馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
13:1 Iā Chéng-chí ê Phì-jū
( Mk 4: 1-9; Lk 8: 4-8)
Kāng hit ji̍t, I-é-su chhut-mn̂g, khì chē tī ô͘-piⁿ.
13:2 Ū chin tōa-tīn ê lâng chū-chi̍p óa-lâi I hia, I soah tio̍h khì chûn-téng chē, kui tīn ê lâng lóng khiā tī hōaⁿ-téng.
13:3 I-é-su chiū ēng chióng-chióng ê phì-jū kā in kóng, " Lí khòaⁿ, ū chi̍t-ê choh-sit lâng chhut-khì iā chéng-chí.
13:4 Iā ê sî, ū ê chéng-chí ka-la̍uh tī lō͘ piⁿ, chiáu-á poe-lâi kā chéng-chí chia̍h liáu-liáu;
13:5 Ū ê ka-la̍uh tī chio̍h-thâu-á tē, thô͘-bah chhián ê só͘-chāi, in-ūi thô͘-bah bô chhim, chéng-chí chin kín chiū hoat-gê,
13:6 M̄ koh, ji̍t chhut chi̍t ē pha̍k, in-ūi bô kin chiū ta-.khì;
13:7 Mā ū ê ka-la̍uh tī chhì-á lāi, chhì-á chi̍t ē tōa châng chiū kā gê hip-sí;
13:8 Koh ū ê ka-la̍uh tī hó ê thô͘-bah, kiat-si̍t, ū ê pah pōe, ū ê la̍k-cha̍p pōe, ū ê saⁿ-cha̍p pōe.
13:9 Ū hīⁿ-khang ê lâng tio̍h thiaⁿ. "
13:10 Phì-jū ê Bo̍k-tek
( Mk 4: 10-12; Lk 8: 9-10)
Bûn-tô͘ lâi mn̄g I-é-su kóng, " Lí sī án-chóaⁿ tio̍h ēng phì-jū kā in kóng? "
13:11 I ìn kóng, " In-ūi Siōng-tè hō͘ lín un-sù lâi jīn-bat thian-kok ê ò-pì, khiok bô hō͘ in chit khoán ê un-sù.
13:12 In-ūi Siōng-tè beh hō͘ ū ê lâng koh khah chē, chē kah ū chhun; m̄ koh, bô ê lâng liân i só͘-ū ê mā beh chhiúⁿ-.khì.
13:13 In-ūi I-sá-iah su ū kì-chài, In khòaⁿ mā khòaⁿ bô, thiaⁿ mā thiaⁿ bē bêng-pe̍k koh bē liáu-kái, só͘-í, góa chiah tio̍h ēng phì-jū tùi in kóng.
13:14 I-sá-iah ê ī-giân tútú èng-giām tī in ê sin chiūⁿ, Lín ū teh thiaⁿ, m̄ koh, lóng bē liáu-kái; Lín ū teh khòaⁿ, m̄ koh, lóng khòaⁿ bē bêng-pe̍k.
13:15 In-ūi chiahê jîn-bîn sim tūn, hīⁿ-khang tāng, in ê ba̍k-chiu pàng-kheh-kheh. Nā m̄-sī ánne, in ēng ba̍k-chiu khòaⁿ-.tio̍h, ēng hīⁿ-khang thiaⁿ-.tio̍h, iōng-sim lâi bêng-pe̍k, koh ē hôe-sim choán-ì, góa chiū ē kā in i hó. (chù, ISI 6:9-10)
13:16 M̄ koh, lín chin ū hok-khì, in-ūi lín ê ba̍k-chiu ū khòaⁿ-kìⁿ, lín ê hīⁿ-khang ū thiaⁿ-.tio̍h.
13:17 Góa si̍t-chāi kā lín kóng, í-chêng ū chin chē sian-ti kah gī lâng, ài beh khòaⁿ lín só͘ khòaⁿ-.tio̍h ê, m̄ koh, bô khòaⁿ-.tio̍h; ài beh thiaⁿ lín só͘ thiaⁿ-.tio̍h ê, mā bô thiaⁿ-.tio̍h. "
13:18 Kái-soeh Iā Chéng-chí ê Phì-jū
( Mk 4: 13-20; Lk 8: 11-15)
" Taⁿ lín tio̍h thiaⁿ góa kái-soeh chit-ê iā chéng-chí ê phì-jū.
13:19 Thiaⁿ tio̍h thian-kok ê sìn-sit bô bêng-pe̍k ê lâng, ná chhin-chhiūⁿ iā tī lō͘ piⁿ ê chéng-chí; Mô͘-kúi chi̍t-ē kàu, chiū kā iā tī i sim-lāi ê chéng-chí chhiúⁿ-.khì.
