馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
15:1 Chó͘-sian ê Thoân-thóng
( Mk 7: 1-23)
Hit sî, ū Hoa-lí-sái phài ê lâng kah keng-ha̍k kàu-su tùi Ê-lú-sa-lèm lâi kìⁿ I-é-su, kóng,
15:2 " Sī án-chóaⁿ Lí ê bûn-tô͘ chia̍h pn̄g chêng bô seng sé-chhiú? Án-ne kám m̄-sī hoān tio̍h lán chó͘-sian ê thoân-thóng? "
15:3 I-é-su ìn kóng, " Sī Án-chóaⁿ lín ūi tio̍h chip-siú thoân-thóng-lâi hoān tio̍h Siōng-tè ê kài-bēng?
15:4 In-ūi Siōng-tè kóng, ' Τio̍h hàu-kèng lín ê lāu-pē, lín ê lāu-bú. ' (chù, CAG 20:12; SBK 5:16) koh ū kóng, ' mē lāu-pē á-.sī mē lāu-bú ê, it-tēng tio̍h hō͘ i sí. ' (chù, CAG 21:17; LBK 20:9)
15:5 M̄ koh, lín kóng, ' Nā lâng tùi lāu-pē á-.sī lāu-bú kóng, góa beh hō͘ lí ê hû-ióng-hùi í-keng hiàn hō͘ Siōng-tè à, ánne i chiū m̄-bián hàu-kèng pē-bú. '
15:6 Lín ūi tio̍h beh chun-siú lín ê thoân-thóng, soah lâi hùi-tû Siōng-tè ê ōe.
15:7 Ké hó ê lâng, I-sá-iah só͘ kóng koan-hē lín ê ī-giân chin tio̍h, i kóng,
15:8 Chiahê jîn-bîn ēng chhùi-tûn chun-kèng góa, m̄ koh, in ê sim lī-khui góa hn̄g-hn̄g.
15:9 In tùi góa ê kèng-pài sī khang-khang, in-ūi in ēng lâng ê kui-lu̍t tòng-chò kài-bēng lâi kà-sī lâng. " (chù, ISI 29:13)
15:10 Jiân-āu, I-é-su kiò kûn-chiòng lâi, kā in kóng, " Lín tio̍h thiaⁿ, koh tio̍h liáu-kái,
15:11 M̄-sī tùi chhùi ji̍p-khì ê ē hō͘ lâng bô chheng-khì; tùi chhùi chhut-.lâi ê chiah ē hō͘ lâng bô chheng-khì. "
15:12 Hit sî, bûn-tô͘ lâi kā I-é-su kóng, " Hoa-lí-sái phài ê lâng thiaⁿ tio̍h Lí kóng chit-ê ōe chin hùn-khài, Lí kám chai? "
15:13 I-é-su ìn kóng, " Nā m̄-sī góa ê Thiⁿ-pē chai-chèng ê mi̍h, lóng beh kā i khau khí-.lâi.
15:14 Chhut-chāi in lah, in sī chheⁿmê-.ê teh kā chheⁿmê-.ê chhōa-lō͘; nā-sī chheⁿmê-.ê kā chheⁿmê-.ê chhōa-lō͘, nn̄g-ê lóng ē poa̍h-lo̍h kheⁿ-kau. "
15:15 Piat-tò͘ ìn kóng, " Chhiáⁿ Lí kā goán kái-soeh chit-ê phì-jū. "
15:16 I-é-su chiū kóng, " Liân lín to iáu koh bē bêng-pe̍k?
15:17 Lín kám m̄-chai, só͘-ū tùi chhùi ji̍p-khì ê lóng lo̍h-khì tī pak-tó͘ té, āu-lâi chiū pàng-chhut-.lâi, kám m̄-sī?
15:18 M̄ koh, tùi chhùi chhut-.lâi ê sī tùi sim-lāi hoat-chhut, chiah ē hō͘ lâng bô chheng-khì.
15:19 In-ūi tùi sim-lāi hoat-chhut ê pháiⁿ liām-thâu ē ín-khí hiong-sat, kan-îm, su-thong, thau-the̍h, gūi-chèng kah húi-pòng.
15:20 Chiahê chiah ē hō͘ lâng bô chheng-khì; bô chiàu kui-tēng tī chia̍h pn̄g chêng sé-chhiú, bē hō͘ lâng bô chheng-khì. "
15:21 Ka-nân ê Hū-jîn lâng ê Sìn-sim
( Mk 7: 24-30)
I-é-su lī-khui hit só͘-chāi, thè-khì-kàu Tu-lô kah Si-tòng ê kéng lāi.
