馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
9:1 I-é-su koh kā in kóng, " Góa si̍t-chāi kā lín kóng, khiā tī chia ê, ū lâng iáu-bōe sí í-chêng, ē khòaⁿ tio̍h Siōng-tè kok-tō͘ chhiong-móa tōa koân-lêng lîm-kàu. "
9:2 I-é-su Kái-piàn Hêng-siōng
( Mt 17: 1-13; Lk 9: 28-36)
Kòe la̍k ji̍t āu, I-é-su kantaⁿ chhōa Piat-tò͘, Iâ-kop kah Iô-há-neh peh-chiūⁿ chi̍t chō koân soaⁿ. I-é-su tī in ê bīn-chêng kái-piàn hêng-siōng.
9:3 I ê saⁿ pe̍h-siaksiak koh chhàn-lān, sè-kan ê phiò-pò͘ sai-hū mā bē tàng phiò kah hiahni̍h pe̍h.
9:4 In khòaⁿ-kìⁿ E-li-iah kah Mô͘-se chhut-hiān kah I-é-su teh kóng ōe.
9:5 Piat-tò͘ tùi I-é-su kóng, " Lāu-su, lán tī chia chin hó, goán lâi tah saⁿ-keng liâu-á, chi̍t keng hō͘ Lí, chi̍t keng hō͘ Mô͘-se, chi̍t keng hō͘ E-li-iah. "
9:6 Piat-tò͘ ē ánne kóng sī in-ūi i chin tio̍h-kiaⁿ, soah m̄-chai tio̍h án-chóaⁿ kóng chiah hó.
9:7 Hit sî, ū chi̍t phiàn hûn kā in tah-teh, koh tùi hûn-.ni̍h chhut siaⁿ kóng, " Chit-ê sī góa só͘ thiàⁿ ê Kiáⁿ, lín tio̍h thiaⁿ I ê ōe. "
9:8 In sûi-sî khòaⁿ sì-kho͘-ûi, bô khòaⁿ tio̍h pòaⁿ-lâng, chí ū I-é-su kah in tī hia.
9:9 In lo̍h soaⁿ ê sî, I-é-su bēng-lēng in kóng, " Jîn-chú iáu-bōe tùi sí-lâng tiong koh-oa̍h chìn-chêng, m̄ thang kā lín só͘ khòaⁿ-.tio̍h ê tāichì kā lâng kóng. "
9:10 Bûn-tô͘ kā I-é-su ê ōe kì-tiâu tī sim-lāi, hō͘-siong gī-lūn " Tùi sí-lâng tiong koh-oa̍h " Chit-kù ōe sī siáⁿ-mi̍h ì-sù.
9:11 Bûn-tô͘ koh mn̄g I-é-su kóng, " Sī án-chóaⁿ keng-ha̍k kàu-su ē kóng, E-li-iah tio̍h tāi-seng lâi-kàu? "
9:12 I-é-su ìn kóng, " E-li-iah kó-jiân ē tāi-seng lâi kā it-chhè tiông-sin chéng-tùn; kám sī ū ánne kì-chài kóng, Jîn-chú tio̍h siū chin chē khó͘-lān koh hō͘ lâng khòaⁿ-khin?
9:13 M̄ koh, góa kā lín kóng, tútú chiàu keng-tián só͘ kì-chài, E-li-iah í-keng lâi ā, jî-chhiáⁿ lâng chiàu kakī ê ì-sù kā i khoán-thāi. "
9:14 I-é-su Tháu-pàng Siâ-sîn Hū-sin ê Gín-á
( Mt 17: 14-20; Lk 9: 37-43a)
I-é-su kah Piat-tò͘, Iâ-kop, Iô-há-neh lâi-kàu kî-tha ê bûn-tô͘ hia, khòaⁿ tio̍h kui tōa-tīn lâng kā in ûi-.leh, mā ū keng-ha̍k kàu-su kah in teh piān-lūn.
9:15 Kûn-chiòng khòaⁿ tio̍h I-é-su, chin tio̍h-kiaⁿ, soah gāng-.khì, sûi-sî cháu-óa-lâi kā I chhéng-an.
9:16 I-é-su mn̄g in kóng, " Lín kah in teh piān-lūn siáⁿ-mi̍h? "
9:17 Chèng lâng tiong-kan ū chi̍t-ê lâng ìn kóng, " Lāu-su, góa chhōa góa ê kiáⁿ kàu Lí chia, i hō͘ kúi hū-sin soah piàn é-káu.