13:20 Thiaⁿ tio̍h sìn-sit sûi-sî hoaⁿ-hí chiap-siū ê lâng, ná chhin-chhiūⁿ iā tī chio̍h-thâu-á tē ê chéng-chí;
13:21 Chóng-.sī, chit-ê chéng-chí tèng-kin bô chhim, oa̍h bē kú, chi̍t ē tú tio̍h hoān-lān pek-hāi, chiū sûi-sî pàng-sak.
13:22 Iā tī chhì-á lāi ê chéng-chí, sī chí lâng thiaⁿ tio̍h sìn-sit liáu-āu, hō͘ sè-kan ê chhau-hoân kah chîⁿ-châi ê bê-he̍k jia-khàm tiâu-.leh, soah lóng bē kiat kóe-chí.
13:23 Iā chéng-chí tī hó thô͘-bah ê, sī chí lâng thiaⁿ tio̍h sìn-sit ū bêng-pe̍k, chin-chiàⁿ ū kiat kóe-chí, ū ê chi̍t-pah pōe, ū ê la̍k-cha̍p pōe, ū ê saⁿ-cha̍p pōe. "
13:24 Phê-á ê Phì-jū
I-é-su koh tùi in kóng chi̍t-ê phì-jū, " Thian-kok ná chhin-chhiūⁿ lâng iā hó chéng-chí tī i ê hn̂g.
13:25 Lâng teh khùn ê sî, i ê tùi-te̍k lâi, kā phê-á iā tī be̍h-hn̂g tiong chiū lī-khui.
13:26 Be̍h-á chiām-chiām tōa châng, chhut-sūi ê sî, phê-á mā chhut-hiān.
13:27 Kang-lâng lâi kā chú-lâng pò-kò kóng, ' Thâu-ke, lí kám m̄-sī iā hó chéng-chí tī lí ê hn̂g-.ni̍h? Hiahê phê-á-.sī tùi tó-ūi lâi? '
13:28 Chú-lâng kā in kóng, ' Che sī tùi-te̍k só͘ chò ê. ' Kang-lâng chiū kóng, ' Án-ne lí ài goán lâi-khì kā hiahê phê-á khau tiāu bô? '
13:29 Chú-lâng ìn kóng, ' M̄-bián, khióng-kiaⁿ lín khau phê-á ê sî liân be̍h-á soah khau khí-.lâi.
13:30 Hō͘ be̍h-á kah phê-á tâng-chê tōa châng, kàu siu-sêng ê sî, góa chiah hoan-hù siu-koah ê lâng seng khau hiahê phê-á, khún kui pé khì sio-tiāu, jiân-āu kā be̍h-á siu ji̍p-khì góa ê chhek-chhng. '"
13:31 Kòa-chhài-chí ê Phì-jū
( Mk 4: 30-32; Lk 13: 18-21)
I-é-su koh kā in kóng chi̍t-ê phì-jū, " Thian-kok chhin-chhiūⁿ chi̍t lia̍p kòa-chhài-chí, lâng the̍h-khì iā tī i ê hn̂g-.ni̍h.
13:32 Kòa-chhài-chí-sī chéng-chí tiong-kan siōng sè lia̍p ê, m̄ koh, tōa châng khí-.lâi, pí só͘-ū ê chhài-se koh khah tōa châng, chiâⁿ-chò chi̍t châng chhiū, liân khong-tiong ê chiáu-á to poe-lâi tī chhiū-ki chò siū. "
13:33 Kàⁿ-bó ê Phì-jū
I-é-su koh kā in kóng chi̍t-ê phì-jū, " Thian-kok chhin-chhiūⁿ kàⁿ-bó, hū-jîn-lâng the̍h-khì chham tòa saⁿ lâng hūn ê mī-hún lāi-bīn, chòe-āu lóng hoat khí-.lâi. "
13:34 I-é-su Ēng Phì-jū ê Bo̍k-tek
( Mk 4: 33-34)
I-é-su tùi kûn-chiòng lóng ēng phì-jū kā in kóng. Sū-si̍t siōng, ta̍k pái kah in kóng-ōe lóng ū ēng phì-jū.
13:35 I ánne chò sī beh èng-giām Siōng-tè thong-kòe sian-ti só͘ kóng ê ōe, " Góa beh khui chhùi kóng phì-jū, kóng bêng chhòng-sè í-lâi ê ò-pì. " (chù, SPh 78:2)
13:36 Kái-soeh Phê-á ê Phì-jū
Jiân-āu I-é-su lī-khui kûn-chiòng ji̍p-khì chhù lāi. I ê bûn-tô͘ lâi kā I kóng, " Chhiáⁿ kā goán kái-soeh hn̂g-.ni̍h phê-á ê phì-jū. "
13:37 I-é-su ìn kóng, " Hitê iā hó chéng-chí ê to̍h-sī Jîn-chú;
13:38 Hn̂g to̍h-sī sè-kan; hó chéng-chí-sī teh chí thian-kok ê kiáⁿ-jî; phê-á-.sī chí Mô͘-kúi-ê kiáⁿ-jî;
13:39 Iā phê-á ê tùi-te̍k, to̍h-sī chí Mô͘-kúi; siu-sêng ê sî sī chí kim-sè ê boa̍t-ji̍t, siu-koah ê to̍h-sī chí thiⁿ-sài.
