路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
12:1 Kéng-kài Ké-hó ê Lâng
Hit sî, kúi-nā bān lâng chū-chi̍p óa-.lâi, tì-sú kàu hō͘-siong thún-ta̍h. I-é-su chiū tùi bûn-tô͘ kóng, " Lín tio̍h thê-hông Hoa-lí-sái phài ê lâng ê kàⁿ, to̍h-sī in ê ké-hó.
12:2 Bô chi̍t hāng khàm ba̍t ê tāichì bē lō͘-hiān, múi chi̍t hāng pì-bi̍t ê tāichì kàu-sî mā lóng ē hō͘ lâng chai-iáⁿ.
12:3 Só͘-í, lín tī o͘-àm tiong só͘ kóng ê, ē tī kng-bêng tiong hō͘ lâng thiaⁿ-.tio̍h. Lín tī pâng-keng lāi hīⁿ-khang piⁿ só͘ kóng ê, ē hō͘ lâng tī chhù-bóe-téng kong-khai soan-pò͘. "
12:4 Tio̍h Kèng-ùi Siōng-tè
( Mt 10: 28-31)
" Góa ê pêng-iú, góa kā lín kóng, hāi-sí lín ê seng-khu liáu-āu bē tàng koh tùi lín chò siáⁿ-mi̍h ê lâng, lín m̄-bián kiaⁿ in.
12:5 Góa beh chí-sī lín tio̍h kèng-ùi siáⁿ-mi̍h khoán lâng; lín tio̍h kèng-ùi Siōng-tè, I hō͘ lâng sí liáu-āu koh ū koân-pèng kā lâng hiat lo̍h-khì tē-ga̍k. Sī lah, góa kā lín kóng, tio̍h-kiaⁿ chit ūi!
12:6 " Gō͘ chiah chhek-chiáu-á kám m̄-sī bē nn̄g kak gîn? Tī Siōng-tè ê bīn-chêng, liân chi̍t chiah to bô bē kì-.tit.
12:7 Sīm-chì liân lín ê thâu-mn̂g to lóng ū sǹg kòe. M̄-bián kiaⁿ, lín pí hiahê chhek-chiáu-á koh khah kùi-tiōng. "
12:8 Kong-khai Sêng-jīn Ki-tok
( Mt 10: 32-33; 12: 32; 10, 19-20)
" Góa kā lín kóng, tī lâng ê bīn-chêng sêng-jīn góa ê, Jîn-chú tī Siōng-tè ê thiⁿ-sài bīn-chêng mā ē kā i sêng-jīn.
12:9 M̄ koh, tī lâng ê bīn-chêng bô sêng-jīn góa ê, tī Siōng-tè ê thiⁿ-sài bīn-chêng, Jîn-chú mā bô beh kā i sêng-jīn.
12:10 " Lâng nā kóng-ōe kong-kek Jîn-chú ê, iáu ē tit tio̍h sià-bián; nā-sī siat-to̍k Sèng Sîn ê, chiū bē tàng sià-bián.
12:11 " Lâng nā ah lín khì-kàu hōe-tn̂g á-.sī thóng-tī-chiá kah koaⁿ-oân ê bīn-chêng, lín m̄-bián hoân-ló beh án-chóaⁿ piān-kái á-.sī tio̍h kóng siáⁿ-mi̍h.
12:12 In-ūi kàu-sî Sèng Sîn ē kà lín tio̍h kóng siáⁿ-mi̍h ōe. "
12:13 Kéng-kò Tham-sim ê Châi-chú
Chèng lâng tiong-kan ū chi̍t-ê châi-chú kā I-é-su kóng, " Lāu-su, chhiáⁿ lí kiò góa ê hiaⁿ-tī kah góa pun ke-hóe. "
12:14 M̄ koh, I-é-su kā i kóng, " Lí chit-ê lâng, siáⁿ lâng siat-li̍p góa chò lín ê sím-phòaⁿ-koaⁿ á-.sī chò pun ke-hóe ê kong-chhin? "
12:15 I-é-su chiū tùi kûn-chiòng kóng, " Tio̍h kín-sīn, tio̍h iok-sok kakī, tio̍h thê-hông kok chióng ê tham-sim, in-ūi lâng ê oa̍h-miā kè-ta̍t m̄-sī chāi tī i só͘ chek-chū ê châi-sán. "
12:16 Jiân-āu I-é-su ēng phì-jū tùi in kóng, " Ū chi̍t-ê hó-gia̍h lâng, i ê chhân-hn̂g chin hong-siu.
