馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
15:1 I-é-su tī Pí-la̍h-to bīn-chêng siū Sím-mn̄g
( Mt 27: 1-2, 11-14; Lk 23: 1-5; Ih 18: 28-38)
Kàu thiⁿ-kng, hiahê chè-si-tiúⁿ, tiúⁿ-ló, keng-ha̍k kàu-su kah choân gī-hōe chò-hóe thó-lūn hó-sè, kā I-é-su pa̍k khí-.lâi, ah-khì kau hō͘ Pí-la̍h-to.
15:2 Pí-la̍h-to mn̄g I-é-su kóng, " Lí sī Iô-tá-iah lâng ê ông, sī-.bô? " I-é-su ìn kóng, " Chiàu lí kóng ánne. "
15:3 Tōa-chè-si kò I-é-su chin chē hāng.
15:4 Pí-la̍h-to koh mn̄g I-é-su kóng, " Lí ná ē lóng bô ìn? Lí khòaⁿ, in kò Lí hiah chē hāng. "
15:5 I-é-su iû-goân bô ìn pòaⁿ-kù. Pí-la̍h-to soah kám-kak chin kî-koài.
15:6 I-é-su Hông phòaⁿ Sí-hêng
( Mt 27: 15-26; Lk 23: 13-25; Ih 18: 39-19:16)
Tī ta̍k nî ê Pôaⁿ-kòe-cheh, chóng-tok lóng ū chiàu jîn-bîn só͘ kiû ê lâi pàng chi̍t-ê hoān-lâng hō͘ in.
15:7 Hit sî, ū chi̍t-ê kah hiahê chok-loān ê lâng chò-hóe koaiⁿ-kaⁿ, miâ kiò-chò Ba-la̍h-ba ê hoān-lâng.
15:8 Kûn-chiòng chū-chi̍p óa-.khì, iau-kiû Pí-la̍h-to chiàu koàn-lē lâi pàng chi̍t-ê hoān-lâng.
15:9 Pí-la̍h-to mn̄g in kóng, " Lín ài góa pàng Iô-tá-iah lâng ê ông hō͘ lín, sī-.bô? "
15:10 In-ūi i chai hiahê chè-si-tiúⁿ sī ūi tio̍h oàn-tò͘ chiah kā I-é-su kau hō͘ i.
15:11 M̄ koh, hiahê chè-si-tiúⁿ siàn-tōng kûn-chiòng, tian-tò iau-kiû Pí-la̍h-to pàng Ba-la̍h-ba hō͘ in.
15:12 Pí-la̍h-to koh ìn kóng, " Án-ne, lín kiò-chò Iô-tá-iah lâng ê ông hit ūi, góa tio̍h án-chóaⁿ kā I pān? "
15:13 In koh tōa-siaⁿ hoah, " Kā I tèng si̍p-jī-kè! "
15:14 Pí-la̍h-to kā in kóng, " Sī án-chóaⁿ lè, I kám ū hoān siáⁿ-mi̍h chōe? " Chóng-.sī, kûn-chiòng ná tōa-siaⁿ hoah, " Kā I tèng si̍p-jī-kè! "
15:15 Pí-la̍h-to ūi tio̍h beh hō͘ kûn-chiòng hoaⁿ-hí, chiū pàng Ba-la̍h-ba hō͘ in. I koh bēng-lēng lâng piⁿ-phah I-é-su. Jiân-āu kā I-é-su kau hō͘ in khì tèng si̍p-jī-kè.
15:16 Peng-á hì-lāng I-é-su
( Mt 27: 27-31; Ih 19:2-3)
Peng-á thoa I-é-su ji̍p-khì chóng-tok-hú ê īⁿ lāi, koh tiàu choân-tūi ê peng-á lâi.
15:17 In kā I-é-su chhēng chi̍t-niá chí-sek ê tn̂g-phàu, koh kā I tì chhì-á piⁿ ê bián-liû,
15:18 Jiân-āu kā I-é-su chhéng-an kóng, " Iô-tá-iah lâng ê ông, pêng-an! "
15:19 In koh ēng lô͘-tek sut I-é-su ê thâu-khak, kā I phùi chhùi-nōa, kūi lo̍h-khì kā I pài.
15:20 In hì-lāng soah, kā hit niá chí-sek ê tn̂g-phàu thǹg khí-.lâi, koh kā I-é-su kakī ê saⁿ-chhēng tò tńg-.khì, jiân-āu kā I ah-khì tèng si̍p-jī-kè.
15:21 I-é-su Hông tèng Si̍p-jī-kè
( Mt 27: 32-44; Lk 23: 26-43; Ih 19: 17-27)
Ū chi̍t-ê Ku-lé-nái lâng Sí-mòng, to̍h-sī A-le̍k-san-toh kah Ló͘-ho͘h ê lāu-pē, tùi chng-kha lâi, àn hia keng-kòe. Peng-á chiū kiông-pek i lâi giâ I-é-su ê si̍p-jī-kè.
15:22 In kā I-é-su ah kàu Gol-gó-thah ê só͘-chāi, hit-ê tē-miâ hoan-e̍k to̍h-sī " Thâu-khak-óaⁿ ê só͘-chāi. "
15:23 In ēng kiáu bu̍t-io̍h ê chiú hō͘ I-é-su lim. I m̄-lim.
15:24 In kā I-é-su tèng si̍p-jī-kè liáu-āu, pun I ê saⁿ-khò͘, liam-khau lâi khòaⁿ siáⁿ lâng tit tio̍h siáⁿ-mi̍h.
15:25 In kā I-é-su tèng tī si̍p-jī-kè ê sî sī chá-khí sî káu tiám.
15:26 I ê chōe-chōng ê pâi-á siá kóng, " Iô-tá-iah lâng ê ông ".
