路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
2:1 I-é-su ê Chhut-sì
( Mt 1: 18-25)
Hit sî, Lô-má hông-tè Au-gú-su-toh ū pan-pò͘ chiàu-lēng, kiò choân kok ê jîn-bîn lóng tio̍h teng-kì hō͘-kháu.
2:2 Chit-ê thâu chi̍t pái ê hō͘-kháu phó͘-cha, sī Ku-lé-niú chò Su-lī-a chóng-tok ê sî si̍t-si ê.
2:3 Só͘-í, ta̍k lâng lóng tio̍h khì kakī ê kò͘-hiong teng-kì hō͘-kháu.
2:4 Iô-sé-huh tùi Ga-lí-la-iah séng ê Na-cha-lia̍t siâⁿ, tńg-khì Iô-tá-iah séng ê Bia̍t-lé-hèm siâⁿ, to̍h-sī Ta-bi̍t chhut-sì ê siâⁿ, in-ūi Iô-sé-huh sio̍k Ta-bi̍t ê ke, sī Ta-bi̍t ê sè-hē.
2:5 Iô-sé-huh beh kah i só͘ phèng-tiāⁿ ê Mâ-lí-ah chò-hóe teng-kì hō͘-kháu; hit sî, Mâ-lí-ah í-keng ū sin-īn ā.
2:6 In tī hia ê sî, Mâ-lí-ah seng-sán ê kî kàu.
2:7 Chiū seⁿ thâu-the ê chapo͘ kiáⁿ; i ēng pò͘ kā I pau-teh, hō͘ I khùn tòa bé-chô-.ni̍h, in-ūi kheh-koán bô só͘-chāi thang hō͘ in tòa.
2:8 Thiⁿ-sài Tùi bo̍k-chiá Soan-kò
Hit tē-hng ū kò͘ iûⁿ ê lâng tòa tī soaⁿ-.ni̍h, àm-sî lûn-liû kò͘ in ê iûⁿ-kûn.
2:9 Ū chi̍t ūi Chú ê thiⁿ-sài chhut-hiān tī in ê sin piⁿ, Chú ê êng-kng sì-bīn teh kā in chiàu; in tōa tio̍h-kiaⁿ.
2:10 Thiⁿ-sài kā in kóng, " M̄-bián kiaⁿ! Góa pò lín chi̍t-ê beh hō͘ bān-bîn tōa hoaⁿ-hí ê hó siau-sit.
2:11 Kin-á-ji̍t tī Ta-bi̍t ê siâⁿ, ū chi̍t ūi Kiù-chú ūi tio̍h lín chhut-sì, to̍h-sī Chú Ki-tok.
2:12 Lín ē khòaⁿ tio̍h chi̍t-ê eⁿ-á ēng pò͘ pau, khùn tī chô-.ni̍h, chit-ê to̍h-sī hō͘ lín chò kì-hō. "
2:13 Hut-jiân ū chin chē thian-peng kah hit-ê thiⁿ-sài chò-hóe teh oló Siōng-tè, kóng,
2:14 Goān êng-kng kui tī chì-koân Siōng-tè, goān I sù hô-pêng hō͘ I só͘ hoaⁿ-hí ê lâng.
2:15 Chiahê thiⁿ-sài lī-khui in beh chiūⁿ thiⁿ ê sî, kò͘ iûⁿ ê lâng chò-hóe kóng, " Taⁿ lán lâi-khì Bia̍t-lé-hèm siâⁿ, khòaⁿ Chú pò lán chai só͘ hoat-seng ê tāichì. "
2:16 In chiū kóaⁿ-kín khì, chhōe tio̍h Mâ-lí-ah kah Iô-sé-huh, koh khòaⁿ tio̍h eⁿ-á khùn tī bé-chô-.ni̍h.
2:17 In khòaⁿ-liáu, chiū kā thiⁿ-sài tùi in só͘ kóng koan-hē chit-ê eⁿ-á ê tāichì pò hō͘ lâng chai.
