但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Ta-ni-el Ūi Tông-pau Kî-tó
Ma-tái cho̍k ê A-ha-sui-ló͘ ê kiáⁿ — Ta-lió-suh li̍p-chò Kal-tí-ah kok ê ông goân nî,
9:2 to̍h-sī i chē-ūi ê goân nî, góa — Ta-ni-el tùi chheh-.ni̍h chai-iáⁿ hiahê nî ê sò͘-gia̍h, to̍h-sī Siōng-chú ê ōe lîm-kàu sian-ti — I-é-lí-miah, kóng-khí Ê-lú-sa-lèm tú tio̍h hong-hùi tio̍h móa chhit-cha̍p nî.
9:3 Góa koat-ì ǹg Chú Siōng-tè, ēng kî-tó khún-kiû, kìm-chia̍h, chhēng môa-saⁿ kah sám hóe-hu, lâi cháu-chhōe I.
9:4 Góa tùi Siōng-chú — góa ê Siōng-tè kî-tó, jīn chōe, kóng, " Chú — chì-tōa thang kiaⁿ-ùi ê Siōng-tè ah, to̍h-sī siú iok si un hō͘ kiàn-nā thiàⁿ I, kín-siú I kài-bēng ê lâng ê.
9:5 " Goán ū hoān chōe, chok-gia̍t, kiâⁿ pháiⁿ, pōe-poān, lī-khui Lí ê kài-bēng kah hoat-tō͘,
9:6 bô thiaⁿ Lí ê lô͘-po̍k —chiahê sian-ti, to̍h-sī hōng Lí ê miâ tùi goán ê kun-ông, kùi-cho̍k, chó͘-sian kah kok lāi só͘-ū ê jîn-bîn kóng-ōe ê.
9:7 Chú ah, kong-gī kui tī Lí, kiàn-siàu kui tī goán; chhin-chhiūⁿ kin-á-ji̍t, to̍h-sī kui tī Iô-tah lâng kah Ê-lú-sa-lèm ê jîn-bîn, í-ki̍p I-su-la-el chèng lâng, á-.sī kīn ê, á-.sī hn̄g ê, tī Lí ūi tio̍h in tek-chōe Lí, lâi kóaⁿ in khì-kàu ê ta̍k kok.
9:8 Chú ah, kiàn-siàu kui tī goán, kui tī goán ê kun-ông, kùi-cho̍k kah chó͘-sian, in-ūi goán tek-chōe Lí.
9:9 Goán sûi-jiân pōe-ge̍k Chú — goán ê Siōng-tè, chóng-.sī, liân-bín sià chōe sī chāi tī I;
9:10 goán mā bô thiaⁿ Siōng-chú — goán ê Siōng-tè ê ōe, lâi kiâⁿ I kau-thok I ê lô͘-po̍k —chiahê sian-ti só͘ pâi-lia̍t tī goán ê bīn-chêng ê lu̍t-hoat.
9:11 I-su-la-el choân cho̍k lóng ū hoān tio̍h Lí ê lu̍t-hoat, kiâⁿ phian-lō͘ bô chun-thàn Lí ê ōe; in-ūi ánne, chit-ê chiù-chó͘ kah Siōng-tè ê lô͘-po̍k — Mô͘-se lu̍t-hoat tiong só͘ kì ê chiùchōa, lóng piàⁿ tī goán ê sin chiūⁿ, in-ūi goán ū tek-chōe Lí.
9:12 I bat kàng tōa chai-hō hō͘ goán, lâi èng-giām I chêng kéng-kài goán, mā kéng-kài kā goán sím-phòaⁿ ê sū-su ê ōe; in-ūi I tī phó͘-thiⁿ-ē, m̄ bat kiâⁿ chhin-chhiūⁿ só͘ kiâⁿ tī Ê-lú-sa-lèm ê.
9:13 Che it-chhè ê chai-hō lîm-kàu goán, sī chiàu Mô͘-se lu̍t-hoat tiong só͘ kì-chài ê, chóng-.sī, goán iáu bô kiû Siōng-chú — goán ê Siōng-tè si un, hō͘ goán oa̍t thâu lī-khui goán ê chōe-kò, bêng-pe̍k Lí ê chin-lí.
9:14 Só͘-í, Siōng-chú tì-ì beh hō͘ chit-ê chai-hō lîm-kàu goán, in-ūi Siōng-chú — goán ê Siōng-tè tī I só͘ kiâⁿ ê tāichì lóng sī kong-gī; goán pēng bô chun-thàn I ê ōe.
9:15 Chú — goán ê Siōng-tè ah, Lí bat ēng tōa koân-lêng ê chhiú chhōa Lí ê chú-bîn chhut Ai-gi̍p tē, hō͘ Lí ū miâ-siaⁿ, chhin-chhiūⁿ kin-á-ji̍t. Goán ū hoān chōe, goán ū kiâⁿ pháiⁿ.
