彌迦書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 I-su-la-el Lâng ê Hú-pāi
Góa ū chai-hō! Góa chhin-chhiūⁿ joa̍h-thiⁿ ê kóe-chí siu-sêng liáu ê sî, koh chhin-chhiūⁿ bán phû-tô só͘ chhun lo̍h-.lâi ê lân-san lia̍p, bô kui pha thang chia̍h; góa ê sim him-bō͘ khí-thâu se̍k ê bû-hoa-kó.
7:2 Tē chiūⁿ khiân-sêng ê lâng ē sí-bông, tī lâng ê tiong-kan bô chèng-ti̍t ê lâng; in lóng bâi-ho̍k beh thâi-sí-lâng, ēng lô-bāng tng i ê hiaⁿ-tī.
7:3 In ê chhiú ngē-ngē beh chò pháiⁿ, siú-léng kah sím-phòaⁿ-koaⁿ thó o͘-se, tōa koaⁿ-oân thò͘-chhut i sim-lāi ê su-io̍k, chò-hóe cho͘-chit pháiⁿ thoân-thé.
7:4 In tiong-kan siōng hó ê chhin-chhiūⁿ chi̍t-lê, tē-it chèng-ti̍t ê chhin-chhiūⁿ lî-pa ê chhì-á. Lí ê siú-bōng ê lâng só͘ kóng ê ji̍t, to̍h-sī lí siū hêng-hoa̍t ê ji̍t kīn à. In ê bê-loān kàu à.
7:5 M̄-thang óa-khò tâng-phōaⁿ, m̄ thang sìn chhin-bi̍t ê pêng-iú. Tio̍h iok-sok lí ê chhùi, m̄ thang tùi só͘ thiàⁿ ê bó͘ kóng-khí.
7:6 In-ūi kiáⁿ biáu-sī lāu-pē, chabó͘ kiáⁿ ngó͘-ge̍k lāu-bú, sim-pū ngó͘-ge̍k ta-ke; lâng ê tùi-te̍k, to̍h-sī i chhù lāi ê lâng.
7:7 Nā-sī góa, góa beh gióng-bōng Siōng-chú, mā beh thèng-hāu kiù góa ê Siōng-tè; góa ê Siōng-tè ē thiaⁿ góa.
7:8 Siōng-chú Chín-kiù I ê Chú-bîn
Góa ê tùi-te̍k, m̄ thang in-ūi góa lâi hoaⁿ-hí. Góa sûi-jiân poa̍h-tó, ē koh peh khí-.lâi; góa chē tī o͘-àm, Siōng-chú chò góa ê kng.
7:9 Góa tio̍h jím-siū Siōng-chú ê siū-khì, in-ūi góa tek-chōe I, thèng-hāu I piān-hō͘ góa ê àn, kā góa phòaⁿ-toàn. I ē chhōa góa chhut-lâi-kàu tī kng-bêng, góa mā ē khòaⁿ tio̍h I ê kong-gī.
7:10 Hit sî, góa ê tùi-te̍k, to̍h-sī bat tùi góa kóng " Siōng-chú — lí ê Siōng-tè tī tó-ūi " ê, i chi̍t-ē khòaⁿ-.tio̍h, chiū tōa-tōa kiàn-siàu. Góa ē chhin-ba̍k khòaⁿ tio̍h i; i ē siū thún-ta̍h, chhin-chhiūⁿ ke-lō͘ ê thô͘-môe.
7:11 Ê-lú-sa-lèm lâng, khí lí ê siâⁿ chhiûⁿ ê ji̍t-chí kàu à, hit ji̍t, lí ê tē-kài ē khui-khoah.
7:12 Hit ji̍t, in ē tùi A-siul kàu Ai-gi̍p chiahê siâⁿ, tùi Ai-gi̍p kàu tōa hô, tùi chit-ê hái kàu hit-ê hái, tùi chit-ê soaⁿ kàu hit-ê soaⁿ, lóng ē kui óa-.lâi.
7:13 Chóng-.sī, tē in-ūi tòa tī hia ê jîn-bîn ê iân-kò͘ lâi pha-hng, sī in ê hêng-ûi ê kiat-kó.
7:14 Siōng-chú Liân-bín I ê Chú-bîn
Kiû Lí ēng Lí ê koái-á chhī Lí ê chú-bîn, to̍h-sī Lí ê sán-gia̍p ê iûⁿ-kûn, tī Kal-mel soaⁿ kakī tiàm tī chhiū-nâ lāi ê, chhī in tī Ba-siáng kah Gi-lia̍t, chhin-chhiūⁿ chá-sî ánne.
7:15 Góa beh hián-chhut kî-sū hō͘ i khòaⁿ, chhin-chhiūⁿ lí chhut Ai-gi̍p tē ê sî hit khoán.
7:16 Lia̍t-pang khòaⁿ tio̍h chiū ē ūi kakī ê sè-le̍k kiàn-siàu; in ē ēng chhiú am chhùi, in ê hīⁿ-khang mā ē chhàu-hīⁿ-lâng.
7:17 In ē chīⁿ thô͘-soa hún chhin-chhiūⁿ chôa, chhin-chhiūⁿ tī thô͘-kha teh sô ê mi̍h, phi̍h-phi̍h chhoah chhut i ê khang. In ē kiaⁿ-hiâⁿ lâi kui lán ê Siōng-tè — Siōng-chú, koh in-ūi Lí lâi kiaⁿ-hiâⁿ.
7:18 Siōng-tè ah, siáⁿ lâng chhin-chhiūⁿ Lí, sī sià-bián chōe-kò, liōng-chêng I só͘ chhun lo̍h-.lâi ê chú-bîn ê kòe-sit ê? I bô éng-oán khǹg siū-khì, in-ūi I hoaⁿ-hí liân-bín.
7:19 I ē oa̍t tńg-lâi liân-bín lán, I ta̍h lán ê chōe-ok tī kha chêng, Lí ē kā in só͘-ū ê chōe-ok hiat lo̍h-khì chhim hái.
7:20 Lí beh chiàu kó͘-chá só͘ tùi goán ê chó͘-sian chiùchōa ê, si sêng-si̍t tī Iâ-kop, kiâⁿ chû-ài tī A-bu-la-hàm.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。