2:18 Thiaⁿ-.tio̍h ê lâng lóng chin tio̍h-kiaⁿ;
2:19 To̍k-to̍k Mâ-lí-ah kā chiahê ōe kì-tiâu-tiâu, sim-lāi tiāⁿtiāⁿ teh siūⁿ.
2:20 Kò͘-iûⁿ ê lâng tńg-.khì, ūi tio̍h só͘ thiaⁿ-.tio̍h kah só͘ khòaⁿ-.tio̍h ê tāichì lóng kah thiⁿ-sài só͘ kóng ê oân-choân kāng-khoán, chiū kā êng-kng kah oló kui hō͘ Siōng-tè.
2:21 Kàu eⁿ-á chhut-sì āu tē-peh ji̍t, kā eⁿ-á kiâⁿ kat-lé ê ji̍t kàu, chiū kā I hō-miâ kiò-chò I-é-su. Chit-ê miâ sī Mâ-lí-ah iáu-bōe hoâi-īn ê sî thiⁿ-sài kā I hō ê.
2:22 Phō I-é-su Khì Sèng-tiān Hōng-hiàn
In chheng-khì ê ji̍t-kî chi̍t ē móa, Iô-sé-huh kah Mâ-lí-ah chiū chiàu Mô͘-se ê lu̍t-hoat, phō eⁿ-á khì Ê-lú-sa-lèm, beh kā I hiàn hō͘ Chú.
2:23 （ Chiàu Chú ê lu̍t-hoat kì-chài, thâu- chi̍t-the ê chapo͘ kiáⁿ lóng tio̍h sèng-pia̍t lâi kui hō͘ Chú. ）
2:24 In mā ū chiàu Chú ê lu̍t-hoat kui-tēng " Hiàn chi̍t tùi pan-kah á-.sī nn̄g chiah hún-chiáu-kiáⁿ " Chò seng-lé. (chù, LBK 12: 8; 5:11 LXX)
2:25 Tī Ê-lú-sa-lèm ū chi̍t-ê lâng, miâ kiò-chò Si-miān; chit-ê lâng sī gī lâng koh kèng-khiân, put-sî to teh kî-thāi I-su-la-el ê ho̍k-heng; Sèng Sîn mā kah i tông-chāi.
2:26 I bat tit tio̍h Sèng Sîn chí-sī, chai-iáⁿ i sí í-chêng ē khòaⁿ tio̍h Chú só͘ èng-ín ê Ki-tok.
2:27 I hō͘ Sèng Sîn kám-tōng ji̍p-khì sèng-tiān. Tú hit sî, I-é-su ê pē-bú phō eⁿ-á ji̍p-.lâi, beh chiàu lu̍t-hoat kā I-é-su kí-hêng gî-sek.
2:28 Si-miān ēng siang chhiú kā eⁿ-á chiap kòe-.lâi, oló Siōng-tè kóng,
2:29 " Chú ah, taⁿ chiàu Lí ê ōe, hō͘ Lí ê lô͘-po̍k pêng-pêng an-an lī-khui sè-kan.
2:30 In-ūi góa í-keng chhin-ba̍k khòaⁿ tio̍h Lí ê chín-kiù,
2:31 Chiū-sī Lí ūi tio̍h bān-bîn só͘ chún-pī ê;
2:32 Beh chò khé-sī gōa-pang lâng ê kng, koh chò Lí ê chú-bîn — I-su-la-el lâng ê êng-kng. "
2:33 I-é-su ê pē-bú thiaⁿ tio̍h Si-miān kóng-khí koan-hē eⁿ-á ê ōe, kám-kak chin tio̍h-kiaⁿ.
