馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
20:1 Phû-tô-hn̂g ê Kang-Lâng
" Thian-kok chhin-chhiūⁿ chi̍t-ê phû-tô hn̂g ê chú-lâng thàu-chá chhut-khì chhiàⁿ-kang lâng ji̍p-khì i ê hn̂g chò-kang.
20:2 I kah kang-lâng iok-tēng chi̍t ji̍t chi̍t chîⁿ ê gîn-á, chiū chhe in ji̍p-khì i ê hn̂g chò-kang.
20:3 Chá-khí sî káu tiám ê sî, i koh chhut-.khì, khòaⁿ tio̍h ū lâng êng-êng khiā tī tōa lō͘-kháu,
20:4 Chiū kā in kóng, ' Lín mā khì phû-tô hn̂g chò-kang, góa ē hō͘ lín kong-tō ê kang-chîⁿ. '
20:5 In chiū ji̍p-.khì. Tiong-tàu cha̍p-jī tiám kah saⁿ tiám ê sî, hn̂g-chú koh chhut-.khì, mā ánne chò.
20:6 Ē-po͘ gō͘ tiám ê sî hn̂g-chú chhut-.khì, koh tú tio̍h ū lâng khiā tī hia, chiū kā in kóng, ' Lín sī án-chóaⁿ kui ji̍t êng-êng khiā tī chia bô teh chò siáⁿ-mi̍h? '
20:7 In kā hn̂g-chú kóng, ' In-ūi bô lâng chhiàⁿ goán. ' hn̂g-chú kā in kóng, ' Lín mā lâi-khì phû-tô hn̂g chò-kang. '
20:8 Kàu beh àm-á ê sî, hn̂g-chú kā i ê koán-ke kóng, ' Kiò kang-lâng lâi, hoat kang-chîⁿ hō͘ in. Tùi lō͘-bóe lâi ê khai-sí hoat, kàu tāi-seng lâi ê ûi-chí. '
20:9 Hiahê ē-po͘ gō͘ tiám chiah lâi ê, ta̍k-ê lâng lóng niá tio̍h chi̍t chîⁿ ê gîn-á.
20:10 Hiahê chìn-chêng ji̍p lâi chò-kang ê lâng siūⁿ kóng ē niá khah chē chîⁿ, m̄ koh, ta̍k-ê lâng lóng niá chi̍t chîⁿ ê gîn-á.
20:11 In niá tio̍h chîⁿ liáu-āu chiū tùi hn̂g-chú nga̍uh-nga̍uh-liām.
20:12 In bâi-oàn kóng, ' Goán kui ji̍t chò-kang hō͘ ji̍t-thâu pha̍k. Hiahê lō͘-bóe lâi ê lâng chò-kang chi̍t-tiám-cheng, lí kèng-jiân hō͘ in kah goán pêⁿ chē chîⁿ. '
20:13 Hn̂g-chú tùi in kî-tiong chi̍t-ê lâng kóng, ' Pêng-iú, góa m̄-sī tùi lí bô kong-tō. Lí kám m̄-sī kah góa iok-tēng kang-chîⁿ chi̍t chîⁿ ê gîn-á?
20:14 The̍h lí ê kang-chîⁿ chò lí tńg-.khì. Góa beh hō͘ chit-ê lō͘-bóe lâi ê lâng kah lí niá pêⁿ chē.
20:15 Góa ēng kakī ê chîⁿ chò góa ài chò ê, kám bē chò-.tit? Góa tùi in khóng-khài, lí soah teh ba̍k-khang-chhiah, sī-.bô? '
20:16 Chhin-chhiūⁿ ánne, lō͘-bóe ê beh chò tāi-seng, tāi-seng ê beh chò lō͘-bóe. "
20:17 I-é-su Tē-saⁿ pái Ī-giân I ê Sí-bông kah Koh-oa̍h
( Mk 10: 32-34; Lk 18: 31-34)
I-é-su tī chiūⁿ Ê-lú-sa-lèm ê lō͘ tiong, kiò cha̍p-jī sù-tô͘ lâi piⁿ-á, kā in kóng,
20:18 " Taⁿ lán beh chiūⁿ Ê-lú-sa-lèm khì. Jîn-chú ē siū chhut-bē hō͘ hiahê chè-si-tiúⁿ kah keng-ha̍k kàu-su, in ē kā I tēng sí-chōe.
