出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 Tē-jī Tè Chio̍h-pi
( SBK 10: 1-5)
Siōng-chú tùi Mô͘-se kóng, " Lí phah nn̄g tè chio̍h-pi kah í-chêng ê kāng-khoán, lí chêng só͘ phah-phòa hiahê pi hit téng-bīn ê jī, Góa ē koh siá tī chiahê pi.
34:2 Bîn-á-chá-khí, lí tio̍h chún-pī piān, thàu-chá lí tio̍h chiūⁿ Si-nái soaⁿ, tī hia, tī soaⁿ-bóe-liu, khiā tī Góa bīn-chêng.
34:3 M̄-thang ū lâng kah lí chò-hóe lâi, piàn-soaⁿ lóng m̄ thang khòaⁿ tio̍h ū lâng, tī soaⁿ-kha mā m̄ thang hō͘ gû-kûn, iûⁿ-kûn chia̍h chháu. "
34:4 Siōng-chú chiū phah nn̄g tè chio̍h-pi kah í-chêng ê kāng-khoán. Mô͘-se thàu-chá khí-.lâi, chiàu Siōng-chú só͘ hoan-hù i ê, chiūⁿ-khì Si-nái soaⁿ, chhiú-.ni̍h the̍h hit nn̄g tè chio̍h-pi.
34:5 Siōng-chú chē hûn lîm-kàu kah i khiā tī hia, soan-pò͘ I ê miâ — I-é-ho-bah.
34:6 Siōng-chú tùi i ê bīn-chêng keng-kòe, soan-pò͘ kóng, " Siōng-chú, Siōng-chú, sī ū liân-bín koh ū un-tián ê Siōng-tè, bô khoài siū-khì, koh ū hong-sēng ê chû-ài kah sêng-si̍t,
34:7 Ūi chheng-bān lâng chûn chû-ài, sià-bián chōe-kò, kòe-sit kah chōe-ok, choa̍t-tùi bô lia̍h ū chōe ê chò bô chōe, ē kui-kiū i ê chōe, tùi pē kàu kiáⁿ, kàu sun, kàu saⁿ-sì tāi. "
34:8 Mô͘-se kóaⁿ-kín àⁿ lo̍h tē kèng-pài, kóng,
34:9 " Chú ah, góa nā tī Lí ê bīn-chêng tit tio̍h un-tián, kiû Chú tī goán tiong-kan kah goán chò-hóe kiâⁿ, in-ūi chiahê sī ām-kún ngē ê jîn-bîn. Koh kiû Lí sià-bián goán ê chōe-kò kah goán ê chōe-ok, lia̍h goán chò Lí ê sán-gia̍p. "
34:10 Tiông-sin Li̍p-iok
( CAG 23: 14-19; SBK 7: 1-5; 16, 1-17)
Siōng-chú kóng, " Lí khòaⁿ, Góa beh tiông-sin li̍p-iok, beh tī lín chèng lâng ê bīn-chêng kiâⁿ kî-biāu ê tāichì, sī thian-hā bān-kok tiong só͘ m̄ bat kiâⁿ ê. Τī lí sì-kho͘-ûi ê chèng lâng chiū ē khòaⁿ tio̍h Siōng-chú ê só͘ chò, in-ūi Góa tùi lí só͘ kiâⁿ ê sī thang kiaⁿ ê tāichì.
34:11 " Góa kin-á-ji̍t só͘ hoan-hù lí ê, lí tio̍h chip-siú. Lí khòaⁿ, Góa beh tùi lí ê bīn-chêng kóaⁿ-chhut A-mô͘-lī, Ka-nân, Hiat, Pe-lí-ji, Hi-bī kah I-é-bú-suh hiahê cho̍k.
34:12 Lí kakī tio̍h kín-sīn, m̄ thang kah tòa tī lí só͘ khì hit só͘-chāi ê jîn-bîn li̍p-iok, khióng-kiaⁿ he ē chiâⁿ-chò lín tiong-kan ê lô-bāng.
34:13 Lín tio̍h thiah in ê chè-tôaⁿ, phah-chhùi in tiau-khek ê thiāu, chhò in ê A-si-lah.
34:14 " M̄-thang kèng-pài pa̍t-ê sîn-bêng, in-ūi Siōng-chú ê miâ kiò-chò to̍k-chun, I sī to̍k-chun ê Siōng-tè.
34:15 Khióng-kiaⁿ lí kah tòa tī hit só͘-chāi ê jîn-bîn li̍p-iok, in tòe in ê sîn-bêng kiâⁿ siâ-îm, chè-sū in ê sîn-bêng, ū lâng kiò lí, lí chiū chia̍h i ê chè-mi̍h,
34:16 koh khióng-kiaⁿ lí kā lí ê kiáⁿ chhōa in ê chabó͘ kiáⁿ chò bó͘, in ê chabó͘ kiáⁿ tòe in ê sîn-bêng kiâⁿ siâ-îm, hō͘ lí ê kiáⁿ mā tòe in ê sîn-bêng kiâⁿ siâ-îm.