2:34 Si-miān kā in chiok-hok, koh tùi I-é-su ê lāu-bú Mâ-lí-ah kóng, " Chit-ê eⁿ-á siū siat-li̍p, sī beh hō͘ I-su-la-el tiong chin chē lâng poa̍h-tó, chin chē lâng peh khí-.lâi, mā chò siū kong-kek ê kì-hō;
2:35 Koh hō͘ chin chē lâng sim-lāi ê ì-liām lō͘-chhut, lí kakī ê sim mā ē hō͘ kiàm chha̍k thàng-kòe. "
2:36 Lú-sian-ti Tùi I-é-su ê Hôe-èng
Koh ū chi̍t-ê nî-hòe chin lāu ê lú-sian-ti An-ná, sī A-sel chi-cho̍k Hôa-nu-el ê chabó͘ kiáⁿ. I kiat-hun liáu-āu kah tiōng-hu chò-hóe seng-oa̍h chhit nî,
2:37 Āu-lâi, i chiū chiú-kóaⁿ. Kàu-taⁿ í-keng peh-cha̍p-sì hòe, lóng bô lī-khui sèng-tiān, mê-ji̍t kìm-chia̍h kî-tó, ho̍k-sāi Siōng-tè.
2:38 Tú hit sî, i mā kiâⁿ chìn-chêng lâi kám-siā Siōng-tè, tùi só͘-ū kî-thāi Siōng-tè kiù-sio̍k Ê-lú-sa-lèm ê lâng, kóng-khí chit-ê eⁿ-á ê tāichì.
2:39 Tńg-khì Na-cha-lia̍t
Iô-sé-huh kah Mâ-lí-ah chiàu Chú ê lu̍t-hoat pān oân ta̍k hāng tāichì liáu-āu, chiū tńg-khì Ga-lí-la-iah séng, kàu in ê kò͘-hiong Na-cha-lia̍t.
2:40 Eⁿ-á chiām-chiām tōa-hàn, ji̍t-ji̍t ióng-chòng, tì-hūi chhiong-móa; Siōng-tè ê un-tián kah I tông-chāi.
2:41 Pôaⁿ-kòe-cheh, Gín-á I-é-su tī Sèng-tiān
Ta̍k nî Pôaⁿ-kòe-cheh ê sî, I-é-su ê pē-bú lóng ē khì Ê-lú-sa-lèm kòe-cheh.
2:42 Kàu I-é-su cha̍p-jī hòe ê sî, mā chiàu koàn-lē khì Ê-lú-sa-lèm kòe-cheh.
2:43 Cheh-kî soah liáu-āu, in beh tńg-.khì ê sî, gín'á I-é-su iáu lâu tī Ê-lú-sa-lèm; I ê pē-bú m̄-chai.
2:44 In siūⁿ kóng I-é-su tī chò-hóe kiâⁿ ê lâng tiong-kan, in kiâⁿ chi̍t ji̍t ê lō͘-thêng liáu-āu, chiah tī chhin-chiâⁿ kah se̍k-sāi lâng ê tiong-kan chhōe I-é-su.
2:45 In chhōe bô I-é-su, chiū tò tńg-khì Ê-lú-sa-lèm chhōe.
2:46 Saⁿ ji̍t āu chiah tī sèng-tiān lāi, khòaⁿ tio̍h I-é-su chē tī hiahê kàu-su tiong-kan, mā teh thiaⁿ, mā teh mn̄g.
2:47 Thiaⁿ tio̍h I-é-su teh kóng ōe ê lâng, lóng tùi I ê chhong-bêng kah ìn-tap kám-kak hi-kî.
2:48 Pē-bú khòaⁿ tio̍h I chiū tio̍h-kiaⁿ; I ê lāu-bú tùi I kóng, " Kiáⁿ ah, Lí ná thang ánne tùi-thāi goán? Lí khòaⁿ, Lí ê lāu-pē kah góa chin hoân-ló, it-ti̍t teh chhōe Lí. "
2:49 I-é-su ìn kóng, " Lín ná tio̍h chhōe góa? Lín kám m̄-chai góa eng-kai tio̍h tòa góa ê Thiⁿ-pē ê chhù? "
2:50 In bē liáu-kái I-é-su tùi in kóng ê ōe.
2:51 I-é-su chiū kah pē-bú tńg-khì kàu Na-cha-lia̍t, lâi kā in iú-hàu. I ê lāu-bú kā chiahê ōe lóng kì tī sim-lāi.
2:52 I-é-su ê tì-hūi kah nî-hòe ná ke-thiⁿ, Siōng-tè kah lâng mā ná thiàⁿ I.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。