出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38:1 Chō Chè-tôaⁿ
( CAG 27: 1-8)
I ēng chô-kia̍p chhâ chò sio-chè ê tôaⁿ, tn̂g gō͘ tiú, khoah gō͘ tiú, chit-ê tôaⁿ sī sì-kak-hêng ê, koân saⁿ tiú.
38:2 Tī tôaⁿ ê sì-kak-thâu chò sì ki kak kah tôaⁿ sio-liân chò chi̍t-ê, ēng tâng pau khí-.lâi.
38:3 Koh chò tôaⁿ it-chhè ê khì-kū, i ê phûn, thuh-á, pôaⁿ, chhe, hóe-tiáⁿ, só͘-ū ê khì-kū lóng ēng tâng lâi chò.
38:4 Koh ūi tio̍h tôaⁿ ēng tâng-bāng chò chi̍t-ê teng-sa, an-tì tī tôaⁿ sì-bīn ûi io-pán ê ē-bīn, hō͘ i thàu kàu tôaⁿ ê pòaⁿ-io.
38:5 Ūi tio̍h tâng ê teng-sa ê sì-kak chù sì-ê khoân, chò chhng kǹg ê lō͘-ēng.
38:6 Ēng chô-kia̍p chhâ chò kǹg, ēng tâng pau khí-.lâi.
38:7 Kā kǹg chhng tī tôaⁿ ê siang pêng ê khoân lāi, ēng i lâi kng tôaⁿ, mā ēng pán chò tôaⁿ, tôaⁿ sī khang-khak.
38:8 Chō Tâng-phûn
( CAG 30: 18)
I ēng tâng chò sé-tn̄g ê phûn kah tâng-chō, sī ēng hōe-bō͘ mn̂g chêng teh chò-kang ê chabó͘ lâng ê tâng-kiàⁿ chò ê.
38:9 Chō Siōng-chú Sèng-bō͘ ê Īⁿ
( CAG 27: 9-19)
I chō hōe-bō͘ ê tiâⁿ, hit-ê tiâⁿ ê lâm pêng, ēng kòe-pháng ê iù-tē chò ûi, chi̍t pah tiú.
38:10 Ûi ê thiāu jī-cha̍p ki, tâng chò ê khū jī-cha̍p-ê, thiāu ê kau kah hoâiⁿ-koaiⁿ sī ēng gîn chò ê.
38:11 Pak-bīn mā chi̍t pah tiú, ûi ê thiāu jī-cha̍p ki, tâng chò ê khū jī-cha̍p-ê, thiāu ê kau kah hoâiⁿ-koaiⁿ sī ēng gîn chò ê.
38:12 Si-miān ū ûi gō͘-cha̍p tiú, ûi ê thiāu cha̍p ki, khū cha̍p-ê, thiāu ê kau kah hoâiⁿ-koaiⁿ sī ēng gîn chò ê.
38:13 Tang bīn ê tang pêng, gō͘-cha̍p tiú.
38:14 Mn̂g chit pêng ê ûi cha̍p-gō͘ tiú, ûi ê thiāu saⁿ ki, ū khū saⁿ-ê.
38:15 Hit-pêng mā sī ánne, tiâⁿ-mn̂g ê chó-iū, kok ū ûi cha̍p-gō͘ tiú, ûi ê thiāu saⁿ ki, khū saⁿ-ê.
38:16 Tiâⁿ sì-bīn ê tiùⁿ-ûi lóng sī ēng kòe-pháng ê iù-tē chò ê.
38:17 Thiāu ê khū sī tâng ê, thiāu ê kau kah hoâiⁿ-koaiⁿ sī gîn ê, thiāu-táu sī ēng gîn-pau ê; tiâⁿ só͘-ū ê thiāu sī ēng gîn ê hoâiⁿ-koaiⁿ chhng sio-liân ê.
38:18 Tiâⁿ-mn̂g ê mn̂g-lî sī ēng siù-hoe ê kang-hu, ēng nâ-sek, chí-sek, chu-âng sek ê liāu kah kòe-pháng ê iù-tē chò ê, tn̂g jī-cha̍p tiú, koân gō͘ tiú kah tiâⁿ ê ûi sio-phòe.
