約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
9:1 I-é-su I-hó Chhut-sì To̍h Chheⁿ-mê ê Lâng
I-é-su kiâⁿ-kòe ê sî, khòaⁿ tio̍h chi̍t-ê chhut-sì to̍h chheⁿmê ê lâng.
9:2 I ê bûn-tô͘ mn̄g kóng, " Lāu-su, chit-ê lâng chhut-sì to̍h chheⁿmê, sī siáⁿ lâng hoān chōe? Sī i pún-sin á-.sī i ê pē-bú? "
9:3 I-é-su ìn kóng, " Chit-ê lâng bô hoān chōe, i ê pē-bú mā bô; sī beh thong-kòe i lâi hián-bêng Siōng-tè ê chok-ûi.
9:4 Thàn iáu ji̍t-sî, lán tio̍h chò chhe-phài góa lâi ê hit ūi ê kang; àm-sî chi̍t-ē kàu, to̍h bô lâng ē-tàng chò-kang.
9:5 Góa tī sè-kan ê sî, góa sī sè-kan ê kng. "
9:6 Chiahê ōe kóng liáu, chiū phùi nōa tī thô͘-kha, ēng chhùi-nōa kiáu thô͘ lâi kô͘ chheⁿmê lâng ê ba̍k-chiu, koh kā i kóng,
9:7 " Khì Si-ló-ám tî sé lí ê ba̍k-chiu. "( Si-ló-ám ê ì-sù sī " Hōng chhe-khián "). I chiū khì sé, tńg-.lâi ê sî í-keng ē khòaⁿ-kìⁿ.
9:8 I ê chhù-piⁿ kah pêng-sî bat khòaⁿ tio̍h i í-chêng chò khit-chia̍h ê lâng kóng, " Chit-ê kám m̄-sī put-sî chē teh chò khit-chia̍h hit-ê lâng? "
9:9 Ū lâng kóng, " Chiū-sī i. " Ū lâng kóng, " M̄-sī, sī kahná chhin-chhiūⁿ i. " I kakī kóng, " Góa to̍h-sī. "
9:10 Chèng lâng chiū mn̄g i kóng, " Lí ê ba̍k-chiu án-chóaⁿ piàn ē khòaⁿ-kìⁿ? "
9:11 I ìn kóng, " Hitê miâ kiò-chò I-é-su ê lâng kiáu thô͘ kô͘ góa ê ba̍k-chiu, kā góa kóng, ' Khì Si-ló-ám tî sé. ' Góa sûi-sî khì sé, chiū piàn ē khòaⁿ-kìⁿ. "
9:12 Tāi-ke mn̄g i kóng, " Hitê lâng tī tó-ūi? " I ìn kóng, " Góa m̄-chai. "
9:13 Hoa-lí-sái Phài ê Lâng Chit-būn Hitê Chheⁿ-mê ê Lâng
In chhōa hit-ê chêng chheⁿmê ê lâng khì kìⁿ Hoa-lí-sái phài ê lâng.
9:14 I-é-su kiáu thô͘ lâi khui i ê ba̍k-chiu ê ji̍t sī An-hioh-ji̍t.
9:15 Só͘-í, Hoa-lí-sái phài ê lâng koh mn̄g i ná ē khòaⁿ-kìⁿ. I chiū kā in kóng, " I ēng thô͘-môe kô͘ góa ê ba̍k-chiu, góa khì sé, chiū ū khòaⁿ-kìⁿ.
9:16 Hoa-lí-sái phài ê lâng tiong-kan ū ê kóng, " Chit-ê lâng bô siú An-hioh-ji̍t, m̄-sī tùi Siōng-tè lâi ê. " Ū ê kóng, " Ū chōe ê lâng ná ē kiâⁿ chit khoán sîn-jiah? " In chiū ánne ì-kiàn hun-lia̍t.
9:17 In koh kā chheⁿmê-.ê kóng, " I í-keng khui lí ê ba̍k-chiu, lí kóng I sī siáⁿ-mi̍h khoán lâng? " I ìn kóng, " I sī sian-ti. "
9:18 Iô-tá-iah lâng m̄-sìn i í-chêng chheⁿmê, chitmá ē koh khòaⁿ-kìⁿ, chiū kiò i ê pē-bú lâi,
9:19 Mn̄g in kóng, " Chit-ê sī lín kóng chhut-sì to̍h chheⁿmê-.ê kiáⁿ, sī-.bô? Taⁿ i ná ē ū khòaⁿ-kìⁿ? "
9:20 I ê pē-bú ìn kóng, " Goán chai i sī goán ê kiáⁿ, goán mā chai i chhut-sì to̍h chheⁿmê.
