約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
11:1 La̍h-cha-lō͘ ê Sí-bông
Ū chi̍t-ê pēⁿ-lâng, miâ kiò-chò La̍h-cha-lō͘, i tòa tī Bē-tha-niah, to̍h-sī Mâ-lí-ah kah i ê á-ché Mal-tha ê chng-thâu.
11:2 Chit-ê Mâ-lí-ah to̍h-sī bat ēng phang-iû boah Chú ê kha, koh ēng i ê thâu-mn̂g kā i chhit ê hit-ê; i ê sió-tī La̍h-cha-lō͘ teh phòa-pēⁿ.
11:3 In nn̄g chí-mōe chiū chhe lâng khì chhōe I-é-su, kóng, " Chú ah, Lí só͘ thiàⁿ ê lâng teh phòa-pēⁿ. "
11:4 I-é-su thiaⁿ-.tio̍h chiū kóng, " Chit-ê pēⁿ bē tì-kàu sí, che sī ūi tio̍h beh hián-bêng Siōng-tè ê êng-kng, hō͘ Siōng-tè ê Kiáⁿ tùi chit-ê tāichì tit tio̍h êng-kng. "
11:5 I-é-su chin thiàⁿ Mal-tha kah i ê sió-mōe, í-ki̍p La̍h-cha-lō͘.
11:6 I-é-su thiaⁿ tio̍h La̍h-cha-lō͘ phòa-pēⁿ, kè-sio̍k tī hit só͘-chāi koh tòa nn̄g ji̍t.
11:7 Āu-lâi, chiū kā bûn-tô͘ kóng, " Lán koh lâi-khì Iô-tá-iah. "
11:8 Bûn-tô͘ kā I kóng, " Lāu-su, kīn-lâi Iô-tá-iah lâng ài beh ēng chio̍h-thâu kā Lí tìm, Lí kám beh koh khì hia? "
11:9 I-é-su ìn kóng, " Ji̍t-sî kám m̄-sī ū cha̍p-jī tiám-cheng? Lâng nā ji̍t-sî kiâⁿ lō͘ chiū bē poa̍h-tó, in-ūi ū khòaⁿ-kìⁿ chit sè-kan ê kng.
11:10 Chóng-.sī, lâng nā àm-sî kiâⁿ lō͘, chiū ē poa̍h-tó, in-ūi bô kng thang chiò lō͘. "
11:11 I-é-su kóng chiahê ōe liáu-āu, koh kā in kóng, " Lán ê pêng-iú La̍h-cha-lō͘ teh khùn, góa beh lâi-khì kā i kiò-chhéⁿ. "
11:12 Bûn-tô͘ kóng, " Chú ah, i Nā-sī teh khùn, chiū ē hó khí-.lâi. "
11:13 I-é-su sī kóng La̍h-cha-lō͘ í-keng sí-.khì, m̄ koh, in lia̍h-chún sī kóng i chin-chiàⁿ teh khùn.
11:14 Só͘-í, I-é-su bêng-pe̍k kā in kóng, " La̍h-cha-lō͘ sí-.khì à.
11:15 Góa mā ūi tio̍h lín hoaⁿ-hí, in-ūi góa bô tī hia sī beh hō͘ lín sìn góa; taⁿ lán lâi-khì i hia. "
11:16 Kiò-chò siang-seⁿ-á ê Tho-má-suh kā bûn-tô͘ tâng-phōaⁿ kóng, " Lán mā lâi-.khì, thang kah I chò-hóe sí. "
11:17 I-é-su Sī Koh-oa̍h kah Oa̍h-miā
I-é-su khì-kàu-ūi ê sî, La̍h-cha-lō͘ í-keng bâi-chòng tī bōng-.ni̍h sì ji̍t ā.
11:18 Bē-tha-niah lī Ê-lú-sa-lèm iok saⁿ kong-lí.
11:19 Ū chin chē Iô-tá-iah lâng in-ūi La̍h-cha-lō͘ sí-.khì, lâi an-ùi Mal-tha kah Mâ-lí-ah.
11:20 Mal-tha thiaⁿ tio̍h I-é-su lâi, chiū chhut-khì gêng-chiap, Mâ-lí-ah iû-goân chē tī chhù lāi.