12:17 I siūⁿ-lâi siūⁿ-khì, kóng, ' Góa bô kàu só͘-chāi thang tún góa ê ngó͘-kok, taⁿ beh án-chóaⁿ? '
12:18 Koh kóng, ' Góa tio̍h ánne chò, góa beh kā chhek-chhng thiah-tiāu, koh khí khah tōa keng, thang kā góa ê ngó͘-kok kah châi-bu̍t lóng tún tòa hia.
12:19 Jiân-āu mā beh tùi góa ê lêng-hûn kóng, ' Lêng-hûn ah, lí ū chek-chū chin chē châi-bu̍t thang chò chin chē nî ê lō͘-ēng. Taⁿ chheng-êng ā, lâi lim-chia̍h, lâi hióng-siū! '
12:20 M̄ koh, Siōng-tè kā i kóng, ' Gōng lâng, kim-mê beh tùi lí thó lí ê sèⁿ-miā, lí só͘ chek-chū ê châi-sán beh lâu hō͘ siáⁿ lâng? '
12:21 Án-ne, ūi tio̍h kakī chek-chū châi-pó, bô hō͘ Siōng-tè khòaⁿ-chò hó-gia̍h ê lâng mā sī kāng-khoán. "
12:22 M̄-bián Chhau-hoân
( Mt 6: 25-34, 19-21)
I-é-su koh tùi bûn-tô͘ kóng, " Só͘-í, góa kā lín kóng, m̄ thang ūi tio̍h lín ê sèⁿ-miā chhau-hoân beh chia̍h siáⁿ-mi̍h, á-.sī ūi tio̍h lín ê seng-khu chhau-hoân beh chhēng siáⁿ-mi̍h.
12:23 In-ūi sèⁿ-miā pí chia̍h-mi̍h khah tiōng-iàu, seng-khu pí saⁿ-khò͘ khah kè-ta̍t.
12:24 Lín khòaⁿ o͘-a, in sûi-jiân bô chèng-choh, bô siu-sêng, mā bô chhng-khò͘, bô chhek-chhng, Siōng-tè iáu koh teh kā in iúⁿ-chhī. Lín kám bô pí hiahê chiáu-á khah kùi-tiōng?
12:25 Lín kám ū lâng siūⁿ kóng chhau-hoân ē-tàng hō͘ kakī ê sèⁿ-miā ke oa̍h chi̍t-sî-á kú?
12:26 Taⁿ lín kì-jiân liân chiahni̍h sè-hāng tāichì to bô hoat-tō͘ chò, ná tio̍h chhau-hoân kî-tha ê tāichì?
12:27 Lín sió siūⁿ khòaⁿ māi lè, pek-ha̍p hoe án-chóaⁿ teh tōa châng? In bô lô-khó͘, mā bô pháng-chit. M̄ koh, góa kā lín kóng, tng Só͘-lô-móng siōng êng-hôa hù-kùi ê sî, i só͘ chhēng ê saⁿ to bô-pí chiahê hoe ê chi̍t lúi khah súi.
12:28 Taⁿ soaⁿ-.ni̍h ê chháu, kin-á-ji̍t teh oa̍h, bîn-á-chài to̍h hō͘ lâng hiat lo̍h-khì hóe-lô͘, Siōng-tè iáu koh ánne teh kā in táⁿ-pān, I kám bē koh khah kā lín khòaⁿ-kò͘? Lín ná ē chiahni̍h bô sìn-sim?
