但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Ta-ni-el ê Ī-siōng
(7:1-12:13)
— Khòaⁿ-kìⁿ Sì Chiah Tōa Siù
Tng Ba-bú-lông ông Bel-sia-chal goân nî, Ta-ni-el tī chhn̂g-.ni̍h bāng-kìⁿ, sim-lāi ū khòaⁿ tio̍h ī-siōng, i chiū kā hit-ê bāng siá lo̍h-.lâi, koh kóng-khí kî-tiong ê tāi-ì.
7:2 Ta-ni-el kóng: Góa àm-sî khòaⁿ tio̍h ī-siōng, lí khòaⁿ, thiⁿ-.ni̍h ê sì-bīn hut-jiân khí hong, chhoe tī tōa hái ê téng-bīn.
7:3 Ū sì chiah siù, chin tōa chiah, tùi hái-.ni̍h khí-.lâi, khoán-sit kok bô sio-kāng.
7:4 Thâu chi̍t-chiah chhin-chhiūⁿ sai, ū eng-chiáu ê si̍t. Góa khòaⁿ tio̍h i ê si̍t siū poe̍h khí-.lâi, koh tī tē-chiūⁿ tit tio̍h hû-khí, lâi hō͘ i ê nn̄g ki kha khiā khí-.lâi, chhin-chhiūⁿ lâng teh khiā, mā hō͘ i ū lâng ê sim.
7:5 Lí khòaⁿ, koh ū chi̍t chiah siù sī tē-jī chiah, chhin-chhiūⁿ hîm. I théng-khí i seng-khu ê chi̍t-pêng, i ê chhùi lāi ū saⁿ ki hia̍p-kut, kâm tī chhùi-khí tiong. In kā i kóng, ' Khí-.lâi, thun-chia̍h chē-chē bah. '
7:6 Āu-lâi, góa koh khòaⁿ, lí khòaⁿ, koh ū chi̍t chiah siù, khoán-sit chhin-chhiūⁿ pà, kha-chiah-phiaⁿ ū sì-ê si̍t chhin-chhiūⁿ chiáu; chit chiah siù ū sì-ê thâu-khak, koh ū koân-pèng hō͘ i.
7:7 Āu-lâi, góa tī àm-sî ê ī-siōng tiong teh khòaⁿ, lí khòaⁿ, ū tē-sì chiah siù, thang kiaⁿ thang lún, koh put-chí kiông-béng, i ū tōa ki ê thih-khí, i thun-kā thiah-chhùi, só͘ chhun lo̍h-.lâi ê koh ēng kha thún-ta̍h. I kah í-chêng hiahê siù lóng bô kāng-khoán, koh ū hoat cha̍p ki kak.
7:8 Góa teh khòaⁿ hiahê kak, lí khòaⁿ, hit tiong-kan ū lēng-gōa hoat chi̍t ki sè-ki kak; í-chêng hiahê kak ê tiong-kan ū saⁿ ki kak, tī sè-ki kak ê thâu-chêng hâm kin poe̍h khí-.lâi. Lí khòaⁿ, chit ki kak ū ba̍k-chiu chhin-chhiūⁿ lâng ê ba̍k-chiu, koh ū chhùi teh kóng tōa-ōe.
7:9 Khòaⁿ-kìⁿ Kó͘-chá To̍h Chûn-chāi ê Lâng
Góa koh khòaⁿ tio̍h hiahê pâi-lia̍t ê pó-chō, ū chi̍t-ê tùi kó͘-chá to̍h ū-.ê chē-.leh. I ê saⁿ-khò͘ pe̍h kah chhin-chhiūⁿ seh, i ê thâu-mn̂g chhin-chhiūⁿ chin chheng-khì ê iûⁿ-mn̂g. I ê pó-chō to̍h-sī hóe-iām, i ê lián-á chhin-chhiūⁿ hóe teh to̍h.
7:10 Ū hóe chhin-chhiūⁿ khe-lâu hoat-chhut, lâu tī i ê bīn-chêng; kā i ho̍k-sāi ê lâng ū chheng-chheng, kin-tòe tī i ê bīn-chêng ê ū bān-bān; sím-phòaⁿ ê tāichì lóng chún-pī piān-piān, chheh lóng hian-khui.
7:11 Hit sî, in-ūi hit ki kak teh kóng tōa-ōe ê siaⁿ, góa chiū kā i khòaⁿ, khòaⁿ tio̍h hit chiah siù siū thâi, i ê seng-khu siū húi-hoāi, hông hiat tī hóe-.ni̍h sio.
7:12 Kóng tio̍h kî-tha hiahê siù, in ê koân lóng sit-lo̍h, chóng-.sī, in ê sèⁿ-miā iáu lâu-.leh, ti̍t-kàu tī tiāⁿ tio̍h ê sî, tiāⁿ tio̍h ê ji̍t-kî.
