馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
7:1 Phoe-phêng Lâng
( Lk 6:37-38; 41-42)
" M̄-thang phoe-phêng lâng, chiah bián siū lâng phoe-phêng.
7:2 In-ūi lín ēng siáⁿ-mi̍h phiau-chún lâi phoe-phêng lâng, mā ē ánne siū phoe-phêng. Lín ēng siáⁿ-mi̍h niû-khì lâi niû hō͘ lâng, lâng mā ē ánne niû hō͘ lín.
7:3 Lí bô chù-ì tio̍h kakī ba̍k-chiu lāi ê chhâ-kho͘, ná ē kantaⁿ khòaⁿ tio̍h hiaⁿ-tī ba̍k-chiu lāi ê chháu-á-iù?
7:4 Lí kakī ba̍k-chiu lāi ū chhâ-kho͘, ná ē-tàng kā lí ê hiaⁿ-tī kóng, ' Lí ba̍k-chiu lāi ê chháu-á-iù, góa kā lí the̍h chhut-.lâi? '
7:5 Ké hó ê lâng, seng kā lí kakī ba̍k-chiu lāi ê chhâ-kho͘ the̍h chhut-.lâi, chiah ē-tàng khòaⁿ chheng-chhó, thang kā lí hiaⁿ-tī ba̍k-chiu lāi ê chháu-á-iù the̍h chhut-.lâi.
7:6 M̄-thang ēng sîn-sèng ê mi̍h hiat hō͘ káu chia̍h, khióng-kiaⁿ káu ōe oa̍t kòe-lâi kā lín; mā m̄ thang ēng lín ê chin-chu hiat tī ti ê bīn-chêng, ti ē ēng kha lâi thún-ta̍h. "
7:7 Tio̍h Kiû, Tio̍h Chhōe, Tio̍h Phah Mn̂g
( Lk 11: 9-13)
" Tio̍h kiû, lín chiū ē tit tio̍h; tio̍h chhōe, lín chiū ē chhōe-.tio̍h; tio̍h phah mn̂g, chiū ē kā lín khui mn̂g.
7:8 In-ūi lâng nā kiû chiū ē tit tio̍h; nā chhōe chiū ē chhōe-.tio̍h; nā phah mn̂g chiū ē kā i khui mn̂g.
7:9 Lín chò lāu-pē ê lâng, lí ê kiáⁿ kā lí thó piáⁿ, lín kám ē the̍h chio̍h-thâu hō͘ i?
7:10 Á-sī kā lí thó hî, lín kám ē lia̍h chôa hō͘ i?
7:11 Lín sûi-jiân sī pháiⁿ, iáu koh ē-hiáu ēng hó mi̍h hō͘ lín ê kiáⁿ-jî, hô-hòng lín ê Thiⁿ-pē, I kám bē ēng hó mi̍h hō͘ tùi I kî-kiû ê lâng?
7:12 Só͘-í, lín ài lâng án-chóaⁿ kā lín khoán-thāi, lín mā tio̍h ánne khoán-thāi lâng, in-ūi che sī lu̍t-hoat kah sian-ti ê kà-sī. "
7:13 E̍h ê Mn̂g
( Lk 13: 24)
" Lín tio̍h tùi hit-ê e̍h-mn̂g ji̍p-.khì, in-ūi thàu kàu bia̍t-bông ê mn̂g chin khoah, hit tiâu lō͘ chin hó kiâⁿ, tùi hia ji̍p-.khì ê lâng chin chē.
7:14 Thàu kàu éng-seng ê mn̂g chin e̍h, hit tiâu lō͘ chin pháiⁿ-kiâⁿ, chhōe tio̍h ê lâng chin chió. "
7:15 Tùi Kóe-chí Lâi Jīn-bat Chhiū
( Lk 6: 43-44)
" Tio̍h thê-hông ké sian-ti, in lâi lín chia ê sî, gōa-piáu ké kahná mî-iûⁿ, lāi-sim khiok sī hiong-ok ê chhâi-lông.
7:16 Lín ē-tàng tùi in ê kóe-chí lâi jīn-bat in. Kám ē-tàng tùi chhì-phè bán phû-tô? Kám ē-tàng tùi chi̍t-lê bán bû-hoa-kó?
7:17 Án-ne, hó-chhiū ē kiat hó kóe-chí, pháiⁿ-chhiū ē kiat pháiⁿ kóe-chí;
7:18 Hó-chhiū bē kiat pháiⁿ kóe-chí, pháiⁿ-chhiū mā bē kiat hó kóe-chí.
7:19 Bē kiat hó kóe-chí ê chhiū, chiū kā i chhò khí-.lâi, hiat lo̍h-khì hóe-.ni̍h sio.
7:20 Só͘-í, lín ē-tàng tùi in só͘ kiat ê kóe-chí lâi jīn-bat in. "
7:21 Ji̍p Thian-kok Chi Mn̂g ê Iàu-kiāⁿ
( Lk 13: 25-27)
" M̄-sī chheng-ho͘ Góa ' Chú ah, Chú ah'ê lâng lóng ē-tàng ji̍p-khì thian-kok; kantaⁿ si̍t-hiān Góa ê Thiⁿ-pē chí-ì ê lâng, chiah ē-tàng ji̍p-.khì.
7:22 Hit ji̍t kàu ê sî, chin chē lâng ē kā góa kóng, ' Chú ah, Chú ah, goán kám m̄-sī ū hōng Lí ê miâ thoân sìn-sit, koh hōng Lí ê miâ kóaⁿ kúi, mā ū hōng Lí ê miâ kiâⁿ chin chē sîn-jiah? '
7:23 Hit sî, góa ē bêng-pe̍k kā in kóng, ' Góa lóng m̄ bat lín. Lín chiahê chò pháiⁿ ê lâng, tio̍h lī-khui góa. '"
7:24 Nn̄g Khoán Tē-ki
( Lk 6:47-49)
" Só͘-í, thiaⁿ góa ê ōe ū khì si̍t-hiān ê lâng, ná chhin-chhiūⁿ chi̍t-ê chhong-bêng ê lâng kā i ê chhù khí tòa chio̍h-pôaⁿ téng;
7:25 Tú tio̍h tōa hō͘ phoah, tōa-chúi lâi, tōa hong sàu, chhiong tio̍h hit keng chhù, chhù mā bē tó, in-ūi ū kian-kò͘ ê tē-ki tī chio̍h-pôaⁿ téng.
7:26 Thiaⁿ góa chiahê ōe bô khì si̍t-hiān ê lâng, ná chhin-chhiūⁿ chi̍t-ê gōng lâng kā chhù khí tòa soa á téng;
7:27 Tú tio̍h tōa hō͘ phoah, tōa-chúi lâi, tōa hong sàu, chhiong tio̍h hit keng chhù, chhù chiū tó kah chin giâm-tiōng. "
7:28 Kûn-chiòng ê Hôe-èng
I-é-su kóng chiahê ōe liáu-āu, kûn-chiòng hō͘ I ê kà-sī kiaⁿ tio̍h,
7:29 In-ūi I kà-sī lâng chin ū koân-ui kah in ê keng-ha̍k kàu-su bô kāng-khoán.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。