路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 I-é-su Chhe-phài Chhit-cha̍p-jī Lâng
Chiahê tāichì liáu-āu, Chú koh chhe-phài chhit-cha̍p-jī lâng （ Chù, goân pán-pún sī " Chhit-cha̍p lâng "）, chi̍t tùi chi̍t tùi chhe in chò chêng khì I só͘ beh khì ê ta̍k-ê siâⁿ kah ta̍k-ê só͘-chāi.
10:2 I-é-su kā in kóng, " Thang siu-sêng ê chin chē, chò-kang ê lâng chin chió, só͘-í, lín tio̍h khì kiû hn̂g-chú phài khah chē kang-lâng khì siu-sêng.
10:3 Lín khì! Góa chhe lín chhut-khì chò-kang, chhin-chhiūⁿ iûⁿ-á ji̍p-khì chhâi-lông ê tiong-kan.
10:4 M̄-thang tòa chîⁿ tē, m̄ thang tòa hêng-lí tē, m̄ thang chhēng ê, tī lō͘-.ni̍h m̄ thang kā lâng chhéng-an.
10:5 Lín bô-lūn ji̍p-khì siáⁿ lâng ê chhù, tio̍h tāi-seng kóng, ' Goān lín chit ke ê lâng pêng-an. '
10:6 Tī hia nā ū ì-ài pêng-an ê lâng, in chiū ē tit tio̍h lín kā in chhéng-an ê pêng-an. Nā bô, hit-ê pêng-an chiū ē tò tńg-lâi kui lín.
10:7 Tio̍h tiàm hit ke, lim-chia̍h in só͘ kiong-kip ê mi̍h, in-ūi chò-kang ê lâng ē kham-tit tit tio̍h i ê kang-chîⁿ. M̄-thang tùi chit ke sóa kòe-khì hit ke.
10:8 Lín bô-lūn ji̍p-khì siáⁿ-mi̍h siâⁿ, lâng nā chiap-la̍p lín, tio̍h chia̍h in só͘ pâi tī lín bīn-chêng ê mi̍h.
10:9 Siâⁿ lāi ū pēⁿ ê lâng, tio̍h kā in i hó, sòa kā in kóng, ' Siōng-tè kok-tō͘ teh beh kàu à. '
10:10 M̄ koh, bô-lūn ji̍p-khì siáⁿ-mi̍h siâⁿ, lâng nā m̄ chiap-la̍p lín, lín tio̍h chhut-khì in ê tōa ke-lō͘, kóng,
10:11 ' Liân lín ê siâⁿ tiâu tī goán kha-té ê thô͘-soa hún, goán to beh pōaⁿ-tiāu; chóng-.sī, lín tio̍h chai Siōng-tè kok-tō͘ teh beh kàu à. '
10:12 Góa kā lín kóng, sím-phòaⁿ ê ji̍t-chí nā kàu, So͘-tóm só͘ siū ê hêng-hoa̍t pí hit-ê siâⁿ só͘ siū ê iáu khah hó jím-siū. "
10:13 M̄ hóe-kái ê Siâⁿ Ū Chai-hō
( Mt 11: 20-24)
" Ko-la̍h-sìn, lí ū chai-hō! Bia̍t-sái-tah, lí ū chai-hō! In-ūi góa tī lín tiong-kan só͘ kiâⁿ chiahê koân-lêng, nā kiâⁿ tī Tu-lô kah Si-tòng, in chá to̍h chhēng môa-saⁿ, sám hóe-hu, chē-.leh lâi hóe-kái.
10:14 M̄ koh, tī sím-phòaⁿ ê sî, Tu-lô kah Si-tòng tio̍h siū ê hêng-hoa̍t pí lín iáu khah hó jím-siū.
10:15 Ka-peh-ná-um, lí siàu-siūⁿ hō͘ lâng hû khí-lih thiⁿ-téng? Lí ē hō͘ lâng chhia lo̍h-khì im-hú.
