路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
23:1 I-é-su hō͘ Lâng Ah-khì Pí-la̍h-to Hia
( Mt 27: 1-2, 11-14; Mk 15: 1-5; Ih 18: 28-38)
Choân-thé gī-oân lóng khiā khí-.lâi, kā I-é-su ah-khì Pí-la̍h-to ê bīn-chêng.
23:2 In khòng-kò kóng, " Goán khòaⁿ chit-ê lâng bê-he̍k goán ê jîn-bîn, kìm-chí lâng la̍p-sòe hō͘ hông-tè, koh chū-chheng chò Ki-tok, chò ông. "
23:3 Pí-la̍h-to mn̄g I-é-su kóng, " Lí sī Iô-tá-iah lâng ê ông, sī-.bô? " I-é-su ìn kóng, " Sī, chiàu lí kóng ánne. "
23:4 Pí-la̍h-to tùi hiahê chè-si-tiúⁿ kah kui tīn ê lâng kóng, " Góa khòaⁿ chit-ê lâng bô chōe. "
23:5 Chóng-.sī, in jú kian-chhî kóng, " I tùi Ga-lí-la-iah séng khai-sí, taⁿ lâi-kàu chia, I tī Iô-tá-iah choân tē kà-sī lâng, siàn-tōng jîn-bîn. "
23:6 I-é-su tī He-lo̍t ê Bīn-chêng
Pí-la̍h-to chi̍t-ē thiaⁿ-.tio̍h, chiū mn̄g khòaⁿ chit-ê lâng sī Ga-lí-la-iah lâng á m̄-sī.
23:7 I chi̍t ē chai I-é-su sio̍k tī He-lo̍t só͘ koán-hat, chiū kā I sàng-khì He-lo̍t hia. Hit sî, He-lo̍t lâng mā tī Ê-lú-sa-lèm.
23:8 He-lo̍t khòaⁿ tio̍h I-é-su chin hoaⁿ-hí, in-ūi i bat thiaⁿ tio̍h I-é-su ê tāichì, it-ti̍t ài beh kìⁿ I, koh ǹg-bāng ē-tàng khòaⁿ tio̍h I kiâⁿ sîn-jiah.
23:9 He-lo̍t mn̄g I-é-su chin chē tāichì, m̄ koh, I-é-su lóng bô ìn i pòaⁿ-kù.
23:10 Chè-si-tiúⁿ kah keng-ha̍k kàu-su khiā khí-.lâi, ke̍k-le̍k khòng-kò I-é-su.
23:11 He-lo̍t kah i ê peng mā kā I bú-jio̍k, hì-lāng. Jiân-āu kā I chhēng chi̍t-niá chin súi ê tn̂g-phàu, chiah kā I sàng tńg-khì hêng Pí-la̍h-to.
23:12 He-lo̍t kah Pí-la̍h-to pún-lâi ū kiat-oàn, tùi hit ji̍t khí soah piàn-chò pêng-iú.
23:13 I-é-su Hông Phòaⁿ Sí-hêng
( Mt 27: 15-26; Mk 15: 6-15; Ih 18: 39-19:16)
Pí-la̍h-to tiàu hiahê chè-si-tiúⁿ, koaⁿ-oân kah jîn-bîn lâi,
23:14 Kā in kóng, " Lín ah chit-ê lâng lâi góa chia, khòng-kò I siàn-tōng jîn-bîn. Taⁿ góa tī lín ê bīn-chêng kā I sím-mn̄g, chóng-.sī, góa chhâ lóng bô lín kò I ê chōe.
23:15 He-lo̍t mā jīm-tēng I bô chōe, chiah kā I sàng tńg-lâi hêng lán, khó-kiàn I bô chò siáⁿ-mi̍h eng-kai sí ê tāichì.
23:16 Só͘-í, góa beh kā I piⁿ-phah, kà-sī chi̍t ē chiah pàng I khì. "
23:17 Múi nî ê Pôaⁿ-kòe-cheh, chóng-tok tio̍h chiàu in ê iau-kiû kā in pàng chi̍t-ê hoān-lâng. ( ū ê pán-pún bô chit chat )
23:18 Kûn-chiòng tâng-chê tōa-siaⁿ hoah, " Tio̍h tû-khì chit-ê lâng, pàng Ba-la̍h-ba hō͘ goán. "
23:19 Chit-ê Ba-la̍h-ba, in-ūi tī siâⁿ lāi chok-loān koh thâi-sí-lâng, chiah hông koaiⁿ lo̍h kaⁿ.
