撒迦利亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Siōng-chú Khián-chek Bô Sêng-khún ê Kìm-chia̍h
Ta-lió-suh ông sì nî káu-.goe̍h, to̍h-sī Ki-su-liû goe̍h （ Chù, Hi-bú-lâi le̍k-hoat ê tē-káu-ê goe̍h, siong-tong se-le̍k ê cha̍p-it chì cha̍p-jī goe̍h ）Chhe sì, Siōng-chú ê ōe lîm-kàu Cha-kha-lī-a.
7:2 Hit sî, Be-thel lâng í-keng chhe-phài Sia-lé-chel, Le-gian-me-le̍k kah tòe in ê lâng khì ǹg Siōng-chú kiû un,
7:3 mā mn̄g bān-kun ê Siōng-chú tiān lāi ê chè-si í-ki̍p sian-ti, kóng, " Góa le̍k-nî í-lâi, tī gō͘-goe̍h kan thî-khàu beh hō͘ kakī hun-pia̍t sè-sio̍k, taⁿ kám iáu koh tio̍h ánne kiâⁿ? "
7:4 Bān-kun ê Siōng-chú ê ōe lîm-kàu góa, kóng,
7:5 " Lí tio̍h kā chit só͘-chāi ê chèng lâng kah chè-si kóng, ' Lín chhit-cha̍p nî lâi, tī gō͘-.goe̍h, chhit-.goe̍h kìm-chia̍h pi-ai, kám sī ūi tio̍h Góa, kám ūi tio̍h Góa teh kìm-chia̍h?
7:6 Lín á-.sī chia̍h á-.sī lim, kám m̄-sī lín teh chia̍h, lín teh-lim?
7:7 " Tng Ê-lú-sa-lèm kah sì-kho͘-ûi ê siâⁿ ū tòa ê jîn-bîn koh hong-sēng, lâm-hong kah pêng-goân ū lâng tòa ê sî, Siōng-chú kau-thok í-chêng ê sian-ti só͘ soan-pò͘ ê ōe, lín kám m̄-sī tio̍h thiaⁿ? '"
7:8 Pōe-ge̍k Tì-sú Siū-lia̍h
Siōng-chú ê ōe koh lîm-kàu Cha-kha-lī-a, kóng,
7:9 " Bān-kun ê Siōng-chú bat ánne kóng, ' Tio̍h chiàu chin-si̍t ê kong-pêⁿ lâi sím-phòaⁿ, tāi-ke ēng chû-ài, liân-bín lâi sio khoán-thāi.
7:10 M̄-thang khi-hū kóaⁿ-hū, ko͘-jî, chhut-gōa lâng kah sànchhiah lâng. M̄-thang sim-lāi kè-bô͘ pháiⁿ tāi lâi sio hām-hāi. '
7:11 " Chóng-.sī, in m̄-khéng chun-thàn, oa̍t-tńg keng-kah-thâu lâi pōe-ge̍k, that-ba̍t in ê hīⁿ-khang tì-sú bē thiaⁿ.
7:12 Koh hō͘ in ê sim ngē kah chhin-chhiūⁿ soān-chio̍h, bô ài thiaⁿ lu̍t-hoat kah bān-kun ê Siōng-chú ēng I ê Sèng Sîn thok í-chêng ê sian-ti só͘ kóng ê ōe. Só͘-í, bān-kun ê Siōng-chú tōa-tōa siū-khì.
7:13 In-ūi I bat kiò, in m̄-thiaⁿ, ánne in beh kiò, Góa mā m̄-thiaⁿ. Che sī bān-kun ê Siōng-chú kóng ê.
7:14 M̄ koh, Góa beh ēng kńg-lê-á hong kā in chhoe sòaⁿ khì-kàu in só͘ m̄ bat ê lia̍t kok. Án-ne, chit-ê tē tī in khì liáu-āu to̍h piàn-chò pha-hng, tì-sú bô lâng chhut-ji̍p keng-kòe, in-ūi in hō͘ thang hoaⁿ-hí ê tē pha-hng à. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。