路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
15:1 Sit-lo̍h Iûⁿ ê Phì-jū
( Mt 18: 12-14)
Ū chi̍t pái, chin chē thiu-sòe ê kah chōe-jîn lâi I-é-su hia beh thiaⁿ I káng tō-lí.
15:2 Hoa-lí-sái phài ê lâng kah keng-ha̍k kàu-su nga̍uh-nga̍uh-liām, kóng, " Chit-ê lâng chiap-la̍p chōe-jîn koh kah in chò-hóe chia̍h pn̄g! "
15:3 I-é-su chiū ēng chi̍t-ê phì-jū tùi in kóng,
15:4 " Lín tiong-kan nā siáⁿ lâng ū chi̍t-pah chiah iûⁿ, phah-m̄-kiàn chi̍t chiah, i kám bē chiām-chhiáⁿ pàng káu-cha̍p-káu chiah tī soaⁿ-.ni̍h, khì chhōe phah-m̄-kiàn ê hit chiah, it-ti̍t kàu chhōe tio̍h ūi chí?
15:5 Chhōe tio̍h liáu-āu chiū hoaⁿ-hí, kā hit chiah iûⁿ phāiⁿ tòa keng-kah-thâu,
15:6 Tńg-kàu chhù chiū kiò chhù-piⁿ ê pêng-iú lâi, kā in kóng, " Lâi kah góa tàu hoaⁿ-hí, in-ūi góa chhōe tio̍h phah-m̄-kiàn ê hit chiah iûⁿ. '
15:7 Góa kā lín kóng, tī thiⁿ-téng mā chhin-chhiūⁿ ánne, ē ūi tio̍h chōe-jîn tiong-kan ū chi̍t-ê lâng hóe-kái lâi hoaⁿ-hí, pí ūi tio̍h ū káu-cha̍p-káu ê m̄-bián hóe-kái ê gī lâng koh khah hoaⁿ-hí. "
15:8 Sit-lo̍h Chîⁿ ê Phì-jū
" Á-sī ū chi̍t-ê hū-jîn-lâng ū cha̍p-ê gîn-á, nā phah-m̄-kiàn chi̍t-ê, i kám bē tiám teng, piàⁿ-sàu chhù lāi, phah-piàⁿ chhōe kàu chhōe tio̍h?
15:9 I chi̍t ē chhōe-.tio̍h, chiū kiò pêng-iú kah chhù-piⁿ lâi, kā in kóng, ' Lâi kah góa tàu hoaⁿ-hí, in-ūi góa phah-m̄-kiàn ê gîn-á í-keng chhōe-.tio̍h. '
15:10 Góa kā lín kóng, chhin-chhiūⁿ ánne, Siōng-tè ê thiⁿ-sài mā ē ūi tio̍h chōe-jîn tiong-kan ū chi̍t-ê lâng hóe-kái lâi hoaⁿ-hí. "
15:11 Sit-lo̍h Kiáⁿ ê Phì-jū
I-é-su koh kóng, " Ū chi̍t-ê lâng ū nn̄g-ê kiáⁿ.
15:12 Hitê sè-hàn kiáⁿ kā lāu-pē kóng, ' A-pa, chhiáⁿ kā góa eng-kai tit ê châi-sán pun hō͘ góa. ' Lāu-pē chiū pun ke-hóe hō͘ nn̄g-ê kiáⁿ.
15:13 Keh bô kúi ji̍t, hit-ê sè-hàn kiáⁿ kā só͘ tit tio̍h ê châi-sán choân-pō͘ ōaⁿ-chò hiān-kim, chiū chhut-gōa khì chin hn̄g ê só͘-chāi. I tī hia hòng-tōng loān khai-chîⁿ.
15:14 I kā só͘-ū ê chîⁿ khai liáu-liáu ê sî, hit só͘-chāi tú tio̍h tōa ki-hng, i chiah kak-ngō͘ khiàm-khoeh ê kan-khó͘.
15:15 I chiū khì hō͘ hit só͘-chāi ê chi̍t-ê lâng chhiàⁿ, hit-ê lâng chhe i khì soaⁿ-.ni̍h ê hn̂g chhī ti.
