馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 Koan-hē lî-hun ê Kà-sī
( Mt 19: 1-12)
I-é-su lī-khui hia lâi-kàu Iô-tá-iah tē-khu, kòe-khì Iol-tàn hô hit pêng. Kûn-chiòng koh chū-chi̍p khì I-é-su hia, I koh chiàu-siông kà-sī in.
10:2 Ū chi̍t-kóa Hoa-lí-sái phài ê lâng beh chhì-thàm I-é-su, óa-lâi mn̄g I kóng, " Lâng kám thang lî i ê bó͘? "
10:3 I-é-su ìn kóng, " Mô͘-se ê lu̍t-hoat án-chóaⁿ kui-tēng? "
10:4 In kóng, " Mô͘-se ín-chún lâng siá lî-hun-su lâi lî i ê bó͘. "
10:5 I-é-su kā in kóng, " Mô͘-se In-ūi lín ê sim ngē, chiah chè-tēng chit-ê kài-bēng hō͘ lín.
10:6 Chóng-.sī, goân-khí-thâu, Siōng-tè chhòng-chō lâng ū lâm ū lí. (chù, CSK 1: 27)
10:7 In-ūi ánne, chapo͘ lâng tio̍h lī-khui pē-bú lâi kah i ê bó͘ kiat-liân;
10:8 Nn̄g-ê chiâⁿ-chò chi̍t thé. (chù, CSK 2:24) Án-ne, in m̄-sī nn̄g-ê, sī chiâⁿ-chò chi̍t thé.
10:9 Só͘-í, Siōng-tè só͘ phòe-ha̍p ê, lâng m̄ thang kā i thiah-sòaⁿ. "
10:10 Ji̍p-khì chhù lāi, bûn-tô͘ koh mn̄g I-é-su chit-ê būn-tê.
10:11 I-é-su kā in kóng, " Lâng nā lî i ê bó͘ koh chhōa pa̍t-ê chabó͘ lâng, to̍h-sī hoān kan-îm lâi ko͘-hū i ê bó͘;
10:12 Bó͘ nā khì-sak i ê tiōng-hu lâi kè pa̍t-ê ang, mā sī hoān kan-îm. "
10:13 I-é-su Chiok-hok Sè-hàn Gín-á
( Mt 19: 13-15; Lk 18: 15-17)
Ū lâng chhōa sè-hàn gín'á lâi I-é-su hia, beh hō͘ I-é-su hōaⁿ-chhiú chiok-hok. Bûn-tô͘ kā in chek-pī.
10:14 I-é-su khòaⁿ-.tio̍h, chin bô hoaⁿ-hí, kā bûn-tô͘ kóng, " Hō͘ hiahê sè-hàn gín'á lâi góa chia, m̄ thang kā in chó͘-tòng. In-ūi chhin-chhiūⁿ chit khoán gín'á ê lâng, chiah ē-tàng chiâⁿ-chò Siōng-tè kok-tō͘ ê chú-bîn.
10:15 Góa si̍t-chāi kā lín kóng, nā bô chhin-chhiūⁿ gín'á ánne chiap-siū Siōng-tè kok-tō͘, choa̍t-tùi bē tàng ji̍p-.khì. "
10:16 I-é-su chiū kā gín'á phō khí-.lâi, kā in hōaⁿ-chhiú chiok-hok.
10:17 Hó-gia̍h lâng ê Gî-būn
( Mt 19: 16-30; Lk 18: 18-30)
I-é-su chhut-khì tī lō͘-.ni̍h, ū chi̍t-ê lâng cháu-lâi kūi tī I ê bīn-chêng, mn̄g kóng, " Hó ê lāu-su ah, góa tio̍h án-chóaⁿ chò chiah ē-tàng tit tio̍h éng-oán ê oa̍h-miā? "
10:18 I-é-su kā i kóng, " Lí ná ē chheng-ho͘ góa sī hó ê? Siōng-tè í-gōa bô chi̍t-ê sī hó ê.