15:22 Tú-hó ū chi̍t-ê Ka-nân ê hū-jîn-lâng tùi hit-ê tē-khu chhut-.lâi, tōa-siaⁿ hoah, " Chú ah, Ta-bi̍t ê kiáⁿ-sun, liân-bín góa! Góa ê chabó͘ kiáⁿ hō͘ siâ-sîn hū-sin, chin kan-khó͘. "
15:23 I-é-su bô ìn i pòaⁿ-kù ōe. I ê bûn-tô͘ lâi kiû I, kóng, " Kā i kóaⁿ-cháu, in-ūi i tī lán ê āu-bīn it-ti̍t teh tōa-siaⁿ hoah. "
15:24 I-é-su ìn kóng, " Góa hōng chhe-phài sī beh lâi chhōe I-su-la-el ê chú-bîn sit-lo̍h ê iûⁿ. "
15:25 Hitê hū-jîn-lâng lâi kūi tī I ê bīn-chêng, kóng, " Chú ah, kiû Lí pang-chān góa. "
15:26 I-é-su ìn kóng, " The̍h gín'á ê chia̍h-mi̍h hiat hō͘ káu á chia̍h sī bô eng-kai ê. "
15:27 Hū-jîn lâng ìn kóng, " Chú ah, bô m̄ tio̍h; m̄ koh, káu-á mā ē-tàng chia̍h in ê chú-lâng ka-la̍uh tī toh-kha ê piáⁿ-iù-á. "
15:28 I-é-su ìn kóng, " Hū-jîn lâng, lí ê sìn-sim chin tōa, chiàu lí ê sim-goān hō͘ lí tit chiâⁿ. " Tú-tú hit sî, i ê chabó͘ kiáⁿ chiū tit tio̍h i hó.
15:29 I-hó Ta̍k chióng Pēⁿ-Lâng
I-é-su lī-khui hit só͘-chāi, lâi-kàu Ga-lí-la-iah ô͘-piⁿ, chiūⁿ soaⁿ chē tòa hia.
15:30 Ū chin tōa-tīn ê lâng lâi-kàu I-é-su hia, in chhōa pái-kha-.ê, chheⁿmê-.ê, é-káu ê, phòa-siùⁿ ê kah chin chē pa̍t khoán pēⁿ ê lâng lâi hē tī I ê kha chêng, I-é-su chiū kā in i hó.
15:31 Kûn-chiòng khòaⁿ tio̍h é-káu ê kóng-ōe, phòa-siùⁿ ê lóng hó khí-.lâi, pái-kha-.ê kiâⁿ lō͘, chheⁿmê-.ê khòaⁿ-.tio̍h, chiū tōa tio̍h-kiaⁿ lâi kui êng-kng hō͘ I-su-la-el ê Siōng-tè.
15:32 I-é-su hō͘ Sì-chheng Lâng Chia̍h-pá
( Mk 8: 1-10)
I-é-su kiò I ê bûn-tô͘ lâi, kā in kóng, " Góa khó-liân chiahê lâng, in-ūi in í-keng kah góa chò-hóe saⁿ ji̍t, taⁿ bô mi̍h thang chia̍h. Góa m̄-kam hō͘ in iau-iau tńg-.khì, khióng-kiaⁿ in tī lō͘ tiong hūn-tó. "
15:33 Bûn-tô͘ kā I kóng, " Tī chit-ê chiah phian-phiah ê só͘-chāi, goán beh tùi tó-ūi khì the̍h hiah chē piáⁿ lâi hō͘ chiah chē lâng chia̍h kàu pá? "
15:34 I-é-su mn̄g in kóng, " Lín ū gōa chē piáⁿ? " In ìn kóng, " Chhit tè kah kúi bé sè-bóe hî á. "
15:35 I-é-su chiū hoan-hù kûn-chiòng chē tī thô͘-kha,
15:36 Jiân-āu chiū the̍h-khí hit chhit tè piáⁿ kah hit kúi-bóe-á hî, chiok-siā liáu-āu kā piáⁿ peh-khui, kau hō͘ bûn-tô͘, bûn-tô͘ chiū pun hō͘ kûn-chiòng.
15:37 Tāi-ke lóng chia̍h kàu pá, koh khioh chia̍h chhun lo̍h-.lâi ê piáⁿ-sut-á, té-móa chhit nâ.
15:38 Chia̍h-ê lâng, hū-jîn-lâng kah gín'á bô sǹg, chóng-kiōng sì-chheng lâng.
15:39 I-é-su kā kûn-chiòng kái-sàn liáu-āu, chiū chē chûn khì-kàu Ma-ga-tàn ê só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。