馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
23:1 Keng-ha̍k Kàu-su kah Hoa-lí-sái Phài ê Hêng-ûi
Hit sî, I-é-su kā kûn-chiòng kah I ê bûn-tô͘ kóng,
23:2 " Keng-ha̍k kàu-su kah Hoa-lí-sái phài ê lâng chē tī Mô͘-se ê ūi teh kái-soeh lu̍t-hoat.
23:3 Só͘-í, in kā lín kóng ê, lín lóng tio̍h chun-siú lâi chò, chóng-.sī, m̄ thang chiàu in ê hêng-ûi lâi kiâⁿ; in-ūi in kóng chi̍t-khoán, chò koh lēng-gōa chi̍t-khoán.
23:4 In kā tāng koh oh taⁿ ê tàⁿ pa̍k tòa lâng ê keng-kah-thâu téng, m̄ koh, in kakī liân chi̍t ki chéng-thâu-á to m̄-khéng tín-tāng.
23:5 In só͘ chò ê tāichì lóng sī ūi tio̍h beh hō͘ chèng lâng khòaⁿ. In kā keng-bûn-tē chò khah khoah, saⁿ-á-ki ê chhiu chò khah tn̂g.
23:6 In koh ài tī iàn-se̍k chē tōa-ūi, tī hōe-tn̂g lāi chē koân ūi,
23:7 Iū-koh ài tī tōa lō͘-kháu hō͘ lâng chhéng-an, mā ài hō͘ lâng chheng-ho͘ in chò ' La̍h-bí'( lāu-su ).
23:8 M̄ koh, lín m̄ thang hō͘ lâng kiò-chò " La̍h-bí ", in-ūi lín ê lāu-su chí ū chi̍t-ê, lín hō͘-siong lóng sī hiaⁿ-tī.
23:9 Tī tē-chiūⁿ mā m̄ thang chheng lâng chò " Pē ", in-ūi lín ê Thiⁿ-pē chí ū chi̍t ūi, to̍h-sī tī thiⁿ-téng hit-ūi.
23:10 Lín mā m̄ thang hō͘ lâng kiò-chò " Lāu-su ", in-ūi lín ê lāu-su chí ū chi̍t ūi, to̍h-sī Ki-tok.
23:11 M̄ koh, lín tiong-kan chò tōa ê lâng tio̍h chò lín ê chhe-ēng.
23:12 Hoān-nā kiau-ngō͘ ê lâng it-tēng ē hō͘ lâng ap-kē; chū-khiam ê lâng it-tēng ē hō͘ lâng ko-seng. "
23:13 Khián-chek Keng-ha̍k kàu-su kah Hoa-lí-sái Phài ê Lâng
( Mk 12:38-40; Lk 11: 37-52; 20:45-47)
" Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám à! In-ūi lín kā thian-kok ê mn̂g koaiⁿ khí-.lâi. Lín kakī bô beh ji̍p-.khì, mā m̄-chún hō͘ siūⁿ beh ji̍p-.khì ê lâng ji̍p-.khì.
23:14 " Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám à! Lín chhim-chiàm kóaⁿ-hū ê ke-hóe, koh ké-ì kî-tó chin kú. Lín it-tēng ē siū tio̍h koh khah giâm-tiōng ê hêng-hoa̍t. "（ Chù, goân e̍k-pún bô chit chat, ū ê chhau-pún ke chit chat ）
23:15 Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám à! In-ūi lín ūi tio̍h beh hō͘ chi̍t-ê lâng ji̍p-kàu, thiⁿ-piⁿ hái-kak kiâⁿ thàu-thàu. M̄ koh, hit-ê lâng ji̍p-kàu liáu-āu, lín soah hō͘ i piàn-chò pí lín ka-pōe pháiⁿ ê lâng.
23:16 Lín chiahê chheⁿmê chò chí-tō chiá ê lâng chhám à! Lín kóng kí sèng-tiān lâi chiùchōa ê bô hāu-kó; to̍k-to̍k kí sèng-tiān ê kim-khì lâi chiùchōa ê chiah ū chún-sǹg.
23:17 Lín chiahê gōng koh chheⁿmê ê lâng, sī kim-khì á-.sī hō͘ kim-khì chiâⁿ-chò sîn-sèng ê sèng-tiān, tó chi̍t hāng khah tiōng-iàu?
23:18 Lín koh kóng kí-chè-tôaⁿ lâi chiùchōa ê bô chún-sǹg; to̍k-to̍k kí tôaⁿ téng ê chè-mi̍h lâi chiùchōa ê chiah tio̍h chun-siú.
23:19 Lín chiahê chheⁿmê-.ê ah, sī chè-mi̍h á-.sī hō͘ chè-mi̍h chiâⁿ-chò sîn-sèng ê chè-tôaⁿ, tó chi̍t hāng khah tiōng-iàu ah?
23:20 Só͘-í, lâng kí-chè-tôaⁿ lâi chiùchōa, sī kí-chè-tôaⁿ kah tôaⁿ téng ê chè-mi̍h lâi chiùchōa.
