馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
12:1 Tī An-hioh-ji̍t Tiah Be̍h-sūi
( Mk 2:23-28; Lk 6:1-5)
Hit sî, I-é-su tī An-hioh-ji̍t tùi be̍h-hn̂g keng-kòe; I ê bûn-tô͘ pak-tó͘ iau, chiū tiah be̍h-sūi lâi chia̍h.
12:2 Hoa-lí-sái phài ê lâng khòaⁿ tio̍h chiū tùi I-é-su kóng, " Lí khòaⁿ, Lí ê bûn-tô͘ chò An-hioh-ji̍t bô eng-kai chò ê tāichì. "
12:3 I-é-su chiū ìn in kóng, " Ta-bi̍t kah kin-tòe ê lâng pak-tó͘ iau ê sî só͘ chò ê tāichì, lín kám bô tha̍k tio̍h?
12:4 Chiū-sī Ta-bi̍t ji̍p Siōng-tè ê tiān, chia̍h chè-tôaⁿ téng ê piáⁿ; che m̄-sī i kah kin-tòe ê lâng só͘ thang chia̍h ê, kantaⁿ chè-si chiah ē-tàng chia̍h.
12:5 Á-sī lín kám m̄ bat tha̍k tio̍h lu̍t-hoat só͘ kì-chài, tng An-hioh-ji̍t, chè-si tī sèng-tiān hoān tio̍h An-hioh-ji̍t ê kui-kú mā sǹg sī bô chōe?
12:6 Taⁿ góa kā lín kóng, tī chia ū pí sèng-tiān koh khah tiōng-iàu ê.
12:7 Chóng-.sī, lín nā chai ū kì-chài kóng, ' Góa ài liân-bín, bô ài chè-mi̍h' (chù, HSA 6:6) chit kù ōe ê ì-sù, chiū bē kā bô chōe ê lâng tēng chōe.
12:8 In-ūi Jîn-chú sī An-hioh-ji̍t ê Chú. "
12:9 Tī An-hioh-ji̍t I-pēⁿ
( Mk 3: 1-6; Lk 6: 6-11)
I-é-su lī-khui hia, ji̍p-khì in ê hōe-tn̂g;
12:10 Tú-hó ū chi̍t-ê khôe-chhiú ê lâng tī hia. Ū chi̍t-kóa lâng siūⁿ beh chhōe khang-phāng lâi kò I-é-su, chiū mn̄g I kóng, " An-hioh-ji̍t i-pēⁿ kám ū chiàu lu̍t-hoat ê kui-tēng? "
12:11 I-é-su ìn kóng, " Lín tiong-kan ū lâng chi̍t chiah iûⁿ tī An-hioh-ji̍t poa̍h-lo̍h kheⁿ, i kám bē kā i giú khí-.lâi?
12:12 Hô-hòng lâng pí iûⁿ ke gōa-ni̍h kùi-tiōng! Só͘-í, An-hioh-ji̍t chò hó sū sī ha̍h lu̍t-hoat ê. "
12:13 I-é-su chiū tùi hit-ê lâng kóng, " Lí chhiú chhun chhut-.lâi! " I chi̍t ē chhun chhiú, chhiú chiū sûi-sî ho̍k-goân, chhin-chhiūⁿ lēng-gōa hit ki chhiú.
12:14 Hoa-lí-sái phài ê lâng chhut-.khì, chò-hóe kè-bô͘ beh án-chóaⁿ lâi hāi-sí I-é-su.
12:15 Siōng-tè Kéng-soán ê Lô͘-po̍k
I-é-su chai-iáⁿ in ê kè-bô͘, chiū lī-khui hia; ū chin chē lâng tòe I khì, I kā in tiong-kan só͘-ū ê pēⁿ-lâng i hó.
12:16 I-é-su bēng-lēng in m̄ thang soan-iông I ê tāichì.
12:17 Che sī beh èng-giām I-sá-iah sian-ti só͘ kóng ê ōe,
12:18 Lí khòaⁿ, góa só͘ kéng ê lô͘-po̍k, góa só͘ thiàⁿ ê, góa só͘ kah-ì ê; góa beh kā góa ê Sèng Sîn sù hō͘ I, I beh tùi bān-bîn soan-kò góa ê kong-gī.