34:17 " Lí m̄ thang ūi kakī chù-chō chiahê sîn-bêng.
34:18 " Lí tio̍h siú Tû-kàⁿ-cheh, chiàu Góa só͘ hoan-hù lí ê, tī A-pit-goe̍h lāi só͘ tiāⁿ tio̍h ê ji̍t-kî, chia̍h bô-kàⁿ piáⁿ chhit ji̍t, in-ūi lí tī A-pit-goe̍h lāi chhut Ai-gi̍p.
34:19 " Kiàn-nā thâu-the ê lóng sī Góa ê, só͘-ū ê chengseⁿ thâu-chúi ê, bô-lūn sī gû á-.sī iûⁿ, kang ê lóng sī Góa ê.
34:20 Thâu-chúi ê lî tio̍h ēng iûⁿ-á thè-sio̍k, nā bô thè-sio̍k, chiū tio̍h kòng-tn̄g i ê ām-kún. Kiàn-nā lí thâu-chiūⁿ ê kiáⁿ lóng tio̍h sio̍k-hôe. " Lâng lâi kìⁿ Góa m̄ thang khang-chhiú.
34:21 " Lí la̍k ji̍t tio̍h chò-kang, tē-chhit ji̍t tio̍h an-hioh, tī chai-chèng siu-koah ê sî mā tio̍h an-hioh.
34:22 " Be̍h khí-thâu se̍k siu-koah ê sî, tio̍h siú chhit-chhit-ji̍t cheh. Koh tī nî bóe, tio̍h siú siu-chông ê cheh.
34:23 " Lín só͘-ū ê chapo͘ teng tio̍h chi̍t nî saⁿ pái lâi kìⁿ chì-koân Siōng-chú — I-su-la-el ê Siōng-tè.
34:24 Góa beh tùi lí ê bīn-chêng kóaⁿ-chhut gōa-pang lâng, khok-tián lí ê tē-kài. Lí chi̍t nî saⁿ pái chiūⁿ-khì kìⁿ lí ê Siōng-chú ê sî, it-tēng bô lâng tham lí ê thó͘-tē.
34:25 " Lí m̄ thang kā Góa ê seng-lé ê hoeh chham ū kàⁿ ê mi̍h lâi hiàn, Pôaⁿ-kòe-cheh ê chè-mi̍h mā m̄ thang lâu kàu keh kang chá-khí.
34:26 " Tē-.ni̍h siōng khí-thâu se̍k ê mi̍h tio̍h sàng kàu Siōng-chú — lí ê Siōng-tè ê chhù, chú soaⁿ-iûⁿ-á m̄ thang ēng i ê lāu bú ê leng.
34:27 Siōng-chú tùi Mô͘-se kóng, " Lí tio̍h siá chiahê ōe, in-ūi Góa sī chiàu chiahê ōe kah lí í-ki̍p I-su-la-el li̍p-iok.
34:28 Mô͘-se kah Siōng-chú tī hia sì-cha̍p kang sì-cha̍p mê, bô chia̍h piáⁿ bô lim chúi. I kā chit-ê iok ê ōe, to̍h-sī cha̍p-tiâu-kài, siá tī nn̄g tè pi.
34:29 Mô͘-se Lo̍h Soaⁿ
Mô͘-se lo̍h Si-nái soaⁿ ê sî; i ê chhiú the̍h nn̄g tè iok-pi, i lo̍h soaⁿ ê sî, i ê bīn in-ūi Siōng-chú kah i kóng-ōe, chiū siā-chhut kng, Mô͘-se kakī m̄-chai.
34:30 A-lông kah I-su-la-el jîn-bîn khòaⁿ tio̍h Mô͘-se ê sî, lí khòaⁿ, i ê bīn siā-chhut kng, in chiū kiaⁿ, m̄-káⁿ óa-kīn i.
34:31 Mô͘-se kiò in lâi, A-lông kah hōe-chiòng tiong chiahê thâu-lâng chiū lóng tò-tńg kàu i hia, Mô͘-se chiū kah in kóng-ōe.
34:32 Jiân-āu I-su-la-el jîn-bîn lóng chìn-chêng lâi, Mô͘-se chiū kā Siōng-chú tī Si-nái soaⁿ kah i só͘ kóng it-chhè ê ōe, lóng kā in hoan-hù.
34:33 Mô͘-se kah in kóng-ōe liáu-āu, chiū ēng phè tà bīn.
34:34 Chóng-.sī, Mô͘-se ji̍p-khì Siōng-chú ê bīn-chêng kah I kóng-ōe, phè chiū hian khí-.lâi, it-ti̍t kàu i chhut-.lâi. I chhut-.lâi ê sî, chiū kā Siōng-chú só͘ hoan-hù ê ōe tùi I-su-la-el lâng kóng.
34:35 I-su-la-el lâng khòaⁿ tio̍h Mô͘-se ê bīn, Mô͘-se ê bīn siā-chhut kng, Mô͘-se koh ēng phè tà bīn, thèng-hāu kàu i ji̍p-khì kah Siōng-chú kóng-ōe, phè chiū hian khí-.lâi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。