13:40 Tī kim-sè ê boa̍t-ji̍t, pháiⁿ lâng ē chhin-chhiūⁿ phê-á hō͘ lâng pa̍k kui pé lâi ēng hóe sio.
13:41 Jîn-chú ē chhe I ê thiⁿ-sài khì I ê kok-tō͘, kā it-chhè hō͘ lâng poa̍h-tó hoān chōe kah chò put-hoat ê lâng lóng lia̍h khí-.lâi,
13:42 Kā in hiat-lo̍h hóe-lô͘, tī hia in ē thî-khàu, kā-gê chhiat-khí.
13:43 Hit sî, gī lâng tī in ê Thiⁿ-pē ê kok-tō͘ ē chhin-chhiūⁿ ji̍t-thâu hoat-chhut kng. Ū hīⁿ-khang thang thiaⁿ ê, tio̍h chù-ì thiaⁿ. "
13:44 Pó-pòe ê Phì-jū
" Thian-kok chhin-chhiūⁿ pó-pòe tâi tī hn̂g-.ni̍h; ū chi̍t-ê lâng hoat-hiān chiū kā i khàm khí-.lâi, chin hoaⁿ-hí chiū khì bē só͘-ū-ê it-chhè lâi bé hit tè hn̂g. "
13:45 Chin-chu ê Phì-jū
" Thian-kok koh chhin-chhiūⁿ chi̍t-ê senglí lâng teh chhōe hó ê chin-chu;
13:46 I chhōe tio̍h chi̍t lia̍p put-chí-á ta̍t-chîⁿ ê chin-chu, chiū khì bē só͘-ū-ê it-chhè lâi bé hit lia̍p chin-chu. "
13:47 Pha-bāng ê Phì-jū
" Thian-kok mā chhin-chhiūⁿ lâng tī ô͘-.ni̍h teh pha bāng, lia̍h kok chióng ê hî;
13:48 Bāng chi̍t ē móa, chiū thoa chiūⁿ-hōaⁿ, chē lo̍h-.lâi, kéng hó ê hî khǹg tòa hî lông-á-lāi, kā bái ê hî hiat-ka̍k.
13:49 Kim-sè ê boa̍t-ji̍t mā ē chhin-chhiūⁿ ánne; thiⁿ-sài beh chhut-.lâi, tùi gī lâng ê tiong-kan kā chōe-jîn hun-pia̍t chhut-.lâi,
13:50 Hiat lo̍h-khì hóe-lô͘. Τī hia in ē thî-khàu, kā-gê chhiat-khí. "
13:51 Sin kah Kū ê Chin-lí
I-é-su mn̄g bûn-tô͘ kóng, " Chiahê tō-lí lín lóng ū bêng-pe̍k bô? " In ìn kóng, " Ū. "
13:52 I-é-su kā in kóng, " Só͘-í, cheng-thong thian-kok tō-lí ê keng-ha̍k kàu-su, chhin-chhiūⁿ chi̍t ke ê chú-lâng tùi i ê chhng-khò͘ kā sin ê kah kū ê mi̍h-kiāⁿ lóng poaⁿ chhut-.lâi. "
13:53 I-é-su tī Ka-hiong Hông Kī-choa̍t
( Mk 6: 1-6; Lk 4: 16-30)
I-é-su kóng chiahê phì-jū liáu-āu chiū lī-khui hia,
13:54 Tńg-khì kakī ê kò͘-hiong, tī in ê hōe-tn̂g kà-sī lâng, hō͘ thiaⁿ-.tio̍h ê lâng tio̍h-kiaⁿ kah gāng-.khì, kóng, " Chit-ê lâng tùi tó-ūi tit tio̍h chit khoán ê tì-hūi kah kiâⁿ sîn-jiah ê khùi-la̍t ah?
13:55 Chit-ê kám m̄-sī ba̍k-chhiūⁿ ê kiáⁿ? I ê lāu-bú kám m̄-sī kiò-chò Mâ-lí-ah, I ê hiaⁿ-tī kám m̄-sī kiò-chò Iâ-kop, Iô-sé-huh, Sí-mòng, Iô-tah?
13:56 I ê chí-mōe kám m̄-sī lóng tòa tī lán chia? Án-ne, chit-ê lâng sī tùi tó-ūi tit tio̍h chiahê pún-léng? "
13:57 In soah tùi I-é-su khí hoán-kám, m̄ koh, I-é-su kā in kóng, " Sian-ti tī kakī ê kò͘-hiong kah ka-têng í-gōa, khì-kàu tó-ūi lóng ē siū chun-tiōng. "
13:58 In-ūi in m̄-sìn, I-é-su tī hia bô kiâⁿ chin chē sîn-jiah.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。