馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
14:1 Kiâⁿ Sé-lé Iô-há-neh ê Sí-bông
( Mk 6: 14-29; Lk 9: 7-9)
Hit tong-sî, Ga-lí-la-iah séng hun-hong ê ông He-lo̍t thiaⁿ tio̍h I-é-su ê miâ-siaⁿ,
14:2 Chiū kā i ê pō͘-hā kóng, " Chit-ê to̍h-sī kiâⁿ sé-lé Iô-há-neh; i tùi sí-lâng tiong koh-oa̍h, só͘-í, chiah ū kiâⁿ chiahê sîn-jiah ê koân-lêng. "
14:3 Goân-lâi í-chêng He-lo̍t ūi tio̍h sió-tī Hui-li̍p-pò͘ ê bó͘ He-ló-tiah ê iân-kò͘, ū lia̍h Iô-há-neh kā i liān khí-.lâi, koaiⁿ lo̍h kaⁿ.
14:4 In-ūi Iô-há-neh tiāⁿtiāⁿ kā i kóng, " Lí chiàm chit-ê hū-jîn-lâng lâi chò bó͘ bô ha̍h lu̍t-hoat. "
14:5 He-lo̍t ài beh kā i thâi, m̄ koh, kiaⁿ jîn-bîn hoán-tôaⁿ, in-ūi jîn-bîn lóng siūⁿ kóng Iô-há-neh sī sian-ti.
14:6 He-lo̍t chò seⁿ-ji̍t ê sî, He-ló-tiah ê chabó͘ kiáⁿ tī lâi-pin bīn-chêng thiàu-bú, hō͘ He-lo̍t chin hoaⁿ-hí.
14:7 He-lo̍t chiū kong-khai chiùchōa, tap-èng hit-ê chabó͘ gín'á bô-lūn kiû siáⁿ-mi̍h lóng beh hō͘ i.
14:8 I hō͘ in lāu-bú sái-lōng, chiū kóng, " Chhiáⁿ kā kiâⁿ sé-lé Iô-há-neh ê thâu-khak khǹg tòa pôaⁿ-.ni̍h hō͘ góa. "
14:9 Ông chin iu-būn, chóng-.sī, in-ūi í-keng tī lâi-pin bīn-chêng soan-káng, koh ū kâng toh ê lâng tī-.leh, put-tek-put chiū bēng-lēng chiàu i só͘ kiû ê hō͘ i.
14:10 Ông chiū chhe lâng khì kaⁿ-.ni̍h chám Iô-há-neh ê thâu,
14:11 Kā i ê thâu-khak khǹg tòa pôaⁿ-.ni̍h, kau hō͘ hit-ê chabó͘ gín'á, i chiū phâng khì hō͘ i ê lāu-bú.
14:12 Iô-há-neh ê bûn-tô͘ lâi siu i ê sin-si khì bâi-chòng, chiū khì kā I-é-su kóng.
14:13 I-é-su hō͘ Gō͘-chheng Lâng Chia̍h-pá
( Mk 6: 30-44; Lk 9: 10-17; Ih 6: 1-14)
I-é-su thiaⁿ tio̍h chit-ê siau-sit chiū chē chûn thè-khì khòng-iá, kakī tòa tī hia. Kûn-chiòng thiaⁿ-.tio̍h chiū tùi chiahê siâⁿ kiâⁿ lō͘ lâi tòe I.
14:14 I-é-su chhut-.khì, khòaⁿ tio̍h kui tōa-tīn ê lâng, chiū liân-bín in, i hó in tiong-kan ū pēⁿ ê lâng.
14:15 Beh àm á ê sî, bûn-tô͘ óa-lâi kā I kóng, " Chia sī khòng-iá, sî-kan mā í-keng chin òaⁿ; tio̍h kái-sàn kûn-chiòng, thang hō͘ in khì hù-kīn ê chng-thâu bé chia̍h-mi̍h. "
14:16 I-é-su ìn kóng, " In m̄-bián kakī khì, lín hō͘ in chia̍h. "
14:17 Bûn-tô͘ kā I kóng, " Lán chia kantaⁿ ū gō͘ tè piáⁿ, nn̄g bóe hî. "
14:18 I-é-su kóng, " The̍h lâi chia hō͘ góa. "
14:19 I chiū hoan-hù kûn-chiòng chē tòa chháu-po͘, kā hit gō͘ tè piáⁿ kah nn̄g bóe hî the̍h khí-.lâi, jiân-āu gióng-bōng thiⁿ lâi kám-siā, peh piáⁿ hō͘ bûn-tô͘, bûn-tô͘ chiū pun hō͘ kûn-chiòng.
