阿摩司書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Chháu-me̍h ê Hiān-siōng
Chì-koân Siōng-chú hō͘ góa khòaⁿ tio̍h chi̍t hāng, lí khòaⁿ, kā ông koah-chháu liáu-āu, chháu koh hoat khí-.lâi; tú-á koh hoat ê sî, I hō͘ chháu-meh chhut-.lâi.
7:2 Chháu-me̍h chia̍h-oân hit-ê kéng lāi chheⁿ-chhùi ê mi̍h, góa chiū kóng, " Chì-koân Siōng-chú ah, kiû Lí sià-bián Lí ê chú-bîn! Iâ-kop ná khiā ē tiâu? In-ūi i sī bî-sè. "
7:3 Siōng-chú ūi tio̍h chit-ê tāichì hō͘-hóe, Siōng-chú koh kóng, " Chit-ê tāichì bē hoat-seng. "
7:4 Hóe ê Hiān-siōng
Chì-koân Siōng-chú koh hō͘ góa khòaⁿ tio̍h chi̍t hāng; lí khòaⁿ, chì-koân Siōng-chú kiò hóe lâi chek-hoa̍t, hóe sio choân-pō͘ ê chhim-ian, mā ē thun-chia̍h tē.
7:5 Góa chiū kóng, " Chì-koân Siōng-chú ah, kiû Lí thêng-chí; Iâ-kop ná khiā ē tiâu? In-ūi i sī bî-sè. "
7:6 Siōng-chú ūi chit-ê tāichì hō͘-hóe, chì-koân Siōng-chú koh kóng, " Chit-ê tāichì mā bē hoat-seng. "
7:7 Chún-chîn ê Ī-siōng
Siōng-Chú koh hō͘ góa khòaⁿ tio̍h chi̍t hāng; lí khòaⁿ, ū chi̍t chōa chhiûⁿ sī chiàu chún-chîn khí ê, Chú khiā tī hit téng-bīn, chhiú the̍h chún-chîn.
7:8 Siōng-chú tùi góa kóng, " A-mô͘-su, lí ū khòaⁿ tio̍h siáⁿ-mi̍h? " Góa kóng, " Khòaⁿ-kìⁿ chún-chîn. " Chú kóng, " Lí khòaⁿ, Góa beh khan chún-chîn tī Góa ê chú-bîn — I-su-la-el lâng tiong-kan, Góa bô beh koh kā in liōng-chêng.
7:9 Í-sak ê soaⁿ-thâu tôaⁿ ē pha-hng, I-su-la-el ê sèng-só͘ ē hong-hùi. Góa beh khí-.lâi, ēng to kong-kek Ia-lô-ba-am ê ke. "
7:10 A-mô͘-su kah A-má-chiah
Tong-sî, Be-thel ê chè-si — A-má-chiah, i chhe lâng khì I-su-la-el ông Ia-lô-ba-am hia, kóng, " A-mô͘-su tī I-su-la-el cho̍k tiong-kan beh kè-bô͘ kong-kek lí; chit-ê só͘-chāi bē kham-tit i kóng chiahê ōe.
7:11 In-ūi A-mô͘-su ánne kóng, ' Ia-lô-ba-am ē hō͘ to thâi-sí, I-su-la-el jîn-bîn choa̍t-tùi ē siū lia̍h lī-khui pún só͘-chāi. '"
7:12 A-má-chiah koh tùi A-mô͘-su kóng, " Lí chit-ê sian-kiàn, lí khì, tio̍h cháu-khì Iô-tah tē, tī hia thàn-chia̍h, tī hia chò sian-ti.
7:13 Chóng-.sī, m̄ thang koh tī Be-thel kóng sian-ti ōe; in-ūi tī chia ū ông ê sèng-só͘, ū ông-ka ê kiong-tiān. "
7:14 A-mô͘-su chiū tùi A-má-chiah kóng, " Góa pún-lâi m̄-sī sian-ti, mā m̄-sī sian-ti ê kiáⁿ. Góa sī chhī chengseⁿ ê lâng, koh sī teh tī-lí sng-châi chhiū ê.
7:15 Góa teh kò͘ iûⁿ-kûn ê sî, Siōng-chú kéng-tiàu góa, Siōng-chú tùi góa kóng, ' Lí khì, tùi Góa ê chú-bîn — I-su-la-el lâng soan-pò͘. '
7:16 Taⁿ lí tio̍h thiaⁿ Siōng-chú ê ōe. Lí kóng, ' M̄-thang soan-pò͘ lâi kong-kek I-su-la-el, m̄ thang kóng-ōe lâi kong-kek Í-sak ê ke. '
7:17 Só͘-í, Siōng-chú ánne kóng, ' Lí ê bó͘ ē tī siâⁿ lāi chò chhiong-ki, lí ê kiáⁿ-jî ē sí tī to hā; lí ê tē, lâng ē ēng soh niû lâi pun hō͘ pa̍t lâng, lí pún-sin ē sí tī ù-òe ê só͘-chāi. I-su-la-el jîn-bîn it-tēng ē siū lia̍h lī-khui pún só͘-chāi. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。