路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
6:1 Tī An-hioh-ji̍t Tiah Be̍h-sūi
( Mt 12: 1-8; Mk 2: 23-28)
Ū chi̍t-ê An-hioh-ji̍t, I-é-su tùi be̍h-hn̂g keng-kòe, I ê bûn-tô͘ tiah be̍h-sūi, ēng chhiú jôe lâi chia̍h.
6:2 Ū chi̍t-kóa Hoa-lí-sái phài ê lâng tùi in kóng, " Lín ná ē tī An-hioh-ji̍t chò lu̍t-hoat kui-tēng bô eng-kai chò ê tāichì? "
6:3 I-é-su ìn kóng, " Lín kám bô tha̍k tio̍h Ta-bi̍t kah kin-tòe ê lâng pak-tó͘ iau ê sî só͘ chò ê tāichì?
6:4 I ji̍p-khì Siōng-tè ê tiān, the̍h hiàn chè ê piáⁿ lâi chia̍h, koh hō͘ i kin-tòe ê lâng chia̍h. Chit khoán piáⁿ kantaⁿ7 chè-si chiah thang chia̍h. "
6:5 I-é-su koh kā in kóng, " Jîn-chú sī An-hioh-ji̍t ê Chú. "
6:6 I-é-su tī An-hioh-ji̍t I-hó Khôe-chhiú ê Lâng
( Mt 12: 9-14; Mk 3: 1-6)
Koh ū chi̍t-ê An-hioh-ji̍t, I-é-su ji̍p-khì hōe-tn̂g kà-sī lâng. Tī hia ū chi̍t-ê chiàⁿ chhiú khôe-khì ê lâng.
6:7 Ū chi̍t-kóa keng-ha̍k kàu-su kah Hoa-lí-sái phài ê lâng teh tng-tán, khòaⁿ I-é-su ū tī An-hioh-ji̍t kā lâng i-pēⁿ á-bô, ì-sù sī beh chhōe khang-phāng thang kò I-é-su.
6:8 I-é-su chai in ê khì-tô͘, chiū kā hit-ê khôe-chhiú ê lâng kóng, " Khí-.lâi! Khiā tòa tiong-ng. " Hitê lâng chiū khí-lâi khiā tī hia.
6:9 Jiân-āu I-é-su tùi in kóng, " Góa mn̄g lín, tī An-hioh-ji̍t chò hó sū á-.sī chò pháiⁿ sū, kiù sèⁿ-miā á-.sī hāi sèⁿ-miā, tó chi̍t hāng khah ha̍h lu̍t-hoat? "
6:10 I-é-su kā kûn-chiòng khòaⁿ chi̍t liàn liáu-āu, tùi hit-ê lâng kóng, " Kā lí ê chhiú chhun chhut-.lâi! " I chi̍t ē chhun chhiú, chhiú chiū hó-.khì.
6:11 Hiahê lâng hui-siông siū-khì, chiū chò-hóe chham-siông beh án-chóaⁿ lâi tùi-hù I-é-su.
6:12 I-é-su Siat-li̍p Cha̍p-jī Sù-tô͘
( Mt 10: 1-4; Mk 3: 13-19)
Ū chi̍t kang, I-é-su chhut-khì soaⁿ-.ni̍h kî-tó, kui mê tùi Siōng-tè kî-kiû.
6:13 Kàu thiⁿ-kng chiū kiò bûn-tô͘ lâi, tùi in tiong-kan kéng-soán cha̍p-jī lâng, chheng in chò sù-tô͘,
6:14 Chiū-sī Sí-mòng, I-é-su koh kā i hō-miâ chò Piat-tò͘ kah i ê hiaⁿ-tī An-to-le̍h, koh ū Iâ-kop kah Iô-há-neh, Hui-li̍p-pò͘ kah Ba-tho-lô-mái,
6:15 Má-thài kah Tho-má-suh, Al-hoa-ioh ê kiáⁿ Iâ-kop kah kiò-chò Se-lô-tí ê Sí-mòng,
6:16 Iâ-kop ê kiáⁿ Iô-tah kah chhut-bē I-é-su ê Ka-lio̍k lâng Iô-tah.
6:17 I-é-su ê Miâ-siaⁿ Thê-ko
( Mt 4: 23-25)
I-é-su kah sù-tô͘ lo̍h soaⁿ lâi khiā tī pêⁿ-tē, tī hia ū chin chē I ê bûn-tô͘ kah kui tōa-tīn ê lâng. Chiahê lâng sī tùi Iô-tá-iah choân tē kah Ê-lú-sa-lèm, í-ki̍p Tu-lô, Si-tòng iân hái ê só͘-chāi lâi ê.
