馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
24:1 I-é-su Ī-giân Sèng-tiān Siū Húi-hoāi
( Mk 13: 1-2; Lk 21: 5-6)
I-é-su tùi sèng-tiān chhut-lâi tú teh kiâⁿ lō͘ ê sî, I ê bûn-tô͘ óa-lâi pò I khòaⁿ sèng-tiān ê kiàn-tio̍k-bu̍t.
24:2 M̄ koh, I-é-su ìn kóng, " Lín teh khòaⁿ chiahê kiàn-tio̍k-bu̍t, sī-.bô? Góa si̍t-chāi kā lín kóng, chiong-lâi tī chit-ê só͘-chāi bô kah chi̍t tè chio̍h ē sio-tha̍h, lóng ē tó kah pêⁿ-pêⁿ-pêⁿ. "
24:3 Chai-hō ê Khai-Sí
( Mk 13: 3-13; Lk 21: 7-19)
I-é-su tī Kaⁿ-ná soaⁿ teh chē ê sî, bûn-tô͘ su-hā lâi mn̄g I kóng, " Chhiáⁿ kā goán kóng, tang-sî ē hoat-seng chiahê tāichì? Lí ê chài-lîm kah sè-kài ê boa̍t-ji̍t ū siáⁿ-mi̍h tiāu-thâu? "
24:4 I-é-su ìn kóng, " Tio̍h kín-sīn, m̄ thang hō͘ lâng bê-he̍k khì.
24:5 In-ūi chin chē lâng ē mō͘-iōng góa ê miâ kóng, ' Góa sī Ki-tok' lâi bê-he̍k chin chē lâng.
24:6 Lín ē thiaⁿ tio̍h chiàn-cheng kah chiàn-cheng ê hong-siaⁿ, tio̍h kín-sīn m̄-bián kiaⁿ. Chiahê tāichì it-tēng ē hoat-seng, chóng-.sī, boa̍t-ji̍t iáu-bōe kàu.
24:7 In-ūi bîn-cho̍k ē khí-lâi kong-kek bîn-cho̍k, kok-ka ē khí-lâi kong-kek kok-ka; chin chē só͘-chāi ē hoat-seng ki-hng kah tē-tāng.
24:8 Chiahê tāichì lóng sī sán-hū chhui-chūn thòng-khó͘ ê khai-sí.
24:9 Hit sî, lín ē hō͘ lâng lia̍h-khì khó͘-to̍k, sīm-chì hô͘ lâng thâi-sí. Lín ē ūi tio̍h góa ê miâ hō͘ bān-pang oàn-hūn.
24:10 Hit sî, chin chē lâng ē sit-khì sìn-sim, hō͘-siōng kong-kek, pí-chhú oàn-hūn.
24:11 Koh ū chin chē ké sian-ti ē chhut-hiān lâi bê-he̍k chin chē lâng.
24:12 Put-hoat ê tāichì ná chēng-ka, chin chē lâng ê thiàⁿ-sim chiām-chiām léng-tām.
24:13 To̍k-to̍k jím-nāi kàu lō͘-bóe ê lâng ē tit tio̍h kiù.
24:14 Chit-ê thian-kok ê hok-im ē thoân-kàu phó͘-thiⁿ-ē, tùi bān-pang chò kiàn-chèng. Hit sî, boa̍t-ji̍t chiū ē kàu. "
24:15 Tōa Chai-lān
( Mk 13: 14-23; Lk 21: 20-24)
" Só͘-í, lín khòaⁿ tio̍h Siōng-tè thok sian-ti Ta-ni-el só͘ kóng hit-ê ' Khó-ò͘ⁿ ê húi-bia̍t chiá'khiā tī sîn-sèng ê só͘-chāi. ( tha̍k ê lâng tio̍h lí-kái chit kù ōe ê ì-sù )
24:16 Hit sî, tī Iô-tá-iah séng ê lâng tio̍h tô-cháu khì soaⁿ-.ni̍h;
24:17 Tī chhù téng ê lâng m̄ thang lo̍h-lâi the̍h i chhù lāi ê mi̍h-kiāⁿ;
24:18 Tī hn̂g-.ni̍h ê lâng m̄ thang tńg-khì hiaⁿh gōa-saⁿ.
