路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
20:1 Chit-būn I-é-su ê Koân-pèng
( Mt 21: 23-27; Mk 11: 27-33)
Ū chi̍t ji̍t, I-é-su tī sèng-tiān kà-sī lâng koh thoân hok-im ê sî, hiahê chè-si-tiúⁿ, keng-ha̍k kàu-su kah tiúⁿ-ló chò-hóe lâi,
20:2 Mn̄g I-é-su kóng, " Lí tio̍h kā goán kóng, Lí sī khò siáⁿ-mi̍h koân-pèng lâi chò chiahê tāichì? Sī siáⁿ lâng hō͘ Lí chit-ê koân-pèng? "
20:3 I-é-su ìn kóng, " Góa mā beh mn̄g lín chi̍t kù ōe, lín tio̍h kā góa ìn-tap.
20:4 Iô-há-neh kā lâng sé-lé ê koân-pèng sī tùi thiⁿ á-.sī tùi lâng lâi ê? "
20:5 In hō͘-siong gī-lūn kóng, " Lán nā kóng ' Tùi thiⁿ', ánne I ē kóng ' Lín ná ē bô beh sìn Iô-há-neh? '
20:6 Lán nā kóng ' Tùi lâng', jîn-bîn lóng ē ēng chio̍h-thâu tìm lán, in-ūi chèng lâng lóng chhim-sìn Iô-há-neh sī sian-ti. "
20:7 Só͘-í, in ìn kóng, " Goán m̄-chai sī tùi tó-ūi lâi ê. "
20:8 I-é-su kā in kóng, " Án-ne, góa mā bô beh kā lín kóng góa sī khò siáⁿ-mi̍h koân-pèng lâi chò chiahê tāichì. "
20:9 Pháiⁿ Chhân-tiān ê Phì-jū
( Mt 21: 33-46; Mk 12: 1-12)
I-é-su koh ēng chi̍t-ê phì-jū tùi chèng lâng kóng, " Ū chi̍t-ê lâng khai-khún chi̍t khu phû-tô hn̂g, cho͘ hō͘ chhân-tiān, chiū chhut-gōa chin kú.
20:10 Kàu siu-sêng ê kî, hn̂g-chú chhe chi̍t-ê lô͘-po̍k khì chhōe chhân-tiān, beh tùi in siu hn̂g-cho͘ ê kóe-chí; chóng-.sī, chhân-tiān phah hit-ê lô͘-po̍k, hō͘ i khang-chhiú tńg-.khì.
20:11 Hn̂g-chú koh chhe pa̍t-ê lô͘-po̍k khì, chhân-tiān kāng-khoán kā i phah, koh kā i bú-jio̍k, iū-koh hō͘ i khang-chhiú tńg-.khì.
20:12 Hn̂g-chú koh chhe tē-saⁿ ê lô͘-po̍k khì, hiahê chhân-tiān mā sī kā i phah-siong, koh kā i kóaⁿ chhut-.khì.
20:13 Āu-lâi, hn̂g-chú kóng, ' Taⁿ góa tio̍h án-chóaⁿ chò chiah hó? Góa beh chhe góa só͘ thiàⁿ ê kiáⁿ khì. In tāi-khài ē kā i chun-tiōng. '
20:14 M̄ koh, chhân-tiān khòaⁿ tio̍h hn̂g-chú ê kiáⁿ lâi, chiū hō͘-siong chham-siông kóng, ' Chit-ê sī beh sêng-chiap hn̂g-chú châi-sán ê kiáⁿ, lán lâi kā i thâi-sí, ánne, chiahê châi-sán chiū piàn-chò lán ê. '
20:15 In chiū kā i hiat chhut-khì hn̂g-gōa, koh kā i thâi-sí. Hn̂g-chú beh án-chóaⁿ lâi kā in chhù-lí?
20:16 Hn̂g-chú ē lâi kā hiahê chhân-tiān châu-bia̍t, kā i ê hn̂g cho͘ hō͘ pa̍t lâng. " In thiaⁿ tio̍h chiahê ōe liáu-āu chiū kóng, " Chhian-bān m̄ thang ánne. "
20:17 I-é-su ba̍k-chiu kim-kim kā in khòaⁿ, kóng, " Ū kì-chài, sai-hū só͘ khì-sak ê chio̍h, chiâⁿ-chò chhù-kak-thâu ê ki-chio̍h. (chù, SPh 118:22) Chit-kù ōe sī siáⁿ-mi̍h ì-sù?
20:18 Só͘-ū poa̍h lo̍h-khì hit tè chio̍h-thâu téng ê lâng lóng ē chhùi-kut hún-si, hō͘ hit tè chio̍h-thâu teh tio̍h ê lâng lóng ē chhùi-kô͘-kô͘. "
20:19 Hit sî, hiahê keng-ha̍k kàu-su kah chè-si-tiúⁿ chai I-é-su chit-ê phì-jū sī teh chí in, chiū ài beh tong-tiûⁿ hē chhiú lia̍h I-é-su, m̄ koh, in kiaⁿ chèng lâng.
20:20 Siat-kè Hām-hāi I-é-su
( Mt 22: 12-22; Mk 12: 13-17)
In chiū chhōe ki-hōe, phài bi̍t-thàm ké-chò gī lâng, beh chhńg I-é-su ê ōe-phāng, thang kā I kau hō͘ chóng-tok lâi e-hoat pān-lí.
20:21 Chiahê bi̍t-thàm lâi mn̄g I-é-su kóng, " Lāu-su ah, goán chai Lí só͘ kóng só͘ kà-sī ê sī chèng-ti̍t, Lí mā bô khòaⁿ lâng ê bīn-sek, to̍h-sī tiong-si̍t kà-sī Siōng-tè ê tō-lí.