6:18 In lâi beh thiaⁿ I-é-su káng tō-lí, mā beh hō͘ I i-pēⁿ. Hiahê hō͘ siâ-sîn hū-sin kiáu-jiáu ê lâng mā lóng tit tio̍h i-tī.
6:19 Chèng lâng lóng siūⁿ beh kā I bong, in-ūi ū koân-lêng tùi I-é-su chhut-.lâi, hō͘ in lóng tit tio̍h i hó.
6:20 Hok-khì kah Chai-hō
( Mt 5: 1-12)
I-é-su gia̍h thâu khòaⁿ I ê bûn-tô͘, kóng, " Lín chiahê sànchhiah lâng si̍t-chāi ū hok-khì, in-ūi Siōng-tè kok-tō͘ sī lín ê.
6:21 Lín chitmá teh iau ê lâng si̍t-chāi ū hok-khì, in-ūi Siōng-tè ē hō͘ lín chia̍h kah pá. Lín chitmá teh thî-khàu ê lâng si̍t-chāi ū hok-khì, in-ūi Siōng-tè ē hō͘ lín chhiò.
6:22 Lâng ūi tio̍h Jîn-chú ê iân-kò͘ lâi oàn-hūn lín, kī-choa̍t lín, bú-jio̍k lín, kā lín khòaⁿ-chò pháiⁿ lâng lâi pâi-thek ê sî, lín si̍t-chāi ū hok-khì.
6:23 Hit ji̍t lín tio̍h hoaⁿ-hí tiô-thiàu, in-ūi lín tī thiⁿ-téng ê pò-siúⁿ chin tōa, í-chêng in ê chó͘-sian mā sī ánne khoán-thāi sian-ti.
6:24 M̄ koh, lín chiahê hó-gia̍h lâng ē ū chai-hō! In-ūi lín í-keng teh hióng-siū an-lo̍k ê seng-oa̍h.
6:25 Lín chitmá pá-chiok ê lâng ē ū chai-hō! In-ūi lín teh beh iau; lín chitmá teh chhiò ê lâng ē ū chai-hō! In-ūi lín teh beh ai-siong thî-khàu.
6:26 Lín chiahê hō͘ kûn-chiòng oló ê lâng ē ū chai-hō! In-ūi in ê chó͘-sian mā bat ánne khoán-thāi ké sian-ti. "
6:27 Thiàⁿ Te̍k-jîn
( Mt 5: 38-48; 7: 12a)
" M̄ koh, lín chiahê teh thiaⁿ ê lâng, góa kā lín kóng, tio̍h thiàⁿ lín ê tùi-te̍k, tio̍h hó khoán-thāi oàn-hūn lín ê lâng.
6:28 Tio̍h chiok-hok pháiⁿ chhùi mē lín ê lâng, tio̍h thè bú-jio̍k lín ê lâng kî-tó.
6:29 Ū lâng siàn lí chi̍t-pêng ê chhùi-phóe, lēng-gōa hit pêng mā hō͘ i siàn; ū lâng pak lín ê gōa-saⁿ, liân lāi-saⁿ mā sūn-sòa hō͘ i.
6:30 Nā ū lâng kā lí kiû siáⁿ-mi̍h tio̍h hō͘ i; nā ū lâng chhiúⁿ lí ê mi̍h-kiāⁿ, m̄ thang kā i thó tńg-.lâi.
6:31 Lín ài lâng án-chóaⁿ tùi-thāi lín, mā tio̍h ánne tùi-thāi lâng.
6:32 Lín nā thiàⁿ hiahê thiàⁿ lín ê lâng, ū siáⁿ-mi̍h kong-lô? In-ūi pháiⁿ lâng mā sī thiàⁿ hiahê thiàⁿ in ê lâng.
6:33 Lín nā hó khoán-thāi hiahê kā lín hó khoán-thāi ê lâng, ū siáⁿ-mi̍h kong-lô? In-ūi pháiⁿ lâng mā sī ánne teh chò.
6:34 Lín nā chioh chîⁿ hō͘ hiahê ū ǹg-bāng hêng lí chîⁿ ê lâng, ū siáⁿ-mi̍h kong-lô? In-ūi pháiⁿ lâng mā káⁿ chioh chîⁿ hō͘ ē chiàu siàu-gia̍h lâi hêng ê lâng.
6:35 M̄ koh, lín tio̍h thiàⁿ lín ê tùi-te̍k, hó khoán-thāi in; chioh-.lâng mā m̄ thang siūⁿ beh thó tńg-.lâi. Án-ne, lín ē tit tio̍h chin tōa ê pò-siúⁿ, koh ē chiâⁿ-chò chì-koân Siōng-tè ê kiáⁿ-jî, in-ūi I tùi bōng-un pōe-gī kah chò pháiⁿ ê lâng mā chin chû-pi.
