馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
4:1 I-é-su Siū Chhì-thàm
( Mk 1: 12-13; Lk 4: 1-13)
Hit sî, I-é-su hō͘ Sèng Sîn chhōa kàu khòng-iá, khì siū Mô͘-kúi-ê chhì-thàm.
4:2 I-é-su kìm-chia̍h sì-cha̍p mê-ji̍t, āu-lâi chiū iau.
4:3 Chhì-thàm-chiá óa-lâi kā I kóng, " Lí nā-sī Siōng-tè ê Kiáⁿ, tio̍h bēng-lēng chiahê chio̍h-thâu piàn-chò piáⁿ. "
4:4 I-é-su ìn kóng, " Ū kì-chài, lâng ê oa̍h-miā m̄-sī kantaⁿ óa-khò piáⁿ, sī óa-khò tùi Siōng-tè ê chhùi só͘ kóng chhut-.lâi ê múi chi̍t kù ōe. " (chù, SBK 8:3)
4:5 Mô͘-kúi chiū chhōa I-é-su khì-kàu sèng-siâⁿ, hō͘ I khiā tī sèng-tiān chhù téng siōng koân ê só͘-chāi.
4:6 Tùi I kóng, " Lí nā-sī Siōng-tè ê Kiáⁿ, tio̍h tùi chia thiàu lo̍h-.khì, in-ūi ū kì-chài, Siōng-tè ē bēng-lēng I ê thiⁿ-sài lâi pó-hō͘ Lí. In ē ēng chhiú kā Lí hû-teh, hō͘ Lí ê kha bē tak tio̍h chio̍h-thâu. " (chù, SPh 91:11-12)
4:7 I-é-su kā i kóng, " Koh ū kì-chài, M̄-thang chhì-thàm Chú — lí ê Siōng-tè. " (chù, SBK 6:16)
4:8 Mô͘-kúi koh chhōa I-é-su khì chi̍t-ê chin koân ê soaⁿ téng, hō͘ I khòaⁿ thian-hā bān-kok kah in ê êng-hôa hù-kùi,
4:9 Kā I kóng, " Lí nā phak lo̍h-lâi pài góa, chiahê it-chhè góa lóng beh hō͘ Lí. "
4:10 I-é-su ìn kóng, " Sa-tán, siám-khui! Ū kì-chài, Tio̍h pài Chú — lí ê Siōng-tè, to̍k-to̍k ho̍k-sāi I. " (chù, SBK 6:13)
4:11 Mô͘-kúi chiū lī-khui I-é-su, sûi-sî ū thiⁿ-sài lâi kā I sū-hāu.
4:12 I-é-su Khì Ga-lí-la-iah Séng Khai-sí Thoân-tō
( Mk 1: 14-15; Lk 4: 14-15)
I-é-su thiaⁿ tio̍h Iô-há-neh hō͘ lâng lia̍h-khì koaiⁿ-kaⁿ, chiū siám-phiah-khì Ga-lí-la-iah séng;
4:13 I lī-khui Na-cha-lia̍t siâⁿ, khì tòa tī Che-bú-lông kah Ná-hu-tha-lím tē-khu, Ga-lí-la-iah ô͘-piⁿ ê Ka-peh-ná-um.
4:14 Che sī beh èng-giām I-sá-iah sian-ti só͘ kóng ê ōe,
4:15 " Che-bú-lông ê tē, Ná-hu-tha-lím ê tē, iân hái-hōaⁿ ê lō͘, Iol-tàn hô ê hô gōa, gōa-pang lâng teh tòa ê Ga-lí-la-iah séng,
4:16 Tòa tī o͘-àm tiong ê jîn-bîn, ū khòaⁿ tio̍h tōa kng; tòa tī sí-ìm tē ê lâng ū kng chiò in. " (chù, ISI 9:1-2)
4:17 Tùi hit sî khí, I-é-su khai-sí soan-káng tō-lí, kóng, " Lín tio̍h hóe-kái, in-ūi thian-kok teh beh lâi-lîm! "
4:18 I-é-su Ho͘-tiàu Tē-it Phoe Bûn-tô͘
( Mk 1: 16-20; Lk 5: 1-11)
Ū chi̍t ji̍t, I-é-su tī Ga-lí-la-iah ô͘ ê ô͘-piⁿ teh kiâⁿ ê sî, khòaⁿ tio̍h nn̄g-ê hiaⁿ-tī-á, to̍h-sī kiò-chò Piat-tò͘ ê Sí-mòng kah An-to-le̍h, tī ô͘-.ni̍h teh pha bāng, in sī lia̍h-hî lâng.
4:19 I-é-su kā in kóng, " Lâi tòe góa, góa beh hō͘ lín tit tio̍h lâng chhin-chhiūⁿ lia̍h-hî lâng tit tio̍h hî. "
4:20 In sûi-sî kā hî-bāng-á pàng-teh, lâi tòe I-é-su.
4:21 I-é-su hiòng chêng kiâⁿ, koh khòaⁿ tio̍h nn̄g-ê hiaⁿ-tī-á, Che-beh-tái ê kiáⁿ Iâ-kop kah i ê sió-tī Iô-há-neh. In kah lāu-pē Che-beh-tái tī chûn téng teh pó͘ bāng. I-é-su mā chio in lâi tòe I.
4:22 In sûi-sî lī-khui chûn kah in ê lāu-pē sio-sî, lâi tòe I-é-su.
4:23 I-é-su Tùi Kui Tōa-tīn ê Lâng Thoân-tō
( Lk 6: 17-19)
I-é-su kā Ga-lí-la-iah séng kiâⁿ thàu-thàu, tī hia ê hōe-tn̂g kà-sī lâng, soan-káng thian-kok ê hok-im, i hó bîn-chiòng ta̍k chióng ê pēⁿ-chèng.
4:24 I ê miâ-siaⁿ thoân kàu choân Su-lī-a. Lâng chiū kā ū kok chióng pēⁿ-thiàⁿ ê lâng, bô-lūn sī siâ-sîn hū-sin, iûⁿ-hîn á-.sī piàn-sūi, lóng chhōa-lâi I-é-su hia, I chiū kā in i hó.
4:25 Hit sî, ū chin tōa-tīn lâng tùi Ga-lí-la-iah, Te-ka-po͘-lī, Ê-lú-sa-lèm, Iô-tá-iah kah Iol-tàn hô tùi-hōaⁿ-lâi tòe I-é-su.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。