10:19 Chiahê kài-bēng lí í-keng lóng chai, M̄-thang thâi-sí-lâng; M̄-thang kan-îm; M̄-thang thau-the̍h; M̄-thang chò ké ê kiàn-chèng; M̄-thang khek-khui lâng; Tio̍h hàu-kèng lí ê pē-bú. " (chù, CAG 12:16)
10:20 Hitê lâng ìn kóng, " Lāu-su ah, chiahê góa tùi sè-hàn to̍h lóng ū teh chun-siú. "
10:21 I-é-su chù-ba̍k kā i khòaⁿ, ēng thiàⁿ-sim kā i kóng, " Lí iáu khiàm chi̍t hāng, lí tio̍h khì bē lí só͘-ū ê châi-sán lâi hō͘ sànchhiah lâng. Án-ne, lí chiū ū chek-chū châi-pó tī thiⁿ-téng; jiân-āu chiah lâi tòe góa. "
10:22 Hitê lâng thiaⁿ tio̍h chiahê ōe, bīn chiū sit-sek, iu-thâu kat-bīn lī-khui I-é-su, in-ūi i ū chin chē châi-sán.
10:23 I-é-su kā kûn-chiòng khòaⁿ chi̍t liàn chiah tùi bûn-tô͘ kóng, " Hó-gia̍h lâng beh ji̍p Siōng-tè kok-tō͘ chin khùn-lān! "
10:24 Bûn-tô͘ thiaⁿ-liáu chiahê ōe, kám-kak chin kî-koài. I-é-su koh kóng, " Sè-kiáⁿ, óa-khò chîⁿ-châi beh ji̍p Siōng-tè kok-tō͘ chin-chiàⁿ khùn-lân!
10:25 Lo̍k-tô chhng-kòe chiam-phīⁿ pí hó-gia̍h lâng ji̍p Siōng-tè kok-tō͘ iáu khah kán-tan. "
10:26 Bûn-tô͘ koh khah tio̍h-kiaⁿ, khí gî-būn, kóng, " Án-ne siáⁿ lâng chiah ē-tàng tit-kiù? "
10:27 I-é-su chù-ba̍k kā in khòaⁿ, kóng, " Chit-hāng tāichì lâng chò bē kàu; tùi Siōng-tè lâi kóng m̄-sī ánne, in-ūi Siōng-tè ta̍k hāng lóng ē. "
10:28 Piat-tò͘ chiū tùi I-é-su kóng, " Goán í-keng pàng-sak it-chhè lâi tòe Lí à. "
10:29 I-é-su ìn kóng, " Góa si̍t-chāi kā lín kóng, lâng nā ūi tio̍h góa kah hok-im ê iân-kò͘ lâi pàng-sak chhù-the̍h, hiaⁿ-tī, chí-mōe, lāu-bú, lāu-pē, kiáⁿ-jî, chhân-hn̂g,
10:30 In tī kim-sè ē tit tio̍h pah pōe ê chhù-the̍h, hiaⁿ-tī, chí-mōe, lāu-bú, kiáⁿ-jî, chhân-hn̂g, tông-sî mā ē siū pek-hāi; m̄ koh, tī lâi-sè in ē tit tio̍h éng-oán ê oa̍h-miā.
10:31 Chóng-.sī, chin chē chò thâu-chêng ê lâng ē piàn-chò lō͘-bóe, lō͘-bóe ê lâng mā ē piàn-chò thâu-chêng. "
10:32 I-é-su Tē-saⁿ pái Ī-giân I ê Sí-bông kah Koh-oa̍h
( Mt 20: 17-19; Lk 18: 31-34)
I-é-su kah bûn-tô͘ chiūⁿ Ê-lú-sa-lèm. Tī lō͘-.ni̍h, I-é-su kiâⁿ tī thâu-chêng, bûn-tô͘ tio̍h-kiaⁿ kah gāng-.khì, kin-tòe ê lâng mā chin kiaⁿ-hiâⁿ. I-é-su koh chhōa cha̍p-jī sù-tô͘ khì piⁿ-á, kā I teh beh tú-.tio̍h ê tāichì kā in kóng.
10:33 I kóng, " Chit-má lán beh chiūⁿ Ê-lú-sa-lèm, Jîn-chú ē hông chhut-bē khì kau hō͘ hiahê chè-si-tiúⁿ kah keng-ha̍k kàu-su. In ē kā I tēng sí-chōe, koh kā I kau hō͘ gōa-pang lâng.