6:36 Só͘-í, lín tio̍h ū liân-bín ê sim, chhin-chhiūⁿ lín ê Thiⁿ-pē teh liân-bín lâng. "
6:37 Phoe-phêng Lâng
( Mt 7: 1-5)
" M̄-thang phoe-phêng lâng, chiah bē hō͘ lâng phoe-phêng. M̄-thang kā lâng phòaⁿ-chōe, chiah bē hō͘ lâng kā lín phòaⁿ-chōe. Tio̍h sià-bián lâng, chiah ē tit tio̍h lâng ê sià-bián.
6:38 Tio̍h hō͘ lâng, lín chiah ē tit tio̍h, koh ē ēng chiok-gia̍h ê táu niû hō͘ lín; kā i ji̍h koh iô, hō͘ i cha̍t kah móa chhut-.lâi, chiah piàⁿ lo̍h-khì lín ê saⁿ-á phè; in-ūi lín ēng siáⁿ-mi̍h niû-khì lâi niû hō͘ lâng, lâng mā ē chiàu ánne niû tò tńg-khì hō͘ lín. "
6:39 Tio̍h Phiah-bián Chū-khi Khi-jîn
I-é-su koh ēng phì-jū kā in kóng, " Chheⁿ-mê ê kám ē kā chheⁿmê-.ê chhōa-lō͘? Kám bē nn̄g-ê lâng lóng poa̍h-lo̍h kheⁿ-kau?
6:40 Ha̍k-seng bē tàng iâⁿ-kòe lāu-su; chóng-.sī, ha̍k-seng nā o̍h ū khí, chiū ē chhin-chhiūⁿ i ê lāu-su.
6:41 " Lí ná ē kantaⁿ7 khòaⁿ tio̍h hiaⁿ-tī ba̍k-chiu lāi ê chháu-á-iù, ā bô chù-ì tio̍h lí kakī ba̍k-chiu lāi ê chhâ-kho͘?
6:42 Á-.sī lí pún-sin bô khòaⁿ-kìⁿ kakī ba̍k-chiu lāi ê chhâ-kho͘, ná ē-tàng kā lí ê hiaⁿ-tī kóng, ' Hiaⁿ-tī, lí ba̍k-chiu lāi ê chháu-á-iù hō͘ góa kā i the̍h chhut-.lâi '? Ké hó ê lâng, tio̍h seng kā lí kakī ba̍k-chiu lāi ê chhâ-kho͘ the̍h chhut-.lâi, chiah ē-tàng khòaⁿ chheng-chhó, thang kā lí hiaⁿ-tī ba̍k-chiu lāi ê chháu-á-iù the̍h chhut-.lâi. "
6:43 Tùi Kóe-chí Lâi Jīn-bat Chhiū
( Mt 7: 17-20; 12: 33-34b)
" In-ūi hó-chhiū bē kiat pháiⁿ kóe-chí, pháiⁿ-chhiū mā bē kiat hó kóe-chí.
6:44 Khòaⁿ kóe-chí chiū ē-tàng chai hit-châng chhiū ê hó-pháiⁿ. Lâng bē tàng tùi chhì-phè lāi bán bû-hoa-kó, mā bē tàng tùi chhì-á-tîn bán phû-tô.
6:45 Hó lâng tùi i ê sim só͘ chek-chū ê hó lâi hoat-chhut hó; pháiⁿ lâng tùi i só͘ chek-chū ê pháiⁿ lâi hoat-chhut pháiⁿ, in-ūi lâng sim-lāi chhiong-móa siáⁿ-mi̍h, chhùi chiū ē kóng-chhut siáⁿ-mi̍h. "
6:46 Nn̄g Khoán Tē-ki
( Mt 7: 24-27)
" Lín ná ē chheng-ho͘ Góa, ' Chú ah, Chú ah', m̄ koh bô chiàu Góa ê kà-sī khì chò?
6:47 Lâi Góa chia, thiaⁿ Góa ê ōe lâi chò ê lâng, Góa pò lín chai hit-ê lâng chhin-chhiūⁿ siáⁿ-mi̍h.
6:48 I chhin-chhiūⁿ lâng teh khí chhù, ku̍t hō͘ i chhim, kā tē-ki hē tī chio̍h-pôaⁿ téng; tōa-chúi chi̍t-ē kàu, khe lâu chhiong tio̍h chhù, chhù mā bē iô-tāng, in-ūi chhù khí liáu chin kian-kò͘.
6:49 M̄ koh, thiaⁿ-liáu bô khì chò ê lâng, sī chhin-chhiūⁿ lâng khí chhù tī thô͘ téng, bô hē tē-ki, hō͘ khe-lâu chhiong-.tio̍h, hit keng chhù chiū sûi-sî tó lo̍h-.khì, koh ē tó kah chin siong-tiōng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。