路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
14:1 I-é-su I-hó Kó͘-tiòng-pēⁿ ê Lâng
Ū chi̍t-ê An-hioh-ji̍t, I-é-su ji̍p-khì chi̍t-ê Hoa-lí-sái phài ê thâu-lâng ê chhù chia̍h pn̄g, tāi-ke teh koan-chhat I-é-su ê só͘ chò.
14:2 Tú-hó tī I-é-su ê bīn-chêng ū chi̍t-ê kó͘-tiòng-pēⁿ ê lâng.
14:3 I-é-su tùi lu̍t-hoat kàu-su kah Hoa-lí-sái phài ê lâng kóng, " An-hioh-ji̍t i-pēⁿ thang á m̄ thang? "
14:4 Hiahê lâng tiām-tiām, I-é-su chiū kā hit-ê lâng khan-.lâi, kā i i hó, hō͘ i tńg-.khì.
14:5 Jiân-āu I-é-su tùi in kóng, " Lín tiong-kan siáⁿ lâng nā ū lî á-.sī gû tī An-hioh-ji̍t poa̍h-lo̍h kau-khut, lín kám bô sûi-sî kā i giú khí-.lâi? "
14:6 Hiahê lâng lóng bô ōe thang ìn.
14:7 Chú-Kheh Koan-hē ê Kà-sī
I-é-su khòaⁿ hiahê lâng-kheh teh kéng tōa-ūi, chiū ēng phì-jū tùi in kóng,
14:8 " Lín hō͘ lâng chhiáⁿ khì hù hun-iàn ê sî, m̄ thang chē tōa-ūi, khióng-kiaⁿ ū pí lí khah chun-kùi ê lâng mā lâi hō͘ i chhiáⁿ.
14:9 Hit sî, chú-lâng ē lâi kā lí kóng, ' Chhiáⁿ niū ūi hō͘ chit-ê lâng', lí ē kám-kak kiàn-siàu, soah tio̍h khì chē tī siōng bóe ê ūi.
14:10 Hō͘ lâng chhiáⁿ ê sî tio̍h khì chē bóe-ūi, chhiáⁿ lí ê lâng lâi kā lí kóng, ' Pêng-iú, chhiáⁿ lí khí-lâi chē tōa-ūi. ' Hit sî, lí tī kâng toh ê lâng bīn-chêng chiū ū thé-biān.
14:11 In-ūi kiau-ngō͘ ê lâng ē siū kàng kē; khiam-pi ê lâng ē hō͘ lâng kā i thê-ko. "
14:12 Jiân-āu I-é-su mā kā chhiáⁿ I ê lâng kóng, " Lí pān tiong-tàu-tǹg, á-.sī àm-tǹg ê sî, m̄ thang chhiáⁿ lí ê pêng-iú, á-.sī hiaⁿ-tī, á-.sī chhin-chiâⁿ, á-.sī hó-gia̍h ê chhù-piⁿ, chiah bián-tit in kā lí chhiáⁿ tò tńg-.lâi, ánne, lí soah siū lâng pò-tap.
14:13 Lí pān toh chhiáⁿ lâng-kheh ê sî, tio̍h chhiáⁿ sànchhiah-.ê, phòa-siùⁿ-.ê, pái-kha-.ê, chheⁿmê-.ê,
14:14 Án-ne, lí it-tēng ē siū chiok-hok, in-ūi in bô lêng-le̍k kā lí pò-tap. Tī gī lâng koh-oa̍h ê sî, Siōng-tè ē kā lí pò-tap. "
14:15 Tōa Iàn-se̍k ê Phì-jū
( Mt 22: 1-10)
Kâng toh ê chi̍t lâng thiaⁿ tio̍h chiahê ōe, chiū tùi I-é-su kóng, "Ē-tàng tī Siōng-tè kok-tō͘ lim-chia̍h ê lâng chin ū hok-khì!. "
14:16 M̄ koh, I-é-su kā i kóng, " Ū chi̍t-ê lâng pān tōa iàn-se̍k, chhiáⁿ chin chē lâng.
