馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
26:1 Hāi-sí I-é-su ê Kè-bô͘
( Mk 14: 1-2; Lk 22: 1-2; Ih 11: 45-53)
I-é-su kóng chiahê ōe liáu-āu, chiū kā bûn-tô͘ kóng,
26:2 " Lín chai koh kòe nn̄g ji̍t to̍h-sī Pôaⁿ-kòe-cheh, Jîn-chú ē hō͘ lâng chhut-bē khì tèng tī si̍p-jī-kè téng. "
26:3 Hit sî, chè-si-tiúⁿ kah bîn-kan ê tiúⁿ-ló chū-chi̍p tī tōa-chè-si Kai-a-hoah ê kong-koán.
26:4 In chò-hóe chham-siông beh ēng kè-bô͘ lâi lia̍h I-é-su, kā I sat-hāi.
26:5 Chóng-.sī, in kóng, " M̄-thang tī cheh-kî tiong-kan hē chhiú, khióng-kiaⁿ jîn-bîn ē khí pō-tōng. "
26:6 Hū-jîn lâng Tò Iû tī I-é-su ê Thâu-khak Téng
( Mk 14: 3-9; Ih 12: 1-8)
Ū chi̍t ji̍t I-é-su tī Bē-tha-niah, khì thái-ko pēⁿ-lâng Sí-mòng ê chhù teh chē-toh chia̍h pn̄g ê sî,
26:7 Ū chi̍t-ê hū-jîn-lâng tòa ge̍k-pân, lāi-bīn té hui-siông ko-kùi ê phang-iû, kiâⁿ óa-lâi kā phang-iû piàⁿ tī I-é-su ê thâu-khak téng.
26:8 Bûn-tô͘ khòaⁿ tio̍h chiū siū-khì, kóng, "Ná tio̍h hiahni̍h lōng-hùi?
26:9 Chit koàn phang-iû ē-tàng bē chin chē chîⁿ lâi kiù-chè sànchhiah lâng. "
26:10 I-é-su chai chiū kā in kóng, " Lín ná ē beh thiau-lân chit-ê hū-jîn-lâng? I ūi tio̍h góa chò chi̍t hāng hó sū.
26:11 Lín put-sî to ū sànchhiah lâng kah lín chò-hóe, m̄ koh, góa bô tiāⁿtiāⁿ kah lín tī-.leh.
26:12 I tò phang-iû tī góa ê seng-khu sī teh chún-pī góa ê bâi-chòng.
26:13 Góa si̍t-chāi kā lín kóng, chit-ê hok-im bô-lūn thoân kàu phó͘-thiⁿ-ē siáⁿ-mi̍h só͘-chāi, lâng ē kóng-khí chit-ê hū-jîn-lâng só͘ chò ê lâi kì-liām i. "
26:14 Iô-tah Chhut-bē I-é-su
( Mk 14: 10-11; Lk 22: 3-6)
Hit sî, cha̍p-jī sù-tô͘ tiong-kan ū chi̍t-ê kiò-chò Ka-lio̍k lâng Iô-tah, i khì kìⁿ hiahê chè-si-tiúⁿ,
26:15 Kā in kóng, " Góa nā kā I-é-su kau hō͘ lín, lín beh hō͘ góa siáⁿ-mi̍h? " In chiū the̍h saⁿ-cha̍p-ê gîn-á hō͘ i.
26:16 Tùi hit sî khí, Iô-tah it-ti̍t teh chhōe ki-hōe beh kā I-é-su kau hō͘ in.
26:17 Chún-pī Pôaⁿ-kòe-cheh ê Boán-chhan
( Mk 14: 12-21; Lk 22: 7-14, 21-23; Ih 13: 21-30)
Tû-kàⁿ-cheh ê thâu chi̍t ji̍t, bûn-tô͘ lâi mn̄g I-é-su, " Lí ài goán tī siáⁿ-mi̍h só͘-chāi, kā Lí chún-pī chia̍h Pôaⁿ-kòe-cheh ê boán-chhan? "
26:18 I-é-su kóng, " Lín ji̍p-khì siâⁿ lāi chhōe bó͘ chi̍t-ê lâng, kā i kóng, ' Goán lāu-su ū kóng, góa ê sî í-keng kàu à, góa beh kah góa ê bûn-tô͘ tī lí ê chhù siú Pôaⁿ-kòe-cheh. '"
26:19 Bûn-tô͘ chiàu I-é-su só͘ hoan-hù ê khì chún-pī Pôaⁿ-kòe-cheh ê boán-chhan.
26:20 Ji̍t chi̍t ē àm, I-é-su chiū kah cha̍p-jī sù-tô͘ chē-toh.