9:16 " Chú ah, kiû Lí chiàu Lí ê kong-gī, hō͘ Lí ê siū-khì kah Lí ê tōa siū-khì oa̍t-tńg lī-khui Lí ê siâⁿ Ê-lú-sa-lèm, to̍h-sī Lí ê sèng-soaⁿ. In-ūi tùi goán ê chōe-ok kah goán chó͘-sian ê chōe-kò, Ê-lú-sa-lèm kah Lí ê chú-bîn hō͘ sì-kho͘-ûi ê lâng teh lêng-jio̍k.
9:17 Só͘-í, goán ê Siōng-tè ah, taⁿ kiû Lí thiaⁿ Lí ê lô͘-po̍k ê kî-tó khún-kiû, koh in-ūi Chú ê iân-kò͘, hō͘ Lí ê bīn ê kng chiò tī Lí pha-hng ê sèng-só͘.
9:18 Góa ê Siōng-tè ah, kiû Lí àⁿ hīⁿ-khang lâi thiaⁿ, khui lí ê ba̍k-chiu lâi khòaⁿ goán pha-hng ê tē kah ēng Lí ê miâ lâi chheng-ho͘ ê siâⁿ. In-ūi goán tī Lí ê bīn-chêng hiàn goán ê kî-tó, m̄-sī in-ūi kakī ê gī, sī in-ūi Lí ê tōa liân-bín.
9:19 Chú ah, kiû Lí thiaⁿ! Chú ah, kiû Lí sià-bián! Chú ah, kiû Lí thiaⁿ lâi kiâⁿ! Góa ê Siōng-tè, ūi tio̍h Lí ê iân-kò͘, kiû Lí m̄ thang iân-chhiân. In-ūi Lí ê siâⁿ kah Lí ê chú-bîn lóng sī ēng Lí ê miâ lâi chheng-ho͘ ê. "
9:20 Ga-bu-li-el Kái-soeh Ī-giân
Góa teh kóng teh kî-tó ê sî, jīn góa ê chōe kah góa ê jîn-bîn — I-su-la-el ê chōe, ūi tio̍h góa ê Siōng-tè ê sèng-soaⁿ, tī góa ê Siōng-tè — Siōng-chú ê bīn-chêng hiàn góa ê khún-kiû.
9:21 Góa kî-tó ê ōe kóng iáu-bōe oân, góa khí-thâu tī ī-siōng tiong só͘ khòaⁿ-.tio̍h ê lâng — Ga-bu-li-el, hōng bēng-lēng kóaⁿ-kín poe-.lâi, chha-put-to tī hiàn ê-hng-chè ê sî, lâi bong góa.
9:22 I kà-sī góa, kā góa kóng, " Ta-ni-el, góa lâi sī beh hō͘ lí ū tì-hūi, chhong-bêng.
9:23 Lí khí-thâu kî-tó ê sî, chiū ū bēng-lēng hoat-chhut, taⁿ góa lâi kā lí kóng, in-ūi lí tōa-tōa tit tio̍h thióng-ài; só͘-í, lí tio̍h su-khó chit-ê tāichì, lâi bêng-pe̍k chit-ê ī-siōng.
9:24 " Lí ê jîn-bîn kah lí ê sèng-siâⁿ í-keng hān-tiāⁿ chhit-cha̍p-ê chhit-ji̍t kî, ē lâi chó͘-chí kòe-sit, tû-chīn chōe-ok, kiù-sio̍k chōe-kò, ín-chìn éng-oán ê gī, hong ba̍t ī-siōng kah ī-giân, koh ēng iû boah chì-sèng ê.
9:25 Só͘-í, lí tio̍h chai, tio̍h bêng-pe̍k, tùi chhut bēng-lēng tiông-sin khí-chō Ê-lú-sa-lèm ti̍t-kàu siū boah-iû ê kun-ông ê sî, ē ū chhit-ê chhit-ji̍t kî. Koh-chài keng-kòe la̍k-cha̍p-jī-ê chhit-ji̍t kî, tng teh kan-lân ê sî, siâⁿ kah ke-lō͘ í-ki̍p hô-kau lóng ē koh khí-chō khí-.lâi.
9:26 Keng-kòe la̍k-cha̍p-jī-ê chhit-ji̍t kî liáu-āu, siū boah-iû ê ē tú tio̍h siū chián-tû, ta̍k hāng mā lóng ē bô liáu-liáu; ē ū chi̍t-ê kun-ông ê jîn-bîn kàu, lâi kā siâⁿ kah sèng-só͘ húi-bia̍t, i ê kiat-kio̍k ē chhin-chhiūⁿ ēng tōa-chúi lâi im-bia̍t. Kàu lō͘-bóe ē ū kau-chiàn, pha-hng ê tāichì í-keng tiāⁿ tio̍h.
9:27 Chi̍t-ê chhit-ji̍t kî ê lāi-bīn, i ē kah chin chē lâng li̍p kian-kò͘ ê iok; chhit-ji̍t kî ê chi̍t-pòaⁿ, i ē hō͘ chè-sū kah lé-mi̍h lóng soah. Chân-sat-.ê chioh khó-ò͘ⁿ ê lâng ê si̍t poe-.lâi, koh ū tōa siū-khì piàⁿ tī hit-ê kiâⁿ húi-bia̍t ê sin chiūⁿ, it-ti̍t kàu tī só͘ tiāⁿ tio̍h ê boa̍t-ji̍t. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。