但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Boa̍t-ji̍t
Hitê thiⁿ-sài kóng, " Hit sî, pó-hō͘ lí ê jîn-bîn ê thiⁿ-sài-tiúⁿ — Mî-khá-el ē khiā khí-.lâi; koh ē ū tōa khùn-khó͘ ê sî, tùi khai-kok í-lâi-kàu hit sî m̄ bat ū ánne. Hit sî, lí ê jîn-bîn tiong, kiàn-nā miâ kì tī chheh-.ni̍h ê, ē tit tio̍h chín-kiù.
12:2 Khùn tī thô͘-soa hún tiong-kan ê, ē ū chin chē lâng koh chhéⁿ; ū ê ē tit tio̍h éng-oán ê oa̍h-miā, ū ê ē siū kiàn-siàu, thó-ià kàu éng-oán.
12:3 Tì-hūi ê lâng ē hoat-chhut kng chhin-chhiūⁿ thiⁿ-téng ê kng; hiahê hō͘ chin chē lâng kui tī gī ê, ē chhin-chhiūⁿ kng-chheⁿ, ti̍t-kàu éng-oán.
12:4 " Ta-ni-el, lí tio̍h am-khàm chiahê ōe, hong ba̍t chit pún chheh, kàu lō͘-bóe ê sî, ē ū chin chē lâng cháu-lâi cháu-khì, jî-chhiáⁿ kiàn-sek ē ke-thiⁿ. "
12:5 Góa — Ta-ni-el teh khòaⁿ, lí khòaⁿ, lēng-gōa ū nn̄g-ê khiā-.leh, chi̍t-ê tī hô ê chit pêng hōaⁿ, mā ū chi̍t-ê tī hô ê hit pêng hōaⁿ.
12:6 Ū chi̍t-ê kā hit-ê khiā tī hô chúi ê téng-bīn, chhēng iù-tē saⁿ ê lâng kóng, " Chiahê kî-sū ê chiong-kio̍k ē kàu gōa kú? "
12:7 Góa thiaⁿ tio̍h hit-ê khiā tī hô chúi ê téng-bīn, chhēng iù-tē saⁿ ê lâng, gia̍h-khí i ê chiàⁿ chhiú kah tò chhiú ǹg thiⁿ, kí éng-oán oa̍h-miā ê Chú lâi chiùchōa kóng, " Tio̍h kàu chi̍t-ê sî-kî, nn̄g-ê sî-kî koh pòaⁿ-ê sî-kî （ Chù, ū ê e̍k-pún e̍k-chò " Saⁿ nî pòaⁿ " ）. Tng sèng ê jîn-bîn ê koân-le̍k siū phò-hoāi ê sî, chiahê it-chhè ê tāichì lóng ē oân-sêng. "
12:8 Góa thiaⁿ tio̍h mā bô bêng-pe̍k, chiū kóng, " Góa ê chú ah, chiahê tāichì ê chiong-kio̍k sī án-chóaⁿ? "
12:9 I kóng, " Ta-ni-el, lí chò lí khì; in-ūi chiahê ōe í-keng am-khàm hong ba̍t, ti̍t-kàu lō͘-bóe ê sî.
12:10 Ē ū chin chē lâng kakī chheng-khì-kàu pe̍h-pe̍h, koh siū toàn-liān; chóng-.sī, pháiⁿ lâng iû-goân ē kiâⁿ pháiⁿ; só͘-ū ê pháiⁿ lâng lóng bē bêng-pe̍k, to̍k-to̍k tì-hūi ê lâng ē bêng-pe̍k.
12:11 " Tùi tû-khì ji̍t-ji̍t só͘ hiàn ê chè-sū koh siat-li̍p hit-ê chân-hāi khó-ò͘ⁿ ê mi̍h ê sî sǹg-khí, ē ū chi̍t-chheng nn̄g-pah káu-cha̍p kang.
12:12 Kiàn-nā thèng-hāu kàu chi̍t-chheng saⁿ-pah saⁿ-cha̍p gō͘ kang ê, hit-ê lâng ū hok-khì.
12:13 " Chóng-.sī, lí tio̍h khì-kàu lō͘-bóe ê sî, in-ūi lí beh an-hioh. Kàu lō͘-bóe ê sî, lí ē-tàng khiā khí-.lâi, hióng-siū lí ê hok-hūn. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。