路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
1:1 Siá hō͘ Thê-o-hui-lô
Kèng-ài ê Thê-o-hui-lô tāi-jîn, ū chin chē lâng í-keng kā goán tiong-kan só͘ hoat-seng ê tāichì chéng-lí kì-lio̍k lo̍h-.lâi.
1:2 In chiàu hiahê thoân tō-lí ê lâng tùi khí-thâu chhin-ba̍k khòaⁿ-.tio̍h ê tāichì, lâi kì-lio̍k thoân hō͘ goán.
1:3 Góa ū tùi khí-thâu siông-sè chhâ-khó choân-pō͘ ê tāichì, só͘-í siūⁿ beh chiàu sūn-sū siá chhut-lâi kià hō͘ lí,
1:4 Hō͘ lí thang bêng-pe̍k lí só͘ niá-siū ê tō-lí sī khak-si̍t ê.
1:5 Ī-kò kiâⁿ sé-lé Iô-há-neh ê Chhut-sì
He-lo̍t chò Iô-tá-iah ông ê sî, ū chi̍t-ê miâ kiò-chò Cha-kha-lī-a ê A-mí-a pan ê chè-si, i ê bó͘ sī A-lông ê kiáⁿ-sun, miâ kiò-chò E-lí-sa-biat.
1:6 In nn̄g ang-á-bó͘ hō͘ Siōng-tè khòaⁿ-chò sī gī lâng, in-ūi in chun-siú Siōng-tè it-chhè ê kài-bēng kah lé-gî lâi kiâⁿ.
1:7 Chóng-.sī, in bô kiáⁿ, in-ūi E-lí-sa-biat bē hoâi-īn, nn̄g lâng ê nî-hòe iū-koh lāu à.
1:8 Ū chi̍t ji̍t, Cha-kha-lī-a chiàu i ê lûn-pan tī Siōng-tè ê bīn-chêng teh chip-hêng chè-si ê chit-bū,
1:9 Chiàu chè-si chit-hūn ê lē, i thiu-khau tit tio̍h ji̍p-khì Chú ê sèng-tiān sio hiuⁿ.
1:10 Tng i teh sio hiuⁿ ê sî, hōe-chiòng kui tōa-tīn tī gōa-bīn teh kî-tó.
1:11 Ū chi̍t-ê Chú ê thiⁿ-sài tùi i hián-hiān, khiā tī hiuⁿ-tôaⁿ ê chiàⁿ pêng.
1:12 Cha-kha-lī-a khòaⁿ-.tio̍h, chiū tio̍h-kiaⁿ kah gāng-.khì, hui-siông put-an.
1:13 Thiⁿ-sài tùi i kóng, " Cha-kha-lī-a, m̄-bián kiaⁿ, in-ūi Siōng-tè í-keng thiaⁿ tio̍h lí ê kî-tó. Lí ê bó͘ E-lí-sa-biat beh seⁿ kiáⁿ, lí tio̍h kā i hō-miâ kiò-chò Iô-há-neh.
1:14 Lí ē hoaⁿ-hí koh khoài-lo̍k; chin chē lâng mā ē ūi tio̍h i ê chhut-sì lâi hoaⁿ-hí.
1:15 In-ūi i tī Chú ê bīn-chêng beh chò tōa-jîn-bu̍t, phû-tô chiú kah it-chhè ê chiú lóng m̄ thang hō͘ i lim. I tī bó-sin chiū hō͘ Sèng Sîn chhiong-móa.
1:16 I ē hō͘ I-su-la-el kiáⁿ-sun chin chē lâng oa̍t tńg-lâi kui-ǹg Chú, to̍h-sī in ê Siōng-tè.
1:17 I ē ēng E-li-iah ê cheng-sîn kah châi-lêng chò Chú ê sian-hong, hō͘ pē-bú kah kiáⁿ-jî hô-hó, hō͘ pōe-ge̍k ê lâng hôe-sim choán-ì lâi kin-tòe gī lâng ê tì-hūi, hō͘ jîn-bîn chún-pī sim lâi gêng-chiap Chú. "
1:18 Cha-kha-lī-a tùi thiⁿ-sài kóng, " Kám chiâⁿ-si̍t ē ánne? In-ūi góa í-keng lāu à, góa ê bó͘ nî-hòe mā chin tōa à. "
1:19 Thiⁿ-sài ìn kóng, " Góa sī teh ho̍k-sāi Siōng-tè ê Ga-bu-li-el, hōng chhe-phài lâi kah lí kóng-ōe, tùi lí pò-kò chit-ê hó siau-sit.
