彌迦書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Mí-kah Chek-pī I-su-la-el ê Léng-siù
Góa kóng, Iâ-kop chiahê siú-léng, I-su-la-el ê chú-bîn chiahê koaⁿ-tiúⁿ, lín tio̍h thiaⁿ! Lín kám m̄ chai-iáⁿ kong-pêⁿ?
3:2 Lín oàn-hūn hó ài pháiⁿ, pak lâng ê phôe, tùi in ê kut thak bah.
3:3 Mā chia̍h góa ê jîn-bîn ê bah, pak in ê phôe, at-tn̄g in ê kut-thâu, chhiat kui tè chhin-chhiūⁿ teh beh lo̍h oe, koh chhin-chhiūⁿ tiáⁿ lāi ê bah.
3:4 Hit sî, in ē kiû-kiò Siōng-chú, m̄ koh, I bô beh kā in ìn. Hit sî, I beh chiàu in só͘ kiâⁿ ê pháiⁿ tāi, tùi in am bīn.
3:5 Siōng-chú kóng tio̍h hiahê hō͘ góa ê jîn-bîn kiâⁿ m̄ tio̍h lō͘ ê sian-ti ánne kóng: In ê chhùi-khí nā ū mi̍h-kiāⁿ thang pō͘, chiū tōa-siaⁿ hoah, " Pêng-an! " Lâng nā bô ēng mi̍h-kiāⁿ that in ê chhùi, in chiū chún-pī kau-chiàn lâi kā i kong-kek.
3:6 Só͘-í, Siōng-chú tùi chit chióng sian-ti kóng, " Lín ē tú tio̍h àm-mê, tì-sú khòaⁿ bē tio̍h ī-siōng, koh ē tú tio̍h o͘-àm, tì-sú bē chiam-pok. Hiahê sian-ti ē tú tio̍h chhin-chhiūⁿ ji̍t lo̍h, mā ē tú tio̍h ji̍t-sî piàn o͘-àm. "
3:7 Hit sî, sian-kiàn ê kiàn-siàu, chiam-pok ê làu-khùi, lóng ē am in ê chhùi-tûn, in-ūi Siōng-chú bô teh thiaⁿ in ê ōe.
3:8 Nā-sī góa, góa tùi Siōng-chú ê Sèng Sîn, ū khùi-la̍t, ū kong-pêⁿ, ū châi-lêng móa-móa, thang tùi Iâ-kop kóng bêng i ê kòe-sit, tùi I-su-la-el chí-chhut i ê chōe-ok.
3:9 Iâ-kop ê siú-léng kah I-su-la-el ê chú-bîn ê koaⁿ-tiúⁿ, lín oàn-hūn kong-pêⁿ, óng-khut chèng-ti̍t ê lâng, lín tio̍h thiaⁿ!
3:10 In ēng hoeh kiàn-li̍p Si-óng, ēng chōe-ok khí-chō Ê-lú-sa-lèm.
3:11 In ê siú-léng ūi tio̍h o͘-se lâi sím-phòaⁿ, in ê chè-si ūi tio̍h kang-chîⁿ lâi kà-sī, in ê sian-ti ūi tio̍h gîn lâi chiam-pok, in iáu koh óa-khò Siōng-chú, kóng, " Siōng-chú kám bô tī lán tiong-kan? Chai-hō bô lîm-kàu lán. "
3:12 Só͘-í, in-ūi lín ê iân-kò͘, Si-óng ē hō͘ lâng lê, chhin-chhiūⁿ teh lê chhân-hn̂g; Ê-lú-sa-lèm ē piàn-chò thô͘-tui, chit-ê tiān ê soaⁿ ē chhin-chhiūⁿ chhiū-nâ koân ê só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。