10:16 Thiaⁿ lín ê ōe to̍h-sī thiaⁿ góa ê ōe; khì-sak lín ê to̍h-sī khì-sak góa; khì-sak góa ê to̍h-sī khì-sak chhe góa lâi ê hit ūi. "
10:17 Chhit-cha̍p-jī Lâng Tńg-lâi Pò-kò
Hit chhit-cha̍p-jī lâng hoaⁿ-hoaⁿ hí-hí tńg-.lâi, kóng, " Chú ah, goán hōng Lí ê miâ bēng-lēng, siâ-sîn mā lóng khut-ho̍k. "
10:18 I-é-su kā in kóng, " Góa ū khòaⁿ tio̍h Sa-tán chhin-chhiūⁿ sihnà tùi thiⁿ lak lo̍h-.lâi.
10:19 Góa í-keng hō͘ lín ū koân-lêng thang ta̍h chôa kah giat-á-thâng, koh ū chè-ho̍k tùi-te̍k só͘-ū ê khùi-la̍t, choa̍t-tùi bô chi̍t hāng ē kā lín siong-hāi.
10:20 Chóng-.sī, m̄ thang in-ūi chiahê siâ-sîn khut-ho̍k lín lâi hoaⁿ-hí; tio̍h in-ūi lín ê miâ kì tī thiⁿ-téng lâi hoaⁿ-hí. "
10:21 I-é-su ê Hí-lo̍k
( Mt 11: 25-27; 13: 16-17)
Hit sî, I-é-su hō͘ Sèng Sîn chhiong-móa kah móa-sim hoaⁿ-hí, kóng, " Thiⁿ-pē ah, thiⁿ-tē ê Chú, góa oló Lí, in-ūi Lí kā chiahê tāichì tùi tì-hūi chhong-bêng ê lâng am-khàm khí-.lâi, khiok tùi sè-hàn gín'á ū hián-bêng chhut-.lâi. Thiⁿ-pē ah, sī lah, in-ūi che sī Lí khòaⁿ-chò hoaⁿ-hí ê.
10:22 Góa ê Thiⁿ-pē í-keng kā it-chhè lóng kau-hù góa. Thiⁿ-pē í-gōa bô chi̍t-ê bat Kiáⁿ sī siáⁿ lâng; Kiáⁿ kah Kiáⁿ só͘ ài beh khé-sī ê lâng í-gōa, mā bô chi̍t-ê bat Thiⁿ-pē sī siáⁿ lâng. "
10:23 I-é-su oa̍t tńg-sin thau-thau-á tùi bûn-tô͘ kóng, " Ū ba̍k-chiu khòaⁿ-kìⁿ lín só͘ khòaⁿ-.tio̍h ê lâng, si̍t-chāi ū hok-khì!
10:24 Góa kā lín kóng, í-chêng ū chin chē sian-ti kah kun-ông, ài beh khòaⁿ lín só͘ khòaⁿ-.tio̍h ê mā bô khòaⁿ-.tio̍h, in ài beh thiaⁿ lín só͘ thiaⁿ-.tio̍h ê mā bô thiaⁿ-.tio̍h. "
10:25 Thiàⁿ Lí ê Chhù-piⁿ
Ū chi̍t-ê lu̍t-hoat kàu-su khiā khí-lâi chhì-thàm I-é-su kóng, " Lāu-su ah, góa tio̍h án-chóaⁿ chò chiah ē tit tio̍h éng-oán ê oa̍h-miā? "
10:26 I-é-su ìn kóng, " Lu̍t-hoat ū kì-chài siáⁿ-mi̍h? Lí tha̍k-liáu án-chóaⁿ? "
10:27 Hitê lâng ìn kóng, " Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-tè, mā tio̍h thiàⁿ chhù-piⁿ chhin-chhiūⁿ kakī. " (chù, SBK 6:5; LBK 19:18)
10:28 I-é-su kā i kóng, " Lí só͘ ìn ê sī tio̍h, chiàu ánne khì chò, chiū ē tit tio̍h oa̍h-miā. "
10:29 M̄ koh, hit-ê lâng ài beh hián-bêng kakī chò liáu chin tio̍h, chiū koh mn̄g I-é-su kóng, " Siáⁿ lâng sī góa ê chhù-piⁿ? "
10:30 I-é-su ìn kóng, " Ū chi̍t-ê lâng tùi Ê-lú-sa-lèm lo̍h-khì I-é-lī-kho siâⁿ, tú tio̍h thó͘-húi chhiúⁿ i ê saⁿ-khò͘, kā i phah kàu pòaⁿ-sí, jiân-āu kā i pàng hē-.leh, chò in khì.