26:21 Teh chia̍h ê sî, I-é-su kóng, " Góa si̍t-chāi kā lín kóng, lín tiong-kan ū chi̍t-ê lâng ē kā góa chhut-bē. "
26:22 In chin iu-būn, chi̍t-ê chi̍t-ê khai-sí mn̄g I-é-su kóng, " Chú ah, m̄-sī góa ho͘ⁿh? "
26:23 I-é-su ìn kóng, " Kah góa tâng-chê chhun chhiú khì pôaⁿ-.ni̍h ùn chia̍h-mi̍h hit-ê beh kā góa chhut-bē.
26:24 Jîn-chú ē chiàu keng-tián só͘ kì-chài lâi lī-khui sè-kan, m̄ koh, chhut-bē Jîn-chú ê lâng ū chai-hō lah! Hitê lâng lêng-khó bô chhut-sì khah hó. "
26:25 Beh chhut-bē I-é-su ê Iô-tah mā mn̄g kóng, " Lāu-su, chóng m̄-sī góa ho͘ⁿh? " I-é-su ìn kóng, " Lí kakī kóng chhut-lâi à. "
26:26 Chú ê Boán-chhan
( Mk 14:22-26; Lk 22:15-20; 1Klt 11:23-25)
In teh chia̍h ê sî, I-é-su the̍h piáⁿ, chiok-siā liáu-āu peh-khui, pun hō͘ bûn-tô͘, kóng, " The̍h khì chia̍h; che sī góa ê seng-khu. "
26:27 Jiân-āu, phâng poe chiok-siā liáu-āu, phâng hō͘ bûn-tô͘, kóng, " Lín lóng tio̍h lim chit-ê poe,
26:28 In-ūi che sī góa ê hoeh, sī li̍p-iok ê hoeh, ūi tio̍h chin chē lâng lâi lâu chhut ê, beh hō͘ in ê chōe tit tio̍h sià-bián.
26:29 Góa kā lín kóng, tùi taⁿ khí, kàu tī thian-kok kah lín lim hit-ê sin ê phû-tô chiú í-chêng, góa choa̍t-tùi bē koh lim chit khoán ê phû-tô chiú. "
26:30 In gîm-si liáu-āu, chiū chhut-hoat khì Kaⁿ-ná soaⁿ.
26:31 I-é-su Ī-giân Piat-tò͘ M̄-jīn I
( Mk 14:27-31; Lk 22:31-34; Ih 13:36-38)
Jiân-āu I-é-su kā in kóng, " Kim-mê lín lóng ē ūi tio̍h góa lâi sit-khì sìn-sim, pàng-sak góa, in-ūi ū kì-chài, góa beh phah bo̍k-chiá, iûⁿ-kûn chiū sì-sòaⁿ. (chù, CKL 13:7)
26:32 M̄ koh, góa koh-oa̍h liáu-āu ē pí lín tāi-seng khì Ga-lí-la-iah séng. "
26:33 Piat-tò͘ ìn I-é-su kóng, " Ká-sú in tāi-ke ūi tio̍h Lí lâi sit-khì sìn-sim, pàng-sak Lí, góa mā éng-oán bē pàng-sak Lí. "
26:34 I-é-su kā Piat-tò͘ kóng, " Góa si̍t-chāi kā lí kóng, eng-àm ke iáu-bōe thî í-chêng, lí ē saⁿ pái m̄ jīn góa. "
26:35 Piat-tò͘ ìn kóng, " Góa nā tio̍h kah Lí chò-hóe sí, góa mā choa̍t-tùi bē m̄-jīn Lí. " kî-tha ê bûn-tô͘ mā lóng ánne kóng.
26:36 I-é-su tī Gia̍t-se-má-neh Kî-tó
( Mk 14: 32-42; Lk 22: 39-46)
Jiân-āu I-é-su kah bûn-tô͘ khì-kàu chi̍t-ê kiò-chò Gia̍t-se-má-neh ê só͘-chāi. I tùi bûn-tô͘ kóng, " Lín tòa chia chē, thèng-hāu góa khì hia kî-tó. "
26:37 I-é-su chiū chhōa Piat-tò͘ kah Che-beh-tái ê nn̄g-ê kiáⁿ chò-hóe khì. I khí iu-būn, kám-kak hui-siông thòng-khó͘.
26:38 I-é-su kóng, " Góa ê sim iu-būn kah kiōng-beh sí-.khì, lín tòa chia kah góa chò-hóe kéng-séng. "
26:39 I-é-su chiū kiâⁿ khah chìn-chêng, bīn phak lo̍h-khì thô͘-kha kî-tó, kóng, " Góa ê Thiⁿ-pē ah, nā ē-tàng, kiû Lí hō͘ góa bián lim chit-ê poe. Chóng-.sī, m̄-sī chiàu góa só͘ ì-ài ê, tio̍h chiàu Lí ê chí-ì lâi chò. "
26:40 Jiân-āu I-é-su tńg-lâi bûn-tô͘ hia, khòaⁿ tio̍h in teh khùn, chiū kā Piat-tò͘ kóng, " Lín kám chin-chiàⁿ bô hoat-tō͘ mài khùn lâi kah góa chò-hóe kéng-séng chi̍t-tiám-cheng?