1:20 In-ūi lí m̄ siong-sìn góa ê ōe, to̍h-sī kàu-sî ē èng-giām ê ōe, lí ē piàn-sêng é-káu bē kóng-ōe, it-ti̍t kàu chiahê tāichì tit tio̍h èng-giām ê ji̍t. "
1:21 Hōe-chiòng teh thèng-hāu Cha-kha-lī-a, in kám-kak kî-koài i ná ē tī sèng-tiān lāi hiahni̍h kú.
1:22 I chhut-.lâi ê sî soah bē tàng kah in kóng-ōe, in chiū chai i tī sèng-tiān-.ni̍h ū khòaⁿ tio̍h ī-siōng. I tùi in it-ti̍t pí chhiú-gí, kèng-jiân sī é-káu.
1:23 Cha-kha-lī-a ho̍k-sāi ê ji̍t-kî móa, chiū tńg-khì in chhù.
1:24 Bô gōa kú liáu-āu, i ê bó͘ E-lí-sa-biat ū sin, gō͘ goe̍h-ji̍t bô chhut-mn̂g.
1:25 E-lí-sa-biat kóng, " Chú hiahni̍h khòaⁿ-kò͘ góa, hō͘ góa m̄-bián koh hō͘ lâng thí-chhiò bē seⁿ kiáⁿ. "
1:26 Ī-kò I-é-su ê Chhut-sì
E-lí-sa-biat ū sin la̍k goe̍h-ji̍t ê sî, thiⁿ-sài Ga-bu-li-el hōng Siōng-tè ê chhe-phài lâi-kàu Ga-lí-la-iah séng chi̍t-ê siâⁿ, kiò-chò Na-cha-lia̍t,
1:27 Lâi chhōe chi̍t-ê chāi-sek-lí, miâ kiò-chò Mâ-lí-ah. I í-keng kah chi̍t-ê Ta-bi̍t ê kiáⁿ-sun miâ kiò-chò Iô-sé-huh ê tēng-hun.
1:28 Thiⁿ-sài khì-kàu Mâ-lí-ah hia, tùi i kóng, " Pêng-an, lí sī siōng ū hok-khì ê lâng. Siōng-tè kah lí tông-chāi. "
1:29 Mâ-lí-ah tùi chiahê ōe tio̍h-kiaⁿ kah gāng-.khì, sim-lāi it-ti̍t teh siūⁿ chit-ê chhéng-an sī siáⁿ-mi̍h ì-sù.
1:30 Thiⁿ-sài kā i kóng, " Mâ-lí-ah ah, m̄-bián kiaⁿ, in-ūi lí tit tio̍h Siōng-tè ê un-tián.
1:31 Taⁿ lí ē hoâi-īn seⁿ chi̍t-ê hāu-seⁿ, tio̍h kā I hō-miâ kiò-chò I-é-su.
1:32 I ē chò tōa-jîn-bu̍t, lâng ē chheng-ho͘ I chì-koân Siōng-tè ê Kiáⁿ. Chú, Siōng-tè ē kā I chó͘-sian Ta-bi̍t ê ông-ūi siúⁿ-sù I.
1:33 I ē chò ông, éng-oán thóng-tī Iâ-kop ê kiáⁿ-sun, I ê kok mā ē bû kiông-chīn. "
1:34 Mâ-lí-ah tùi thiⁿ-sài kóng, " Góa iáu-bōe chhut-kè, ná ē ū chit khoán tāichì? "
1:35 Thiⁿ-sài ìn kóng, " Sèng Sîn ē lîm-kàu lí, chì-koân Siōng-tè ê koân-lêng ē tì-ìm lí, só͘-í, hit-ê teh beh chhut-sì ê eⁿ-á-.sī sèng ê, lâng ē chheng-ho͘ I chò Siōng-tè ê Kiáⁿ.
