路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
4:1 I-é-su siū Chhì-thàm
( Mt 4: 1-11; Mk 1: 12-13)
I-é-su siū Sèng Sîn chhiong-móa, tùi Iol-tàn hô tńg-.lâi, hō͘ Sèng Sîn chhōa-khì khòng-iá sì-cha̍p kang, siū Mô͘-kúi kā I chhì-thàm.
4:2 Hit tiong-kan, I lóng bô chia̍h siáⁿ-mi̍h, āu-lâi pak-tó͘ chiū iau.
4:3 Mô͘-kúi kā I kóng, " Lí nā-sī Siōng-tè ê Kiáⁿ, tio̍h bēng-lēng chit tè chio̍h-thâu piàn-chò piáⁿ. "
4:4 I-é-su ìn kóng, " Ū kì-chài, lâng teh oa̍h m̄ nā óa-khò piáⁿ. " (chù, SBK 8:3)
4:5 Mô͘-kúi koh chhōa I-é-su peh chiūⁿ-koân ê só͘-chāi, chi̍t-ba̍k-nih kú kā thian-hā bān-kok hō͘ I khòaⁿ,
4:6 Koh tùi I kóng, " Chiahê it-chhè ê koân-sè kah êng-kng góa lóng beh hō͘ Lí, in-ūi chiahê it-chhè í-keng lóng kau hō͘ góa, chhut-chāi góa beh hō͘ siáⁿ lâng.
4:7 Só͘-í, Lí nā kūi lo̍h-lâi pài góa, chiahê it-chhè lóng beh hō͘ Lí. "
4:8 I-é-su ìn kóng, " Ū kì-chài, Tio̍h pài Chú — lí ê Siōng-tè, chí ū tio̍h ho̍k-sāi I. " (chù, SBK 6:13)
4:9 Mô͘-kúi koh chhōa I-é-su kàu Ê-lú-sa-lèm, hō͘ I khiā tī sèng-tiān siōng koân ê só͘-chāi, kā I kóng, " Lí nā-sī Siōng-tè ê Kiáⁿ, to̍h tùi chia thiàu lo̍h-.khì,
4:10 In-ūi ū kì-chài, Siōng-tè ē ūi tio̍h Lí bēng-lēng I ê thiⁿ-sài lâi pó-hō͘ Lí.
4:11 Koh kóng, thiⁿ-sài ē ēng chhiú kā Lí hû-.leh, bián-tit Lí ê kha tak tio̍h chio̍h-thâu. " (chù, SPh 91:11-12)
4:12 I-é-su ìn kóng, " Keng-tián ū kóng, M̄-thang chhì-thàm Chú — lí ê Siōng-tè. " (chù, SBK 6:16)
4:13 Mô͘-kúi só͘-ū ê chhì-thàm lóng ēng oân, chiū chiām-sî lī-khui I-é-su.
4:14 I-é-su tī Ga-lí-la-iah Séng Khai-sí Thoân-tō
( Mt 4: 12-17; Mk 1: 14-15)
Jiân-āu I-é-su siū Sèng Sîn ê koân-lêng chhiong-móa, tò tńg-khì Ga-lí-la-iah séng; I ê miâ-siaⁿ thoân kàu sì-kho͘-ûi ê só͘-chāi.
4:15 I tī ta̍k-ê hōe-tn̂g kà-sī lâng, siū kûn-chiòng ê oló.
4:16 I-é-su tī Na-cha-lia̍t Hông Kī-choa̍t
( Mt 13: 53-58; Mk 6: 1-6)
I-é-su tńg-khì kàu I sêng-tióng ê kò͘-hiong Na-cha-lia̍t. Tī An-hioh-ji̍t, I chiàu pêng-siông ê si̍p-koàn ji̍p-khì hōe-tn̂g, khiā khí-lâi teh beh tha̍k keng-tián ê chheh.
4:17 Ū lâng the̍h I-sá-iah sian-ti ê chheh hō͘ I, I chiū hian-khui, chhōe tio̍h chi̍t-ê só͘-chāi ū kì-chài kóng,
4:18 Chú ê Sèng Sîn lîm-kàu góa, in-ūi I ēng iû boah góa, hō͘ góa thoân hok-im hō͘ sànchhiah lâng. I chhe-phài góa lâi soan-pò͘ kóng, siū lia̍h ê lâng ē tit tio̍h tháu-pàng, chheⁿmê-.ê ē khòaⁿ-kìⁿ, siū ap-pek ê lâng ē tit tio̍h chū-iû,
4:19 koh soan-pò͘ Chú ê hí-nî. (chù, ISI 61:1-2; 58:6)
4:20 I-é-su kā chheh kńg khí-.lâi, hêng hōe-tn̂g ê chip-sū, chiū chē lo̍h-.lâi. Hōe-tn̂g lāi ê chèng lâng lóng chù-ba̍k kā I khòaⁿ.
4:21 I-é-su chiū khui chhùi tùi in kóng, " Chit-tōaⁿ keng-tián, kin-á-ji̍t lín thiaⁿ-.tio̍h ê sî í-keng si̍t-hiān ā. "
4:22 Chèng lâng lóng oló I-é-su, tùi I só͘ kóng un-tián ê ōe kám-kak hi-kî, kóng, " Chit-ê lâng kám m̄-sī Iô-sé-huh ê kiáⁿ? "
4:23 I-é-su tùi in kóng, " Lín it-tēng ē ín-iōng ' I-seng, lí tio̍h kakī i. ' Chit-kù sio̍k-gí tùi góa kóng, ' Goán ū thiaⁿ tio̍h Lí tī Ka-peh-ná-um chò chin chē tāichì, taⁿ mā tio̍h tī Lí ê kò͘-hiong lâi chò. '"
4:24 I-é-su koh kóng, " Góa si̍t-chāi kā lín kóng, sian-ti bô chi̍t-ê tī kakī ê kò͘-hiong siū lâng hoan-gêng.