9:21 Taⁿ i ná ē koh khòaⁿ-kìⁿ, goán m̄-chai. Siáⁿ lâng khui i ê ba̍k-chiu, goán mā m̄-chai. I í-keng tōa-hàn à, lín khì kā i mn̄g, i ē-hiáu kakī kóng. "
9:22 I ê pē-bú ánne kóng, sī in-ūi kiaⁿ Iô-tá-iah lâng, in-ūi Iô-tá-iah lâng í-keng ū iok-sok hó-sè, nā ū lâng jīn I-é-su chò Ki-tok, tio̍h beh kā i tùi hōe-tn̂g kóaⁿ chhut-.khì.
9:23 Só͘-í, i ê pē-bú kóng, " I í-keng tōa-hàn à, lín khì mn̄g i kakī. "
9:24 In chiū koh kiò hit-ê í-chêng chheⁿmê-.ê lâi, mn̄g i kóng, " Tī Siōng-tè ê bīn-chêng tio̍h chiàu-si̍t kóng. Goán chai hit-ê lâng sī ū chōe ê lâng. "
9:25 I ìn kóng, " I sī ū chōe ê lâng á m̄-sī, góa m̄-chai. Góa kantaⁿ chai chi̍t hāng tāichì, í-chêng góa chheⁿmê, taⁿ góa ē khòaⁿ-kìⁿ. "
9:26 In chiū mn̄g i kóng, " Hitê lâng kā lí chò siáⁿ-mi̍h? I án-chóaⁿ khui lí ê ba̍k-chiu? "
9:27 I ìn kóng, " Góa í-keng kā lín kóng kòe, lín m̄-thiaⁿ, chitmá ná ē beh koh thiaⁿ? Lín mā siūⁿ beh chò I ê bûn-tô͘, sī-.bô? "
9:28 In chiū kā i mā, kóng, " Lí chiah sī hit-ê lâng ê bûn-tô͘, goán sī Mô͘-se ê bûn-tô͘.
9:29 Goán chai Siōng-tè ū tùi Mô͘-se kóng-ōe; to̍k-to̍k chit-ê lâng tùi tó-ūi lâi, goán m̄-chai. "
9:30 Hitê lâng ìn kóng, " Che to̍h chin kî-koài à, I i hó góa ê ba̍k-chiu, lín iáu koh m̄-chai I tùi tó-ūi lâi.
9:31 Lán chai Siōng-tè bô thiaⁿ chōe-jîn ê kî-kiû, to̍k-to̍k lâng nā kèng-pài Siōng-tè lâi chun-chiàu I ê chí-ì, Siōng-tè chiū ē thiaⁿ i ê kî-kiû.
9:32 Tùi kó͘-chá í-lâi, m̄ bat thiaⁿ-kòe ū lâng hō͘ chhut-sì to̍h chheⁿmê ê lâng ē koh khòaⁿ-kìⁿ.
9:33 Chit-ê lâng nā m̄-sī tùi Siōng-tè hia lâi, chiū bô khó-lêng chò chit khoán tāichì. "
9:34 In chiū tùi i kóng, " Lí chhut-sì to̍h ū chōe, tī chōe-ok tiong tōa-hàn, tian-tò beh kà-sī goán? " In chiū tùi hōe-tn̂g kā i kóaⁿ chhut-.khì.
9:35 Sim-lêng ê Chheⁿ-mê
I-é-su thiaⁿ tio̍h in kā i kóaⁿ-chhut hōe-tn̂g. Āu-lâi, chhōe tio̍h i, chiū kā i mn̄g kóng, " Lí ū sìn Jîn-chú bô? "
9:36 I ìn kóng, " Sin-seⁿ ah, siáⁿ lâng sī Jîn-chú? Chhiáⁿ Lí kā góa kóng, thang hō͘ góa sìn I. "
9:37 I-é-su kā i kóng, " Lí bat khòaⁿ tio̍h I; chitmá kah lí teh kóng ōe ê to̍h-sī. "
9:38 I chiū kóng, " Chú ah, góa sìn. " I chiū kūi lo̍h-khì kā I pài.
9:39 I-é-su kóng, " Góa ūi tio̍h sím-phòaⁿ lîm-kàu chit sè-kan, hō͘ bô khòaⁿ-kìⁿ-ê lâng ē khòaⁿ-kìⁿ, mā hō͘ ū khòaⁿ-kìⁿ ê lâng piàn-chò chheⁿmê. "
9:40 Chi̍t-kóa Hoa-lí-sái phài ê lâng thiaⁿ tio̍h chiahê ōe, chiū mn̄g I-é-su kóng, " Chóng-bô goán mā sī chheⁿmê-.ê, sī-.bô? "
9:41 I-é-su ìn kóng, " Lín nā chheⁿmê, chiū bô chōe; taⁿ lín kóng, ' Goán ū khòaⁿ-kìⁿ', ánne, lín goân-chāi iáu koh ū chōe. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。