20:22 Goán la̍p-sòe hō͘ Lô-má ê hông-tè, ū ha̍h lán ê lu̍t-hoat á-bô? "
20:23 M̄ koh, I-é-su khòaⁿ-chhut in ê kúi-kè, chiū tùi in kóng,
20:24 " The̍h chi̍t-ê gîn-á hō͘ góa khòaⁿ. Chit-ê siōng kah jī-hō sī siáⁿ lâng ê? " In kóng, " Sī Lô-má hông-tè ê. "
20:25 I-é-su chiū tùi in kóng, " Án-ne, lín tio̍h kā hông-tè ê mi̍h la̍p hō͘ hông-tè, kā Siōng-tè ê mi̍h la̍p hō͘ Siōng-tè. "
20:26 In tī chèng lâng ê bīn-chêng bē tàng chhńg tio̍h I-é-su ê ōe-phāng, koh tùi I ê ìn-tap chin tio̍h-kiaⁿ, chiū ánne tiām-khì.
20:27 Sí-lâng Koh-oa̍h ê Būn-tê
( Mt 22: 23-33; Mk 12: 18-27)
Ū chi̍t-kóa chú-tiuⁿ lâng sí-liáu bô koh-oa̍h ê Sat-to-kai phài ê lâng lâi mn̄g I-é-su, kóng,
20:28 " Lāu-su ah, Mô͘-se kā goán kui-tēng, nā ū lâng ê a-hiaⁿ sí-.khì, bó͘ iáu tī-.leh, m̄ koh, bô seⁿ kiáⁿ, i ê sió-tī tio̍h chhōa hit-ê hiaⁿ-só lâi chò bó͘, thang seⁿ kiáⁿ lâi thè a-hiaⁿ thoân-chong chiap-tāi. (chù, SBK 25:5; CSK38:8)
20:29 Bat ū chhit-ê hiaⁿ-tī, tōa ê chhōa bó͘, bô kiáⁿ chiū sí-.khì.
20:30 Tē-jī-ê, tē-saⁿ-ê mā lóng chhōa hit-ê hiaⁿ-só.
20:31 Chhit-ê lóng ánne, bô seⁿ kiáⁿ chiū sí-.khì.
20:32 Āu-lâi, hit-ê hū-jîn-lâng mā sí-.khì.
20:33 Án-ne, tī koh-oa̍h ê sî, chit-ê hū-jîn-lâng beh chò in tiong-kan tó chi̍t-ê ê bó͘? In-ūi chit chhit-ê lâng lóng ū chhōa i chò bó͘. "
20:34 I-é-su kā in kóng, " Kim-sè ê lâng ū kè ū chhōa,
20:35 M̄ koh, ē kham-tit tùi sí-lâng tiong koh-oa̍h chìn-ji̍p lāi-sè ê, chiū bô kè bô chhōa.
20:36 In-ūi in koh-oa̍h liáu-āu bē koh sí kah thiⁿ-sài kāng-khoán, lóng sī Siōng-tè ê kiáⁿ-jî.
20:37 Koan-hē sí-lâng koh-oa̍h ê tāichì, Mô͘-se tī ' Teh To̍h ê chhì-phè' hit phiⁿ ū chí-bêng, Chú sī A-bu-la-hàm ê Siōng-tè, Í-sak ê Siōng-tè, Iâ-kop ê Siōng-tè. (chù, CAG 3:6, 15-16)
20:38 I m̄-sī sí-lâng ê Siōng-tè, sī oa̍h-lâng ê Siōng-tè, in-ūi lâng lóng sī ūi tio̍h Chú teh oa̍h. "
20:39 Ū kúi-nā-ê keng-ha̍k kàu-su ìn kóng, " Lāu-su ah, Lí kóng liáu chin hó. "
20:40 In chiū m̄-káⁿ koh mn̄g I-é-su siáⁿ-mi̍h būn-tê.
20:41 Ta-bi̍t ê Kiáⁿ-sun ê Būn-tê
( Mt 22: 41-46; Mk 12: 35-37)
I-é-su tùi in kóng, " Lâng ná ē kóng Ki-tok sī Ta-bi̍t ê kiáⁿ-sun?
20:42 In-ūi Ta-bi̍t tī Si-phian kakī kóng, ' Chú kā góa ê Chú kóng, chē góa ê chiàⁿ pêng,
20:43 Kàu góa hō͘ Lí ê tùi-te̍k chò Lí ê kha-ta̍h. ' (chù, SPh 110:1)
20:44 Ta-bi̍t kì-jiân chheng Ki-tok chò Chú, Ki-tok ná ē chò Ta-bi̍t ê kiáⁿ-sun? "
20:45 Khián-chek Keng-ha̍k Kàu-su
( Mt 23: 1-36; Mk 12: 38-40; Lk 11: 37-54)
Chèng lâng teh thiaⁿ ê sî, I-é-su kā bûn-tô͘ kóng,
20:46 " Tio̍h thê-hông hiahê keng-ha̍k kàu-su, in ài chhēng tn̂g-saⁿ sì-kè kiâⁿ, chin ài tī tōa lō͘-kháu hō͘ lâng chhéng-an, tī hōe-tn̂g lāi chē koân ūi, tī iàn-se̍k chē tōa-ūi.
20:47 In chhim-chiàm kóaⁿ-hū ê ke-hóe, thiau-kò͘-ì kî-tó chin tn̂g; in ē siū koh khah tāng ê hêng-hoa̍t. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。