10:34 In ē kā I hì-lāng, phùi nōa, piⁿ-phah, hāi-sí, saⁿ ji̍t āu I ē koh oa̍h. "
10:35 Iâ-kop kah Iô-há-neh ê Iau-kiû
( Mt 20:20-28)
Jiân-āu Che-beh-tái ê kiáⁿ Iâ-kop kah Iô-há-neh óa-lâi kā I-é-su kóng, " Lāu-su ah, kiû Lí tap-èng goán tùi Lí só͘ kiû ê tāichì. "
10:36 I-é-su mn̄g kóng, " Lín ài góa ūi lín chò siáⁿ-mi̍h? "
10:37 In kóng, " Tī Lí tit tio̍h êng-kng ê sî, kiû Lí hō͘ goán chi̍t-ê chē Lí ê chiàⁿ pêng, chi̍t-ê chē Lí ê tò pêng. "
10:38 I-é-su kā in kóng, " Lín m̄-chai kakī teh kiû siáⁿ-mi̍h. Góa só͘ lim ê poe, lín kám ē-tàng lim? Góa siū ê sé-lé, lín kám ē-tàng siū? "
10:39 In kóng, " Goán ē. " I-é-su kā in kóng, " Góa só͘ lim ê poe, lín beh lim, góa só͘ siū ê sé-lé, lín beh siū.
10:40 Chóng-.sī, chē góa ê chiàⁿ pêng á-.sī tò pêng, m̄-sī góa ē-tàng chò chú. Siōng-tè ūi tio̍h siáⁿ lâng chún-pī, chiū ē hō͘ hit-ê lâng. "
10:41 Kî-tha cha̍p-ê bûn-tô͘ thiaⁿ-.tio̍h, chiū tùi Iâ-kop kah Iô-há-neh siū-khì.
10:42 I-é-su kiò in lâi, kā in kóng, " Lín chai gōa-pang lâng ê tiong-kan, hō͘ lâng chun-chò thóng-tī-chiá ê lâng ē chò chú lâi kā in tī-lí, in ê koaⁿ-oân mā ū koân kā in koán-hat.
10:43 To̍k-to̍k lín tiong-kan bô eng-kai ánne. Lín tiong-kan ài beh chò tōa ê lâng tio̍h chò chèng lâng ê chhe-ēng;
10:44 Lín tiong-kan ài beh chò thâu ê lâng tio̍h chò chèng lâng ê lô͘-po̍k.
10:45 In-ūi Jîn-chú lâi chit-ê sè-kan m̄-sī beh hō͘ lâng ho̍k-sāi, hoán-tńg sī beh lâi ho̍k-sāi lâng, sīm-chì hi-seng kakī ê sèⁿ-miā lâi sio̍k-hôe chin chē lâng. "
10:46 I-é-su I-hó Chheⁿ-mê ê Ba-tí-mái
( Mt 20: 29-34; Lk 18: 35-43)
I-é-su kah bûn-tô͘ lâi-kàu I-é-lī-kho siâⁿ. In kah chi̍t-tōa-tīn lâng chhut I-é-lī-kho siâⁿ ê sî, ū chi̍t-ê chheⁿmê-.ê khit-chia̍h, Tí-mái ê kiáⁿ Ba-tí-mái, chē tī lō͘ piⁿ.
10:47 Hitê chheⁿmê-.ê khit-chia̍h thiaⁿ tio̍h na-cha-lia̍t lâng I-é-su tùi hia keng-kòe, chiū tōa-siaⁿ hoah, " Ta-bi̍t ê kiáⁿ-sun, I-é-su, khó-liân góa! "
10:48 Chin chē lâng kā i chek-pī, kiò i tiām-tiām, m̄ koh, i koh khah tōa-siaⁿ hoah, " Ta-bi̍t ê kiáⁿ-sun ah, khó-liân góa! "
10:49 I-é-su thêng lo̍h-.lâi, kóng, " Kiò i lâi. " In chiū kiò chheⁿmê-.ê lâi, kā i kóng, " Hòng-sim, khí-.lâi, I teh kiò lí. "
10:50 Chheⁿ-mê ê chiū pàng-lo̍h i ê saⁿ, thiàu khí-lâi khì-kàu I-é-su hia.
10:51 I-é-su kā i kóng, " Lí ài góa kā lí chò siáⁿ-mi̍h? " Chheⁿ-mê-ê kóng, " Lāu-su, kiû Lí hō͘ góa ē koh khòaⁿ-kìⁿ. "
10:52 I-é-su kā i kóng, " Lí tńg-.khì, lí ê sìn-sim í-keng hō͘ lí tit tio̍h i hó. " Chheⁿ-mê ê sûi-sî koh ē khòaⁿ-kìⁿ, chiū tòe I-é-su khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。