23:20 Pí-la̍h-to ài beh pàng I-é-su, chiū koh tùi chèng lâng kóng chi̍t pái.
23:21 M̄ koh, in tōa-siaⁿ hoah, " Kā I tèng si̍p-jī-kè! Kā I tèng si̍p-jī-kè! "
23:22 Pí-la̍h-to tē-saⁿ pái tùi in kóng, " Tàu-té sī án-chóaⁿ? I kám ū chò siáⁿ-mi̍h pháiⁿ tāichì? Góa khòaⁿ I pēng bô eng-kai sí ê chōe, só͘-í, góa beh kā I piⁿ-phah, kà-sī chi̍t ē chiah pàng I khì. "
23:23 In kè-sio̍k tōa-siaⁿ hoah, iau-kiû Pí-la̍h-to kā I-é-su tèng si̍p-jī-kè. Kiat-kó in ê siaⁿ soah khah iâⁿ.
23:24 Pí-la̍h-to chiū chiàu in só͘ kiû ê lâi soan-phòaⁿ,
23:25 Pàng in só͘ iau-kiû hit-ê in-ūi chok-loān koh thâi-sí-lâng, hō͘ lâng koaiⁿ lo̍h kaⁿ ê Ba-la̍h-ba, koh kā I-é-su kau hō͘ in, sūn in ê ì-sù khì chhú-lí.
23:26 I-é-su Hông Tèng Si̍p-jī-kè
( Mt 27: 32-44; Mk 15: 21-32; Ih 19: 17-27)
Peng-á ah I-é-su khì ê sî, ū chi̍t-ê Kó͘-lī-nāi ê lâng, miâ kiò-chò Sí-mòng, tùi chng-kha lâi; in kā i khiú-lâi, kā si̍p-jī-kè kòa tòa i ê keng-kah-thâu hō͘ i giâ, lâi tòe I-é-su ê āu-bīn kiâⁿ.
23:27 Ū chi̍t-tōa-tīn lâng teh tòe I-é-su, kî-tiong ū chi̍t-kóa hū-jîn-lâng ūi I pi-siong thî-khàu.
23:28 I-é-su oa̍t thâu tùi in kóng, " Ê-lú-sa-lèm ê hū-jîn-lâng, lín m̄-bián ūi góa thî-khàu, tio̍h ūi lín kakī kah lín ê kiáⁿ-jî lâi thî-khàu!
23:29 In-ūi sî teh beh kàu, lâng ē kóng, ' Bē hoâi-īn, m̄ bat seⁿ kiáⁿ, m̄ bat hō͘ gín'á chia̍h leng ê hū-jîn-lâng chin ū hok-khì. '
23:30 Hit sî, lâng ē tùi tōa soaⁿ kóng, ' Kā goán teh lo̍h-.lâi! ' mā tùi sió soaⁿ kóng, ' Kā goán khàm lo̍h-.lâi! ' (chù, HSA 10:8)
23:31 In-ūi liân chheⁿ ê chhiū-ba̍k to ánne, ta-.khì ê chhiū-ba̍k kám bē koh khah lī-hāi? "
23:32 Si̍p-jī-kè téng ê I-é-su
Koh ū nn̄g-ê hoān-lâng hō͘ lâng ah-khì kah I-é-su chò-hóe chhú sí-hêng.
23:33 In khì-kàu chi̍t-ê miâ kiò-chò thâu-khak-óaⁿ ê só͘-chāi, chiū tī hia kā I-é-su tèng si̍p-jī-kè, mā tèng hit nn̄g-ê hoān-lâng, chi̍t-ê tī chiàⁿ pêng, chi̍t-ê tī tò pêng.
23:34 I-é-su kóng, " Thiⁿ-pē ah, sià-bián in, in-ūi in m̄-chai in só͘ chò ê. " Jiân-āu in chiū liam-khau lâi pun I-é-su ê saⁿ.