11:21 Mal-tha tùi I-é-su kóng, " Chú ah, Lí nā tī chia, goán sió-tī chiū bē sí.
11:22 Taⁿ góa mā chai, Lí tùi Siōng-tè kiû siáⁿ-mi̍h, Siōng-tè it-tēng ē hō͘ Lí. "
11:23 I-é-su kā i kóng, " Lí ê sió-tī ē koh oa̍h khí-.lâi. "
11:24 Mal-tha ìn kóng, " Góa chai tī boa̍t-ji̍t koh-oa̍h ê sî, i ē koh oa̍h khí-.lâi. "
11:25 I-é-su kā i kóng, " Góa sī koh-oa̍h kah oa̍h-miā. Sìn góa ê lâng sûi-jiân sí-.khì, iáu koh ē oa̍h khí-.lâi;
11:26 Chit-má oa̍h-.leh lâi sìn góa ê lâng, éng-oán bē sí. Lí ū ánne sìn bô? "
11:27 Mal-tha ìn kóng, " Chú ah, góa sìn Lí sī Ki-tok, Siōng-tè ê Kiáⁿ, sī teh beh lâi sè-kan ê hit ūi. "
11:28 I-é-su Lâu Ba̍k-sái
Mal-tha kóng chiahê ōe liáu-āu chiū tńg-.khì, kiò i ê sió-mōe Mâ-lí-ah lâi, su-hā kā i kóng, " Lāu-su lâi ā, I teh kiò lí. "
11:29 Mâ-lí-ah thiaⁿ-.tio̍h chiū kóaⁿ-kín khí-.lâi, cháu-khì I-é-su hia.
11:30 Hit sî, I-é-su iáu-bōe ji̍p-khì chng-thâu, iáu tī Mal-tha gêng-chiap I ê só͘-chāi.
11:31 Hiahê kah Mâ-lí-ah tī chhù lāi teh an-ùi i ê Iô-tá-iah lâng, khòaⁿ tio̍h i kóaⁿ-kín khí-lâi chhut-.khì, chiū tòe i khì, siūⁿ kóng i beh khì bōng-.ni̍h thî-khàu.
11:32 Mâ-lí-ah lâi-kàu I-é-su hia, khòaⁿ tio̍h I chiū phak tī I ê kha chêng, kā I kóng, " Chú ah, Lí nā tī chia, góa ê sió-tī chiū bē sí-.khì. "
11:33 I-é-su khòaⁿ tio̍h i teh thî-khàu kah i chò-hóe lâi ê Iô-tá-iah lâng mā teh thî-khàu, chiū chin chheh-sim, thó͘ chi̍t ē tōa khùi,
11:34 Mn̄g in kóng, " Lín kā i chòng tī siáⁿ-mi̍h só͘-chāi? " In chiū kā I kóng, " Chú ah, lán lâi-khì khòaⁿ. "
11:35 I-é-su lâu ba̍k-sái.
11:36 Hiahê Iô-tá-iah lâng kóng, " Lí khòaⁿ, I hiahni̍h thiàⁿ chit-ê lâng! "
11:37 Kî-tiong ū chi̍t-kóa lâng kóng, " I bat hō͘ chheⁿmê-.ê koh khòaⁿ-kìⁿ, kám bē tàng hō͘ chit-ê lâng mài sí? "
11:38 I-é-su hō͘ La̍h-cha-lō͘ Koh-oa̍h
I-é-su lâi-kàu bōng-.ni̍h, sim-lāi iū-koh chin pi-siong. Hitê bōng sī chio̍h-tōng, ū chi̍t tè chio̍h-thâu that-.leh.
11:39 I-é-su kóng, " Sóa-khui hit tè chio̍h-thâu. Sí-lâng ê á-ché Mal-tha kā I kóng, " Chú ah, i í-keng sí sì ji̍t à, taⁿ it-tēng chin chhàu. "
11:40 I-é-su kā i kóng, " Góa kám bô kā lí kóng, lí nā sìn chiū ē khòaⁿ tio̍h Siōng-tè ê êng-kng? "
11:41 In chiū kā hit tè chio̍h-thâu sóa-khui. I-é-su gia̍h thâu ǹg thiⁿ, kóng, " Thiⁿ-pē ah, góa kám-siā Lí, in-ūi Lí í-keng ū thiaⁿ góa ê kî-tó.
