約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
7:1 I-é-su ê Hiaⁿ-tī M̄-sìn
Hiahê tāichì í-āu, I-é-su khì Ga-lí-la-iah séng sì-kè kiâⁿ. I bô ài khì Iô-tá-iah séng, in-ūi Iô-tá-iah lâng ài beh kā I thâi.
7:2 Iô-tá-iah lâng ê Tah-pò͘-pêⁿ-cheh teh beh kàu à,
7:3 Só͘-í, I-é-su ê hiaⁿ-tī kā I kóng, " Lí tio̍h lī-khui chia, khì Iô-tá-iah séng, hō͘ Lí ê bûn-tô͘ mā thang khòaⁿ Lí teh chò ê tāichì.
7:4 Lâng nā ài chhut-miâ chiū bē tiām-tiām-á chò tāichì. Lí kì-jiân teh chò chiahê tāichì, tio̍h khì chò hō͘ sè-kan lâng khòaⁿ. "
7:5 In-ūi liân I ê hiaⁿ-tī mā m̄-sìn I.
7:6 I-é-su chiū kā in kóng, " Góa ê sî iáu-bōe kàu, m̄ koh, lín ê sî chhìn-chhái sî to piān-piān.
7:7 Sè-kan bē oàn-hūn lín, in oàn-hūn góa, in-ūi góa put-sî teh chí-chhut in ê siâ-ok chok-ûi.
7:8 Lín chò lín khì siú lín ê cheh, góa bô ài tńg-khì siú chit-ê cheh, in-ūi góa ê sî iáu-bōe kàu. "
7:9 I-é-su kóng chiahê ōe liáu-āu, iû-goân lâu tī Ga-lí-la-iah séng.
7:10 I-é-su Kòe Tah-pò͘-pêⁿ-cheh
I-é-su ê hiaⁿ-tī khì siú cheh í-āu, I-é-su mā khì, m̄-sī kong-khai, sī tiām-tiām-á khì.
7:11 Iô-tá-iah lâng tī cheh-kî tiong teh chhōe I-é-su, mn̄g lâng kóng, " Hitê lâng tī tó-ūi? "
7:12 Chèng lâng tiong-kan chin chē lâng su-hā teh gī-lūn I-é-su ê tāichì, ū lâng kóng, " I sī hó lâng. " Mā ū lâng kóng, " M̄-sī, I sī teh siàn-tōng kûn-chiòng. "
7:13 To̍k-to̍k in kiaⁿ Iô-tá-iah-kàu ê léng-siù, bô lâng káⁿ kong-khai kóng-khí I-é-su ê tāichì.
7:14 I-é-su tī Sèng-tiān Kà-sī Lâng
Kàu cheh-kî ê tiong-chām, I-é-su chiah tńg-khì sèng-tiān kà-sī lâng.
7:15 Iô-tá-iah lâng chiū kî-koài, kóng, " Chit-ê lâng bô siū kàu-io̍k, ná ē hiahni̍h ū ha̍k-būn? "
7:16 I-é-su chiū kā in kóng, " Góa ê kà-sī m̄-sī tùi kakī lâi ê, sī tùi chhe-phài góa lâi ê hit ūi ê kà-sī.
7:17 Lâng nā goān-ì chiàu Siōng-tè ê chí-ì lâi chò, chiū ē chai góa ê kà-sī sī tùi Siōng-tè lâi ê, á-.sī chiàu góa kakī ê ì-sù teh kóng.
7:18 Óa-khò kakī teh kóng ê lâng, sī teh kiû kakī ê êng-kng; to̍k-to̍k kiû chhe-phài I ê hit ūi ê êng-kng ê lâng, sī chin-si̍t, I ê lāi-bīn mā lóng bô put-gī.
7:19 Mô͘-se kám bô hō͘ lín lu̍t-hoat? M̄ koh, lín tiong-kan bô kah chi̍t-ê lâng siú lu̍t-hoat. Lín ná ē siūⁿ beh thâi góa? "
7:20 Chèng lâng ìn kóng, " Lí m̄ teh khí-kông, siáⁿ lâng ài beh thâi Lí? "
7:21 I-é-su ìn kóng, " Góa kantaⁿ chò chi̍t hāng tāichì, lín chiū lóng kám-kak kî-koài.
7:22 Mô͘-se bēng-lēng lín kiâⁿ kat-lé, lín mā tī An-hioh-ji̍t kā lâng kiâⁿ kat-lé. Sū-si̍t siōng, chit-ê kat-lé m̄-sī tùi Mô͘-se, sī tùi lín chó͘-sian to̍h khai-sí.
7:23 Kì-jiân lín ûi-pōe Mô͘-se ê lu̍t-hoat, tī An-hioh-ji̍t kiâⁿ kat-lé, ánne, góa tī An-hioh-ji̍t kā chi̍t-ê pēⁿ-lâng oân-choân i hó, lín ná ē hiah siū-khì?
7:24 M̄-thang chiàu gōa-māu-lâi phòaⁿ-toàn lâng, tio̍h chiàu kong-tō lâi phòaⁿ-toàn. "
7:25 I sī Ki-tok á M̄-sī?
Ū chi̍t-kóa Ê-lú-sa-lèm ê lâng teh kóng, " Chit-ê kám m̄-sī in siūⁿ beh sat-hāi ê lâng?
7:26 Lí khòaⁿ, I hó-táⁿ teh kóng, mā bô lâng tùi I kóng siáⁿ-mi̍h. Kám kóng chiahê koaⁿ-hú chin-chiàⁿ chai-iáⁿ chit-ê sī Ki-tok?