24:19 Hitê sî-kî, ū sin-īn kah hō͘ eⁿ-á chia̍h leng ê hū-jîn-lâng si̍t-chāi chin put-hēng!
24:20 Lín tio̍h kî-tó, chiah bián-tit lín ê tô-cháu hoat-seng tī kôaⁿ-thiⁿ sî á-.sī An-hioh-ji̍t.
24:21 In-ūi hit-ê sî-kî ē ū tōa hoān-lān, sī tùi chhòng-chō ú-tiū kàu taⁿ m̄ bat ū ê, chiong-lâi mā choa̍t-tùi bē koh ū.
24:22 Siōng-tè nā bô kiám-chió hiahê ji̍t-chí, chiū bô chi̍t-ê lâng ē-tàng tit-kiù; to̍k-to̍k Siōng-tè ē ūi tio̍h I ê soán-bîn lâi kiám-chió hiahê ji̍t-chí.
24:23 " Hit sî, nā ū lâng kā lín kóng, ' Lín khòaⁿ, Ki-tok tī chia', á-.sī kóng, ' Ki-tok tī hia', lín m̄ thang siong-sìn.
24:24 In-ūi chi̍t-kóa ké Ki-tok kah ké sian-ti ē chhut-hiān, lâi kiâⁿ tōa sîn-jiah kah kî-sū, chīn-liōng beh bê-he̍k Siōng-tè ê soán-bîn.
24:25 Góa í-keng tāi-seng kā lín kóng à.
24:26 Só͘-í, nā ū lâng kā lín kóng, ' Lín khòaⁿ, Ki-tok tī khòng-iá. ', lín m̄ thang chhut-.khì; á-.sī kóng, ' Lín khòaⁿ, Ki-tok tī pâng-keng lāi. ', lín mā m̄ thang siong-sìn.
24:27 In-ūi chhin-chhiūⁿ sihnà tùi tang pêng teh sih, chiò kàu sai pêng, Jîn-chú ê chài-lîm mā ē chhin-chhiūⁿ ánne. "
24:28 " Ū si-thé ê só͘-chāi, eng-chiáu chiū ē chū-chi̍p khì hia. "
24:29 Jîn-chú ê Kàng-lîm
( Mk 13: 24-27; Lk 21: 25-28)
Chiahê chai-lān ê ji̍t-chí chi̍t ē kòe-.khì, ji̍t ē piàn o͘-àm, goe̍h bē hoat-chhut kng, chheⁿ ē tùi thiⁿ-téng ka-la̍uh lo̍h-.lâi, thiⁿ-téng ê bān-siōng lóng ē iô-tāng.
24:30 Hit sî, Jîn-chú chài-lîm ê tiāu-thâu ē tī thiⁿ-téng chhut-hiān; tē-chiūⁿ ê ta̍k cho̍k lóng ē thî-khàu. In ē khòaⁿ tio̍h Jîn-chú chhiong-móa koân-lêng kah tōa êng-kng chē thiⁿ-téng ê hûn kàng-lîm. (chù, TNE 7:13)
24:31 I ē chhe I ê thiⁿ-sài pûn kó͘-chhoe, hiáng-liāng ê siaⁿ tùi chit pêng ê thiⁿ-piⁿ thoân kàu hit pêng ê thiⁿ-piⁿ, lâi chū-chi̍p I ê soán-bîn. "
24:32 Bû-hoa-kó Chhiū ê Kà-sī
( Mk 13: 28-31; Lk 21: 29-33)
" Lín tio̍h tùi bû-hoa-kó chhiū lâi ha̍k-si̍p. Tng ki puh-íⁿ hoat-hio̍h ê sî, lín chiū chai joa̍h-thiⁿ teh beh kàu à.
24:33 Chhin-chhiūⁿ ánne, lín khòaⁿ tio̍h chiahê tāichì, chiū chai Jîn-chú teh beh kàu à, lâi-kàu mn̂g-kháu à.
