路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
21:1 Kóaⁿ-hū ê Hōng-hiàn
( Mk 12: 41-44)
I-é-su gia̍h thâu khòaⁿ tio̍h hó-gia̍h lâng kā in ê hiàn-kim hiat lo̍h-khì hōng-hiàn-siuⁿ.
21:2 Koh khòaⁿ tio̍h chi̍t-ê sànchhiah ê kóaⁿ-hū kā nn̄g-ê tâng-chîⁿ-á hiat lo̍h-.khì.
21:3 I-é-su kóng, " Góa si̍t-chāi kā lín kóng, chit-ê sànchhiah ê kóaⁿ-hū só͘ hiat-ê, pí kî-tha chèng lâng khah chē.
21:4 In-ūi kî-tha chèng lâng sī tùi in só͘ chhun lo̍h-.lâi ê hiat lo̍h-.khì, m̄ koh, chit-ê hū-jîn-lâng sûi-jiân chin sàn, iáu koh kā seng-oa̍h-hùi choân-pō͘ hiat lo̍h-.khì. "
21:5 I-é-su Ī-giân Sèng-tiān Siū Húi-hoāi
( Mt 24: 1-2; Mk 13: 1-2)
Ū lâng teh kóng-khí sèng-tiān sī ēng hó chio̍h kah só͘ hiàn ê mi̍h lâi táⁿ-pān. Hit sî, I-é-su kóng,
21:6 " Lín teh khòaⁿ chiahê it-chhè, hit-ê ji̍t-chí teh beh kàu, tī chia bô chi̍t tè chio̍h ē sio-tha̍h, lóng ē tó kah pêⁿ-pêⁿ-pêⁿ. "
21:7 Tiāu-thâu kah Pek-hāi
( Mt 24: 3-14; Mk 13: 3-13)
Bûn-tô͘ mn̄g I-é-su kóng, " Lāu-su ah, chiahê tāichì tang-sî ē hoat-seng? Koh chiahê tāichì beh hoat-seng chìn-chêng, ū siáⁿ-mi̍h tiāu-thâu? "
21:8 I-é-su kóng, " Tio̍h kín-sīn! M̄-thang khì hō͘ lâng bê-he̍k, in-ūi ē ū chin chē lâng lī-iōng góa ê miâ lâi kóng, ' Góa to̍h-sī Ki-tok', koh kóng, ' Sî-ki teh beh kàu à'. Lín m̄ thang tòe in khì.
21:9 Lín ē thiaⁿ tio̍h kau-chiàn kah jiáu-loān ê tāichì, hit sî lín m̄-bián tio̍h-kiaⁿ, in-ūi chiahê tāichì it-tēng ē tāi-seng hoat-seng, chóng-.sī, boa̍t-ji̍t bē sûi-sî kàu. "
21:10 I-é-su kè-sio̍k kā in kóng, " Bîn-cho̍k ē khí-lâi kong-kek bîn-cho̍k, kok-ka mā ē khí-lâi kong-kek kok-ka.
21:11 Ū tōa tē-tāng, mā chin chē só͘-chāi ū ki-hng kah un-e̍k, koh ū tùi thiⁿ-téng lâi thang kiaⁿ ê kéng-siōng kah tōa ê sîn-jiah.
21:12 Chiahê tāichì hoat-seng chìn-chêng, lâng ē hē chhiú kā lín lia̍h, kā lín pek-hāi, koh kā lín kau hō͘ hōe-tn̂g kah kaⁿ-ga̍k. Lín mā ē ūi tio̍h góa ê iân-kò͘, hō͘ lâng lia̍h-khì kun-ông kah chóng-tok ê bīn-chêng.
21:13 Che sī lín chò kiàn-chèng ê ki-hōe.
21:14 Só͘-í, lín tio̍h sim-thâu lia̍h hō͘ tiāⁿ, m̄-bián seng chhau-hoân beh án-chóaⁿ piān-kái.
21:15 In-ūi góa ē siúⁿ-sù hō͘ lín kháu-châi kah tì-hūi, hō͘ lín ê tùi-te̍k lóng bē tàng tùi-khòng kah piān-pok.
21:16 Liân lín ê pē-bú, hiaⁿ-tī, chhin-chiâⁿ, pêng-iú mā ē kā lín chhut-bē; lín tiong-kan ū lâng ē hō͘ in hāi-sí.
21:17 Lín in-ūi góa ê iân-kò͘ ē hō͘ chèng lâng oàn-hūn,
21:18 Chóng-.sī, lín liân chi̍t ki thâu-mn̂g mā bē sit-lo̍h.