23:35 Chèng lâng khiā tī hia teh khòaⁿ. Hiahê Iô-tá-iah lâng ê thâu-lâng kā I-é-su thí-chhiò kóng, " I bat kiù pa̍t lâng, I Nā-sī Siōng-tè só͘ kéng-soán ê Ki-tok, tio̍h kiù kakī! "
23:36 Hiahê peng-á mā kā I hì-lāng, kiâⁿ óa khì phâng sng-chhò͘ hō͘ I,
23:37 Kóng, " Lí nā-sī Iô-tá-iah lâng ê ông, tio̍h kiù Lí kakī. "
23:38 Tī I-é-su ê thâu-khak téng-bīn ū chōe-chōng ê pâi-á siá kóng, " Chit-ê sī Iô-tá-iah lâng ê ông. "
23:39 Chò-hóe tèng si̍p-jī-kè ê hoān-lâng tiong ê chi̍t-ê bú-jio̍k I-é-su, kóng, " Lí kám m̄-sī Ki-tok? Tio̍h kiù Lí kakī, mā tio̍h kiù goán. "
23:40 Lēng-gōa chi̍t-ê hoān-lâng kā hit-ê chek-pī, kóng, " Lí kah I kāng-khoán teh siū-hêng, lí kám m̄-kiaⁿ Siōng-tè?
23:41 Lán siū-hêng sī kong-tō, in-ūi lán ū hoān chōe eng-kai siū chhú-hoa̍t, m̄ koh, chit-ê lâng bô chò m̄ tio̍h ê tāichì. "
23:42 Hitê hoān-lâng kóng, " I-é-su ah, Lí chò ông lâi-lîm ê sî, chhiáⁿ ē kì-tit góa! "
23:43 I-é-su kā i kóng, " Góa si̍t-chāi kā lí kóng, kin-á-ji̍t lí ē kah góa chò-hóe tī lo̍k-hn̂g. "
23:44 I-é-su ê Sí-bông
( Mt 27: 45-56; Mk 15: 33-41; Ih 19: 28-30)
Chha-put-to tiong-tàu ê sî, choân tē o͘-àm, kàu ē-po͘ saⁿ tiám ê sî, ji̍t-thâu sit kng.
23:45 Sèng-tiān lāi ê tiùⁿ-lî tùi-tiong li̍h-.khui.
23:46 I-é-su tōa-siaⁿ kiò, kóng, " Thiⁿ-pē ah, góa ê lêng-hûn kau-thok Lí. " kóng soah chiū tn̄g-khùi.
23:47 Liân-tiúⁿ khòaⁿ tio̍h só͘ hoat-seng ê tāichì, chiū oló Siōng-tè, kóng, " Chit-ê chin-chiàⁿ sī gī lâng! "
23:48 Chū-chi̍p tī hia teh khòaⁿ ê kûn-chiòng, khòaⁿ tio̍h só͘ hoat-seng ê tāichì, lóng ná kiâⁿ ná tûi sim-koaⁿ, pi-siong tńg-.khì.
23:49 Hiahê bat I-é-su ê lâng kah tùi Ga-lí-la-iah séng tòe I-é-su lâi ê hū-jîn-lâng, lóng khiā hn̄g-hn̄g teh khòaⁿ chiahê tāichì.
23:50 I-é-su ê Bâi-chòng
( Mt 27: 57-61; Mk 15: 42-47; Ih 19, 38-42)
Ū chi̍t-ê lâng miâ kiò-chò Iô-sé-huh, i sī chi̍t-ê gī-oân, chò lâng liông-siān koh ū chèng-gī.
23:51 I bô chàn-sêng kî-tha gī-oân ê kè-bô͘ kah hêng-tōng. I sī Iô-tá-iah lâng ê siâⁿ-chhī A-li-má-tha-iah ê lâng, pêng-sî ū teh kî-thāi Siōng-tè kok-tō͘ ê lâi-lîm.
23:52 Chit-ê lâng khì kìⁿ Pí-la̍h-to, chhéng-kiû siu-bâi I-é-su ê sin-si.
23:53 I kā I-é-su ê sin-si siu lo̍h-.lâi, ēng iù-tē pò͘ pau. Jiân-āu kā I bâi-chòng tī chio̍h-piah phah hó ê bōng lāi. Chit-ê bōng lóng iáu m̄ bat ēng kòe.
23:54 Hit ji̍t sī pī-pān cheh ê ji̍t, An-hioh-ji̍t teh beh kàu à.
23:55 Tùi Ga-lí-la-iah séng kah I-é-su chò-hóe lâi hiahê hū-jîn-lâng tòe tī Iô-sé-huh ê āu-bīn. In chim-chiok khòaⁿ hit-ê bōng, khòaⁿ I-é-su ê ûi-thé án-chóaⁿ hē.
23:56 In chiū tńg-khì chún-pī phang-liāu kah phang-iû. An-hioh-ji̍t, hiahê hū-jîn-lâng chiàu lu̍t-hoat ê kui-tēng hioh-khùn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。