何西阿書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 " Góa ài i-tī I-su-la-el ê sî, E-hu-laim ê chōe-kò kah Sa-má-lī-a ê chōe-ok chiū lō͘-hiān. In-ūi in chò tāichì hi-ké, lāi-bīn ū chha̍t ji̍p-.lâi, gōa-bīn ū kui tīn ê chhiúⁿ-kiap.
7:2 In sim-lāi bô siūⁿ kóng, Góa ē kì-tit in só͘-ū ê pháiⁿ; taⁿ in só͘ chò ê teh kā in ûi-khùn, sī tī Góa bīn-chêng.
7:3 Kiong-têng Lāi-loān
Siōng-chú kóng, " In ēng kiâⁿ pháiⁿ lâi hō͘ kun-ông hoaⁿ-hí, ēng pe̍h-chha̍t lâi hō͘ siú-léng khoài-lo̍k.
7:4 In lóng sī kiâⁿ kan-îm ê, chhin-chhiūⁿ piak piáⁿ ê, khí jia̍t ê hóe-lô͘, i tùi chhiau mī kàu hoat-kàⁿ ê sî, chiah bô koh tī hóe-hu tiong ngiáu hóe.
7:5 " Tī lán ê ông iàn-lo̍k ê ji̍t, chiahê siú-léng in-ūi lia̍t-chiú lâi phòa-pēⁿ; i kah bú-bān ê lâng khan-chhiú.
7:6 " In bâi-ho̍k ê sî-chūn, chhin-chhiūⁿ hóe-lô͘ teh chún-pī in ê sim; in piak piáⁿ ê lâng kui mê teh khùn, kàu chá-khí sî, i to̍h chhin-chhiūⁿ hóe iām-iām.
7:7 " In jia̍t kah chhin-chhiūⁿ hóe-lô͘, thun-bia̍t in ê sū-su. In ê kun-ông lóng tó lo̍h-.khì; in tiong-kan lóng bô lâng kiû-kiò Góa. "
7:8 I-su-la-el kah Lia̍t-pang
Siōng-chú kóng, " E-hu-laim kakī chham-chhap tī lia̍t pang; E-hu-laim sī bô kòe-péng ê piáⁿ.
7:9 Gōa-pang lâng í-keng thun-chia̍h i ê lêng-le̍k, i mā m̄-chai; thâu-mn̂g í-keng chham-pe̍h, i mā m̄-chai.
7:10 I-su-la-el ê kiau-ngō͘ tng-bīn kā in kiàn-chèng, sûi-jiân tú tio̍h che it-chhè, in iû-goân bô kui-ǹg Siōng-chú — in ê Siōng-tè, mā bô cháu-chhōe I.
7:11 E-hu-laim chhin-chhiūⁿ hún-chiáu gōng-gōng bû-ti; in kiû-kiò Ai-gi̍p, lâi kìⁿ A-siul.
7:12 In khì ê sî, Góa beh kā Góa ê bāng pha tī in ê téng-bīn; Góa beh hō͘ i tūi-lo̍h, chhin-chhiūⁿ khong-tiong ê chiáu. Góa beh chiàu in ê hōe-chiòng só͘ thiaⁿ tio̍h ê lâi kā in khián-chek.
7:13 " In ū chai-hō ah! In-ūi in lī-khui Góa khì; in ē tú tio̍h pāi-hoāi, in-ūi in tek-chōe Góa. Góa beh kiù-sio̍k in, in iáu koh kóng pe̍h-chha̍t lâi kong-kek Góa.
7:14 In bô ēng sim lâi kiû-kiò Góa, sī tī bîn-chhn̂g teh tōa-siaⁿ hoah; in ūi tio̍h ngó͘-kok kah sin chiú lâi kakī chū-chi̍p, in lóng pōe-ge̍k Góa.
7:15 Góa kàu-tok in, hō͘ in ê chhiú-kut ū la̍t, in iáu koh tô͘-bô͘ pháiⁿ tāi lâi kong-kek Góa.
7:16 In ū kui-ǹg, chóng-.sī, m̄-sī kui-ǹg Chì-koân-.ê; in chhin-chhiūⁿ péng liàn-tńg ê kiong. In ê siú-léng in-ūi chi̍h ê hòng-chhiòng, ē tó tī to hā; chit-ê ē tī Ai-gi̍p tē chiâⁿ-chò chhiò-pèⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。