9:18 Bô-lūn tī siáⁿ-mi̍h só͘-chāi, kúi nā hū-sin chiū kā i siak-tó, i chiū lâu-nōa, kā chhùi-khí-kin koh kui seng-khu ngē-khok-khok. Góa ū chhiáⁿ Lí ê bûn-tô͘ kā i kóaⁿ kúi, m̄ koh, in lóng bô hoat-tō͘. "
9:19 I-é-su ìn kóng, " Ai-ah! Chit-ê sè-tāi ê lâng ná ē hiahni̍h bô sìn-sim? Góa tio̍h koh kah lín tòa gōa kú? Góa tio̍h koh jím-nāi lín gōa kú? Chhōa lí hit-ê hō͘ kúi hū-sin ê kiáⁿ lâi góa chia. "
9:20 In chiū chhōa i lâi I-é-su hia. Hitê kúi chi̍t-ē khòaⁿ tio̍h I-é-su, chiū sûi-sî hō͘ hit-ê gín'á tōa thiu-chhoah, kā i siak lo̍h-khì thô͘-kha, hō͘ i liàn-lâi liàn-khì koh lâu-nōa.
9:21 I-é-su mn̄g gín'á ê lāu-pē kóng, " I hō͘ kúi hū-sin gōa kú à? " Hitê lāu-pē kóng, " Chū sè-hàn to̍h ánne.
9:22 Kúi tiāⁿtiāⁿ kā i hiat-lo̍h hóe, á-.sī hiat-lo̍h chúi, beh kā i hāi-sí. Taⁿ Lí nā chò ē kàu, kiû Lí khó-liân goán, lâi kā goán pang-chān. "
9:23 I-é-su kā i kóng, " Lí cháiⁿ-iūⁿ kóng, ' Lí nā ē '? Ū sìn-sim ê lâng ta̍k hāng lóng ē. "
9:24 Gín-á ê lāu-pē sûi-sî tōa-siaⁿ hoah, " Góa sìn à; góa ê sìn-sim nā bô kàu, kiû Lí tio̍h pang-chān góa. "
9:25 I-é-su khòaⁿ tio̍h kui tīn lâng cháu-óa-.lâi, chiū chek-pī hit-ê siâ-sîn kóng, " Lí chit-ê é-káu koh chhàu-hīⁿ-lâng ê kúi, góa bēng-lēng lí lī-khui chit-ê gín'á, m̄-chún lí koh ji̍p-.khì. "
9:26 Hitê kúi tōa-siaⁿ hoah, hō͘ hit-ê gín'á tōa thiu-chhoah liáu-āu chiah chhut-.khì. Hitê gín'á piàn kah ná sí-lâng. Só͘-í, chin chē lâng kóng, " I sí-.khì à. "
9:27 M̄ koh, I-é-su khan i ê chhiú, kā i hû khí-.lâi, i chiū khí-.lâi.
9:28 I-é-su ji̍p-khì chhù lāi, bûn-tô͘ thau-thau-á mn̄g I kóng, " Sī án-chóaⁿ goán bô hoat-tō͘ kóaⁿ hit-ê kúi? "
9:29 I-é-su ìn kóng, " Chit khoán kúi tio̍h khò kî-tó, chiah ū hoat-tō͘ kā i kóaⁿ chhut-.khì. "
9:30 I-é-su koh Ī-giân I ê Sí-bông kah Koh-oa̍h
( Mt 17: 22-23; Lk 9: 43b-45)
I-é-su kah bûn-tô͘ tùi hia keng-kòe Ga-lí-la-iah séng, I-é-su bô ài lâng chai I tī tó-ūi.
9:31 In-ūi I teh kà-sī bûn-tô͘ kóng, " Jîn-chú ē hō͘ lâng chhut-bē, lâng ē kā I hāi-sí. Sí-liáu saⁿ ji̍t liáu-āu, I ē koh oa̍h. "
9:32 Bûn-tô͘ bē bêng-pe̍k chit kù ōe ê ì-sù, koh m̄-káⁿ mn̄g I.
9:33 Siáⁿ lâng Siōng Tōa
( Mt 18: 1-5; Lk 9: 46-48)
I-é-su kah bûn-tô͘ lâi-kàu Ka-peh-ná-um. I-é-su tī chhù-.ni̍h ê sî, mn̄g in kóng, " Lín tī lō͘-.ni̍h teh gī-lūn siáⁿ-mi̍h? "
9:34 Bûn-tô͘ tiām-tiām, in-ūi in tī lō͘-.ni̍h ū hō͘-siong cheng-lūn siáⁿ lâng siōng tōa.