20:19 Āu-lâi, kā I kau hō͘ gōa-pang lâng, koh kā I hì-lāng, piⁿ-phah, tèng si̍p-jī-kè, tē-saⁿ ji̍t Siōng-tè ē hō͘ I koh-oa̍h. "
20:20 Iâ-kop kah Iô-há-neh ê Lāu-bú ê Chhéng-kiû
( Mk 10: 35-45)
Hit sî, Che-beh-tái ê bó͘ chhōa nn̄g-ê kiáⁿ lâi kìⁿ I-é-su, kūi-.leh kiû chi̍t hāng sū.
20:21 I-é-su mn̄g i kóng, " Lí ài siáⁿ-mi̍h? " I ìn kóng, " Lí chò ông ê sî, hō͘ góa chit nn̄g-ê kiáⁿ chi̍t-ê chē tòa Lí ê chiàⁿ pêng, chi̍t-ê chē tòa Lí ê tò pêng. "
20:22 I-é-su ìn kóng, " Lín m̄-chai kakī teh kiû siáⁿ-mi̍h. Góa só͘ tio̍h lim ê khó͘-poe, lín kám ē-tàng lim? " In ìn kóng, " Ē. "
20:23 I-é-su kā in kóng, " Lín chin-chiàⁿ beh lim góa ê poe, chóng-.sī, chē góa ê chiàⁿ pêng tò pêng, m̄-sī góa ē-tàng hō͘ lâng ê, to̍k-to̍k góa ê Thiⁿ-pē chiah ē-tàng koat-tēng beh hō͘ siáⁿ lâng. "
20:24 Kî-tha cha̍p-ê bûn-tô͘ thiaⁿ-.tio̍h, chiū tùi hit nn̄g-ê hiaⁿ-tī siū-khì.
20:25 I-é-su kiò in lâi, kóng, " Lín chai gōa-pang lâng ê kun-ông lâi thóng-tī in, mā ū phài léng-siù teh kā in koán-hat.
20:26 To̍k-to̍k lín bô eng-kai ánne. Lín tiong-kan ài chò tōa ê tio̍h chò lín ê sī-sè.
20:27 Ài chò thâu-lâng ê lâng tio̍h chò lín ê lô͘-po̍k.
20:28 Tú chhin-chhiūⁿ Jîn-chú lâi, m̄-sī beh hō͘ lâng ho̍k-sāi, sī beh ho̍k-sāi lâng, koh sīm-chì hi-seng kakī ê sèⁿ-miā lâi sio̍k-hôe chin chē lâng. "
20:29 I-é-su I-hó Nn̄g-ê Chheⁿ-mê Lâng
( Mk 10: 46-52; Lk 18: 35-43)
In lī-khui I-é-lī-kho siâⁿ ê sî, ū chin tōa-tīn ê lâng tòe I-é-su khì.
20:30 Tú-hó ū nn̄g-ê chheⁿmê-.ê chē tī lō͘ piⁿ, thiaⁿ tio̍h I-é-su tùi hia keng-kòe, chiū tōa-siaⁿ hoah, " Chú, Ta-bi̍t ê kiáⁿ-sun ah, liân-bín goán! "
20:31 Chèng lâng kā in chek-pī, kiò in tio̍h tiām-chēng, m̄ koh, in koh khah tōa-siaⁿ hoah, " Chú, Ta-bi̍t ê kiáⁿ-sun ah, liân-bín goán! "
20:32 I-é-su thêng lo̍h-.lâi, kiò in lâi, kóng, " Lín ài góa kā lín chò siáⁿ-mi̍h? "
20:33 In ìn kóng, " Chú ah, kiû Lí khui goán ê ba̍k-chiu, hō͘ goán ē khòaⁿ-kìⁿ. "
20:34 I-é-su khó-liân in, bong in ê ba̍k-chiu. In sûi-sî ē khòaⁿ-kìⁿ, chiū tòe I-é-su khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。