15:16 I iau kah siūⁿ beh the̍h ti teh chia̍h ê tāu-phoh lâi chí-iau, mā lóng bô lâng beh hō͘ i chia̍h.
15:17 Āu-lâi, i kak-chhéⁿ kóng, ' Góa ê lāu-pē ū hiah chē tn̂g-kang, bí-niûⁿ chia̍h kah ū chhun, m̄ koh, góa tī chia iaukah teh beh sí-.khì.
15:18 Góa beh tńg-lâi-khì chhōe góa ê lāu-pē, kā i kóng, ' A-pa, góa ū tek-chōe thiⁿ, mā ū tek-chōe lí.
15:19 Taⁿ góa bô chu-keh koh chò lí ê kiáⁿ. Chhiáⁿ hō͘ góa chò lí ê tn̂g-kang to̍h hó. '
15:20 I chiū chhut-hoat tńg-khì chhōe i ê lāu-pē. Lī in lāu-pē iáu koh chin hn̄g ê sî, lāu-pē to̍h khòaⁿ tio̍h i, kám-kak chin m̄-kam, cháu-óa khì kā i lám-.leh, ti̍t-ti̍t kā i chim.
15:21 Kiáⁿ kā lāu-pē kóng, ' A-pa, góa ū tek-chōe thiⁿ, mā ū tek-chōe lí, taⁿ góa bô chu-keh koh chò lí ê kiáⁿ. '.
15:22 M̄ koh, lāu-pē tùi hiahê lô͘-po̍k kóng, ' Kín hiaⁿh siōng hó ê saⁿ lâi kā i chhēng, kā i kòa chhiú-chí, koh kā i chhēng ê;
15:23 Sòa khan hit chiah pûi ê gû-á kiáⁿ lâi thâi, lâi pān toh hoaⁿ-hí khèng-chiok.
15:24 In-ūi góa chit-ê kiáⁿ sí-khì ū koh-oa̍h, phah-m̄-kiàn ū koh chhōe-.tio̍h. 'In chiū chò-hóe hoaⁿ-hí khèng-chiok.
15:25 " Hit sî, tōa-kiáⁿ tùi hn̂g-.ni̍h tńg-lâi beh kàu chhù ê sî, thiaⁿ tio̍h chàu ga̍k kah thiàu-bú ê siaⁿ.
15:26 I kiò chi̍t-ê lô͘-po̍k lâi, mn̄g i khòaⁿ sī teh chò siáⁿ-mi̍h tāichì.
15:27 Hitê lô͘-po̍k kā i kóng, ' Lín sió-tī tńg-.lâi à, lín lāu-pē in-ūi i pêng-an bô-sū tńg-.lâi, só͘-í, thâi hit chiah pûi ê gû-á kiáⁿ. '
15:28 Tōa-kiáⁿ chin siū-khì, m̄ ji̍p-.khì; lāu-pē chhut-lâi kā i khó͘-khǹg.
15:29 I ìn lāu-pē kóng, ' Lí khòaⁿ, góa ho̍k-sāi lí hiah chē nî, lóng m̄ bat ûi-pōe lí ê bēng-lēng, lí mā m̄ bat hō͘ góa chi̍t chiah iûⁿ-á-kiáⁿ, thang kah góa ê pêng-iú chò-hóe hoaⁿ-hí lim-chia̍h.
15:30 Chóng-.sī, lí chit-ê kiáⁿ, kau-pôe chhiong-ki, kā lí pun hō͘ i ê châi-sán choân-pō͘ khai liáu-liáu. I chi̍t ē tńg-.lâi, lí chiū ūi tio̍h i thâi pûi ê gû-á kiáⁿ. '
15:31 Lāu-pē kā i kóng, ' Góa ê kiáⁿ, lí tiāⁿtiāⁿ kah góa chò-hóe, góa só͘-ū ê châi-sán lóng sī lí ê.
15:32 M̄ koh, lí ê sió-tī sí ū koh-oa̍h, phah-m̄-kiàn ū koh chhōe-.tio̍h, lán eng-kai tio̍h lâi hoaⁿ-hí khèng-chiok. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。