24:34 Góa si̍t-chāi kā lín kóng, chit sè-tāi iáu-bōe kòe-khì í-chêng, chiahê tāichì it-tēng lóng ē hoat-seng.
24:35 Thiⁿ kah tē ē siau-sit, m̄ koh, góa ê ōe choa̍t-tùi bē siau-sit. "
24:36 Bô Lâng Chai Hitê Ji̍t, Hitê Sî
( Mk 13: 32-37; Lk 17: 26-30, 34-36)
" M̄ koh, lūn hit-ê ji̍t-chí á-.sī hit-ê sî-khek, bô lâng chai-iáⁿ. Thiⁿ téng ê thiⁿ-sài m̄-chai, Kiáⁿ mā m̄-chai; to̍k-to̍k Thiⁿ-pē chai niā-niā.
24:37 Jîn-chú ê chài-lîm mā ē chhin-chhiūⁿ Nó͘-ah ê chêng-hêng.
24:38 Tōa chúi lâi ê chìn-chêng kàu Nó͘-ah ji̍p-khì tōa chûn hit ji̍t, lâng chiàu-siông lim-chia̍h kè-chhōa.
24:39 In kèng-jiân m̄-chai, tōa-chúi chi̍t-ē kàu, kā in choân-pō͘ bia̍t liáu-liáu; Jîn-chú ê chài-lîm mā ē chhin-chhiūⁿ ánne.
24:40 Hit sî, ū nn̄g-ê lâng tī hn̂g-.ni̍h, chi̍t-ê siū chiap-khì, chi̍t-ê lâu tòa hia;
24:41 Nn̄g-ê hū-jîn-lâng teh e chio̍h-bō, chi̍t-ê siū chiap-khì, chi̍t-ê lâu tòa hia.
24:42 " Tio̍h kéng-séng, in-ūi lín m̄-chai lín ê Chú siáⁿ-mi̍h ji̍t-chí ē chài-lîm.
24:43 Lín lóng chin chheng-chhó chiah tio̍h; chhù ê chú-lâng nā chai chha̍t-á tang-sî-chūn ē kàu, it-tēng ē kéng-séng, bē hō͘ chha̍t-á ó͘ piah-khang ji̍p-lâi chhù lāi.
24:44 Só͘-í, lín mā tio̍h chún-pī piān-piān, in-ūi Jîn-chú ē tī lín siūⁿ bē kàu ê sî-chūn chài-lîm. "
24:45 Tiong-si̍t kah Bô Tiong-si̍t ê Lô͘-po̍k
( Lk 12: 41-48)
" Nā-sī ánne, siáⁿ lâng chiah sī chīn-tiong koh ū tì-hūi ê lô͘-po̍k? Chú-lâng kau-tài i lâi koán chhù lāi kî-tha ê lô͘-po̍k, ē chiàu-sî hun-phòe chia̍h-mi̍h hō͘ lô͘-po̍k ê hit-ê lâng to̍h-sī.
24:46 Chú-lâng tńg-.lâi ê sî, khòaⁿ tio̍h i ū chiàu kau-tài ê khì chò, hit-ê lô͘-po̍k si̍t-chāi ū hok-khì.
24:47 Góa si̍t-chāi kā lín kóng, chú-lâng ē phài hit-ê lâng lâi koán-lí i só͘-ū ê châi-sán.
24:48 Ká-sú sī chi̍t-ê pháiⁿ ê lô͘-po̍k, sim-lāi siūⁿ kóng, góa ê chú-lâng bē hiah kín tńg-.lâi,
24:49 Chiū phah hiahê pêⁿ-pêⁿ chò lô͘-po̍k ê lâng, koh kah chiú-phōaⁿ chò-hóe lim-chia̍h.
24:50 Chú-lâng ē tī hit-ê lô͘-po̍k bô phah-sǹg ê ji̍t, siūⁿ bē kàu ê sî tńg-.lâi.
24:51 Chú-lâng ē tāng-tāng kā i hêng-hoa̍t, hō͘ i kah ké-hó ê lâng tú tio̍h kāng-khoán ê miā-ūn, tī hia in ē thî-khàu, kā-gê chhiat-khí. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。