馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
14:1 Hāi-sí I-é-su ê Kè-bô͘
( Mt 26: 1-5; Lk 22: 1-2; Ih 11: 45-53)
Pôaⁿ-kòe-cheh, mā sī Tû-kàⁿ-cheh ê nn̄g ji̍t chêng, chè-si-tiúⁿ kah keng-ha̍k kàu-su teh chhōe khòaⁿ tio̍h ēng siáⁿ-mi̍h kè-bô͘ lia̍h I-é-su lâi kā I hāi-sí.
14:2 In kóng, " Tng cheh-kî ê sî m̄ thang, khióng-kiaⁿ jîn-bîn ē khí jiáu-loān. "
14:3 Hū-jîn lâng Tò Iû tī I-é-su ê Thâu-khak Téng
( Mt 26: 6-13; Ih 12: 1-8)
I-é-su tī Bē-tha-niah, khì thái-ko pēⁿ-lâng Sí-mòng ê chhù teh chē-toh chia̍h pn̄g ê sî, ū chi̍t-ê hū-jîn-lâng tòa chi̍t-koàn ge̍k-pân ji̍p-.lâi, lāi-bīn té chin sûn koh kùi ê Ná-ta̍t phang-iû. I kòng-phòa ge̍k-pân, kā phang-iû piàⁿ tī I-é-su ê thâu-khak téng.
14:4 Ū chi̍t-kóa lâng chin siū-khì, hō͘-siong gī-lūn kóng, "Ná tio̍h ánne lâi lōng-hùi phang-iû?
14:5 In-ūi chit koàn phang-iû ē-tàng bē saⁿ-pah gōa ê gîn-á, lâi chín-chè sànchhiah lâng. " In chiū kā i chek-pī.
14:6 M̄ koh, I-é-su kóng, " Chhut-chāi i khì! Lín ná ē kā i thiau-lân? I ū ūi tio̍h góa chò chi̍t hāng hó sū.
14:7 In-ūi tiāⁿtiāⁿ ū sànchhiah lâng kah lín chò-hóe, lín put-koán-sî lóng ē-tàng tùi in hó khoán-thāi; m̄ koh, góa bô tiāⁿtiāⁿ kah lín chò-hóe.
14:8 Chit-ê hū-jîn-lâng í-keng chīn-la̍t lâi chò. I seng ēng iû boah góa ê seng-khu, lâi kā góa chún-pī bâi-chòng.
14:9 Góa si̍t-chāi kā lín kóng, hok-im bô-lūn thoân-kàu siáⁿ-mi̍h só͘-chāi, lâng lóng ē kóng-khí chit-ê hū-jîn-lâng só͘ chò ê tāichì, lâi kā i kì-liām. "
14:10 Iô-tah beh Chhut-bē I-é-su
( Mt 26: 14-16; Īh 22: 3-6)
Cha̍p-jī bûn-tô͘ ê chi̍t-ê, Ka-lio̍k lâng Iô-tah, khì kìⁿ hiahê chè-si-tiúⁿ, beh kā I-é-su chhut-bē hō͘ in.
14:11 In thiaⁿ tio̍h ánne chiū chin hoaⁿ-hí, koh tap-èng beh hō͘ i chîⁿ. Iô-tah chiū chhōe-khòaⁿ ū siáⁿ-mi̍h ki-hōe thang kā I-é-su chhut-bē.
14:12 Chún-pī Pôaⁿ-kòe-cheh ê Boán-chhan
( Mt 26: 17-25; Lk 22: 7-14, 21-23; Ih 13: 21-30)
Tû-kàⁿ-cheh ê thâu chi̍t ji̍t, to̍h-sī thâi Pôaⁿ-kòe-cheh ê iûⁿ-ko ê ji̍t, bûn-tô͘ mn̄g I-é-su kóng, " Lí ài goán khì siáⁿ-mi̍h só͘-chāi chún-pī hō͘ Lí chia̍h Pôaⁿ-kòe-cheh ê boán-chhan? "
14:13 I-é-su chhe nn̄g-ê bûn-tô͘, kā in kóng, " Lín ji̍p-khì siâⁿ lāi, chiū ē tú tio̍h chi̍t-ê the̍h chúi-pân ê lâng, lín tio̍h tòe i khì.
14:14 Tī i ji̍p-khì ê chhù, kā hit ke ê chú-lâng kóng, ' Lāu-su kóng, góa beh kah bûn-tô͘ chia̍h Pôaⁿ-kòe-cheh boán-chhan ê kheh-thiaⁿ tī tó-ūi? '
14:15 I ē pò lín khòaⁿ lâu-téng chi̍t keng í-keng chún-pī hó-sè ê tōa thiaⁿ, lín chiū tòa hia chún-pī lán ê boán-chhan. "
14:16 Hit nn̄g-ê bûn-tô͘ chiū chhut-.khì, lâi-kàu siâⁿ lāi, kó-jiân tú tio̍h chiàu I-é-su só͘ kóng ê it-chhè. In chiū tòa hia chún-pī Pôaⁿ-kòe-cheh ê boán-chhan.
