哈該書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Siōng-chú Bēng-lēng Tiông-kiàn Sèng-tiān
Ta-lió-suh ông jī nî la̍k-goe̍h chhe-it, Siōng-chú ê ōe thok sian-ti Ha-gái, thoân hō͘ Iô-tah ê chóng-tok Sa-la-thi-el ê kiáⁿ — Cho-lô-ba-bel kah Io-cha-tak ê kiáⁿ — tōa-chè-si Io-siú-ah, kóng:
1:2 Bān-kun ê Siōng-chú ê ōe ánne kóng, " Chit-ê jîn-bîn kóng-khí Siōng-chú tiān ê sî, hit-ê sî iáu-bōe kàu. "
1:3 Hit sî, Siōng-chú ê ōe thok sian-ti Ha-gái, kóng,
1:4 " Chit keng tiān iû-goân hong-hùi, che kám sī lín kakī tòa thian-hoa-pán ê chhù ê sî?
1:5 Taⁿ bān-kun ê Siōng-chú ánne kóng: Lín tio̍h séng-chhat lín ê só͘ kiâⁿ.
1:6 Lín iā chéng-chí chē, siu-sêng chió; lín chia̍h, mā bē pá; lim, mā bē chí chhùi-ta; chhēng saⁿ, mā bē sio; tit tio̍h kang-chîⁿ ê, kā kang-chîⁿ hē tī phòa-khang ê tē-á. "
1:7 Bān-kun ê Siōng-chú ánne kóng, " Lín tio̍h séng-chhat lín ê só͘ kiâⁿ.
1:8 Lín tio̍h chiūⁿ soaⁿ chhú chhâ-liāu, lâi khí chit-ê tiān, Góa chiū ē in-ūi ánne lâi hoaⁿ-hí, koh tit tio̍h êng-kng. Che sī Siōng-chú kóng ê.
1:9 " Lín ǹg-bāng tit tio̍h chē, lí khòaⁿ, tian-tò tit tio̍h chió; lín tòa kàu chhù ê, Góa chiū pûn hō͘ i bô-.khì. Che sī siáⁿ-mi̍h iân-kò͘? Sī in-ūi Góa ê tiān hong-hùi, lín ta̍k lâng kín-kip kakī ê chhù. Che sī bān-kun ê Siōng-chú kóng ê.
1:10 Só͘-í, in-ūi lín ê iân-kò͘, thiⁿ chiū bô lo̍h lō͘-chúi, tē mā bô chhut i ê lông-sán-bu̍t.
1:11 Góa hō͘ khòng-ōaⁿ lîm-kàu tī thó͘-tē, tī soaⁿ-thâu, tī ngó͘-kok, tī sin chiú, tī iû kah tī tē-chiūⁿ só͘ chhut ê, tī lâng, tī chengseⁿ, tī lâng ê chhiú lô-khó͘ tit tio̍h ê. "
1:12 Jîn-bîn Thiaⁿ-thàn Siōng-chú ê Bēng-lēng
Hit sî, Sa-la-thi-el ê kiáⁿ Cho-lô-ba-bel kah Io-cha-tak ê kiáⁿ tōa-chè-si Io-siú-ah kah só͘ chhun lo̍h-.lâi ê jîn-bîn, lóng chun-thàn in ê Siōng-chú ê siaⁿ kah sian-ti Ha-gái hōng Siōng-chú — in ê Siōng-tè chhe-phài i só͘ kóng ê ōe; jîn-bîn mā tī Siōng-chú ê bīn-chêng chûn kiaⁿ-ùi ê sim.
1:13 Siōng-chú ê sù-chiá Ha-gái chiàu Siōng-chú só͘ bēng-lēng kā jîn-bîn kóng, " Siōng-chú kóng: Góa kah lín tông-chāi. "
1:14 Siōng-chú kek-tōng Iô-tah ê chóng-tok Sa-la-thi-el ê kiáⁿ Cho-lô-ba-bel ê sim, kah Io-cha-tak ê kiáⁿ tōa-chè-si Io-siú-ah ê sim, kah chhun lo̍h-.lâi ê jîn-bîn ê sim, in chiū lâi tī bān-kun ê Siōng-chú — in ê Siōng-tè ê tiān chò-kang.
1:15 Che sī tī Ta-lió-suh ông jī nî la̍k-goe̍h jī-cha̍p sì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。