9:35 I-é-su chē lo̍h-.lâi, kiò cha̍p-jī sù-tô͘ óa-.lâi, kā in kóng, " Lâng nā ài beh chò tē-it, tio̍h chò chèng lâng ê lō͘-bóe, mā tio̍h chò chèng lâng ê chhe-ēng. "
9:36 I-é-su chiū chhōa chi̍t-ê gín'á lâi hō͘ i khiā tī in tiong-kan, koh kā i phō khí-.lâi, tùi bûn-tô͘ kóng,
9:37 " Lâng nā ūi tio̍h góa ê miâ lâi chiap-la̍p chi̍t-ê chit khoán gín'á ê, to̍h-sī chiap-la̍p góa; chiap-la̍p góa ê lâng, m̄-sī chiap-la̍p góa, sī chiap-la̍p chhe góa lâi ê hit ūi. "
9:38 Jīn-bat Lán ê Bêng-iú
( Lk 9: 49-50)
Iô-há-neh kā I-é-su kóng, " Lāu-su, goán ū khòaⁿ tio̍h chi̍t-ê lâng hōng Lí ê miâ teh kóaⁿ kúi. Goán kā i chó͘-tòng, in-ūi i bô teh tòe lán kiâⁿ. "
9:39 I-é-su kóng, " M̄-thang kā i chó͘-tòng, in-ūi bô lâng hōng góa ê miâ kiâⁿ sîn-jiah, sûi-sî hoán tńg-lâi kóng góa ê pháiⁿ ōe.
9:40 Bô hoán-tùi lán ê lâng to̍h-sī chàn-sêng lán.
9:41 Góa si̍t-chāi kā lín kóng, in-ūi lín sio̍k Ki-tok, bô-lūn siáⁿ lâng ēng chi̍t poe chúi hō͘ lín lim, chit-ê lâng it-tēng ē tit tio̍h pò-siúⁿ. "
9:42 Ín-khí Lâng Hoān-chōe ê Tāi-chì
( Mt 18: 6-9; Lk 17: 1-2)
I-é-su kóng, " Bô-lūn siáⁿ lâng hō͘ sìn góa ê lâng tiong-kan bî-sè ê chi̍t-ê hoān chōe, hit-ê lâng lêng-khó hō͘ lâng ēng tōa chio̍h-bō pa̍k tòa ām-kún, hiat lo̍h-khì hái-.ni̍h.
9:43 Lí ê chi̍t ki chhiú nā ín-khí lí hoān chōe, tio̍h kā i chām hiat-ka̍k; lêng-khó kiám chi̍t ki chhiú phòa-siùⁿ lâi ji̍p-khì tī éng-oán oa̍h, pí siang chhiú hó-hó lo̍h tē-ga̍k, hō͘ bē hoa-khì ê hóe sio khah hó.
9:44 Tī hia teh kā in chia̍h ê thâng bē sí, teh kā in sio ê hóe mā bē hoa-khì. (chù, ū ê chhau-pún bô chit chat )
9:45 Lí ê chi̍t ki kha nā ín-khí lí hoān chōe, tio̍h kā i chām hiat-ka̍k; lêng-khó kiám chi̍t ki kha phòa-siùⁿ lâi ji̍p-khì éng-oán oa̍h, pí siang kha hó-hó lo̍h tē-ga̍k khah hó.
9:46 Tī hia teh kā in chia̍h ê thâng bē sí, teh kā in sio ê hóe mā bē hoa-khì. (chù, ū ê chhau-pún bô chit chat )
9:47 Lí ê chi̍t lúi ba̍k-chiu nā ín-khí lí hoān chōe, tio̍h kā i ó͘ hiat-ka̍k; lêng-khó kiám chi̍t lúi ba̍k-chiu phòa-siùⁿ lâi ji̍p-khì Siōng-tè kok-tō͘, pí nn̄g lúi ba̍k-chiu hó-hó lo̍h tē-ga̍k khah hó.
9:48 Tī hia teh kā in chia̍h ê thâng bē sí, teh kā in sio ê hóe mā bē hoa-khì. (chù, ISI 66:24. Ū ê chhau-pún bô chit chat )
9:49 In-ūi ta̍k lâng lóng tio̍h ēng hóe lâi liān, chhin-chhiūⁿ ēng iâm sīⁿ.
9:50 Iâm pún-sin chin ū lō͘-ēng, iâm nā sit-khì i ê kiâm-bī, beh ēng siáⁿ-mi̍h lâi hôe-ho̍k i ê bī? Lín ê lāi-bīn eng-kai tio̍h ū iâm ê chok-iōng, tāi-ke tio̍h hō͘-siong hô-hó. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。