約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
13:1 I-é-su kā Bûn-tô͘ Sé Kha
Pôaⁿ-kòe-cheh chêng, I-é-su chai I lī-khui chit sè-kan tńg-khì Thiⁿ-pē hia ê sî í-keng kàu. I ū it-ti̍t teh thiàⁿ sè-kan sio̍k I ê lâng, taⁿ I beh piáu-sī I thiàⁿ in kàu-té.
13:2 I-é-su kah sù-tô͘ chia̍h àm-tǹg ê sî, Mô͘-kúi kā chhut-bē I-é-su ê ì-sù hē tī Ka-lio̍k lâng Sí-mòng ê kiáⁿ Iô-tah ê sim.
13:3 I-é-su chai Thiⁿ-pē í-keng kā it-chhè kau tī I ê chhiú, koh chai I tùi Siōng-tè hia lâi, mā beh tńg-khì Siōng-tè hia.
13:4 I chiū lī-khui toh, thǹg gōa-saⁿ, the̍h chi̍t tiâu kin-á hâ tī io-.ni̍h,
13:5 Jiân-āu tò chúi tī phûn-.ni̍h, kā bûn-tô͘ sé kha, koh ēng hâ tī io-.ni̍h ê kin-á kā in chhit.
13:6 Sé kàu Sí-mòng Piat-tò͘ ê sî, Piat-tò͘ kā I kóng, " Chú ah, Lí beh kā góa sé kha, sī-.bô? "
13:7 I-é-su ìn kóng, " Góa só͘ chò ê, lí chitmá m̄-chai, āu-lâi chiū ē bêng-pe̍k. "
13:8 Piat-tò͘ kóng, " Lí chhian-bān m̄ thang kā góa sé kha. " I-é-su ìn kóng, " Góa nā bô kā lí sé kha, lí kah góa chiū bô koan-hē. "
13:9 Sí-mòng Piat-tò͘ kóng, " Chú ah, m̄ nā kha, liân chhiú kah thâu-khak mā kā góa sé. "
13:10 I-é-su kóng, " Lâng sé seng-khu liáu-āu, kui seng-khu lóng chheng-khì, kantaⁿ sé kha to̍h hó. Lín í-keng chheng-khì, m̄ koh, bô ta̍k-ê lóng ánne. "
13:11 In-ūi I-é-su chai-iáⁿ siáⁿ lâng beh kā I chhut-bē, só͘-í chiah kóng, " Lín bô ta̍k-ê chheng-khì. "
13:12 I-é-su kā in sé kha liáu-āu, chhēng gōa-saⁿ, koh tńg-lâi chē-toh, mn̄g in kóng, " Góa tùi lín só͘ chò chiahê tāichì, lín kám ū bêng-pe̍k?
13:13 Lín chheng-ho͘ góa ' Lāu-su', mā chheng-ho͘ góa ' Chú', lín ánne chheng-ho͘ bô m̄ tio̍h, in-ūi góa to̍h-sī.
13:14 Góa chò ' Chú', chò ' Lāu-su', to teh kā lín sé kha, lín mā tio̍h hō͘-siong sé kha.
13:15 Góa ū lâu hó bô͘-iūⁿ hō͘ lín, sī beh hō͘ lín thang chiàu góa tùi lín só͘ chò ê khì chò.
13:16 Góa si̍t-chāi kā lín kóng, lô͘-po̍k bē pí chú-lâng khah tōa, hōng chhe-phài ê mā bē pí chhe-phài I ê hit ūi khah tōa.
13:17 Lín kì-jiân bêng-pe̍k chiahê tāichì, nā chiàu ánne khì chò, chiū chin ū hok-khì.
13:18 " Góa m̄-sī kóng lín tāi-ke lóng ánne; góa chai góa só͘ kéng-soán ê. To̍k-to̍k che sī beh èng-giām keng-tián só͘ kóng kah góa chò-hóe chia̍h pn̄g ê lâng ē pōe-ge̍k góa. (chù, SPh 41:9)
13:19 Taⁿ tāichì iáu-bōe hoat-seng, góa seng kā lín kóng, kàu tāichì hoat-seng ê sî, thang hō͘ lín siong-sìn góa to̍h-sī hit ūi.