23:21 Lâng kí sèng-tiān lâi chiùchōa, sī kí sèng-tiān kah tiàm tī hit lāi-bīn ê Siōng-tè lâi chiùchōa.
23:22 Lâng kí thiⁿ lâi chiùchōa, sī kí Siōng-tè ê pó-chō kah chē tī hit téng-bīn ê Siōng-tè lâi chiùchōa.
23:23 " Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám ah! Lín to kā po̍k-hô, peh-kak, sió-hôe-hiong ê cha̍p hūn hiàn chi̍t hūn hō͘ Siōng-tè, m̄ koh, lín tian-tò hut-lio̍k lu̍t-hoat só͘ tiōng-sī ê kong-gī, liân-bín kah sìn-si̍t. Chóng-.sī, chiahê tio̍h eng-kai chun-siú, téng-bīn só͘ thê-khí hiahê koàn-lē mā m̄ thang hut-lio̍k.
23:24 Lín chiahê chheⁿmê chò chí-tō chiá ê lâng, sè chiah báng-á lín to̍h kā i lī khí-.lâi, lo̍k-tô soah kui-chiah thun lo̍h-.khì.
23:25 " Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám ah! Lín kā poe kah pôaⁿ ê gōa-bīn sé chheng-khì, m̄ koh, hit lāi-bīn chhiong-móa tham-io̍k kah hòng-chhiòng.
23:26 Lín chiahê chheⁿmê-.ê Hoa-lí-sái phài ê lâng, lín tio̍h tāi-seng kā poe-pôaⁿ ê lāi-bīn sé chheng-khì, gōa-bīn chū-jiân chiū ē chheng-khì.
23:27 " Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám ah! Lín chhin-chhiūⁿ chhat kah pe̍h-siaksiak ê bōng, gōa-bīn khòaⁿ khí-lâi chin súi, m̄ koh, lāi-bīn chhiong-móa sí-lâng ê kut-thâu kah ta̍k hāng ê ù-òe.
23:28 Lín mā chhin-chhiūⁿ ánne, gōa-bīn hō͘ lâng khòaⁿ-chò sī gī lâng, m̄ koh, lāi-bīn chhiong-móa ké-hó kah put-gī. "
23:29 " Lín chiahê ké-hó ê keng-ha̍k kàu-su kah Hoa-lí-sái phài ê lâng, lín chhám ah! Lín khí-chō sian-ti ê bōng, chéng-siu gī lâng ê kì-liām-pi.
23:30 Lín koh kóng, ' Goán nā oa̍h tī goán chó͘-sian ê sî-tāi, goán it-tēng bē kah in tàu-tīn sat-hāi sian-ti. '
23:31 Án-ne, lín kakī chèng-bêng lín sī chò-hóe sat-hāi sian-ti ê lâng ê kiáⁿ-sun.
23:32 Chò lín khì kè-sio̍k oân-sêng lín chó͘-sian ok-to̍k ê tāichì.
23:33 Lín chiahê to̍k-chôa ê kiáⁿ-sun ah! Kan-kúi-ê lâng ah! Lín ná ē-tàng tô-siám tē-ga̍k ê hêng-hoa̍t?
23:34 Só͘-í, góa beh chhe-phài sian-ti, tì-hūi ê lâng kah keng-ha̍k kàu-su khì lín hia. Ū ê ē hō͘ lín sat-hāi á-.sī tèng si̍p-jī-kè; ū ê mā ē hō͘ lín tī hōe-tn̂g ēng piⁿ phah, tùi chit-ê siâⁿ kóaⁿ-tio̍k kàu hit-ê siâⁿ.
23:35 Án-ne, lín tī tē-chiūⁿ só͘ lâu gī lâng ê hoeh, lóng kui tī lín, to̍h-sī tùi gī lâng A-bel ê hoeh kàu Ba-la-khiah ê kiáⁿ Cha-kha-lī-a tī tiān kah tôaⁿ ê tiong-kan só͘ lâu ê hoeh lóng kui tī lín.
23:36 Góa si̍t-chāi kā lín kóng, chiahê hoeh-chè lóng beh kui tī chit tāi ê lâng. "
23:37 I-é-su Ūi Ê-lú-sa-lèm Ai-khàu
( Lk 13: 34-35)
" Ê-lú-sa-lèm ah! Ê-lú-sa-lèm ah! Lín thâi-sí sian-ti, ēng chio̍h-thâu tìm-sí Siōng-tè chhe-phài lâi-kàu lín chia ê sù-chiá. Góa gōa chē pái ài beh chū-chi̍p lí ê kiáⁿ-jî, chhin-chhiūⁿ ke-bó chū-chi̍p ke-á-kiáⁿ tī si̍t-kó͘-ē, m̄ koh, lín lóng bô ài.
23:38 Lí khòaⁿ! Lín ê chhù it-tēng ē pha-hng bô lâng tòa.
23:39 Góa kā lín kóng, tùi taⁿ í-āu lín bē tàng koh khòaⁿ tio̍h góa, it-ti̍t kàu lín kóng, ' hōng Chú ê miâ lâi ê hit ūi eng-kai tit tio̍h oló. '" (chù, SPh 118:26)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。