何西阿書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 " E-hu-laim chia̍h hong, koh jiok tang-hong, ji̍t-ji̍t ke-thiⁿ pe̍h-chha̍t kah kiông-pō, in kah A-siul li̍p-iok, ēng iû sàng kàu Ai-gi̍p. "
12:2 Siōng-chú kah Iô-tah piān-lūn, beh chiàu Iâ-kop só͘ kiâⁿ ê kā i chek-hoa̍t, chiàu i só͘ chò ê kā i pò-èng.
12:3 I tī thai-.ni̍h khîⁿ-tiâu i ê a-hiaⁿ ê kha-āu-teⁿ, chòng-liân ê sî kah Siōng-tè sio-ián,
12:4 kah thiⁿ-sài sio-ián, koh tit tio̍h khah iâⁿ, thî-khàu khún-kiû i; tī Be-thel tú tio̍h I, I tī hia kah lán kóng-ōe,
12:5 Siōng-chú, to̍h-sī bān-kun ê Siōng-tè; I-é-ho-bah sī I ê miâ.
12:6 Só͘-í, lí tio̍h kui-ǹg lí ê Siōng-tè, chip-siú thiàⁿ-sim, kong-pêⁿ, tiāⁿtiāⁿ thèng-hāu lí ê Siōng-tè.
12:7 Koh Lūn Sím-phòaⁿ
Siōng-chú kóng, " I sī senglí lâng, chhiú gia̍h bô kong-tō ê chhìn-á, ài ēng khi-phiàn.
12:8 E-hu-laim kóng： Góa si̍t-chāi chin hó-gia̍h, í-keng tit tio̍h châi-pó; tī góa só͘ lô-khó͘ tit tio̍h ê, bô thang chhōe tio̍h góa ū put-gī, lâi sǹg-chò ū chōe.
12:9 " Tùi lí chhut Ai-gi̍p tē ê sî, Góa chò lí ê Siōng-tè — Siōng-chú; Góa beh hō͘ lí koh tòa tī pò͘-pêⁿ, chhin-chhiūⁿ tī tāi-hōe ê ji̍t-chí.
12:10 " Góa bat tùi chiahê sian-ti kóng, koh ke-thiⁿ ī-siōng, góa mā thok ū sian-ti siat phì-jū.
12:11 Gi-lia̍t kám bô chōe? In choân-jiân sī hi-ké ê. Tī Gil-gal hiàn gû-á chò chè, in ê chè-tôaⁿ chhin-chhiūⁿ chhân-.ni̍h lê-chōa ê chio̍h-tui. "
12:12 Chá-chêng Iâ-kop cháu kàu A-lâm tē, I-su-la-el in-ūi beh tit tio̍h bó͘ lâi ho̍k-sāi lâng, mā in-ūi beh tit tio̍h bó͘ lâi chhī iûⁿ.
12:13 Siōng-chú koh ēng chi̍t-ê sian-ti chhōa I-su-la-el chhut Ai-gi̍p, mā ēng chi̍t-ê sian-ti kā i pó-choân.
12:14 E-hu-laim jiá tio̍h tōa siū-khì, só͘-í, i hō͘ lâng lâu hoeh ê chōe ē kui tī i. E-hu-laim só͘ kiâⁿ lêng-jio̍k Chú ê tāichì, Chú ē kā i pò-èng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。