26:41 Tio̍h kéng-séng, tio̍h kî-tó, chiah bē siū bê-he̍k; lín ê sim-sîn ì-ài, m̄ koh, jio̍k-thé soah nńg-chiáⁿ. "
26:42 I-é-su tē-jī pái koh khì kî-tó, kóng, " Góa ê Thiⁿ-pē ah, góa nā bē tàng bián lim chit-ê poe, góa it-tēng tio̍h lim, goān Lí ê chí-ì si̍t-hiān. "
26:43 I-é-su tńg-.lâi, koh-chài khòaⁿ tio̍h in in-ūi ba̍k-chiu siap iáu teh khùn.
26:44 I-é-su lī-khui in koh khì, tē-saⁿ pái kî-tó, mā sī ēng kāng-khoán ê ōe kî-tó.
26:45 Liáu-āu I chiū tńg-lâi bûn-tô͘ hia, kā in kóng, " Taⁿ lín iáu teh khùn, iáu teh hioh-khùn, sī-.bô? Lín khòaⁿ, sî-kan í-keng beh kàu à, Jîn-chú teh beh hō͘ lâng chhut-bē, kau tī chōe-jîn ê chhiú-thâu.
26:46 Khí-.lâi, lán chò-hóe lâi-.khì. Lín khòaⁿ, chhut-bē góa ê lâng lâi ā. "
26:47 I-é-su siū Lia̍h
( Mk 14:43-50; Lk 22:47-53; Ιh 18:3-12)
I-é-su iáu teh kóng ōe ê sî, cha̍p-jī sù-tô͘ tiong-kan ê Iô-tah lâi-kàu-ūi. Ū kui tōa-tīn lâng gia̍h to kah thûi-á tòe chè-si-tiúⁿ kah bîn-kan ê tiúⁿ-ló chò-hóe lâi.
26:48 Hitê chhut-bē I-é-su ê lâng sū-sian ū kah in thò àm-hō kóng, " Góa kā I chim hit-ê lâng to̍h-sī I-é-su. Lín thang kā I lia̍h khí-.lâi. "
26:49 Iô-tah sûi-sî óa-khì I-é-su hia, tùi I kóng, " Lāu-su, pêng-an. " Chiū kā I chim.
26:50 I-é-su kā i kóng, " Pêng-iú, lí beh chò ê, kín khì chò. " Hiahê lâng chiū chìn-chêng hē chhiú, kā I-é-su lia̍h tiâu-tiâu.
26:51 Hut-jiân ū chi̍t-ê kah I-é-su tàu-tīn ê lâng chhun chhiú poe̍h to, tùi tōa-chè-si ê lô͘-po̍k phut lo̍h-.khì, kā chi̍t-pêng ê hīⁿ-á siah khí-.lâi.
26:52 I-é-su kā i kóng, " Kā lí ê to siu khí-.lâi, in-ūi gia̍h to ê lâng lóng ē sí tī to hā.
26:53 Lí siūⁿ kóng góa kám bē tàng kiû góa ê Thiⁿ-pē, chit sî ūi góa chhe-phài cha̍p-jī iâⁿ khah ke ê thiⁿ-sài lâi pó-hō͘ góa, sī-.bô?
26:54 Góa nā ánne chò, keng-tián só͘ kì-chài it-tēng ē hoat-seng ê chit-ê tāichì ná ē èng-giām? "
26:55 Hit sî, I-é-su tùi hiahê lâng kóng, " Lín gia̍h to kah thûi-á chhut-lâi lia̍h góa, chhin-chhiūⁿ beh lia̍h thó͘-húi, sī-.bô? Góa ta̍k ji̍t tī sèng-tiān lāi chē-.leh kà-sī lâng, lín bô lâi kā góa lia̍h.
26:56 Chóng-.sī, chiahê tāichì lóng í-keng si̍t-hiān, sī beh èng-giām sian-ti tī keng-tián só͘ kì-chài ê ōe. " Hit sî, bûn-tô͘ lóng pàng-sak I-é-su, tô-cháu-.khì.
26:57 I-é-su tī Gī-hōe Siū Sím-phòaⁿ
( Mk 14: 53-65; Lk 22: 54-5, 63-71; Ih 18: 13-14, 19-24)
Hiahê lia̍h I-é-su ê lâng ah I kàu tōa-chè-si Kai-a-hoah hia, keng-ha̍k kàu-su kah tiúⁿ-ló mā lóng í-keng chū-chi̍p tī hia.