14:17 Kàu ji̍t àm ê sî, I-é-su chiū kah cha̍p-jī sù-tô͘ chò-hóe lâi.
14:18 In chē-toh teh chia̍h pn̄g ê sî, I-é-su kóng, " Góa si̍t-chāi kā lín kóng, Lín chiahê kah góa chò-hóe chia̍h ê lâng tiong-kan, ū chi̍t-ê ē chhut-bē góa. "
14:19 Tāi-ke chiū chin iu-būn, chi̍t-ê chi̍t-ê mn̄g I-é-su kóng, " Chóng m̄-sī góa ho͘ⁿh? "
14:20 I-é-su kā in kóng, " Sī lín cha̍p-jī lâng tiong-kan ê chi̍t-ê. Chiū-sī the̍h piáⁿ kah góa tâng-chê tī pôaⁿ-.ni̍h teh ùn hit-ê lâng.
14:21 Jîn-chú si̍t-chāi ē chiàu keng-tián só͘ kì-chài ê lâi siū hāi, m̄ koh, chhut-bē Jîn-chú ê lâng ū chai-hō ah! Hitê lâng lêng-khó bô chhut-sì khah hó. "
14:22 Chú ê Boán-chhan
( Mt 26: 26-30; Lk 22: 15-20; 1Klt 11, 23-25)
In teh chia̍h ê sî, I-é-su the̍h piáⁿ chiok-siā liáu-āu chiū peh-phòa, pun hō͘ bûn-tô͘, kóng, " The̍h khì chia̍h; chit-ê sī góa ê seng-khu. "
14:23 Sòa lo̍h-lâi koh phâng poe, chiok-siā liáu-āu, the̍h hō͘ bûn-tô͘. In lóng lim hit poe.
14:24 I-é-su kā in kóng, " Chit-ê sī góa ê hoeh, to̍h-sī iok ê hoeh, ūi tio̍h chin chē lâng lâi lâu chhut ê.
14:25 Góa si̍t-chāi kā lín kóng, tùi taⁿ í-āu, kàu tī Siōng-tè kok-tō͘ lim hit-ê sin ê phû-tô-chiap í-chêng, góa choa̍t-tùi bô koh lim chit-ê phû-tô-chiap. "
14:26 In gîm-si liáu-āu chiū chhut-.lâi, khì Kaⁿ-ná soaⁿ.
14:27 I-é-su Ī-giân Piat-tò͘ M̄-jīn I
( Mt 26: 31-35; Lk 22: 31-34; Ih 13: 36-38)
I-é-su kā in kóng, " Lín lóng ē sit-khì sìn-sim lâi pàng-sak góa, in-ūi keng-tián ū kì-chài, góa beh phah bo̍k-chiá, iûⁿ chiū sì-sòaⁿ. (chù, CKL 13:7)
14:28 M̄ koh, góa koh-oa̍h liáu-āu, ē pí lín tāi-seng khì-kàu Ga-lí-la-iah séng. "
14:29 Piat-tò͘ kā I-é-su kóng, " Chèng lâng sui-jiân ē pàng-sak Lí, m̄ koh, góa bē ánne chò. "
14:30 I-é-su kā i kóng, " Góa si̍t-chāi kā lí kóng, kin-á-ji̍t, to̍h-sī tī eng-àm ke thî nn̄g pái í-chêng, lí ē saⁿ pái m̄ jīn góa. "
14:31 Piat-tò͘ koh khah kian-chhî, kóng, " Góa nā tio̍h kah Lí chò-hóe sí, mā choa̍t-tùi bē m̄-jīn Lí. " Chèng lâng mā lóng ánne kóng.
14:32 I-é-su tī Gia̍t-se-má-neh Kî-tó
( Mt 26: 36-46; Lk 23: 39-46)
I-é-su kah bûn-tô͘ chò-hóe lâi-kàu chi̍t-ê kiò Gia̍t-se-má-neh ê só͘-chāi. I-é-su kā bûn-tô͘ kóng, " Lín chē tòa chia thèng-hāu, góa beh khì kî-tó. "
14:33 I-é-su chiū chhōa Piat-tò͘, Iâ-kop kah Iô-há-neh chò-hóe khì. I-é-su khai-sí kiaⁿ-hiâⁿ, koh kám-kak hui-siông ai-siong.
