ i kiat koh khah chē kóe-chí.
15:3 Taⁿ in-ūi lín chiap-siū góa só͘ kā lín kóng ê tō-lí, lín í-keng hō͘ I siu-chéng hó-sè à.
15:4 Lín tio̍h kah góa kiat-liân, góa mā kah lín kiat-liân. Tú chhin-chhiūⁿ ki bô liân tī phû-tô chhiū, kakī bē kiat kóe-chí, lín nā bô kah góa kiat-liân, mā sī ē ánne.
15:5 " Góa to̍h-sī phû-tô chhiū, lín to̍h-sī ki; tiàm tī góa lāi-bīn ê, góa mā tiàm tī i ê lāi-bīn, chiū ē kiat kóe-chí chin chē; in-ūi nā kah góa sio-lī, lín chiū bē tàng chò siáⁿ-mi̍h.
15:6 Lâng nā bô kah góa kiat-liân, ē chhin-chhiūⁿ chhiū-ki hō͘ lâng hiat khì gōa-bīn, soah ta-.khì, lâng ē kā in khioh chò-tui, hiat-lo̍h hóe khì sio.
15:7 Lín nā kah góa kiat-liân, góa ê ōe tī lín lāi-bīn, lín nā ài siáⁿ-mi̍h, kiû chiū ē kā lín sêng-choân.
15:8 Lín nā kiat chin chē kóe-chí, chin-chiàⁿ chò góa ê bûn-tô͘, góa ê Thiⁿ-pē ē in-ūi ánne tit tio̍h êng-kng. "
15:9 Pí-chhú Sio-thiàⁿ
" Chhin-chhiūⁿ Thiⁿ-pē ū thiàⁿ góa, góa mā ū thiàⁿ lín, lín tio̍h tiàm tī góa ê thiàⁿ lāi-bīn.
15:10 Lín nā chun-siú góa ê kài-bēng, lín chiū ē tiàm tī góa ê thiàⁿ lāi-bīn; chhin-chhiūⁿ góa ū chun-siú góa ê Thiⁿ-pē ê kài-bēng, tiàm tī I ê thiàⁿ lāi-bīn.
15:11 " Góa kā lín kóng chiahê tāichì, sī beh hō͘ lín lāi-bīn ū góa ê hoaⁿ-hí, ánne lín ê hoaⁿ-hí chiū ē móa-móa.
15:12 Chhin-chhiūⁿ góa ū thiàⁿ lín, lín tio̍h sio-thiàⁿ; che sī góa ê bēng-lēng.
15:13 Lâng ūi tio̍h pêng-iú hi-seng sèⁿ-miā, bô koh ū pí che khah tōa ê thiàⁿ.
15:14 Lín nā chun-siú góa ê bēng-lēng, lín to̍h-sī góa ê pêng-iú.
15:15 Góa bô koh kiò lín chò lô͘-po̍k, in-ūi lô͘-po̍k m̄-chai chú-lâng teh chò siáⁿ-mi̍h. Taⁿ góa í-keng kā lín kiò-chò pêng-iú, in-ūi góa tùi Thiⁿ-pē só͘ thiaⁿ-.tio̍h ê, lóng ū kā lín kóng à.
15:16 M̄-sī lín kéng-soán góa, sī góa kéng-soán lín, mā jīm-bēng lín, hō͘ lín khì kiat kóe-chí, koh hō͘ lín ê kóe-chí kú-tn̂g pó-chûn. Án-ne, hō͘ lín ē-tàng hōng góa ê miâ lâi tùi Thiⁿ-pē kiû, I lóng ē kā lín sêng-choân.
15:17 Che sī góa hō͘ lín ê bēng-lēng, Lín tio̍h sio-thiàⁿ. "
15:18 Sè-kan ê Oàn-hūn
" Sè-kan nā oàn-hūn lín, lín tio̍h chai i oàn-hūn lín í-chêng to̍h tāi-seng oàn-hūn góa.
15:19 Lín nā sio̍k chit sè-kan, sè-kan chiū ē khòaⁿ lín chò kakī ê lâng lâi thiàⁿ lín; to̍k-to̍k In-ūi lín bô sio̍k chit sè-kan, góa í-keng kā lín tùi sè-kan kéng-soán chhut-.lâi, só͘-í, sè-kan ē oàn-hūn lín.
15:20 Lín tio̍h kì-tiâu góa kā lín kóng ê ōe, lô͘-po̍k bē pí chú-lâng khah tōa. Lâng nā pek-hāi góa, mā ē pek-hāi lín; in nā chun-siú góa ê ōe, mā ē chun-siú lín ê ōe.
15:21 M̄ koh, in-ūi lín sī góa ê bûn-tô͘, in chiū ē ánne tùi-thāi lín, in-ūi in m̄ bat chhe-phài góa lâi ê hit ūi.
15:22 Góa nā m̄ bat lâi kā in kóng, in chiū bô chōe; taⁿ in bô hoat-tō͘ ūi kakī ê chōe lâi piān-kái.
15:23 Oàn-hūn góa ê lâng mā ē oàn-hūn góa ê Thiⁿ-pē.
15:24 Góa tī in tiong-kan nā bô chò pa̍t lâng m̄ bat chò ê tāichì, in chiū bô chōe, m̄ koh, taⁿ in ū khòaⁿ tio̍h góa só͘ chò ê kang-chok, iáu koh teh oàn-hūn góa kah Thiⁿ-pē.
15:25 Che sī beh èng-giām in ê lu̍t-hoat só͘ kì-chài ê ōe, In bô-iân bô-kò͘ oàn-hūn góa. (chù, SPh 35:19; 69:4)
15:26 " hit ūi Pó-hūi-su, to̍h-sī chin-lí ê Sèng Sîn, ē tùi Thiⁿ-pē hia lâi lín chia. Góa tùi Thiⁿ-pē hia chhe Sèng Sîn lâi lín chia, sī beh ūi góa chò kiàn-chèng.
15:27 Lín mā tio̍h ūi góa chò kiàn-chèng, in-ūi lín tùi khí-thâu to̍h kah góa chò-hóe. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。