出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 An-hioh-ji̍t ê Kui-tēng
Mô͘-se chio-chi̍p I-su-la-el choân hōe-chiòng, tùi in kóng, " Siōng-chú só͘ hoan-hù ê ōe kah lín tio̍h kiâⁿ ê, to̍h-sī chiahê:
35:2 La̍k ji̍t tio̍h chò-kang, tē-chhit ji̍t sī lín ê sèng-ji̍t, sī tōa ê An-hioh-ji̍t, lâi ho̍k-sāi Siōng-chú. Só͘-ū tī chit ji̍t chò-kang ê, tio̍h hō͘ i sí.
35:3 An-hioh-ji̍t hit kang, tī lín ta̍k keng chhù lāi lóng m̄ thang khí hóe. "
35:4 Ūi Sèng-bō͘ Hōng-hiàn
( CAG 25: 1-9)
Mô͘-se tùi I-su-la-el choân hōe-chiòng kóng, " Siōng-chú só͘ hoan-hù ê ōe, sī ánne kóng:
35:5 Lín tiong-kan tio̍h the̍h lé-mi̍h lâi hiàn hō͘ Siōng-chú, kiàn-nā sim-goān ê lóng thang the̍h-.lâi, chò hiàn hō͘ Siōng-chú ê lé-mi̍h, to̍h-sī kim, gîn, tâng,
35:6 nâ-sek, chí-sek, chu-âng sek ê liāu, iù-tē, soaⁿ-iûⁿ-mn̂g,
35:7 ní âng ê iûⁿ-káng phôe, hái-káu phôe, chô-kia̍p chhâ,
35:8 Tiám teng ê iû, thang chò boah iû ê kah hiuⁿ ê phang-liāu,
35:9 Âng bé-ló kah pa̍t chióng ê pó-chio̍h, thang siuⁿ tī chè-si ho̍k kah pó͘-kòa. "
35:10 Sèng-bō͘ ê Khì-bu̍t
( CAG 39: 32-43)
" Lín tiong-kan kiàn-nā sim ū tì-hūi ê, lóng tio̍h lâi chò Siōng-chú it-chhè só͘ hoan-hù ê,
35:11 to̍h-sī hōe-bō͘, i ê pò͘-pêⁿ kah i ê kòa, i ê kau, i ê pán, i ê hoâiⁿ-kông, i ê thiāu, i ê khū,
35:12 kūi kah i ê kǹg, si-un-só͘ kah jia-cha̍h ê tiùⁿ-lî,
35:13 toh-á kah i ê kǹg kah i ê khì-kū kah pâi-lia̍t ê piáⁿ,
35:14 tiám kng ê teng-tâi kah i ê khì-kū, teng-chóaⁿ kah tiám kng ê iû,
35:15 hiuⁿ-tôaⁿ kah i ê kǹg, boah iû ê kah hiuⁿ ê phang-hiuⁿ, í-ki̍p hōe-bō͘ mn̂g ê mn̂g-lî,
35:16 sio-chè ê tôaⁿ kah i tâng ê bāng kah i ê kǹg, í-ki̍p i só͘-ū ê khì-kū, sé-tn̄g ê phûn kah i ê chō,
35:17 tiâⁿ ê tiùⁿ-ûi kah i ê thiāu, in ê khū kah tiûⁿ mn̂g ê mn̂g-lî,
35:18 hōe-bō͘ só͘ tèng ê teng kah tiâⁿ só͘ tèng ê teng kah in ê soh,
35:19 chhiú-kang iù ê saⁿ-khò͘, tī sèng-só͘ chhēng lâi ho̍k-sāi ê, to̍h-sī chè-si A-lông ê sèng-saⁿ kah i ê kiáⁿ ê saⁿ, chhēng lâi tam-tng chè-si ê chit. "
35:20 Jîn-bîn ê Hōng-hiàn
I-su-la-el choân hōe-chiòng tùi Mô͘-se ê bīn-chêng chhut-.khì.