14:17 Kàu beh khui-toh ê sî, chhe i ê lô͘-po̍k kā só͘ chhiáⁿ ê lâng kóng, ' Chhiáⁿ lín tio̍h lâi, ta̍k hāng lóng chún-pī hó-sè à. '
14:18 In chi̍t-ê chi̍t-ê the-sî. Thâu chi̍t-ê kā i kóng, ' Góa ū bé chi̍t khu hn̂g, it-tēng tio̍h khì khòaⁿ lè. Chhiáⁿ lí liōng-kái. '
14:19 Koh chi̍t-ê lâng kóng, ' Góa ū bé gō͘-tùi gû, tio̍h khì giām-siu. Chhiáⁿ lí liōng-kái. '
14:20 Koh chi̍t-ê lâng kóng, ' Góa tú chhōa bó͘, só͘-í bē tàng khì. '
14:21 Lô͘-po̍k tńg-khì kā chiahê tāichì kā chú-lâng kóng. Hitê chú-lâng siū-khì, kā i ê lô͘-po̍k kóng, ' Kín chhut-khì siâⁿ lāi ê ke-thâu hāng-bóe, chhōa hiahê sànchhiah-.ê, phòa-siùⁿ-.ê, chheⁿmê-.ê kah pái-kha-.ê lâi chia. '
14:22 Lô͘-po̍k kóng, ' Chú-lâng, lí só͘ hoan-hù ê góa lóng í-keng chò à, m̄ koh, iáu koh ū khang-ūi. '
14:23 Chú-lâng tùi lô͘-po̍k kóng, ' Chhut-khì lō͘-.ni̍h kah lî-pa piⁿ bián-kióng lâng ji̍p-.lâi, thang hō͘ góa ê chhù chē móa.
14:24 In-ūi góa kā lín kóng, chêng só͘ chhiáⁿ hiahê lâng bô chi̍t-ê ē-tàng chia̍h tio̍h góa ê iàn-se̍k. '"
14:25 Chò Bûn-tô͘ ê Tāi-kè
( Mt 10: 37-38)
Ū chin chē lâng kah I-é-su chò-tīn kiâⁿ. I-é-su oa̍t kòe-lâi tùi in kóng,
14:26 " Siūⁿ beh lâi tòe góa ê lâng, nā m̄-khéng pàng-sak i ê pē-bú, bó͘-kiáⁿ, hiaⁿ-tī, chí-mōe, sīm-chì kakī ê sèⁿ-miā, chiū bē tàng chò góa ê bûn-tô͘.
14:27 Bô giâ kakī ê si̍p-jī-kè lâi tòe góa ê lâng, mā bē tàng chò góa ê bûn-tô͘.
14:28 Lín tiong-kan siáⁿ lâng nā siūⁿ beh khí thah, kám bô tāi-seng chē lo̍h-lâi sǹg khòaⁿ ū kàu chîⁿ thang oân-sêng hit-ê kang-têng á-bô?
14:29 Nā bô ánne chò, kiámchhái hē tē-ki liáu-āu soah bē tàng oân-sêng kang-têng. Khòaⁿ tio̍h ê lâng lóng ē kā i thí-chhiò, kóng,
14:30 ' Chit-ê lâng ū khai-sí tāng-kang, soah bē tàng oân-sêng. '
14:31 Á-sī ū chi̍t-ê ông nā siūⁿ beh kah pa̍t-ê ông kau-chiàn, kám bô tāi-seng chē lo̍h-.lâi, siūⁿ khòaⁿ ē-tàng ēng chi̍t-bān-ê peng tí-khòng hit-ê chhōa nn̄g- bān-ê peng lâi kong-kek ê ông á-bē?
14:32 Nā chai-iáⁿ bē, i ē thàn hit-ê ông iáu tī hn̄g-hn̄g ê sî, chhe sù-chiá khì kah i kóng-hô.
14:33 Kah ánne kāng-khoán, lín tiong-kan bô-lūn siáⁿ lâng, nā bô pàng-sak kakī ê it-chhè, chiū bē tàng chò góa ê bûn-tô͘. "
14:34 Sit Bī ê Iâm
( Mt 5: 13; Mk 9: 50)
" Iâm chin ū lō͘-ēng; iâm nā sit-bī, beh án-chóaⁿ hôe-ho̍k i ê kiâm-bī?
14:35 Sit bī ê iâm bē tàng lo̍h-hn̂g, mā bē tàng kauh-pûi, chí ū hiat-tiāu. Ū hīⁿ-khang thang thiaⁿ ê lâng, tio̍h thiaⁿ! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。