38:19 In ê thiāu sì ki, tâng ê khū sì-ê, thiāu ê kau sī gîn ê, thiāu-táu sī ēng gîn pau ê, hoâiⁿ-koaiⁿ sī gîn ê.
38:20 Hōe-bō͘ í-ki̍p tiâⁿ lāi sì-kho͘-ûi só͘ tèng ê teng, lóng sī tâng ê.
38:21 Sèng-bō͘ Só͘ Ēng ê Kim-sio̍k
Chit-ê hōe-bō͘ ê mi̍h-kiāⁿ ū kòe chheng-tiám, hit tiong-kan Lē-bī lâng só͘ beh ēng ê só͘-ū mi̍h-kiāⁿ, lóng sī chiàu Mô͘-se só͘ hoan-hù, keng-kòe chè-si A-lông ê kiáⁿ I-tha-mal ê chhiú só͘ tiám-sǹg ê.
38:22 Kiàn-nā Siōng-chú só͘ hoan-hù Mô͘-se ê, Iô-tah ê chi-cho̍k Hu-ul ê sun — U-lī ê kiáⁿ Be-cha-lel lóng kā i chò.
38:23 Kah i chò-hóe chò ê, ū Tàn ê chi-cho̍k A-hi-sat-boat ê kiáⁿ A-ho-li-ia̍p, i sī gâu tiau-khek koh ū kî-khiáu ê sai-hū, koh ē ēng nâ-sek, chí-sek, chu-âng sek ê liāu kah iù-tē lâi siù-hoe.
38:24 Chò sèng-só͘ it-chhè ê kang só͘ ēng ê kim, to̍h-sī lâng só͘ hiàn ê kim, chiàu sèng-só͘ ê chhìn-á lâi chhìn, ū jī-cha̍p káu tha-lan-t koh chhit-pah saⁿ-cha̍p si-khel.
38:25 Hōe tiong siū-sǹg ê lâng só͘ chhut ê gîn, chiàu sèng-só͘ ê chhìn-á lâi chhìn, ū chi̍t-pah tha-lan-t koh chi̍t-chheng chhit-pah chhit-cha̍p-gō͘ si-khel.
38:26 Kiàn-nā kòe-khì kui tī hiahê keng-kòe tiám-sǹg ê, tùi jī-cha̍p hòe í-siōng, ū la̍k-cha̍p-bān khòng saⁿ-chheng gō͘-pah gō͘-cha̍p lâng, chiàu sèng-só͘ ê chhìn-á lâi chhìn, ta̍k lâng chhut gîn pòaⁿ si-khel, to̍h-sī chi̍t Pe-kah.
38:27 Ēng hit-ê chi̍t-pah tha-lan-t ê gîn, chù sèng-só͘ ê khū kah tiùⁿ-lî thiāu ê khū; chi̍t-pah tha-lan-t chò chi̍t pah-ê khū, chi̍t-ê khū ēng chi̍t tha-lan-t.
38:28 Ēng hit-ê chi̍t-chheng chhit-pah chhit-cha̍p-gō͘ si-khel ê gîn chò thiāu ê kau, mā pau thiāu-táu, mā chò i ê hoâiⁿ-koaiⁿ.
38:29 Só͘ hiàn ê tâng ū chhit-cha̍p tha-lan-t koh nn̄g-chheng sì-pah si-khel.
38:30 Ēng chit-ê tâng chò hōe-bō͘ mn̂g ê khū kah tâng-tôaⁿ kah i ê tâng-bāng ê teng-sa kah tôaⁿ só͘-ū ê khì-kū,
38:31 í-ki̍p tiâⁿ sì-kho͘-ûi ê khū kah tiâⁿ-mn̂g ê khū kah hōe-bō͘ só͘-ū só͘ tèng ê teng kah tiâⁿ sì-kho͘-ûi só͘ tèng ê teng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。