阿摩司書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Chi̍t Lôa Chúi-kó ê Ī-siōng
Chì-koân Siōng-chú hō͘ góa khòaⁿ tio̍h chi̍t hāng, góa khòaⁿ tio̍h chi̍t lôa joa̍h-thiⁿ ê kóe-chí.
8:2 I kóng, " A-mô͘-su, lí khòaⁿ tio̍h siáⁿ-mi̍h? " Góa kóng, " Khòaⁿ-kìⁿ chi̍t lôa joa̍h-thiⁿ ê kóe-chí. " Siōng-chú chiū tùi góa kóng, " Góa ê jîn-bîn — I-su-la-el ê boa̍t-ji̍t kàu à, Góa it-tēng bô beh koh kā in liōng-chêng. "
8:3 Chì-koân Siōng-chú kóng, " Hit ji̍t, kiong-tiān ê chhiùⁿ koa ē piàn-chò thî-khàu; ē ū chin chē sin-si siū hiat-ka̍k tī ta̍k só͘-chāi, lâng lóng tiām-tiām. "
8:4 I-su-la-el ê Miā-ūn
Lín chiahê ài thun-chia̍h sànchhiah lâng, hō͘ chit só͘-chāi ê khùn-khó͘ lâng soe-pāi ê lâng, tio̍h thiaⁿ chit-ê ōe!
8:5 Lín kóng, " Goe̍h ê chhe-it tang-sî kòe-.khì, hō͘ goán thang thiò ngó͘-kok? An-hioh-ji̍t tang-sî kòe-.khì, hō͘ goán thang bē be̍h-á, ēng sè ê e-hoat, ēng tāng ê si-khel, ēng kúi-chà ê thian-phêng lâi phiàn lâng,
8:6 thang ēng gîn lâi bé sànchhiah lâng, ēng chi̍t siang ê lâi ōaⁿ sàn kah kúi to kiaⁿ ê lâng, kā pháiⁿ ê be̍h-á bē hō͘ lâng? "
8:7 Siōng-chú kí Iâ-kop ê êng-hôa lâi chiùchōa kóng: In só͘-ū ê só͘ chò, Góa éng-oán bô bē kì-.tit.
8:8 Chit-ê tē kám bē in-ūi ánne lâi iô-tāng, tòa hit tiong-kan ê lâng kám bô ài pi-ai? Chit-ê tē ē chhin-chhiūⁿ tōa hô tiòng khí-.lâi, mā ē tín-tāng, thè-kē chhin-chhiūⁿ Ai-gi̍p hô.
8:9 Chì-koân Siōng-chú kóng, " Kàu hit ji̍t, Góa beh hō͘ ji̍t-thâu tī tiong-tàu chiū lo̍h-.khì, hō͘ tē tī tng-thâu pe̍h-ji̍t piàn o͘-àm.
8:10 Góa beh hō͘ lín ê cheh-kî piàn-chò pi-ai, koa-khek lóng piàn-chò ai-ko, beh hō͘ chèng lâng io hâ môa-pò͘, thâu-khak bô pòaⁿ-ki mn̂g, koh hō͘ i pi-ai chhin-chhiūⁿ to̍k-seⁿ kiáⁿ sí-.khì, kàu bóe chhin-chhiūⁿ thòng-khó͘ ê ji̍t-chí. "
8:11 Chì-koân Siōng-chú kóng, " Lí khòaⁿ, ji̍t-chí teh beh kàu, Góa beh hō͘ ki-hng lîm-kàu tī chit só͘-chāi, ki-hng m̄-sī in-ūi bô piáⁿ, chhùi-ta m̄-sī ūi tio̍h bô chúi, to̍h-sī in-ūi bô thang thiaⁿ Siōng-chú ê ōe.
8:12 In ē sì-kè khì, tùi chit-ê hái kàu hit-ê hái, tùi pak kàu tang, cháu-lâi cháu-khì, cháu-chhōe Siōng-chú ê ōe, mā chhōe bô.
8:13 " Tng hit ji̍t, súi ê chāi-sek-lí kah siàu-liân ê chapo͘ lâng ē in-ūi chhùi-ta lâi hūn-.khì.
8:14 Hiahê kí Sa-má-lī-a ê chōe lâi chiùchōa, koh kí Tàn ê oa̍h ê Siōng-tè lâi chiùchōa, koh kí Bel-sí-bah ê oa̍h-lō͘ lâi chiùchōa ê, in it-tēng ē poa̍h-tó, éng-oán bē koh khí-.lâi. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。