12:19 I bô beh cheng-lūn, bô beh tōa-siaⁿ soan-jióng; tī ke-lō͘ bô lâng thiaⁿ tio̍h I ê siaⁿ.
12:20 Siū-siong ê lô͘-tek, I bô beh at-tn̄g; beh hoa ê teng-hóe, I mā bô beh pûn-sit, it-ti̍t kàu I hō͘ kong-gī tek-sèng.
12:21 Bān-bîn lóng ē gióng-bōng I ê miâ.
12:22 I-é-su kah Be̍h-che-bul
( Mk 3: 20-30; Lk 11:14-23; 12:10)
Hit sî, ū lâng chhōa chi̍t-ê hō͘ siâ-sîn hū-sin, chheⁿmê koh é-káu ê lâng lâi kìⁿ I-é-su. I chiū kā i i hó, hō͘ é-káu ê kóng-ōe, koh ē khòaⁿ-kìⁿ.
12:23 Chèng lâng lóng tio̍h-kiaⁿ kah gāng-.khì, kóng, " Chit-ê lâng kám m̄-sī Ta-bi̍t ê kiáⁿ-sun? "
12:24 M̄ koh, Hoa-lí-sái phài ê lâng thiaⁿ-.tio̍h chiū kóng, " Chit-ê lâng chí-put-kò sī khò kúi-ông Be̍h-che-bul teh kóaⁿ kúi. "
12:25 I-é-su chai-iáⁿ in ê sim-su, chiū kā in kóng, " Kok-ka nā kakī lāi-loān, chiū ē tì-sú pha-hng; siâⁿ-chhī á-.sī ka-têng nā kakī khí hun-cheng, it-tēng khiā bē tiâu.
12:26 Nā Sa-tán kóaⁿ Sa-tán, sī kakī hun-cheng, i ê ông-kok kám khiā ē tiâu?
12:27 Góa nā-sī khò Be̍h-che-bul teh kóaⁿ kúi, lín ê chú-tē kóaⁿ kúi sī óa-khò siáⁿ lâng? Án-ne, in chiū ē chit-gî lín.
12:28 To̍k-to̍k góa sī óa-khò Siōng-tè ê Sèng Sîn teh kóaⁿ kúi, ánne, Siōng-tè kok-tō͘ chiū lâi-kàu lín tiong-kan à.
12:29 Lâng tio̍h án-chóaⁿ chiah ē-tàng ji̍p-khì ióng-sū ê chhù chhiúⁿ i ê châi-bu̍t? Kám m̄-sī tio̍h tāi-seng kā hit-ê ióng-sū pa̍k khí-.lâi?
12:30 Bô kah góa tâng-sim ê, to̍h-sī hoán-tùi góa; bô kah góa tâng-kang ê, to̍h-sī teh phò-hoāi.
12:31 Siat-to̍k Sèng Sîn
Só͘-í, góa kā lín kóng, lâng it-chhè ê chōe-ok kah húi-pòng, lóng ē tit tio̍h sià-bián; to̍k-to̍k siat-to̍k Sèng Sîn ê, bē tàng sià-bián.
12:32 Lâng nā kóng-ōe kong-kek Jîn-chú ê, iáu ē tit tio̍h sià-bián; to̍k-to̍k nā-sī kóng-ōe kong-kek Sèng Sîn ê, tī kim-sè á-.sī lâi-sè, lóng bē tàng tit tio̍h sià-bián. "
12:33 Chhiū kah Kóe-chí
( Lk 6: 43-45)
" Hó chhiū-kiat hó kóe-chí, pháiⁿ-chhiū-kiat pháiⁿ kóe-chí; khòaⁿ só͘ kiat ê kóe-chí chiū ē-tàng chai-iáⁿ chhiū ê hó-pháiⁿ.
12:34 Lín chiahê to̍k-chôa, lín bêng-bêng sī pháiⁿ ê, ná ē kóng hó ōe? In-ūi lâng sim-lāi chhiong-móa siáⁿ-mi̍h, chhùi chiū ē kóng-chhut siáⁿ-mi̍h.
12:35 Hó lâng tùi só͘ chek-chū ê hó lâi hián-chhut liông-siān; pháiⁿ lâng tùi só͘ chek-chū ê pháiⁿ lâi hián-chhut siâ-ok. "
12:36 " Góa kā lín kóng, lâng só͘ kóng ê êng-á-ōe, tī sím-phòaⁿ ê ji̍t-chí, ta̍k kù lóng tio̍h hū-chek.
