俄巴底亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Siōng-chú beh Têng-hoa̍t E-tóm
Ô-bá-tí-ah só͘ tit tio̍h ê be̍k-sī. Chì-koân Siōng-chú kóng tio̍h E-tóm kóng: Goán tùi Siōng-chú hia thiaⁿ tio̍h siau-sit, mā ū sù-chiá hōng chhe-khián khì lia̍t kok, kóng: Khí-.lâi, lán tio̍h khí-lâi kah i kau-chiàn!
1:2 Lí khòaⁿ, Góa hō͘ lí tī lia̍t kok tiong chò bî-sè, hō͘ lâng tōa-tōa khòaⁿ-khin.
1:3 Tiàm tī chio̍h-tōng lāi, tòa koân ê só͘-chāi ê lâng, lí ê sim kiau-ngō͘ kā lí phiàn, sim-lāi siūⁿ kóng: Siáⁿ lâng ē kā góa kàng lo̍h tē?
1:4 Lí sûi-jiân seng koân chhin-chhiūⁿ eng-chiáu, chò siū tī chheⁿ ê tiong-kan, Góa beh tùi hia kā lí kàng-lo̍h. Che sī Siōng-chú kóng ê.
1:5 Chha̍t nā lâi lí hia, á-.sī kiông-tō àm-sî lâi, kám m̄-sī thau kàu boán-ì ûi-chí? Bán phû-tô ê nā lâi-kàu lí hia bán, kám bô iáu lâu kúi-lia̍p-á? Lí tú tio̍h chián-tû ē kàu án-chóaⁿ?
1:6 E-sáu án-chóaⁿ siū chhiau-chhōe? I só͘ khǹg ê pó-bu̍t án-chóaⁿ hông chhâ chhut-.lâi?
1:7 Kah lí kiat iok ê lâng lóng kā lí chhōa kàu pian-kài; kah lí hô-hó ê lâng kā lí khi-phiàn lâi iâⁿ-kòe lí; chia̍h lí ê bí-niûⁿ ê lâng siat oa̍h-tauh tī lí ê ē-bīn, i ê sim lóng bô tì-sek.
1:8 Siōng-chú kóng: Kàu hit ji̍t, Góa kám bô tùi E-tóm tû-bia̍t tì-hūi ê lâng, tùi E-sáu ê soaⁿ tû-bia̍t chhong-bêng ê lâng?
1:9 Thê-man, lí ê ióng-sū ē kiaⁿ-hiâⁿ, tì-sú tiàm E-sáu ê soaⁿ, ta̍k lâng siū thâi-sí chián-tû.
1:10 E-tóm Siū Têng-hoa̍t ê Goân-in
In-ūi lí pō-gio̍k lí ê hiaⁿ-tī Iâ-kop, lí ē tú tio̍h tōa-tōa kiàn-siàu, lí mā ē éng-oán siū chián-tû.
1:11 Tng lí khiā tī piⁿ-á ê ji̍t, gōa-lâng chhiúⁿ i ê châi-bu̍t, ī-pang lâng ji̍p-khì i ê siâⁿ mn̂g, ūi Ê-lú-sa-lèm liam-khau, hit ji̍t lí chhin-chhiūⁿ in tiong-kan ê chi̍t-ê.
1:12 Tng lí ê hiaⁿ-tī ê ji̍t-chí, to̍h-sī i tú tio̍h hoān-lān ê ji̍t-chí, lí bô eng-kai khiā-teh khòaⁿ; Iô-tah lâng siū bia̍t ê ji̍t-chí, lí bô eng-kai ūi tio̍h ánne lâi hoaⁿ-hí; in tú tio̍h chai-lān ê ji̍t-chí, lí bô eng-kai kóng tōa-ōe.
1:13 Góa ê jîn-bîn tú tio̍h chai-hō ê ji̍t-chí, lí bô eng-kai ji̍p-khì i ê mn̂g; in tú tio̍h chai-hō ê ji̍t-chí, lí bô eng-kai khòaⁿ in teh siū khó͘; in tú tio̍h chai-hō ê ji̍t-chí, lí bô eng-kai bong tio̍h in ê châi-bu̍t.
1:14 Lí bô eng-kai khiā tī siang-chhe lō͘, cha̍h in tiong-kan tô-cháu ê lâng; in tú tio̍h chai-lān ê ji̍t, lí bô eng-kai kā in chhun lo̍h-.lâi ê lâng kau-hù tùi-te̍k.
1:15 Siōng-chú beh Sím-phòaⁿ Bān-kok
In-ūi Siōng-chú pān-lí bān-kok ê ji̍t-chí kīn à. Chiàu lí só͘ kiâⁿ ê mā ē ánne kiâⁿ tī lí; lí só͘ chò ê ē kui tī lí ê thâu-khak.
1:16 In-ūi chhin-chhiūⁿ lín tī Góa ê sèng-soaⁿ bat lim, bān-kok mā ē chhin-chhiūⁿ ánne kú-tn̂g lim, mā lim mā thun lo̍h-.khì, in chiū ē kui tī bô-.khì.
1:17 I-su-la-el Tek-sèng
Tī Si-óng soaⁿ ē ū tô-thoat ê lâng, mā ē chiâⁿ-chò sèng; Iâ-kop ke ē tit tio̍h i pún-lâi to̍h ū ê sán-gia̍p.
1:18 Iâ-kop ke ē chiâⁿ-chò hóe, Iô-sé-huh ke ē chiâⁿ-chò hóe-iām, E-sáu ê ke ē chò tiū-kó, hóe ē sio lâi kā i bia̍t-tiāu. E-sáu ê ke ē bô lâu kah pòaⁿ-ê. In-ūi Siōng-chú ū ánne kóng.
1:19 Lâm-hong ê lâng ē tit tio̍h E-sáu ê soaⁿ, pêng-goân ê lâng ē tit tio̍h Hui-lī-sū, mā ē tit tio̍h E-hu-laim ê chhân kah Sa-má-lī-a ê chhân; Biān-iá-mín lâng ē tit tio̍h Gi-lia̍t.
1:20 I-su-la-el kun-tūi chiahê siū lia̍h ê ē tit tio̍h sio̍k Ka-nân lâng ê tē, it-ti̍t kàu Cha-le-phat; tòa tī Se-hoal-la̍h siū lia̍h ê Ê-lú-sa-lèm lâng ē tit tio̍h lâm-hong ê siâⁿ.
1:21 Ē ū chiahê chín-kiù ê lâng chiūⁿ Si-óng soaⁿ, lâi sím-phòaⁿ E-sáu ê soaⁿ; kok-tō͘ chiū kui tī Siōng-chú.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。