1:36 Lí khòaⁿ! Lí ê chhin-chiâⁿ E-lí-sa-biat, i sûi-jiân nî lāu, mā í-keng hoâi-īn. Lâng kóng i bē seⁿ, i í-keng ū sin la̍k goe̍h-ji̍t ā.
1:37 In-ūi Siōng-tè bô chi̍t hāng tāichì chò bē kàu. "
1:38 Mâ-lí-ah kóng, " Góa sī Chú ê lú-pī; goān chiàu lí ê ōe lâi kā góa sêng-choân. " thiⁿ-sài chiū lī-khui i.
1:39 Mâ-lí-ah hóng-būn E-lí-sa-biat
Kòe bô kúi ji̍t, Mâ-lí-ah chhut-hoat, kóaⁿ-kín khì-kàu Iô-tá-iah soaⁿ-tē ê chi̍t-ê siâⁿ.
1:40 I ji̍p-khì Cha-kha-lī-a ê chhù, kā E-lí-sa-biat chhéng-an.
1:41 E-lí-sa-biat chi̍t-ē thiaⁿ tio̍h Mâ-lí-ah chhéng-an, pak-tó͘ lāi ê thai-jî chiū tiô-thiàu. E-lí-sa-biat hō͘ Sèng Sîn chhiong-móa,
1:42 I chiū tōa-siaⁿ kóng, " Chèng hū-jîn-lâng ê tiong-kan lí tit tio̍h hok-khì, lí só͘ hoâi-īn ê thai-jî mā tit tio̍h hok-khì.
1:43 Góa ê Chú ê lāu-bú lâi hóng-būn góa, góa ná ē kham-tit?
1:44 In-ūi góa chi̍t-ē thiaⁿ tio̍h lí chhéng-an ê siaⁿ, góa pak-tó͘ lāi ê thai-jî chiū hoaⁿ-hí tiô-thiàu.
1:45 Lí chit-ê hū-jîn-lâng chin ū hok-khì! In-ūi Chú só͘ kā lí kóng ê ōe ē si̍t-hiān. "
1:46 Mâ-lí-ah ê Chàn-bí-si
Mâ-lí-ah kóng, góa ê sim-sîn chun-kèng Chú chò tōa,
1:47 Góa ê sim-sîn in-ūi kiù góa ê Siōng-tè lâi hoaⁿ-hí.
1:48 In-ūi I khòaⁿ-kò͘ lú-pī ê pi-bî. Tùi taⁿ í-āu, bān-sè-tāi ê lâng lóng ē kóng góa ū hok-khì.
1:49 In-ūi choân-lêng Siōng-tè ū ūi tio̍h góa chò úi-tāi ê tāichì, I ê miâ sī sèng.
1:50 Kèng-ùi I ê lâng, I liân-bín in, kàu bān-sè-tāi.
1:51 I chhun-chhut koân-lêng ê chhiú, kā sim-chì kiau-ngō͘ ê lâng kóaⁿ-sòaⁿ.
1:52 I kā chiáng-koân ê lâng, tùi i ê ông-ūi thoa lo̍h-.lâi, kā pi-bî ê lâng ko-seng.
1:53 I ēng hó mi̍h hō͘ iau-gō ê lâng chia̍h kàu pá; I hō͘ hó-gia̍h ê lâng khang-khang tńg-.khì.
1:54 I hû-chō͘ I ê lô͘-po̍k I-su-la-el, ē kì-tit kā in liân-bín,
1:55 Chiàu I tùi lán chó͘-sian ê èng-ín, lâi liân-bín A-bu-la-hàm kah i ê kiáⁿ-sun kàu bān-sè-tāi.
1:56 Mâ-lí-ah kah E-lí-sa-biat chò-hóe tòa chha-put-to ū saⁿ goe̍h-ji̍t, chiah tńg-khì in chhù.
1:57 Kiâⁿ Sé-lé Iô-há-neh ê Chhut-sì
E-lí-sa-biat seng-sán ê kî kàu, chiū seⁿ chi̍t-ê hāu-seⁿ.