14:34 Kā in kóng, " Góa ê sim iu-būn kah kiōng- beh sí, lín tòa chia tio̍h kéng-séng. "
14:35 I-é-su koh lio̍h-á chìn-chêng, phak tī thô͘-kha kî-kiû, khòaⁿ ē-tàng hō͘ I bián keng-kòe chit-ê thòng-khó͘ ê sî-kan á-bē.
14:36 I-é-su kî-kiû kóng, " A-pa Thiⁿ-pē ah, Lí bān sū lóng ē, goān Lí hō͘ chit-ê poe lī-khui góa; chóng-.sī, m̄-sī chiàu góa só͘ ì-ài, tio̍h chiàu Lí ê chí-ì lâi si̍t-hiān. "
14:37 Jiân-āu I-é-su tńg-.lâi, khòaⁿ tio̍h in teh khùn, chiū kā Piat-tò͘ kóng, " Sí-mòng, lí teh khùn ò͘? Lí kám bē tàng chhéⁿ-chhéⁿ kéng-séng chi̍t-sî-á kú?
14:38 Lín tio̍h kéng-séng kî-tó, chiah bián-tit siū bê-he̍k. Sim-sîn ì-ài chò hó, m̄ koh, jio̍k-thé nńg-chiáⁿ loán-jio̍k. "
14:39 I-é-su koh-chài khì kî-tó, mā sī kāng-khoán kóng hiahê ōe.
14:40 I-é-su tńg-.lâi, koh khòaⁿ tio̍h in in-ūi ba̍k-chiu chin siap iáu teh khùn. In mā m̄-chai tio̍h án-chóaⁿ ìn I-é-su khah hó.
14:41 I-é-su tē-saⁿ pái tńg-.lâi, kā in kóng, " Taⁿ lín iáu teh khùn, iáu teh hioh-khùn, sī-.bô? Án-ne hó, sî-kan mā í-keng kàu à, Jîn-chú beh hō͘ lâng chhut-bē, kau tī chōe-jîn ê chhiú-thâu à.
14:42 Khí-.lâi! Lán lâi-.khì. Lín khòaⁿ, chhut-bē góa ê lâng beh kàu à. "
14:43 I-é-su siū Lia̍h
( Mt 26: 47-56; Lk 22: 47-63; Ih 18: 3-12)
I-é-su iáu teh kóng ê sî, cha̍p-jī bûn-tô͘ tiong-kan ê Iô-tah lâi-kàu-ūi, mā ū kui tīn lâng gia̍h to kah thûi-á, tòe chè-si-tiúⁿ, keng-ha̍k kàu-su kah tiúⁿ-ló chò-hóe óa-.lâi.
14:44 Hitê chhut-bē I-é-su ê lâng chìn-chêng ū kah in thò àm-hō kóng, " Góa kā I chim ê hit-ê lâng to̍h-sī I-é-su. Lín thang kā I lia̍h khí-.lâi, sè-jī kā I ah-khì. "
14:45 Iô-tah lâi-kàu-ūi, sûi-sî kiâⁿ óa khì I-é-su hia, kiò chi̍t-siaⁿ " Lāu-su ", chiū ti̍t-ti̍t kā I chim.
14:46 In chiū hē chhiú lia̍h I-é-su.
14:47 Khiā tī piⁿ-á ê chi̍t-ê lâng poe̍h to chhut-.lâi, tùi tōa-chè-si ê lô͘-po̍k phut-khì, kā i chi̍t-pêng hīⁿ-á siah-tiāu.
14:48 I-é-su kā in kóng, " Lín gia̍h to kah thûi-á chhut-lâi lia̍h góa, chhin-chhiūⁿ beh lia̍h chha̍t-á, sī-.bô?
14:49 Góa ta̍k ji̍t tī sèng-tiān lāi kà-sī lâng kah lín chò-hóe tī hia, lín bô kā góa lia̍h. Chóng-.sī, ánne sī beh èng-giām keng-tián ê ōe. "
14:50 Hit sî, só͘-ū ê bûn-tô͘ lóng pàng-sak I-é-su, tô-cháu-.khì.
14:51 Tô-cháu ê siàu-liân Lâng
Ū chi̍t-ê siàu-liân lâng thǹgpaktheh, moa iù-tē pò͘ tòe I-é-su kiâⁿ. In beh kā i lia̍h,
14:52 Hitê lâng chiū kā iù-tē pò͘ pàng-teh, thǹgpaktheh lâi tô-cháu.
14:53 I-é-su Tī gī-hōe siū Sím-phòaⁿ
( Mt 26: 57-68; Lk 22: 54-5, 63-71; Ih 18: 13-14, 19-24)
Jiân-āu hiahê lâng kā I-é-su ah kàu tōa-chè-si ê só͘-chāi. Só͘-ū ê chè-si-tiúⁿ, tiúⁿ-ló kah keng-ha̍k kàu-su lóng chū-chi̍p óa-.lâi.