7:13 Góa tī àm-sî ê ī-siōng tiong teh khòaⁿ, lí khòaⁿ, ū chi̍t-ê chhin-chhiūⁿ lâng ê khoán, i chē thiⁿ-téng ê hûn lâi-kàu tī hit-ê tùi kó͘-chá to̍h ū-.ê, in chiū chhōa i kàu hit-ê lâng bīn-chêng.
7:14 I chiū siúⁿ-sù i ū koân-pèng, êng-kng, kok-ūi, hō͘ bān-bîn, bān-kok, bān khiuⁿ-kháu ê lâng lóng kā i ho̍k-sāi. I ê koân-pèng sī éng-oán ê koân-pèng, bē bô-.khì, i ê kok-ūi it-tēng bē hùi bô-.khì.
7:15 Ī-siōng ê Kái-soeh
Góa — Ta-ni-el, góa ê sim-sîn tī góa ê lāi-bīn teh iu-būn, sim-lāi ê ī-siōng hō͘ góa put-an.
7:16 Góa chiū khì chhōe hiahê khiā tī piⁿ-á ê chi̍t-ê, mn̄g i chiahê tāichì ê si̍t-chāi chêng-hêng. I chiū tùi góa kóng, koh kái-bêng hiahê tāichì hō͘ góa chai:
7:17 Hit sì chiah tōa siù sī sì-ê ông, ē tùi tē-chiūⁿ heng-khí.
7:18 Chóng-.sī, chì-koân Siōng-tè sèng ê chú-bîn ē tit tio̍h kok-ūi, kú-tn̂g chiáng-lí kok-koân, éng-oán bô soah.
7:19 Hit sî, góa ài chai tē-sì chiah siù ê si̍t-chāi chêng-hêng, i kah in hiahê siù bô kāng, put-chí thang kiaⁿ, i ê chhùi-khí sī thih ê, i ê jiáu sī tâng ê, i thun-kā thiah-chhùi, só͘ chhun lo̍h-.lâi ê koh ēng kha lâi thún-ta̍h;
7:20 góa koh ài chai i thâu-khak só͘ hoat cha̍p ki kak ê si̍t-chāi chêng-hêng kah hit ki lēng-gōa hoat ê kak, hō͘ saⁿ ki kak lak lo̍h-lâi tī i ê thâu-chêng, to̍h-sī ū ba̍k-chiu, ū chhùi kóng tōa-ōe ê kak, i ê khoán-sit pí i ê tâng-lūi ê khah kiông-béng.
7:21 Góa khòaⁿ tio̍h chit ki kak kah sèng ê chú-bîn kau-chiàn, lâi thâi-iâⁿ in.
7:22 Ti̍t kàu hit-ê tùi kó͘-chá to̍h ū-.ê lâi, kā chì-koân Siōng-tè ê chú-bîn phòaⁿ-toàn, it-ti̍t kàu sèng-tô͘ tit tio̍h kok-ūi ê ji̍t-kî.
7:23 I ánne kóng, " Tē-sì chiah siù ē chò tē-chiūⁿ ê tē-sì kok, i kah só͘-ū ê kok bô kāng, koh ē thun-kā choân tē, ē thún-ta̍h, kā i thiah-chhùi.
7:24 Kóng tio̍h hit cha̍p ki kak, to̍h-sī tùi hit-ê kok lāi beh heng-khí cha̍p-ê ông. Āu-lâi, lēng-gōa ū chi̍t-ê ông heng-khí kah chêng hiahê bô kāng, i ē hō͘ saⁿ-ê ông khut-ho̍k tī i ê bīn-chêng.
7:25 I ē kóng-ōe lâi ngó͘-ge̍k chì-koân Siōng-tè, mā ē khó͘-to̍k chì-koân Siōng-tè ê sèng ê chú-bîn, mā siūⁿ beh kái-ōaⁿ cheh-kî, lu̍t-hoat. In ē hông kau tī i ê chhiú, keng-kòe chi̍t sî, koh nn̄g sî, koh pòaⁿ sî.
7:26 Āu-lâi, sím-phòaⁿ-koaⁿ ē chē-ūi, in ē chhiúⁿ-toa̍t ông ê koân, kā i húi-hoāi, hō͘ i bia̍t-bông kàu thiat-té.
7:27 Phó͘-thiⁿ-ē ê kok-ūi, koân-pèng kah lia̍t kok ê ui-koân lóng kau hō͘ chì-koân ê sèng ê chú-bîn. I ê kok sī éng-oán ê kok, kiàn-nā ū koân ê lóng ē ho̍k-sāi sūn-ho̍k I. "
7:28 Chit-ê tāichì kàu chia kiat-sok. Góa — Ta-ni-el sim-lāi siūⁿ liáu chin put-an, bīn mā piàn-sek, chóng-.sī, góa kā chit-ê tāichì khǹg tī sim-lāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。