12:37 In-ūi Siōng-tè beh kin-kì lí ê ōe lâi tēng lí ū chōe á-.sī bô chōe. "
12:38 Iau-kiû Sîn-jiah
Hit sî, ū kúi-nā-ê keng-ha̍k kàu-su kah Hoa-lí-sái phài ê lâng tùi I-é-su kóng, " Lāu-su, goán ài khòaⁿ Lí kiâⁿ chi̍t-ê sîn-jiah. "
12:39 I-é-su ìn kóng, " Ok-to̍k kan-îm ê sè-tāi siūⁿ beh iau-kiû sîn-jiah; tû-liáu Iô-ná sian-ti ê sîn-jiah í-gōa, bē koh ū sîn-jiah hō͘ in.
12:40 Tú chhin-chhiūⁿ Iô-ná saⁿ ji̍t saⁿ mê tī tōa hî ê pak-tó͘ lāi, (chù, INS 1:17) Jîn-chú mā beh ánne saⁿ ji̍t saⁿ mê tī chhim-thô͘ lāi.
12:41 Tī sím-phòaⁿ ê ji̍t-chí, Ni-ne-beh lâng beh kah chit sè-tāi ê lâng chò-hóe oa̍h khí-.lâi, kā chit sè-tāi ê lâng tēng chōe; in-ūi in thiaⁿ tio̍h Iô-ná ê thoân-tō lâi hóe-kái; hô-hòng tī chia ū pí Iô-ná khah úi-tāi-.ê.
12:42 Tī sím-phòaⁿ ê ji̍t-chí, lâm-hong ê lú-ông ē kah chit sè-tāi ê lâng chò-hóe oa̍h khí-.lâi, kā chit sè-tāi ê lâng tēng chōe; in-ūi i ū tùi tē ê ke̍k-thâu lâi thiaⁿ Só͘-lô-móng tì-hūi ê ōe; hô-hòng tī chia ū pí Só͘-lô-móng khah úi-tāi-.ê. "
12:43 Siâ-sîn Tò Tńg-.lâi
( Lk 11: 24-26)
Siâ-sîn lī-khui hū-sin ê lâng, chiū tī bô chúi ê tē-khu beh chhōe chi̍t-ê hioh-khùn ê só͘-chāi, m̄ koh, lóng chhōe bô.
12:44 I chiū kóng, ' Góa beh tńg-khì góa chhut-.lâi ê chhù. ' I chi̍t-ē kàu-ūi, chiū khòaⁿ-kìⁿ chhù lāi khang-khang, piàⁿ-sàu kah chin chheng-khì, mā chéng-lí kah chin hó-sè.
12:45 Āu-lâi, i koh chhut khì chhōa chhit ê pí kakī khah pháiⁿ ê siâ-sîn, ji̍p-khì hia chò-hóe tòa; ánne, hit-ê lâng ê kiat-kio̍k pí khí-thâu koh khah chhám. Chit-ê siâ-ok ê sè-tāi mā ē chhin-chhiūⁿ ánne.
12:46 I-é-su ê Lāu-bú kah Hiaⁿ-tī
( Mk 3: 31-35; Lk 8: 19-21)
I-é-su iáu teh tùi kûn-chiòng kóng-ōe ê sî, tú-hó I ê lāu-bú kah I ê hiaⁿ-tī khiā tī gōa-bīn, ài beh kah I kóng-ōe.
12:47 Ū lâng kā I-é-su kóng, " Lí khòaⁿ, Lí ê lāu-bú kah Lí ê hiaⁿ-tī khiā tī gōa-bīn, ài beh kah Lí kóng-ōe. "
12:48 I-é-su ìn hit-ê lâng kóng, " Siáⁿ lâng sī góa ê lāu-bú? Siáⁿ lâng sī góa ê hiaⁿ-tī? "
12:49 Jiân-āu chhun chhiú kí I ê bûn-tô͘ kóng, " Lí khòaⁿ, góa ê lāu-bú kah góa ê hiaⁿ-tī.
12:50 Si̍t-hêng góa Thiⁿ-pē ê chí-ì ê lâng, to̍h-sī góa ê hiaⁿ-tī, chí-mōe kah lāu-bú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。