14:20 Tāi-ke lóng chia̍h kàu pá liáu-āu, khioh só͘ chhun lo̍h-.lâi ê sut-á, té cha̍p-jī nâ móa-móa.
14:21 Chia̍h-ê lâng, tû-liáu hū-jîn-lâng kah gín'á í-gōa, iok ū gō͘-chheng-ê chapo͘ lâng.
14:22 I-é-su Kiâⁿ Chúi-bīn
( Mk 6: 45-52; Ih 6: 15-21)
I-é-su sûi-sî kiò bûn-tô͘ chiūⁿ chûn, tāi-seng kòe-khì hit pêng, I kakī lâu-.leh hoat-lo̍h kûn-chiòng sì-sòaⁿ.
14:23 Kûn-chiòng sì-sòaⁿ liáu-āu, I-é-su chiū kakī chiūⁿ soaⁿ kî-tó. Thiⁿ í-keng àm, kantaⁿ I kakī tī hia.
14:24 Hit sî, chûn lâi-kàu ô͘ ê tiong-ng, in-ūi chìⁿ-hong, hō͘ hong-éng phah lâi phah-khì.
14:25 Thiⁿ-phú-kng ê sî, I-é-su tùi ô͘ ê chúi-bīn kiâⁿ-kòe lâi bûn-tô͘ chia.
14:26 Bûn-tô͘ khòaⁿ tio̍h I-é-su kiâⁿ tī chúi-bīn, kiaⁿ kah phi̍h-phi̍h chhoah, tōa-siaⁿ hoah, " Kúi-á lâi lò͘! "
14:27 I-é-su sûi-sî kah in kóng-ōe, kóng, " An lín ê sim, sī góa, m̄-bián kiaⁿ. "
14:28 Piat-tò͘ ìn I kóng, " Chú ah, nā chin-chiàⁿ sī Lí, chhiáⁿ bēng-lēng góa kiâⁿ chúi-bīn lâi-khì Lí hia. "
14:29 I-é-su kóng, " Lâi! " Piat-tò͘ chiū tùi chûn téng lo̍h-.khì, kiâⁿ chúi-bīn lâi-kàu I-é-su hia.
14:30 Chóng-.sī, i khòaⁿ tio̍h hong hiah tōa chiū khí kiaⁿ, teh beh tîm lo̍h-.khì, chiū tōa-siaⁿ hoah, " Chú ah, kiù miā oh! "
14:31 I-é-su sûi-sî chhun chhiú khì kā i khiú-teh, kóng, " Lí ná ē hiahni̍h bô sìn sim, án-chóaⁿ teh giâu-gî? "
14:32 In nn̄g lâng chiūⁿ chûn liáu-āu, hong chiū pêng-chēng.
14:33 Chûn téng ê lâng kūi lo̍h-khì pài I-é-su, kóng, " Lí chin-chiàⁿ sī Siōng-tè ê Kiáⁿ. "
14:34 I-é-su I-hó Ge-ne-sá-lia̍t ê Pēⁿ-Lâng
( Mk 6: 53-56)
I-é-su kah bûn-tô͘ kòe ô͘ liáu-āu, lâi-kàu Ge-ne-sá-lia̍t chiūⁿ hōaⁿ.
14:35 Hit só͘-chāi ê lâng chi̍t ē jīn-chhut I-é-su, chiū phài lâng khì sì-kè kā só͘-ū ê pēⁿ-lâng lóng chhōa-lâi I-é-su hia.
14:36 In kiû I-é-su chì-chió hō͘ pēⁿ-lâng bong I ê saⁿ-á-ki ê chhiu. Só͘-ū bong-.tio̍h ê lâng lóng tit tio̍h i hó.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。