馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
17:1 I-é-su Kái-piàn Hêng siōng
( Mk 9: 2-13; Lk 9: 28-36)
La̍k ji̍t āu, I-é-su kantaⁿ chhōa Piat-tò͘, Iâ-kop kah Iâ-kop ê hiaⁿ-tī Iô-há-neh, peh-chiūⁿ chi̍t chō koân soaⁿ.
17:2 I-é-su tī in ê bīn-chêng piàn-ōaⁿ hêng-siōng. I ê bīn chhin-chhiūⁿ ji̍t hoat kng, I ê saⁿ pe̍h kah kng iàⁿiàⁿ.
17:3 Hut-jiân-kan, chit saⁿ-ê bûn-tô͘ khòaⁿ-kìⁿ Mô͘-se kah E-li-iah hián-hiān lâi kah I-é-su kóng-ōe.
17:4 Piat-tò͘ tùi I-é-su kóng, " Chú ah, lán tī chia chin hó! Lí nā ì-ài, góa tī chia lâi tah saⁿ-keng liâu-á, chi̍t keng hō͘ Lí, chi̍t keng hō͘ Mô͘-se, chi̍t keng hō͘ E-li-iah. "
17:5 I iáu teh kóng ōe ê sî, hut-jiân ū chhàn-lān ê hûn kā in tah-teh, koh ū siaⁿ tùi hûn tiong hoat-chhut, kóng, " Chit-ê sī góa só͘ thiàⁿ ê Kiáⁿ, góa chin-chiàⁿ kah-ì ê, lín tio̍h thiaⁿ I ê ōe. "
17:6 Bûn-tô͘ chi̍t-ē thiaⁿ-.tio̍h, chiū phak lo̍h-khì thô͘-kha, hui-siông kiaⁿ-hiâⁿ.
17:7 I-é-su kiâⁿ óa khì bong in, kóng, " Khí-.lâi! M̄-bián kiaⁿ. "
17:8 In chi̍t-ē gia̍h thâu khòaⁿ, kantaⁿ I-é-su chi̍t-ê lâng tī hia, bô khòaⁿ tio̍h pa̍t lâng.
17:9 Lo̍h-soaⁿ ê sî, I-é-su bēng-lēng in kóng, " Siōng-tè iáu-bōe hō͘ Jîn-chú tùi sí-lâng tiong koh-oa̍h í-chêng, lín m̄ thang kā só͘ khòaⁿ-.tio̍h ê ī-siōng tùi lâng kóng. "
17:10 Bûn-tô͘ mn̄g kóng, " Nā ánne, keng-ha̍k kàu-su án-chóaⁿ ē kóng E-li-iah tio̍h seng lâi? "
17:11 I-é-su ìn kóng, " Ū-iáⁿ, E-li-iah tio̍h seng lâi tiông-sin chéng-lí it-chhè.
17:12 Góa kā lín kóng, E-li-iah í-keng lâi ā, m̄ koh, lâng m̄ bat i, hoán-tńg chiàu kakī ê ì-sù lâi kā i khoán-thāi; chhin-chhiūⁿ ánne, Jîn-chú mā ē siū in ê hām-hāi. "
17:13 Hit sî, bûn-tô͘ chiah liáu-kái I-é-su só͘ kóng ê, sī teh chí kiâⁿ sé-lé Iô-há-neh.
17:14 I-é-su I-hó Siâ-sîn Hū-sin ê Gín-á
( Mk 9: 14-29; Lk 9: 37-43a)
In lâi-kàu kûn-chiòng hia, ū chi̍t-ê lâng lâi kūi tī I-é-su ê bīn-chêng, kóng,
17:15 " Chú ah, liân-bín góa ê kiáⁿ, in-ūi i tài tio̍h iûⁿ-hîn chin kan-khó͘, tiāⁿtiāⁿ poa̍h-lo̍h hóe, mā tiāⁿtiāⁿ poa̍h-lo̍h chúi.
17:16 Góa chhōa i khì chhōe Lí ê bûn-tô͘, in bô hoat-tō͘ kā i i hó. "
17:17 I-é-su ìn kóng, " Ai-ah! Chiahni̍h bô sìn sim koh siâ-ok ê sè-tāi, góa tio̍h kah lín tòa gōa kú? Góa tio̍h koh jím-nāi lín gōa kú? Chhōa hit-ê gín'á lâi góa chia. "
17:18 I-é-su chek-pī siâ-sîn, siâ-sîn tùi gín'á ê seng-khu chhut-.khì; gín'á ê pēⁿ chiū sûi-sî hó-.khì.
17:19 Hit sî, bûn-tô͘ thau-thau-á lâi mn̄g I-é-su kóng, " Goán án-chóaⁿ bô hoat-tō͘ kā siâ-sîn kóaⁿ chhut-.khì? "
17:20 I-é-su kā in kóng, " Sī in-ūi lín ê sìn-sim bô kàu-gia̍h. Góa si̍t-chāi kā lín kóng, lín ê sìn-sim nā ū chhin-chhiūⁿ chi̍t lia̍p kòa-chhài-chí hiah tōa, lín tùi chit chō soaⁿ kóng, ' Tùi chia sóa khì hia! ' soaⁿ mā ē sóa khì; jî-chhiáⁿ lín bô chi̍t hāng tāichì chò bē kàu. "
17:21 （Chit khoán siâ-mô͘, nā m̄-sī ēng kî-tó kah kìm-chia̍h, chiū bē tàng kā i kóaⁿ-chhut. "）（ Chù, Goân pán-pún bô chit chat, ū ê chhau-pún ke chit chat. ）
17:22 I-é-su Tē-jī pái Ī-giân I ê Sí-bông Κah Koh-oa̍h
( Mk 9:30-32; Lk 9:43b-45 )
Bûn-tô͘ chū-chi̍p tī Ga-lí-la-iah séng ê sî, I-é-su kā in kóng, " Jîn-chú teh beh hō͘ lâng chhut-bē ā.
17:23 In ē kā I hāi-sí, tē-saⁿ ji̍t Siōng-tè hō͘ I koh-oa̍h. " bûn-tô͘ thiaⁿ tio̍h ánne, hui-siông pi-siong.
17:24 Liáu-la̍p Sèng-tiān-sòe
I-é-su kah bûn-tô͘ lâi-kàu Ka-peh-ná-um. Ū chi̍t-kóa siu sèng-tiān-sòe ê lâng lâi mn̄g Piat-tò͘ kóng, " Lín lāu-su kám ū la̍p sèng-tiān-sòe? "
17:25 Piat-tò͘ ìn kóng, " Ū là. " Ji̍p-khì chhù lāi ê sî, I-é-su seng mn̄g i kóng, " Sí-mòng, lí ê siūⁿ-hoat án-chóaⁿ? Sè-chiūⁿ ê kun-ông tùi siáⁿ lâng siu koan-sòe kah thiu lâng-thâu-sòe? Sī tùi pún-kok lâng á-.sī tùi gōa-kok lâng? "
17:26 Piat-tò͘ ìn kóng, " Tùi gōa-kok lâng. " I-é-su chiū kā i kóng, " Nā-sī ánne, pún-kok lâng chiū bián la̍p-sòe.
17:27 Chóng-.sī, ūi tio̍h mài tek-chōe hiahê lâng, lí khì ô͘-.ni̍h tiò-hî, kā tiò tio̍h ê thâu-chi̍t bóe hî ê chhùi peh-khui, lí ē khòaⁿ tio̍h chi̍t-ê gîn-á. The̍h khì hō͘ in, thè góa kah lí la̍p sèng-tiān-sòe. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。