何西阿書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 Siōng-tè Liân-bín Pōe-ge̍k ê Chú-bîn
Siōng-chú kóng: I-su-la-el chò gín'á ê sî, Góa to̍h thiàⁿ i, jî-chhiáⁿ Góa ū tiàu Góa ê kiáⁿ chhut Ai-gi̍p tē.
11:2 Góa ná kiò in, in ná cháu lī-khui Góa, in hiàn chè tī chiahê Ba-al, sio hiuⁿ tī ngó͘-siōng.
11:3 Góa kà E-hu-laim o̍h kiâⁿ lō͘, khan i ê chhiú, chóng-.sī, in m̄-chai Góa kā in i hó.
11:4 Góa ēng chû-ài ê soh kah thiàⁿ-sim ê tòa khan in; Góa khoán-thāi in chhin-chhiūⁿ tùi in ê ām-kún kā in ê ka-taⁿ tháu-khui, kā niû-chháu hē tī in bīn-chêng.
11:5 In beh koh tńg-khì Ai-gi̍p tē, A-siul beh chò in ê ông, in-ūi in m̄-khéng tò tńg-lâi kui-ǹg Góa.
11:6 To-kiàm ē kàu tī i ê siâⁿ, húi-hoāi in ê mn̂g-chhòaⁿ, in-ūi in ê kè-bô͘ kā i thun-bia̍t.
11:7 Góa ê jîn-bîn koat-ì beh ûi-pōe góa; sûi-jiân ū lâng kiò in kui-ǹg Chì-koân-.ê, chóng-.sī, bô kah chi̍t-ê chun-tiōng I.
11:8 E-hu-laim, Góa ná ē khì-sak lí? I-su-la-el, Góa ná ē kā lí kau hō͘ te̍k-jîn? Góa ná ē hō͘ lí chhin-chhiūⁿ At-mah? Ná ē kā lí chò Che-bó-ím khoán-thāi? Góa hôe-sim choán-ì, Góa chû-ài ê sim chin jia̍t.
11:9 Góa bô beh hoat-chhut góa béng-lia̍t ê siū-khì, mā bô koh húi-bia̍t E-hu-laim. In-ūi góa sī Siōng-tè, m̄-sī sè-kan lâng, sī tī lín tiong-kan ê sèng ê; góa bô beh tī siū-khì tiong lîm-kàu lín.
11:10 Siōng-chú ē chhin-chhiūⁿ sai teh háu, in ē tòe I lâi kiâⁿ. I háu ê sî, hiahê kiáⁿ chiū phi̍h-phi̍h chhoah, tùi se-hong kóaⁿ-kín lâi.
11:11 In ē chhin-chhiūⁿ chhek-chiáu-á phi̍h-phi̍h chhoah, tùi Ai-gi̍p kóaⁿ-kín lâi, koh chhin-chhiūⁿ hún-chiáu tùi A-siul tē lâi-kàu. Góa beh hō͘ in tòa kakī ê chhù. Che sī Siōng-chú kóng ê.
11:12 I-su-la-el kah Iô-tah siū khián-chek
Siōng-chú kóng, " E-hu-laim ēng khi-phiàn ûi góa, I-su-la-el ê chú-bîn mā ēng kúi-kè kā góa pau-ûi; Iô-tah khò Siōng-tè chiáng-koân, ǹg sèng ê ū chīn-tiong ê sim.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。