12:29 Só͘-í, lín m̄ thang kantaⁿ7 teh siūⁿ beh chia̍h siáⁿ-mi̍h, beh lim siáⁿ-mi̍h, mā m̄ thang chhau-hoân.
12:30 In-ūi chiahê lóng sī chit sè-kan ê bī-sìn-chiá só͘ teh kiû ê, lín ê Thiⁿ-pē mā chai lín su-iàu chiahê mi̍h-kiāⁿ.
12:31 Lín tian-tò tio̍h tāi-seng tui-kiû Siōng-tè kok-tō͘, chiahê mi̍h-kiāⁿ ē sūn-sòa siúⁿ-sù hō͘ lín.
12:32 " Lín chiahê sè-sè ê iûⁿ-kûn, m̄-bián kiaⁿ, in-ūi lín ê Thiⁿ-pē hoaⁿ-hí kā I ê kok-tō͘ hō͘ lín.
12:33 Tio̍h bē lín ê châi-sán lâi chín-chè sànchhiah lâng, tio̍h ūi lín kakī chún-pī bē phòa ê chîⁿ-tē-á, lâi chek-chū ēng bē liáu ê châi-pó tī thiⁿ-téng. Tī hia bô chha̍t-á ē lâi thau-the̍h, mā bē ū thâng chiù.
12:34 In-ūi lín ê châi-pó tī tó-ūi, lín ê sim mā ē khì tī hia. "
12:35 Kín-sīn Thèng-hāu ê Lô͘-po̍k
" Lín ê saⁿ tio̍h chhēng hó-sè, lín ê teng tio̍h tiám ho͘ to̍h.
12:36 Lín tio̍h chhin-chhiūⁿ lâng teh thèng-hāu in ê chú-lâng tùi hun-iàn tńg-.lâi. Chú-lâng kàu-ūi, chi̍t ē phah mn̂g thang sûi-sî kā i khui.
12:37 Chú-lâng tńg-.lâi, khòaⁿ tio̍h in chhéⁿ-chhéⁿ, hiahê lô͘-po̍k chin ū hok-khì. Góa si̍t-chāi kā lín kóng, chú-lâng ē kakī hâ ûi-su-kûn, chhiáⁿ in chē-toh, lâi kā in sū-hāu.
12:38 Kiám-chhái chú-lâng ē tī pòaⁿ-mê á-.sī thiⁿ-phú-kng ê sî tńg-.lâi, khòaⁿ tio̍h in chhéⁿ-chhéⁿ, hiahê lô͘-po̍k chin ū hok-khì.
12:39 Chú-lâng nā chai chha̍t-á tang-sî ē lâi, i chiū ē tiuⁿ-tî, it-tēng bē hō͘ chha̍t-á ji̍p-lâi i ê chhù, che sī lín chai-iáⁿ ê tāichì.
12:40 Só͘-í, lín mā tio̍h chún-pī piān-piān, in-ūi Jîn-chú ē tī lín siūⁿ bē kàu ê sî-chūn lâi-lîm. "
12:41 Piat-tò͘ kóng, " Chú ah, Lí chit-ê phì-jū sī teh tùi goán kóng, á-.sī mā tùi kûn-chiòng? "
12:42 Chú kóng, " Siáⁿ lâng sī chīn-tiong koh ki-khiáu ê koán-ke? Chiū-sī chú-lâng kau-tài i lâi koán-lí kî-tha ê lô͘-po̍k, chiàu-sî hun-phòe chia̍h-mi̍h hō͘ in ê hit-ê lâng.
12:43 Chú-lâng tńg-lâi khòaⁿ tio̍h i ū chiàu kau-tài khì chò, hit-ê lô͘-po̍k chin ū hok-khì!
12:44 Góa si̍t-chāi kā lín kóng, chú-lâng ē phài i lâi koán-lí i só͘-ū ê châi-sán.
12:45 Hitê lô͘-po̍k nā sim-lāi siūⁿ kóng góa ê chú-lâng ē khah bān chiah tńg-.lâi, chiū phah kî-tha ê lô͘-po̍k kah lú-pī, koh lim-chia̍h kah chiú-chùi.