26:58 Piat-tò͘ lī hn̄g-hn̄g teh tòe I-é-su lâi-kàu tōa-chè-si kong-koán ê lāi-tiâⁿ, ji̍p-khì lāi-bīn kah hiahê kéng-ōe chò-hóe chē, siūⁿ beh khòaⁿ hit-ê tāichì ê kiat-kio̍k.
26:59 Chè-si-tiúⁿ kah choân gī-hōe ê lâng it-ti̍t teh chhōe ké chèng-kì lâi kò I-é-su, thang kā I tēng sí-chōe.
26:60 Sûi-jiân chin chē lâng bû-kò I-é-su, m̄ koh, lóng chhōe bô chèng-kì. Chòe-āu ū nn̄g-ê lâng chhut-.lâi,
26:61 Kóng, " Chit-ê lâng bat kóng, ' Góa ū hoat-tō͘ húi-hoāi Siōng-tè ê tiān, saⁿ ji̍t lāi koh kā i khí khí-.lâi. '"
26:62 Tōa-chè-si khiā khí-lâi tùi I-é-su kóng, " Chiahê lâng teh kò Lí siáⁿ-mi̍h? Lí ná ē lóng bô beh tap-piān? "
26:63 M̄ koh, I-é-su lóng tiām-tiām. Tōa-chè-si koh kā I kóng, " Góa kí éng-oán oa̍h ê Siōng-tè, bēng-lēng Lí chiùchōa kā goán kóng, Lí chin-chiàⁿ sī Ki-tok, Siōng-tè ê Kiáⁿ, á m̄-sī. "
26:64 I-é-su ìn kóng, " Lí í-keng kóng à, m̄ koh, góa kā lín kóng, tùi taⁿ í-āu lín ē khòaⁿ-kìⁿ Jîn-chú chē tī Choân-lêng-.ê ê chiàⁿ pêng, chē thiⁿ-téng ê hûn kàng-lîm. " (chù, TNE 7:13)
26:65 Tōa-chè-si thiah-phòa gōa-saⁿ, kóng, " I í-keng kóng-chhut siat-to̍k Siōng-tè ê ōe ā, lán iáu koh su-iàu siáⁿ-mi̍h chèng-jîn? Taⁿ lín í-keng ū thiaⁿ tio̍h I siat-to̍k Siōng-tè à.
26:66 Lín siūⁿ kóng, beh án-chóaⁿ? " In ìn kóng, " Eng-kai kā I chhú sí-hêng. "
26:67 Jiân-āu in phùi nōa tī I-é-su ê bīn, kā I cheng, mā ū lâng kā I siàn chhùi-phóe,
26:68 Kóng, " Ki-tok ah, Lí sī sian-ti, taⁿ kā goán kóng, siáⁿ lâng kā Lí phah? "
26:69 Piat-tò͘ M̄-jīn I-é-su
( Mk 14: 66-72; Lk 22: 56-62; Ih 18: 15-18, 25-27)
Piat-tò͘ chē tī kong-koán ê gōa-tiâⁿ, ū chi̍t-ê lú-pī kiâⁿ óa-lâi kā i kóng, " Lí mā lóng ū teh kah Ga-lí-la-iah lâng I-é-su chò-hóe. "
26:70 Piat-tò͘ tī chèng lâng ê bīn-chêng m̄ sêng-jīn, kóng, " Góa m̄-chai lí teh kóng siáⁿ-mi̍h. "
26:71 Piat-tò͘ chhut-khì kàu mn̂g-kháu, koh ū chi̍t-ê lú-pī khòaⁿ tio̍h i, chiū kā tī hia ê lâng kóng, " Chit-ê lâng ū teh kah Na-cha-lia̍t lâng I-é-su chò-hóe. "
26:72 Piat-tò͘ koh chi̍t pái chiùchōa m̄ sêng-jīn, kóng, " Góa m̄ bat hit-ê lâng. "
26:73 Kòe bô gōa kú, tī piⁿ-á teh khiā ê lâng óa-lâi kā Piat-tò͘ kóng, " Lí khak-si̍t mā sī kah in kâng tóng, thiaⁿ lí ê khiuⁿ-kháu chiū chai. "
26:74 Piat-tò͘ koh chiùchōa kóng, " Góa m̄ bat hit-ê lâng. " Tú-tú hit sî, ke chiū thî.
26:75 Piat-tò͘ siūⁿ-khí I-é-su só͘ kóng ê ōe, " Ke thî chìn-chêng, lí ē saⁿ pái m̄ jīn góa. " I chiū chhut-khì gōa-bīn tōa-siaⁿ thî-khàu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。