撒迦利亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Siōng-chú Tap-èng Chín-kiù
Tng chhun-thiⁿ ê hō͘-kùi, lín tio̍h tùi Siōng-chú kiû hō͘, to̍h-sī hoat-chhut sihnà ê Siōng-chú. I ē kā in lo̍h chin chē chūn ê hō͘, hō͘ ta̍k lâng ū chhân-hn̂g ê chhài-se.
10:2 In-ūi chhù lāi ê ngó͘-siōng kóng pe̍h-chha̍t; chiam-pok ê khòaⁿ hi-ké; kóng hi-ké ê bāng khang-khang an-ùi lâng. Só͘-í, in bê-lō͘ chhin-chhiūⁿ iûⁿ, koh in-ūi bô bo̍k-chiá, tì-sú siū khùn-khó͘.
10:3 Siōng-chú kóng, " Góa ê siū-khì tùi hiahê bo̍k-chiá hoat-chok, Góa mā beh pān-lí hiahê kang ê soaⁿ-iûⁿ; in-ūi bān-kun ê Siōng-chú khòaⁿ-kò͘ I ê iûⁿ-kûn, to̍h-sī Iô-tah ke, hō͘ in chhin-chhiūⁿ I ê hó bé tī chiàn-tīn.
10:4 Chhù-kak chio̍h tùi I chhut, kian-kò͘ ê teng mā tùi I chhut, kau-chiàn ê kiong mā tùi I chhut, chiahê chiáng-koân-.ê mā tùi I chhut.
10:5 In ē chhin-chhiūⁿ ióng-sū tī chiàn-tīn, kā tùi-te̍k ta̍h tī ke-lō͘ ê thô͘-môe tiong. In beh kau-chiàn, in-ūi Siōng-chú kah in tông-chāi; kiàn-nā khiâ bé ê tú tio̍h in lóng ē kiàn-siàu.
10:6 Góa beh kian-kò͘ Iô-tah ke, chín-kiù Iô-sé-huh ê ke, beh chhōa in tò tńg-.lâi. In-ūi Góa liân-bín in; in ē chhin-chhiūⁿ Góa m̄ bat kā in khì-sak ê khoán, in-ūi Góa sī Siōng-chú — in ê Siōng-tè, Góa beh thiàⁿ in.
10:7 E-hu-laim ē chhin-chhiūⁿ ióng-sū; in ê sim hoaⁿ-hí chhin-chhiūⁿ teh lim chiú; in ê kiáⁿ-jî ē khòaⁿ tio̍h ánne lâi hoaⁿ-hí; in ê sim ē in-ūi Siōng-chú lâi khoài-lo̍k.
10:8 Góa beh chhut kháu-hō, lâi kā in chū-chi̍p, in-ūi Góa í-keng kā in kiù-sio̍k. In ē ke-thiⁿ, chhin-chhiūⁿ in chêng ê ke-thiⁿ.
10:9 Góa sûi-jiân kā in sì-sòaⁿ tī lia̍t kok tiong, in ē tī hn̄g ê só͘-chāi kì-liām Góa. In kah in ê kiáⁿ-jî lóng ē oa̍h-.leh, koh tò tńg-.lâi.
10:10 Góa beh koh hō͘ in tùi Ai-gi̍p tò tńg-.lâi, kā in chū-chi̍p lâi chhut A-siul, chhōa in lâi-kàu Gi-lia̍t tē kah Le-ba-nòng; mā bô kàu-gia̍h só͘-chāi thang hō͘ in tòa.
10:11 I ē keng-kòe khó͘-lān ê hái, kong-kek hái tiong ê pho-lōng, Nai-l hô chhim ê só͘-chāi ē lóng ta-.khì. A-siul ê kiau-ngō͘ ē kàng kē, Ai-gi̍p ê koân-pèng ē bô-.khì.
10:12 Góa beh hō͘ in tī Siōng-chú ióng-chòng, koh thok I ê miâ kiâⁿ lâi kiâⁿ khì. Che sī Siōng-chú kóng ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。