7:27 M̄ koh lán chai chit-ê lâng tùi tó-ūi lâi; Ki-tok lâi ê sî, bô lâng chai I tùi tó-ūi lâi. "
7:28 I-é-su tī sèng-tiān kà-sī lâng ê sî, tōa-siaⁿ hoah, " Lín bat góa, mā chai góa tùi tó-ūi lâi. Góa m̄-sī chiàu kakī ê ì-sù lâi, chhe-phài góa lâi ê hit ūi sī chin-si̍t, lín khiok m̄ bat I.
7:29 Góa bat I, in-ūi góa tùi I hia lâi, mā sī I chhe-phài góa lâi ê. "
7:30 Hiahê lâng siūⁿ beh kā I lia̍h khí-.lâi; chóng-.sī, bô lâng hē chhiú, in-ūi I ê sî iáu-bōe kàu.
7:31 Kûn-chiòng tiong-kan chin chē lâng sìn I, kóng, " Ki-tok lâi ê sî, kám ē pí chit-ê lâng kiâⁿ khah chē sîn-jiah? "
7:32 Kéng-ōe Siū-phài Khì Lia̍h I-é-su
Hoa-lí-sái phài ê lâng thiaⁿ tio̍h kûn-chiòng ánne teh gī-lūn I-é-su ê tāichì, chè-si-tiúⁿ kah Hoa-lí-sái phài ê lâng chiū chhe kéng-ōe khì lia̍h I-é-su.
7:33 I-é-su chiū kóng, " Góa koh kah lín chò-hóe bô gōa kú, chiū beh tńg-khì chhe-phài góa lâi ê hit ūi hia.
7:34 Lín beh chhōe góa, mā chhōe bē tio̍h, in-ūi góa beh khì ê só͘-chāi, lín bē tàng khì. "
7:35 Iô-tá-iah lâng chiū hō͘-siong kóng, " Chit-ê lâng beh khì tó-ūi hō͘ lán chhōe bē tio̍h? Kám sī siūⁿ beh khì sì-sòaⁿ tī Hi-la̍h siâⁿ-chhī ê Iô-tá-iah kiâu-bîn hia, khì kà-sī Hi-la̍h lâng, sī-.bô?
7:36 I kóng ' Lín beh chhōe góa, mā chhōe bē tio̍h; góa beh khì ê só͘-chāi, lín bē tàng khì. ' Che sī siáⁿ-mi̍h ì-sù? "
7:37 Éng-seng Oa̍h-chúi ê Khe
Cheh-kî ê chòe-āu hit ji̍t, to̍h-sī siōng tiōng-iàu ê ji̍t, I-é-su khiā khí-lâi tōa-siaⁿ hoah, " Chhùi-ta ê lâng tio̍h lâi góa chia lim.
7:38 Sìn góa ê lâng, chiàu keng-tián só͘ kóng, ū oa̍h-chúi ê khe tùi i ê pak-lāi chhèng chhut-.lâi. "
7:39 I-é-su ánne kóng, sī teh chí sìn I ê lâng teh beh niá-siū Sèng Sîn. Hit sî, Siōng-tè iáu-bōe siúⁿ-sù Sèng Sîn, in-ūi I-é-su iáu-bōe tit tio̍h êng-kng.
7:40 Chèng lâng In-ūi I-é-su Khí Hun-cheng
Kûn-chiòng tiong-kan ū lâng thiaⁿ tio̍h chiahê ōe chiū kóng, " Chit-ê lâng chin-chiàⁿ sī hit-ūi sian-ti. "
7:41 Koh ū lâng kóng, " Chit-ê lâng to̍h-sī Ki-tok. " M̄ koh, mā ū lâng kóng, " Ki-tok kám ē tùi Ga-lí-la-iah séng chhut?
7:42 Keng-tián kám bô kóng, ' Ki-tok sī Ta-bi̍t ê kiáⁿ-sun, sī tùi Ta-bi̍t ê kò͘-hiong Bia̍t-lé-hèm siâⁿ chhut? '"
7:43 Kûn-chiòng chiū ánne in-ūi I-é-su lâi khí hun-cheng.
7:44 Kî-tiong ū chi̍t-kóa lâng ài beh lia̍h I-é-su, chóng-.sī, bô lâng hē chhiú.
7:45 Iô-tá-iah-kàu ê Thâu-lâng M̄-sìn I-é-su
Sèng-tiān ê kéng-ōe tńg-lâi kìⁿ chè-si-tiúⁿ kah Hoa-lí-sái phài ê lâng. In mn̄g kéng-ōe kóng, " Lín ná ē bô kā I-é-su ah tńg-.lâi? "
7:46 Kéng-ōe ìn kóng, " Chiông kàu taⁿ m̄ bat ū lâng kóng-ōe chhin-chhiūⁿ chit-ê lâng. "
7:47 Hoa-lí-sái phài ê lâng ìn kóng, " Lín mā khì hō͘ I bê-khì, sī-.bô?
7:48 Lán ê koaⁿ-oân á-.sī Hoa-lí-sái phài ê lâng, kám ū lâng sìn I?
7:49 Chit-tīn m̄ bat lu̍t-hoat ê gōng lâng tio̍h siū chek-hoa̍t. "
7:50 In tiong-kan ū chi̍t ūi bat khì kìⁿ I-é-su ê Nî-ko-té-mô͘ kā in kóng,
7:51 " Chiàu lán ê lu̍t-hoat, bô seng sím-mn̄g koh chhâ-bêng I ū chò siáⁿ-mi̍h, lán kám ē-tàng kā I tēng chōe? "
7:52 In chiū ìn kóng, " Lí mā sī tùi Ga-lí-la-iah séng lâi ê, sī-.bô? Lí khì chhâ-khó keng-tián chiū chai, Ga-lí-la-iah séng bô chhut sian-ti. "
7:53 Chèng lâng lóng tńg-khì in tau;
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。