13:20 Góa si̍t-chāi kā lín kóng, chiap-la̍p góa só͘ chhe-phài ê lâng, to̍h-sī chiap-la̍p góa; chiap-la̍p góa, to̍h-sī chiap-la̍p chhe-phài góa lâi ê hit ūi. "
13:21 I-é-su Ī-giân Siū Chhut-bē
( Mt 26: 20-25; Mk 14: 17-21; Lk 22: 21-23)
I-é-su kóng chiahê ōe liáu-āu, sim-lāi chin kan-khó͘, chiū bêng-kóng, " Góa si̍t-chāi kā lín kóng, lín tiong-kan ū chi̍t-ê lâng ē chhut-bē góa. "
13:22 Sù-tô͘ hō͘-siong khòaⁿ-lâi khòaⁿ-khì, m̄-chai I-é-su sī teh kóng siáⁿ lâng.
13:23 Sù-tô͘ tiong-kan ū chi̍t-ê sī I-é-su só͘ thiàⁿ ê, i chē tī I-é-su ê sin piⁿ.
13:24 Sí-mòng Piat-tò͘ ǹg hit-ê sù-tô͘ tìm-thâu, kóng, " Chhiáⁿ lí mn̄g I-é-su, khòaⁿ I sī teh kóng siáⁿ lâng. "
13:25 Hitê sù-tô͘ chiū khò óa I-é-su ê heng-khám, mn̄g kóng, " Chú ah, sī siáⁿ lâng? "
13:26 I-é-su ìn kóng, " Góa beh ùn piáⁿ the̍h hō͘ i, hit-ê lâng to̍h-sī. " I chiū ùn chi̍t tè piáⁿ, the̍h hō͘ Ka-lio̍k lâng Sí-mòng ê kiáⁿ Iô-tah.
13:27 Iô-tah chi̍t ē chiap tio̍h hit tè piáⁿ, Sa-tán chiū ji̍p-khì i ê sim. I-é-su chiū kā Iô-tah kóng, " Lí siūⁿ beh chò ê, kóaⁿ-kín khì chò. "
13:28 Tâng chē-toh ê lâng bô chi̍t-ê chai-iáⁿ I-é-su ná ē tùi i kóng chit kù ōe.
13:29 In-ūi Iô-tah sī teh koán chîⁿ-hāng, só͘-í, ū lâng siūⁿ kóng chò sī I-é-su teh kiò i khì bé siú cheh só͘ su-iàu ê mi̍h-kiāⁿ, á-.sī kiò i khì chín-chè sànchhiah lâng.
13:30 Iô-tah chiap tio̍h hit tè piáⁿ, sûi-sî chhut-.khì. Hit sî, sī àm-sî.
13:31 Sin ê Kài-bēng
Iô-tah chhut-khì liáu-āu, I-é-su kóng, " Taⁿ Jîn-chú tit tio̍h êng-kng, Siōng-tè mā thong-kòe Jîn-chú tit tio̍h êng-kng.
13:32 Kì-jiân Siōng-tè thong-kòe Jîn-chú tit tio̍h êng-kng, Siōng-tè kakī mā beh êng-kng Jîn-chú, koh sī beh sûi-sî hō͘ I tit tio̍h êng-kng.
13:33 Sè-kiáⁿ, góa kah lín chò-hóe chhun bô gōa kú à, lín ē beh chhōe góa. Chiàu góa bat kā Iô-tá-iah lâng kóng ê, taⁿ góa kā lín kóng, ' Góa beh khì ê só͘-chāi, lín bē tàng khì. '
13:34 Góa hō͘ lín chi̍t tiâu sin ê kài-bēng, Lín tio̍h sio-thiàⁿ, chhin-chhiūⁿ góa bat thiàⁿ lín. Lín mā tio̍h chiàu ánne sio-thiàⁿ.
13:35 Lín nā sio-thiàⁿ, chèng lâng ē chiū ánne lâi chai lín sī góa ê bûn-tô͘. "
13:36 I-é-su Ī-giân Piat-tò͘ M̄-jīn I
( Mt 26: 31-35; Mk 14: 27-31; Lk 22: 31-34)
Sí-mòng Piat-tò͘ mn̄g I-é-su kóng, " Chú ah, Lí beh khì tó-ūi? " I-é-su ìn kóng, " Góa beh khì ê só͘-chāi, lí chitmá bē tàng tòe góa-.khì, āu-lâi lí ē tòe góa khì. "
13:37 Piat-tò͘ kóng, " Chú ah, góa chitmá ná ē bē tàng tòe Lí khì? Góa kam-goān ūi tio̍h Lí lâi pàng-sak sèⁿ-miā. "
13:38 I-é-su ìn kóng, " Lí beh ūi tio̍h góa lâi pàng-sak sèⁿ-miā, sī-.bô? Góa si̍t-chāi kā lí kóng, ke iáu-bōe thî í-chêng, lí ē saⁿ pái m̄ jīn góa. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。