14:54 Piat-tò͘ lī hn̄g-hn̄g tòe I-é-su, lâi-kàu tōa-chè-si kong-koán ê tiâⁿ, ji̍p-khì lāi-bīn kah hiahê sī-ōe-peng chē chò-hóe teh hang-hóe.
14:55 Chiahê chè-si-tiúⁿ kah choân gī-hōe it-ti̍t beh chhōe chèng-kì lâi kò I-é-su, beh kā I tēng sí-chōe, chóng-.sī, chhōe lóng bô.
14:56 In-ūi ū chin chē lâng lāmsám kí-chèng lâi bû-kò I-é-su, m̄ koh, in ê chèng-sû bô tùi tâng.
14:57 Mā ū kúi-nā-ê lâng khí-lâi lāmsám kiàn-chèng kóng,
14:58 " Goán bat thiaⁿ tio̍h I kóng, ' Góa beh húi-hoāi chit keng lâng ê chhiú só͘ khí ê sèng-tiān, saⁿ ji̍t lāi beh koh khí chi̍t keng m̄-sī lâng ê chhiú só͘ khí ê sèng-tiān. '"
14:59 In ánne ê chèng-sû mā bô tùi tâng.
14:60 Tōa-chè-si chiū khiā khí-.lâi, tī chèng lâng ê bīn-chêng mn̄g I-é-su kóng, " Chiahê lâng teh kā Lí kò siáⁿ-mi̍h? Lí ná ē lóng bô ìn? "
14:61 I-é-su tiām-tiām lóng bô ìn. Tōa-chè-si koh mn̄g I kóng, " Lí sī Ki-tok, sī eng-kai oló ê hit ūi ê Kiáⁿ, á m̄-sī? "
14:62 I-é-su kóng, " Góa sī; lín ē khòaⁿ tio̍h Jîn-chú chē tī ū koân-lêng hit ūi ê chiàⁿ pêng, chē thiⁿ-téng ê hûn kàng-lîm. "
14:63 Tōa-chè-si thiah-phòa kakī ê gōa-saⁿ, kóng, " Lán kám iáu su-iàu siáⁿ-mi̍h chèng-jîn?
14:64 Lín í-keng thiaⁿ tio̍h I teh siat-to̍k Siōng-tè à. Lín phah-sǹg án-chóaⁿ? " In lóng toàn-tēng I kai sí.
14:65 Ū chi̍t-kóa lâng kā I-é-su phùi chhùi-nōa, am i ê bīn, ēng kûn-thâu-bú kā I cheng, koh kā I kóng, " Lí chò sian-ti, ioh khòaⁿ siáⁿ lâng kā Lí cheng? " Hiahê sī-ōe-peng mā ûi óa-.lâi, ēng chhiú kā I siàn.
14:66 Piat-tò͘ M̄-jīn Chú I-é-su
( Mt 26: 69-75; Lk 22: 56-62; Ih 18, 15-18, 25-27)
Piat-tò͘ iáu tī ē-bīn gōa-tiâⁿ ê sî, ū chi̍t-ê tōa-chè-si ê lú-pī kiâⁿ óa-.lâi,
14:67 Khòaⁿ tio̍h Piat-tò͘ teh hang-hóe, chiū ti̍t-ti̍t kā i siòng, kóng, " Lí mā bat kah hit-ê Na-cha-lia̍t lâng I-é-su tàu-tīn. "
14:68 Piat-tò͘ m̄ sêng-jīn kóng, " Góa m̄-chai, mā bē liáu-kái lí teh kóng siáⁿ-mi̍h. " Piat-tò͘ chiū chhut-khì kàu chêng-tiâⁿ. Hit sî, ke chiū thî.
14:69 Hitê lú-pī koh khòaⁿ tio̍h i, kā piⁿ-á teh khiā ê lâng kóng, " Chit-ê lâng mā sī in hit tiong-kan ê chi̍t-ê. " Piat-tò͘ koh m̄ sêng-jīn.
14:70 Kòe bô gōa kú, piⁿ-á teh khiā ê koh tùi Piat-tò͘ kóng, " Lí khak-si̍t kah in kâng tóng, in-ūi lí mā sī Ga-lí-la-iah lâng. "
14:71 Piat-tò͘ chiū chiùchōa kóng, " Lín só͘ kóng hit-ê lâng góa m̄ bat. "
14:72 Hit sî, ke chiū thî tē-jī pái. Piat-tò͘ siūⁿ-khí I-é-su kā i kóng ê ōe, " Ke thî nn̄g pái í-chêng, lí ē saⁿ pái m̄ jīn góa ", chiū tōa-siaⁿ thî-khàu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。