21:19 Lín tio̍h jím-nāi kàu-té, chiah ē tit tio̍h oa̍h-miā. "
21:20 Ī-giân Ê-lú-sa-lèm ê Húi-hoāi
( Mt 24: 15-21; Mk 13: 14-19)
" Lín nā khòaⁿ tio̍h Ê-lú-sa-lèm hō͘ kun-peng pau-ûi ê sî, chiū chai chit-ê siâⁿ teh beh bia̍t-bông à.
21:21 Hit sî, tī Iô-tá-iah séng ê lâng tio̍h tô-cháu khì soaⁿ-.ni̍h, tī siâⁿ lāi ê lâng tio̍h chhut-.lâi, tī chng-kha ê lâng m̄ thang ji̍p-khì chit-ê siâⁿ lāi.
21:22 In-ūi che sī ' hêng-hoa̍t ê ji̍t-chí', sī beh èng-giām keng-tián só͘ kì-chài ê it-chhè.
21:23 Tī hiahê ji̍t-chí, ū sin-īn kah hō͘ eⁿ-á chia̍h leng ê hū-jîn-lâng chin put-hēng, in-ūi ū tōa chai-lān teh beh lîm-kàu chit-ê só͘-chāi. Siōng-tè ê tōa siū-khì mā teh beh lîm-kàu chiahê jîn-bîn.
21:24 In ē hō͘ to-kiàm thâi-sí, mā ē hō͘ lâng lia̍h-khì sè-kài kok kok. Ê-lú-sa-lèm ē hō͘ lia̍t pang lâng thún-ta̍h, it-ti̍t kàu lia̍t pang chiàm-niá ê kî-hān móa. "
21:25 Jîn-chú ê Kàng-lîm
( Mt 24: 29-31; Mk 13: 24-27)
" Tī thiⁿ-téng, ji̍t, goe̍h kah chheⁿ lóng ē hián-chhut tiāu-thâu; tī tē-chiūⁿ, bān-bîn ē in-ūi hái-éng hōa-hōa háu lâi kiaⁿ-hiâⁿ put-an.
21:26 Lâng in-ūi chit sè-kài teh beh hoat-seng ê tāichì kiaⁿ kah hūn-.khì, in-ūi thiⁿ-téng ê kng-thé lóng ē iô-tāng.
21:27 Hit sî, lâng ē khòaⁿ tio̍h Jîn-chú chhiong-móa koân-lêng kah tōa êng-kng, chē hûn kàng-lîm.
21:28 Chiahê tāichì teh beh hoat-seng ê sî, lín tio̍h gia̍h thâu théng-heng, in-ūi lín ê tit-kiù teh beh kàu à. "
21:29 Bû-hoa-kó Chhiū ê Kà-sī
( Mt 24: 32-35; Mk 13: 28-31)
I-é-su koh ēng phì-jū kā in kóng, " Lín khòaⁿ bû-hoa-kó chhiū kah só͘-ū ê chhiū.
21:30 Lín chi̍t-ē khòaⁿ tio̍h chiahê chhiū teh puh-íⁿ, chiū chai joa̍h-thiⁿ teh beh kàu à.
21:31 Chhin-chhiūⁿ ánne, lín khòaⁿ tio̍h chiahê tiāu-thâu hoat-seng ê sî, chiū chai Siōng-tè kok-tō͘ teh beh kàu à.
21:32 Góa si̍t-chāi kā lín kóng, chit sè-tāi iáu-bōe kòe-.khì, chiahê tāichì lóng ē hoat-seng.
21:33 Thiⁿ kah tē ē siau-sit, góa ê ōe choa̍t-tùi bē siau-sit. "
21:34 Tio̍h Kín-sīn
" Lín kakī tio̍h kín-sīn! M̄-thang ūi tio̍h tham-chia̍h, chiú-chùi kah chit sè-kan ê chhau-hoân, lâi hō͘ lín ê sim hun-bê, in-ūi sè-kài ê boa̍t-ji̍t ē hut-jiân-kan lâi-lîm.
21:35 Chhin-chhiūⁿ oa̍h-tauh-á pia̍k chi̍t ē chiū lâi-kàu choân sè-kài lâng só͘ tòa ê ta̍k só͘-chāi.
21:36 Só͘-í, lín tio̍h ta̍k sî kéng-séng kî-tó, kî-kiû Siōng-tè hō͘ lín ū khùi-la̍t siám-phiah it-chhè teh beh hoat-seng ê tāichì, ē-tàng tī Jîn-chú ê bīn-chêng khiā chāi-chāi. "
21:37 Chit kúi ji̍t, I-é-su ji̍t-sî tī sèng-tiān kà-sī lâng, àm-sî chiū chhut-khì hit-ê Kaⁿ-ná soaⁿ kòe-mê.
21:38 Chèng lâng lóng thàu-chá chiū khì sèng-tiān thiaⁿ I-é-su káng tō-lí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。