但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Tī Ti-gu-lí-su Tōa-hô Piⁿ Khòaⁿ-kìⁿ ê Ī-siōng
Phel-siah ông Ko-le-si tē-saⁿ nî, ū tāichì hián-sī hō͘ kiò-chò Bel-ti-sia-chal ê Ta-ni-el. Chit-ê tāichì sī chin-si̍t, sī kóng tio̍h tōa kau-chiàn; Ta-ni-el thong-ta̍t chit-ê tāichì, bêng-pe̍k chit-ê ī-siōng.
10:2 Hit sî, góa — Ta-ni-el iu-būn saⁿ-ê chhit-ji̍t kî.
10:3 Hó ê mi̍h góa bô chia̍h, bah kah chiú bô ji̍p góa ê chhùi, mā bô ēng iû boah góa ê seng-khu, it-ti̍t kàu móa saⁿ-ê chhit-ji̍t kî.
10:4 Chiaⁿ-goe̍h jī-cha̍p sì, góa tī Ti-gu-lí-su tōa hô piⁿ,
10:5 Gia̍h thâu teh khòaⁿ, lí khòaⁿ, ū chi̍t-ê lâng seng-khu chhēng iù-tē pò͘ ê saⁿ, io hâ U-hoah ê sûn-kim.
10:6 I ê seng-khu chhin-chhiūⁿ n̂g-ge̍k, bīn-māu chhin-chhiūⁿ sihnà ê khoán, i ê ba̍k-chiu chhin-chhiūⁿ hóe-pé, i ê chhiú kah kha sek-tì chhin-chhiūⁿ bôa-kng ê tâng, i kóng-ōe ê siaⁿ chhin-chhiūⁿ kui tīn lâng ê siaⁿ.
10:7 Chit-ê ī-siōng chí ū góa — Ta-ni-el chi̍t-ê lâng khòaⁿ-.tio̍h, in-ūi kah góa tông-chāi ê lâng bô khòaⁿ tio̍h hit-ê ī-siōng, kantaⁿ phi̍h-phi̍h chhoah, cháu-khì bih.
10:8 Chhun góa kakī tī hia. Góa khòaⁿ tio̍h chit-ê tōa ī-siōng, seng-khu lóng bô khùi-la̍t, jî-chhiáⁿ góa bīn-māu ê súi-sek piàn bái, tì-kàu lóng bô la̍t.
10:9 Chóng-.sī, góa thiaⁿ tio̍h i kóng-ōe ê siaⁿ, thiaⁿ tio̍h i kóng-ōe ê sî, góa phak lo̍h tē, bīn àⁿ tē, chiū khùn tāng-bîn.
10:10 Lí khòaⁿ, ū chi̍t ki chhiú bong góa, hō͘ góa ê kha-thâu-u kah chhiú-chiúⁿ tah tī tē-.ni̍h teh chhoah.
10:11 I chiū tùi góa kóng, " Tōa-tōa tit tio̍h thióng-ài ê lâng — Ta-ni-el, lí tio̍h bêng-pe̍k góa kah lí só͘ kóng chiahê ōe. Khiā khí-.lâi, in-ūi góa taⁿ hōng chhe-khián lâi-kàu lí chia. " I tùi góa kóng chit-ê ōe, góa chiū khiā-teh gī-gī chhoah.
10:12 I koh tùi góa kóng, " Ta-ni-el, m̄-bián kiaⁿ! In-ūi tùi lí thâu chi̍t ji̍t tio̍h choan-sim ài bêng-pe̍k, koh kakī khiam-pi tī lí Siōng-tè ê bīn-chêng ê sî, lí ê ōe í-keng tit tio̍h thiaⁿ-.tio̍h; jî-chhiáⁿ góa sī in-ūi lí ê ōe chiah lâi.
10:13 M̄ koh, Phel-siah kok ê thiⁿ-sài chó͘-tòng góa jī-cha̍p it ji̍t. Lí khòaⁿ, ū thiⁿ-sài-tiúⁿ ê chi̍t-ê — Mî-khá-el, i lâi pang-chān góa, góa chiū thêng tī hia kah Phel-siah hiahê ông chò-tīn.
10:14 Taⁿ góa lâi sī beh hō͘ lí bêng-pe̍k lí ê jîn-bîn ji̍t-āu só͘ ē tú-.tio̍h ê tāichì, in-ūi chit-ê ī-siōng iáu koh kóng tio̍h chin chē í-āu ê ji̍t. "
10:15 I kā chiahê ōe tùi góa kóng, góa chiū bīn ǹg tē, tiām-tiām bô kóng-ōe.
10:16 Lí khòaⁿ, ū chi̍t ūi chhin-chhiūⁿ lâng ê khoán ê teh bong góa ê chhùi-tûn, góa chiū khui chhùi tùi hit ūi khiā tī góa ê bīn-chêng ê kóng, " Góa ê chú ah, in-ūi chit-ê ī-siōng, góa chin iu-būn, tì-sú góa lóng bô la̍t.
10:17 Góa sī chú ê lô͘-po̍k, ná ē-tàng kah góa ê chú kóng-ōe? In-ūi chit sî góa ê seng-khu lóng bô la̍t, mā lóng bē chhoán-khùi. "
10:18 Koh ū chi̍t ūi chhin-chhiūⁿ lâng ê khoán ê lâi bong góa, hō͘ góa koh ū la̍t khí-.lâi.
10:19 I kóng, " Tōa-tōa tit tio̍h thióng-ài ê lâng, m̄-bián kiaⁿ, goān lí pêng-an! Lí tio̍h ióng-chòng, tio̍h ióng-chòng. " I chi̍t-ē tùi góa kóng ōe, góa chiū tit tio̍h ū la̍t, kóng, " Góa ê chú ah, chhiáⁿ lí kóng, in-ūi lí í-keng hō͘ góa ū la̍t. "
10:20 I chiū kóng, " Lí chai góa ūi siáⁿ-mi̍h lâi lí chia? Taⁿ góa beh tò tńg-khì kah Phel-siah ê thiⁿ-sài kau-chiàn, góa khì-liáu, lí khòaⁿ, Hi-la̍h ê thiⁿ-sài teh beh lâi.
10:21 Chóng-.sī, góa beh kā kì-chài tī chin-si̍t ê chheh ê chí-sī lí. Tû-liáu lí ê thiⁿ-sài-tiúⁿ — Mî-khá-el í-gōa, bô chi̍t-ê ē kah goán tàu chhut-la̍t lâi tí-tòng in. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。