35:21 Kiàn-nā siū kám-tōng, tùi sim-lāi hoaⁿ-hí ê lóng lâi the̍h lé-mi̍h hiàn hō͘ Siōng-chú, ēng lâi chò hōe-bō͘ ê kang kah it-chhè ê lō͘-ēng, mā ēng lâi chò sèng-saⁿ.
35:22 Kiàn-nā chhut tī sim só͘ hoaⁿ-hí ê, chapo͘ kah chabó͘ lóng lâi, ta̍k-ê kā kim-khì, to̍h-sī heng chêng ê pín-chiam, hīⁿ-kau, phah ìn ê chhiú-chí kah chhiú-khoân. Che sī ta̍k lâng kā i ê lé-mi̍h hiàn hō͘ Siōng-chú.
35:23 Kiàn-nā lâng ū nâ-sek, chí-sek, chu-âng sek ê liāu, iù-tē, soaⁿ-iûⁿ mn̂g, ní âng ê iûⁿ-káng phôe, hái-káu phôe lóng the̍h-.lâi.
35:24 Kiàn-nā hiàn gîn kah tâng chò lé-mi̍h ê, lóng the̍h-lâi hiàn hō͘ Siōng-chú; kiàn-nā ū chô-kia̍p chhâ thang chò siáⁿ-mi̍h lō͘-ēng ê mā the̍h-lâi hiàn.
35:25 Kiàn-nā sim-lāi ū tì-hūi ê chabó͘ lâng chhin-chhiú pháng-se, kā só͘ pháng ê nâ-sek, chí-sek, chu-âng sek ê pò͘-liāu kah iù-tē lóng the̍h-lâi hiàn.
35:26 Kiàn-nā ū tì-hūi ê sim siū kám-tōng ê chabó͘ lâng, chiū pháng soaⁿ-iûⁿ mn̂g.
35:27 Chiahê thâu-lâng kā âng bé-ló kah pa̍t chióng ê pó-chio̍h, thang siuⁿ tī chè-si ho̍k kah pó͘-kòa ê, lóng the̍h-lâi hiàn.
35:28 Koh the̍h hiuⁿ-liāu kah thang ēng i lâi tiám teng ê iû, chò boah iû ê, chò hiuⁿ ê phang-liāu.
35:29 I-su-la-el lâng bô-lūn lâm-lí, kiàn-nā sim hoaⁿ-hí hiàn lé-mi̍h hō͘ Siōng-chú ê, lóng hoaⁿ-hí the̍h lé-mi̍h lâi hiàn, chò Siōng-chú kau-thok Mô͘-se só͘ kā in hoan-hù khì chò it-chhè ê kang.
35:30 Chō Sèng-bō͘ ê Sai-hū
( CAG 31: 1-11)
Mô͘-se tùi I-su-la-el lâng kóng, " Lín khòaⁿ, Iô-tah ê chi-cho̍k Hu-ul ê sun, U-lī ê kiáⁿ Be-cha-lel, Siōng-chú í-keng chí miâ kéng-tiàu i,
35:31 koh ēng Siōng-tè ê lêng chhiong-móa i, hō͘ i ū tì-hūi, ū chhong-bêng, ū tì-sek, ē chò ta̍k chióng ê kang,
35:32 ē siūⁿ-chhut kî-khiáu ê kang-hu lâi chò kim, gîn, tâng hiahê mi̍h,
35:33 mā ē tiau-khek pó-chio̍h lâi siuⁿ, mā ē tiau-khek chhâ, ē chò ta̍k chióng kî-khiáu ê kang.
35:34 Koh hō͘ i kah Tàn ê chi-cho̍k, A-hi-sat-boat ê kiáⁿ A-ho-li-ia̍p, sim ū lêng-khiàu, ē kà-sī lâng.
35:35 Siōng-tè ēng tì-hūi chhiong-móa chiahê lâng ê sim, hō͘ in ē chò ta̍k chióng ê kang, bô-lūn tiau-khek ê kang, kî-khiáu ê kang, ēng nâ-sek, chí-sek, chu-âng sek ê liāu kah iù-tē, siù-hoe ê, chit pò͘ ê kah ta̍k chióng ê kang lóng ē chò, mā ē siūⁿ-chhut kî-khiáu ê kang-hu. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。