1:58 Chhù-piⁿ keh-piah kah chhin-chiâⁿ, thiaⁿ tio̍h Chú tùi i ū tōa liân-bín, chiū kah i chò-hóe hoaⁿ-hí.
1:59 Kàu eⁿ-á chhut-sì tē-peh ji̍t, in lâi beh kā eⁿ-á kiâⁿ kat-lé, koh chiàu i ê lāu-pē ê miâ kā i hō-chò Cha-kha-lī-a.
1:60 I ê lāu-bú ìn kóng, " M̄-thang ánne, tio̍h kā i hō-chò Iô-há-neh. "
1:61 Tāi-ke chiū tùi i kóng, " Lí ê chhin-chiâⁿ bô lâng hō chit-ê miâ. "
1:62 In chiū pí chhiú-gí mn̄g eⁿ-á ê lāu-pē, ài beh kā i hō siáⁿ-mi̍h miâ.
1:63 Cha-kha-lī-a thó chi̍t tè siá jī ê pang á, siá kóng, " I ê miâ sī Iô-há-neh. " tāi-ke kám-kak kî-koài.
1:64 Hit sî, Cha-kha-lī-a sûi-sî khui chhùi kóng-ōe, oló Siōng-tè.
1:65 Chhù-piⁿ keh-piah ê lâng lóng tio̍h-kiaⁿ; choân Iô-tá-iah ê soaⁿ-tē lóng teh tâm-lūn chit-hāng tāichì.
1:66 Thiaⁿ-.tio̍h ê lâng lóng siūⁿ kóng, " Án-ne, chit-ê eⁿ-á chiong-lâi ē chiâⁿ-chò siáⁿ-mi̍h khoán ê lâng? In-ūi ū Chú ê koân-lêng kah i tông-chāi. "
1:67 Cha-kha-lī-a ê Ī-giân
Iô-há-neh ê lāu-pē Cha-kha-lī-a hō͘ Sèng Sîn chhiong-móa, chiū ī-giân kóng,
1:68 Tio̍h oló Chú, I-su-la-el ê Siōng-tè! in-ūi I ū khòaⁿ-kò͘ koh kiù-sio̍k I ê chú-bîn.
1:69 Ū tùi I ê lô͘-po̍k — Ta-bi̍t ê ke, thè lán siat-li̍p ū tōa-lêng ê Kiù-chú.
1:70 Chiàu I tī kó͘-chá thong-kòe sîn-sèng ê sian-ti ê chhùi èng-ín kóng,
1:71 I beh chín-kiù lán thoat-lī tùi-te̍k kah só͘-ū oàn-hūn lán ê lâng ê chhiú,
1:72 I beh liân-bín lán ê chó͘-sian, koh kì-liām I sîn-sèng ê iok;
1:73 Chiū-sī kah lán ê chó͘-sian A-bu-la-hàm só͘ li̍p ê iok,
1:74 Hō͘ lán ē-tàng thoat-lī chiahê tùi-te̍k ê chhiú,
1:75 Hō͘ lán chi̍t-sì-lâng tī I ê bīn-chêng, ēng sèng ēng gī, bô kiaⁿ-hiâⁿ lâi ho̍k-sāi I.
1:76 Góa ê kiáⁿ, lí ē hō͘ lâng kiò-chò chì-koân Siōng-tè ê sian-ti. in-ūi lí beh chò Chú ê sian-hong lâi chún-pī I ê lō͘,
1:77 Hō͘ I ê chú-bîn in-ūi tit tio̍h sià chōe, lâi bêng-pe̍k Siōng-tè ê chín-kiù.
1:78 Lán ê Siōng-tè chhiong-móa liân-bín ê sim, só͘-í, hō͘ chá-khí sî ê ji̍t tùi thiⁿ-téng lâi chiò lán,
1:79 Lâi chiò lán chiahê tiàm tī o͘-àm kah sí-ìm tiong ê lâng, ín-chhōa lán ê kha kiâⁿ-ji̍p pêng-an ê lō͘.
1:80 Eⁿ-á chiām-chiām tōa-hàn, sim-sîn mā ji̍t-ji̍t ióng-chòng; i tiàm tī khòng-iá, it-ti̍t kàu i tī I-su-la-el tiong-kan kong-khai chhut-hiān hit ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。