15:27 Ū nn̄g-ê chha̍t kah I-é-su tâng-chê tèng si̍p-jī-kè, chi̍t-ê tī chiàⁿ pêng, chi̍t-ê tī tò pêng.
15:28 Án-ne sī lâi èng-giām keng-tián só͘ kì-chài, I mā hō͘ lâng kā I sǹg-chò chōe-hoān. ( ū ê chhau-pún bô chit chat )
15:29 Tùi hia keng-kòe ê lâng kā I bú-jio̍k, iô thâu kóng, " Ai-ah, Lí chit-ê kóng beh húi-hoāi sèng-tiān, saⁿ ji̍t lāi beh koh khí khí-.lâi ê lâng,
15:30 Taⁿ tio̍h kiù Lí kakī, tùi si̍p-jī-kè téng lo̍h-.lâi! "
15:31 Hiahê chè-si-tiúⁿ kah keng-ha̍k kàu-su mā sī ánne kā I thí-chhiò, hō͘-siong kóng-lâi kóng-khì, kóng, " I bat kiù pa̍t lâng, taⁿ bē tàng kiù kakī.
15:32 I-su-la-el ê ông Ki-tok, taⁿ tio̍h tùi si̍p-jī-kè lo̍h-lâi hō͘ goán khòaⁿ, goán chiah beh sìn. " tâng-chê tèng tī si̍p-jī-kè ê nn̄g-ê chha̍t-thâu mā kā I bú-jio̍k.
15:33 I-é-su ê Sí-bông
( Mt 27:45-56; Lk 23:44-49; Ih 19:28-30)
Tiong-tàu ê sî, choân tē o͘-àm, sòa-kàu ē-po͘ saⁿ tiám.
15:34 Saⁿ tiám ê sî, I-é-su tōa-siaⁿ hoah, " Í-lô-i, Í-lô-i, la̍h-má sat-pak-tāi-nî? " Chit-kù A-lâm ōe ê ì-sù sī, " Góa ê Siōng-tè, góa ê Siōng-tè, Lí ná ē pàng-sak góa? "
15:35 Tī piⁿ-á teh khiā ê chi̍t-ê lâng thiaⁿ-.tio̍h, chiū kóng, " Lí khòaⁿ, I teh kiò E-li-iah. "
15:36 Ū chi̍t-ê lâng cháu-óa-.khì, ēng hái-mî chìm chhò͘, pa̍k tī lô͘-tek-á bóe, tu-khì hō͘ I-é-su suh, kóng, " Bān-chhiáⁿ lè, lán lâi khòaⁿ E-li-iah ē lâi kā I kiù lo̍h-lâi á bē. "
15:37 I-é-su tōa-siaⁿ âu-kiò chi̍t-siaⁿ, chiū tn̄g-khùi.
15:38 Sèng-tiān lāi ê tiùⁿ-lî tùi téng kàu ē li̍h chò nn̄g pêng.
15:39 Khiā tī I-é-su ê tùi-bīn ê liân-tiúⁿ khòaⁿ tio̍h I ánne tn̄g-khùi, chiū kóng, " Chit-ê lâng chin-chiàⁿ sī Siōng-tè ê Kiáⁿ. "
15:40 Koh ū kúi-nā-ê hū-jîn-lâng tùi hn̄g-hn̄g teh khòaⁿ, kî-tiong ū Ma̍k-ta-lé ê Mâ-lí-ah, sió Iâ-kop kah Iô-sé-huh ê lāu-bú Mâ-lí-ah, í-ki̍p Sa-ló-meh.
15:41 In to̍h-sī I-é-su tī Ga-lí-la-iah séng ê sî, kin-tòe lâi ho̍k-sāi I-é-su ê hū-jîn-lâng. Mā ū chin chē kah I-é-su tâng-chê chiūⁿ Ê-lú-sa-lèm ê hū-jîn-lâng, in lóng tùi hn̄g-hn̄g teh khòaⁿ.
15:42 I-é-su ê Bâi-chòng
( Mt 27:57-61; Lk 23:50-56; Ih 19:38-42)
Sî í-keng àm, hit ji̍t koh sī chún-pī Pôaⁿ-kòe-cheh ê ji̍t, to̍h-sī An-hioh-ji̍t ê chêng chi̍t ji̍t.
15:43 Ū A-li-má-tha-iah ê Iô-sé-huh lâi, hó-táⁿ ji̍p-khì kìⁿ Pí-la̍h-to, chhéng-kiû hō͘ i siu I-é-su ê sin-si. Iô-sé-huh sī chun-kùi ê gī-oân, pún-sin mā sī him-bō͘ Siōng-tè kok-tō͘ ê lâng.
15:44 Pí-la̍h-to thiaⁿ tio̍h I-é-su í-keng sí, kám-kak kî-koài. I kiò liân-tiúⁿ lâi, mn̄g khòaⁿ I-é-su sí-khì á-bōe.
15:45 I tùi hit-ê liân-tiúⁿ chai-iáⁿ I-é-su í-keng sí-.khì, chiū ín-chún kā sin-si kau hō͘ Iô-sé-huh.
15:46 Iô-sé-huh bé chi̍t tè iù-tē pò͘ lâi, kā I-é-su tùi si̍p-jī-kè téng siu lo̍h-.lâi, ēng iù-tē pò͘ pau sin-si, kā I an chòng tī chio̍h-pôaⁿ só͘ phah ê bōng. I mā kō chi̍t tè chio̍h-thâu lâi that tī bōng-kháu.
15:47 Ma̍k-ta-lé ê Mâ-lí-ah kah Iô-sé-huh ê lāu-bú Mâ-lí-ah, ū khòaⁿ tio̍h bâi-chòng I-é-su ê só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。