11:42 Góa chai Lí put-sî to ū teh thiaⁿ góa ê kî-tó, to̍k-to̍k góa ánne kóng, sī ūi tio̍h khiā tī sì-kho͘-ûi ê kûn-chiòng, beh hō͘ in siong-sìn Lí ū chhe-phài góa lâi. "
11:43 I-é-su kóng soah, chiū tōa-siaⁿ hoah, " La̍h-cha-lō͘, chhut-.lâi! "
11:44 Hitê sí-lâng chiū chhut-.lâi, kha-chhiú ēng pò͘ pau-teh, bīn ēng kin-á tah-.leh. I-é-su kā in kóng, " Kā i tháu-khui, hō͘ i kiâⁿ lō͘. "
11:45 Hāi-sí I-é-su ê Kè-bô͘
( Mt 26: 1-5; Mk 14: 1-2; Lk 22: 1-2)
Lâi teh an-ùi Mâ-lí-ah ê Iô-tá-iah lâng, khòaⁿ tio̍h I-é-su só͘ chò ê tāichì, chin chē lâng chiū sìn I.
11:46 Ū chi̍t-kóa lâng khì chhōe Hoa-lí-sái phài ê lâng, kā in pò-kò I-é-su só͘ chò ê tāichì.
11:47 Chiū ánne, hiahê chè-si-tiúⁿ kah Hoa-lí-sái phài ê lâng tiàu-chi̍p khui-hōe, kóng, " Taⁿ chit-ê lâng kiâⁿ hiah chē sîn-jiah, lán tio̍h án-chóaⁿ lâi tùi-hù?.
11:48 Lán nā pàng I ánne kè-sio̍k chò lo̍h-.khì, kûn-chiòng ē khì sìn I, Lô-má lâng ē lâi húi-bia̍t lán ê sèng-tiān, koh siau-bia̍t lán ê bîn-cho̍k. "
11:49 Kî-tiong chi̍t-ê lâng kiò-chò Kai-a-hoah, sī hit nî ê tōa-chè-si. I kā in kóng, " Lín m̄-chai pòaⁿ-hāng,
11:50 Mā bô siūⁿ khòaⁿ māi lè, lêng-khó hō͘ chi̍t-ê lâng thè chèng lâng sí, chiah bián hō͘ choân bîn-cho̍k bia̍t-bông. Án-ne tùi lín khah iú-lī. "
11:51 I ánne kóng m̄-sī chhut tī kakī ê ì-sù, sī in-ūi hit nî i chò tōa-chè-si, i teh ī-giân I-é-su ē ūi tio̍h chit-ê bîn-cho̍k lâi sí;
11:52 M̄-nā ūi tio̍h chit-ê bîn-cho̍k, mā sī beh kā Siōng-tè sì-sòaⁿ ê kiáⁿ-jî chū-chi̍p chò chi̍t-hóe.
11:53 Tùi hit ji̍t khí, hiahê Iô-tá-iah lâng chiū kè-bô͘ beh thâi I-é-su.
11:54 Pôaⁿ-kòe-cheh teh beh Kàu
In-ūi ánne, I-é-su bô koh kong-khai tī Iô-tá-iah lâng ê tiong-kan chhut-ji̍p. I chiū lī-khui hia, khì óa-kīn khòng-iá ê só͘-chāi, kàu chi̍t-ê kiò-chò E-hu-laim ê siâⁿ kah bûn-tô͘ tī hia tòa.
11:55 Iô-tá-iah lâng ê Pôaⁿ-kòe-cheh teh beh kàu, cheh-kî chìn-chêng, chin chē lâng tùi chng-thâu-chiūⁿ-lâi Ê-lú-sa-lèm, beh siú kiat-chēng-lé.
11:56 In teh chhōe I-é-su, koh khiā tī sèng-tiān lāi, hō͘-siong mn̄g kóng, " Lín siūⁿ án-chóaⁿ? I it-tēng ē lâi kòe-cheh ho͘ⁿh? "
11:57 Chiahê chè-si-tiúⁿ kah Hoa-lí-sái phài ê lâng ū hoat-chhut bēng-lēng, nā ū lâng chai I-é-su tī tó-ūi, tio̍h lâi pò-kò, hō͘ in thang khì kā I lia̍h khí-.lâi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。