10:31 Tú-hó ū chi̍t-ê chè-si tùi hit tiâu lō͘ lo̍h-.khì, khòaⁿ tio̍h hit-ê lâng chiū siám tùi lō͘ ê hit pêng kòe-.khì.
10:32 Koh ū chi̍t-ê Lē-bī lâng kiâⁿ kàu hit só͘-chāi, khòaⁿ-liáu mā kāng-khoán tùi lō͘ ê hit pêng kòe-.khì.
10:33 To̍k-to̍k ū chi̍t-ê Sa-má-lī-a lâng kiâⁿ lō͘ tùi hia keng-kòe, khòaⁿ tio̍h chiū kā i liân-bín.
10:34 I kiâⁿ óa-.khì, ēng chiú （ Chù, ū ê chhau-pún sī " Ēng iû kah chiú "） sé tio̍h-siong ê khang-chhùi, ēng pò͘ kā i pau teh, jiân-āu hû i khí-lih khiâ kakī ê lî-á, chhōa i kàu kheh-tiàm lâi kā i chiàu-kò͘.
10:35 Keh tńg kang, i the̍h nn̄g-ê gîn-á hō͘ tiàm-chú, kóng, ' Chhiáⁿ lí chiàu-kò͘ chit-ê lâng, só͘-hùi nā khah ke, góa tò tńg-.lâi ê sî chiah pó͘ lí. '
10:36 Chit saⁿ lâng tiong-kan, lí siūⁿ tó chi̍t-ê sī tú tio̍h thó͘-húi hit-ê lâng ê chhù-piⁿ? "
10:37 I ìn kóng, " Kā i liân-bín hit-ê lâng to̍h-sī. " I-é-su kā i kóng, " Lí khì, chiàu ánne khì chò. "
10:38 I-é-su Hóng-būn Mal-tha kah Mâ-lí-ah
I-é-su kah bûn-tô͘ kè-sio̍k kiâⁿ, I-é-su ji̍p-khì chi̍t-ê chng-thâu. Ū chi̍t-ê miâ kiò-chò Mal-tha ê hū-jîn-lâng, chiap-thāi I-é-su ji̍p-khì in chhù.
10:39 Mal-tha ū chi̍t-ê chí-mōe, kiò-chò Mâ-lí-ah, chē tī Chú ê kha chêng teh thiaⁿ I ê kà-sī.
10:40 Mal-tha in-ūi chiap-thāi in, tāichì chē, soah sim-koaⁿ loān chhau-chhau, chiū lâi kā I-é-su kóng, " Chú ah, góa ê chí-mōe pàng góa kakī chi̍t-ê teh bô-êng, Lí kám bô teh iàu-kín? Tio̍h kiò i lâi kā góa tàu-kha-chhiú. "
10:41 M̄ koh, Chú ìn kóng, " Mal-tha ah, Mal-tha ah, lí ūi tio̍h tāichì chē teh chhau-hoân.
10:42 M̄ koh, só͘ su-iàu ê kantaⁿ7 chi̍t hāng; Mâ-lí-ah í-keng kéng tio̍h hó ê hit hūn, bô lâng ē-tàng kā i chhiúⁿ-.khì. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。