12:46 Chú-lâng tī i siūⁿ bē kàu ê sî-chūn tńg-.lâi, ē tāng-tāng kā i hêng-hoa̍t, hō͘ i kah hiahê bô tiong-si̍t ê lâng siū kāng-khoán ê hêng-hoa̍t.
12:47 Lô͘-po̍k chai-iáⁿ chú-lâng ê ì-sù khiok bô khì chún-pī, á-.sī bô chiàu chú-lâng ê ì-sù khì chò, i it-tēng ē hō͘ chú-lâng phah kah chin thiám.
12:48 M̄ koh, nā m̄-chai chú-lâng ê ì-sù, khì chò eng-kai siū phah ê tāichì, i ē siū phah khah chió ē. Hō͘ i khah chē ê lâng, ē tùi i the̍h khah chē; kau-thok i khah chē ê lâng, ē kā i iau-kiû khah chē. "
12:49 In-ūi I-é-su Ín-khí ê Hun-lia̍t
( Mt 10: 34-36)
" Góa lâi sī beh ēng hóe tàn tī tē-chiūⁿ, hóe nā to̍h khí-.lâi, m̄-chai gōa-ni̍h-á hó lè?
12:50 Góa ū eng-kai siū ê sé-lé, hit-ê sé-lé iáu-bōe oân-sêng í-chêng, góa tio̍h kan-khó͘ kah siáⁿ-mi̍h thêng-tō͘?
12:51 Lín siūⁿ kóng góa lâi sī beh hō͘ tē-chiūⁿ hô-pêng? Góa kā lín kóng, m̄-sī, tian-tò sī oan-ke.
12:52 Tùi taⁿ í-āu, chi̍t ke gō͘ lâng ē oan-ke, saⁿ-ê kah nn̄g-ê oan-ke, nn̄g-ê kah saⁿ-ê oan-ke.
12:53 In lóng ē oan-ke, pē kah kiáⁿ, kiáⁿ kah pē, lāu-bú kah chabó͘ kiáⁿ, chabó͘ kiáⁿ kah lāu-bú, ta-ke kah sim-pū, sim-pū kah ta-ke.
12:54 Phòaⁿ-toàn Hitê Sî-kî
( Mt 16: 2-3)
I-é-su koh tùi kûn-chiòng kóng, " Lín khòaⁿ tio̍h hûn tùi sai pêng khí-.lâi, lín chiū kóng, ' Beh lo̍h hō͘ ā', kó-jiân chiū lo̍h hō͘.
12:55 Lín khòaⁿ tio̍h thàu lâm-hong ê sî, lín chiū kóng, ' Beh sio-joa̍h ā', chiū chin-chiàⁿ sio-joa̍h khí-.lâi.
12:56 Lín chiahê ké-hó ê lâng, lín to ē-hiáu phòaⁿ-toàn thiⁿ kah tē ê kéng-siōng, ná bē hiáu phòaⁿ-toàn chit-ê sî-kî? "
12:57 Tio̍h kah Khòng-kò Lí ê Lâng Hô-kái
( Mt 5: 25-26)
" Lín ná ē bô beh kakī phòaⁿ-toàn sī-hui?
12:58 Nā ū lâng kā lí kò khì kìⁿ koaⁿ-hú, iáu tī lō͘-.ni̍h ê sî, tio̍h siat-hoat kah i hô-kái. Nā bô, i ē thoa lí khì kìⁿ sím-phòaⁿ-koaⁿ, sím-phòaⁿ-koaⁿ ē kā lí kau hō͘ hoat-kéng, sòa lo̍h-khì hoat-kéng ē kā lí koaiⁿ lo̍h kaⁿ.
12:59 Góa kā lí kóng, chòe-āu ê chi̍t sián gō͘ lî nā bô hêng chheng-chhó, lí choa̍t-tùi bē tàng tùi kaⁿ-.ni̍h chhut-.lâi. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。