4:25 Góa kā lín kóng si̍t-ōe, tī E-li-iah ê sî-tāi ū khòng-hān saⁿ nî pòaⁿ, ta̍k só͘-chāi lóng tōa ki-hng, hit sî I-su-la-el tiong ū chin chē kóaⁿ-hū.
4:26 E-li-iah m̄ bat hōng chhe khì chhōe hiahê kóaⁿ-hū tiong-kan ê chi̍t-ê lâng, i kantaⁿ7 khì Si-tòng ê Sa-lia̍p-thah chhōe chi̍t-ê kóaⁿ-hū.
4:27 Koh tī sian-ti E-lí-siah ê sî-tāi, I-su-la-el tiong ū chin chē thái-ko ê pēⁿ-lâng, tû-liáu Su-lī-a lâng Ná-mān í-gōa, bô kah chi̍t-ê lâng tit tio̍h chheng-khì. "
4:28 Hōe-tn̂g lāi só͘-ū ê lâng thiaⁿ tio̍h chiahê ōe, lóng hui-siông siū-khì.
4:29 Hōe-chiòng chiū khí-lâi kóaⁿ I-é-su chhut-khì siâⁿ gōa, in ê siâⁿ khí tī soaⁿ téng, hōe-chiòng kā I thoa kàu soaⁿ-khàm, beh kā I chhia lo̍h-.khì.
4:30 M̄ koh, I-é-su tùi in tiong-kan kiâⁿ kòe-.khì, chò I khì.
4:31 I-é-su I-hó Siâ-sîn Hū-sin ê Lâng
( Mk 1: 21-28)
I-é-su lo̍h-khì Ga-lí-la-iah séng chi̍t-ê Ka-peh-ná-um siâⁿ, tī An-hioh-ji̍t tòa hia kà-sī lâng.
4:32 Lâng tùi I ê kà-sī kám-kak kî-koài, in-ūi I ê ōe ū koân-ui.
4:33 Hōe-tn̂g lāi ū chi̍t-ê hō͘ siâ-sîn hū-sin ê lâng, tōa-siaⁿ hoah,
4:34 " Haiⁿh, Na-cha-lia̍t lâng I-é-su, Lí hô-pit lâi kan-sia̍p goán? Lí beh lâi húi-bia̍t goán, sī-.bô? Góa chai Lí sī siáⁿ-mi̍h khoán lâng, Lí sī Siōng-tè ê sèng Kiáⁿ. "
4:35 I-é-su kā i chek-pī kóng, " Tiām-khì! Tùi chit-ê lâng chhut-.khì! " kúi tī chèng lâng bīn-chêng hō͘ hit-ê lâng tó lo̍h-khì chiū chhut-.khì, lóng bô kā i siong-hāi tio̍h.
4:36 Chèng lâng tio̍h-kiaⁿ kah gāng-.khì, chò-hóe gī-lūn kóng, " Che sī siáⁿ-mi̍h ōe? I ēng koân-pèng kah lêng-le̍k bēng-lēng chiahê siâ-sîn, in chiū chhut-.khì. "
4:37 I-é-su ê miâ-siaⁿ chiū thoân kàu sì-kho͘-ûi ê ta̍k só͘-chāi.
4:38 I-é-su I-hó Chin Chē Lâng
( Mt 8: 14-17; Mk 1: 29-34)
I-é-su tùi hōe-tn̂g chhut-.lâi, ji̍p-khì Sí-mòng ê chhù. Sí-mòng ê tiūⁿ-ḿ hoat-jia̍t chin sio; ū lâng thè i kiû I-é-su i-tī.
4:39 I-é-su khiā óa-.khì, àⁿ lo̍h-khì chek-pī i ê jia̍t-pēⁿ, jia̍t chiū thè; hū-jîn-lâng sûi-sî khí-lâi kā in chiap-thāi.
4:40 Ji̍t-lo̍h ê sî, chèng lâng chhōa ū pēⁿ ê lâng, bô-lūn hoān tio̍h siáⁿ-mi̍h pēⁿ, lóng chhōa-lâi chhōe I-é-su. I-é-su kā ta̍k lâng hōaⁿ-chhiú lâi kā in ê pēⁿ i hó.
4:41 Koh ū kúi tùi chin chē lâng ê seng-khu chhut-.khì, tōa-siaⁿ hoah, " Lí to̍h-sī Siōng-tè ê Kiáⁿ. " I-é-su in-ūi kúi bat I sī Ki-tok, chiū chek-pī hiahê kúi, m̄-chún in kóng.
4:42 I-é-su tī Ga-lí-la-iah Séng Thoân-tō
( Mk 1: 35-39)
Thiⁿ-kng ê sî, I-é-su khì-kàu phian-phiah ê só͘-chāi; kui tīn lâng lâi chhōe I, chhōe tio̍h chiū kā I lâu, chhiáⁿ I m̄ thang lī-khui in.
4:43 M̄ koh, I-é-su tùi in kóng, " Góa mā tio̍h khì pa̍t-ê siâⁿ-chhī thoân Siōng-tè kok-tō͘ ê hok-im, in-ūi che sī Siōng-tè chhe-phài góa lâi ê bo̍k-tek. "
4:44 I-é-su chiū kè-sio̍k tī Ga-lí-la-iah séng ê kok hōe-tn̂g thoân hok-im.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。